Aonega Herevadia
6 Egu natuna e, bema emu dekena tauna ida gwauhamata ta oi karaia vadaeni,+ abitorehai davana henia totona,
Bema idau tauna ena imana oi udeudea vadaeni,+
2 Bema emu gwauhamata ese oi ia tarapua vadaeni,
Bema oi gwauraia herevadia ese oi ia hahekwakwanaia vadaeni,+
3 Egu natuna e, hari oi be emu dekena tauna ena siahu henunai,
Unai dainai sibona ruhaia totona inai oi karaia:
Oi lao bona sibona oi hamanaua bona emu dekena tauna oi noia loulou oi ia lalonamo henia totona.+
4 Oi mahuta lasi eiava emu matana oi hakapua lasi
Ela bona unai oi karaia.
5 Sibona oi ruhaia, dia be labana tauna amo ia heau boio bamona,
Eiava manu ta be manu tarapua tauna amo ia roho boio bamona.
6 Lahedo tauna e,+ dimairi dekenai oi lao,
Bona edia gaukara dalana oi itaia bona do oi aonega.
7 Ena be idia be mai edia tuari biaguna lasi, eiava ta ese idia ia gunalaia lasi, eiava mai edia king lasi,
8 To aniani gogoa negana ai edia aniani idia hegaegaelaia,+
Bona idia gogoa aniani idia haboua.
9 Lahedo tauna e, do oi hekure noho ela bona edena nega?
Edena nega ai emu mahuta amo do oi noga?
10 Emu imana oi lokua, oi laga-ani sisina,
Bona oi mahuta sisina,+
11 Bona do oi ogogami haraga, henaohenao tauna be oi amo gau ta ia dadia haraga bamona,
Bona tuari tauna ese oi amo gau ibounai ia abia bamona.+
12 Kavakava bona kara dika tauna be koikoi herevadia ia gwauraia loaloa noho.+
13 Ia be ena matana amo toa ia karaia,+ ena aena amo toa ia karaia bona ena ima kwakikwaki ia hamarerea.
14 Kudouna be mai ena koikoi,
Ia be hanaihanai palani dikadia ia karaia+ bona hepapahuahu ia havaraia noho.+
15 Unai dainai ia ese dika bada do ia davaria haraga,
Bona ia davaria dika amo do ia namo lou lasi.+
16 Iehova be gau 6 ia inai henia,
Oibe, gau 7 ia ura henia lasi momokani:
17 Hekokoroku matana,+ koikoi malana,+ bona kerere lasi tauna ena rara ia bubua imana,+
18 Palani dikadia ia lalohadailaia kudouna,+ bona kara dika karaia totona ia heau haraga aena,
19 Kota ai hereva koikoi gwauraia momo tauna,+
Bona tadikaka huanai hepapahuahu ia havaraia noho tauna.+
20 Egu natuna e, emu tamana ena oda herevadia oi badinaia,
21 Nega ibounai emu kudouna ai oi atoa,
Bona emu aiona ai oi kwatua.
22 Oi raka loaloa neganai, unai gaudia ese oi do idia hakaua,
Oi hekure neganai, oi do idia gimaia,
Bona oi noga neganai, oi do idia hereva henia.*
23 Badina oda hereva be lamepa bamona,+
Bona taravatu be diari bamona,+
Bona ta hamaoromaoroa totona idia henia matahakani be mauri ena dala.+
24 Idia ese hahine dikana amo oi do idia gimaia,+
Bona matabodaga hahine ena laloani herevadia amo oi do idia gimaia.+
25 Namo lasi emu kudouna ai iena hairai oi ura henia,+
Eiava namo lasi iena matana ese emu lalona ia veria,
26 Badina ariara hahine dainai, tau ta ia ogogami diba,*+
To tau ma ta ena adavana be mauri namona ia moalelaia.
27 Tau ta be ena kemena dekenai lahi ia atoa neganai, ena dabua do ia araia lasi, a?+
28 Eiava tau ta be lahi gida latanai ia raka neganai, ena aena do ia araia lasi, a?
29 Dekena tauna ena adavana ida ia mahuta hebou tauna be unai bamona,
Unai hahine ia dogoatao dainai panisi do ia abia.+
30 Henaohenao tauna be hitolo dainai ia henaohenao neganai,
Taunimanima ese ia do idia gwauraia dika lasi.
31 To bema ia idia davaria, do ia henia lou davana be nega 7 do ia habadaia,
Bona ena ruma ena dava bada kohu ibounai do ia henia.+
32 Hahine ta ida ia heudahanai tauna be kavakava,*
Unai bamona ia karaia tauna be sibona ia hadikaia.+
33 Ia be bero do ia davaria bona do ia hemarai,+
Bona ia karaia hemarai karana be do idia laloaboio lasi.+
34 Mama karana ese hahine ena adavana ia habadua momokani,
Bona davana ia henia neganai, do ia hebogahisi lasi.+
35 Ena be moni oi henia, to do ia abia dae lasi,
Dava bada harihari gauna ta oi henia, to do ia ura lasi maino ia karaia.