Sivarai Ginigunana

28 Bena Davida ese Ierusalema ai Israela ena gunalaia taudia ibounai ia haboudia, idia be iduhu ta ta edia gunalaia taudia, king idia hesiai henia tuari orea ta ta edia gunalaia taudia,+ tuari orea taudia 1,000 ta ta edia biagudia bona tuari orea taudia 100 ta ta edia biagudia,+ king ese ia biagua gaudia bona ena animal bona ena natudia memero naria taudia edia gunalaia taudia,+ ofesa taudia bona gaukara idia karaia diba tatau goadadia.+ 2 Bena King Davida ia toreisi bona ia gwau:

“Egu tadikakadia bona egu taunimanima e, lau umui kamonai henia. Egu kudouna ai lau ura dikadika ruma ta lau haginia, Iehova ena Taravatu Maua bona iseda Dirava ena aena atoa gabuna totona,+ bona ruma haginia totona lau hegaegae vadaeni.+ 3 To Dirava momokanina ese lau ia hamaoroa, ‘Oi ese egu ladana totona ruma ta do oi haginia lasi,+ badina oi be tuari tauna, bona taunimanima momo oi alaia.’+ 4 To, egu tamana ena bese taudia amo Israela ena Dirava Iehova ese lau ia abia hidi Israela do lau lohiaia hanaihanai,+ badina ia ese Iuda be gunalaia tauna bamona ia abia hidi.+ Bona Iuda besena, egu tamana ena bese unai,+ bona egu tamana ena natudia memero amo lau ia abia hidi Israela ena king ai lau lao totona.+ 5 Iehova ese lau dekenai natudia momo ia henia,+ to idia ibounai amo egu natuna Solomona ia abia hidi,+ Iehova ena terona latanai ia helai bona Israela ia lohiaia totona.+

6 “Ia ese lau ia hamaoroa, ‘Emu natuna Solomona ese egu ruma bona ariara gabudia do ia haginia, badina ia lau abia hidi egu natuna ai do ia lao bona lau be ena tamana ai do lau lao.+ 7 Bema ia ese ena lalona ia hadaia egu hahemaoro herevadia bona oda herevadia ia badinaia,+ hari ia karaia noho bamona, vadaeni ena basileia do lau haginia goada ela bona hanaihanai.’+ 8 Vadaeni lau be Israela taudia ibounai, Iehova ena orea taudia unai, bona iseda Dirava vairanai lau gwau: Iehova emui Dirava ena oda herevadia umui dibaia namonamo bona badinaia, unai amo inai tano namona do umui noholaia daudau+ bona emui natudia dekenai do umui henia hanai, idia noholaia hanaihanai totona.

9 “Bona egu natuna Solomona e, oi ese mai emu kudouna ibounai+ bona mauri* ibounai ida emu tamana ena Dirava oi hesiai henia, badina Iehova ese iseda kudouna ibounai ia tahua,+ bona iseda lalohadai bona ura gaudia ibounai ia diba.+ Bema ia oi tahua, ia ese dala do ia kehoa ia oi davaria totona,+ to bema ia oi rakatania, oi do ia dadaraia ela bona hanaihanai.+ 10 Harihari do oi laloa namonamo, badina Iehova ese oi ia abia hidi dubu helaga oi haginia totona. Oi boga-auka bona gaukara oi karaia.”

11 Bena Davida ese dubu ena raka vareai gabuna+ bona ena daiutu idauidau, hegeregere kohu haboua daiutudia, ataiai daiutudia, lalona momokani daiutudia, bona kara dika gwauatao daiutuna+ edia palani be ena natuna Solomona dekenai ia henia.+ 12 Dirava ena lauma ese Davida dekenai ia hahedinaraia gaudia ibounai, hegeregere Iehova ena ruma ena ariara idauidau,+ aniani daiutu idauidau, Dirava momokanina ena dava bada kohu haboua daiutudia, bona idia hahelagaia gaudia idia atoa daiutudia edia palani danu be Solomona dekenai ia henia.+ 13 Danu hahelaga taudia+ bona Levi taudia edia gaukara, Iehova ena ruma lalonai idia karaia hesiai gaukara idauidau, bona Iehova ena ruma lalonai idia gaukaralaia kohu idauidau ia herevalaia. 14 Danu, hesiai gaukara idauidau edia kohu idia karaia golo ena metau, siliva amo idia karaia gaudia ibounai edia metau, bona hesiai gaukara idauidau totona idia gaukaralaia kohu ibounai edia metau ia gwauraia. 15 Danu golo amo idia karaia lamepa atoa gaudia+ bona edia golo lamepadia edia metau, bona siliva amo idia karaia lamepa atoa gaudia idauidau bona lamepa edia metau, 16 bona golo ena metau, unai golo amo teibolo ta ta do idia karaia, unai be Dirava dekenai idia henia paraoa helagana* atoa totona.+ Bona siliva ena metau, unai siliva amo teibolo idauidau do idia karaia, 17 golo namo hereana amo idia karaia foka, disi, hodu, bona golo amo idia karaia disi maragidia edia metau,+ bona siliva disi maragidia edia metau. 18 Bonana namo muramura idia bouboulaia patana+ bona Dirava ena kariota ia laulaulaia gauna,+ kerubi rua unai,+ edia apena idia kehoa bona apena ese Iehova ena Taravatu Maua idia koua totona do idia gaukaralaia golo namo hereana ena metau ia herevalaia. 19 Davida ia gwau: “Iehova ese lau dekenai laloa kehoa ia henia bona lau laloparara edena bamona inai palani ena kahana idauidau ibounai lau badinaia,+ bona iena hakaua dalana hegeregerena ai lau torea.”+

20 Bena Davida ese ena natuna Solomona ia hamaoroa: “Oi boga-auka bona oi goada bona gaukara oi karaia. Namo lasi oi gari, badina Iehova Dirava, egu Dirava be oi ida.+ Ia be oi do ia rakatania lasi,+ to oi ida do ia noho ela bona Iehova ena ruma haginia gaukara ibounai oi haorea. 21 Bona inai be hahelaga taudia bona Levi taudia edia gaukara,+ Dirava momokanina ena ruma lalonai idia karaia hesiai gaukara idauidau totona. Gau idauidau idia karaia diba taudia ibounai idia ura oi idia durua, gaukara idia karaia totona,+ danu iduhu gunalaia taudia+ bona taunimanima ibounai ese emu hereva do idia badinaia.”