Revareva Ginigunana Korinto Taudia Dekenai

16 Lau ura umui dekenai helaga taudia durua totona moni haboua karana lau herevalaia.+ Galatia kongrigeisen taudia lau hadibaia hegeregerena, umui danu be unai bamona do umui karaia. 2 Wiki ibounai edia dina ginigunadia* ai, umui ta ta ese moni sisina do umui haboua, umui dekenai ia noho gauna hegeregerena, vadaeni lau ginidae neganai, moni do umui haboua lasi. 3 To unuseniai lau ginidae neganai, umui ese revareva amo umui abia hidi taudia do lau siaia,+ bona emui harihari gauna be Ierusalema dekenai do idia abia lao. 4 To bema ia hegeregere, lau danu be unuseniai do lau lao, vadaeni idia be lau ida do idia lao.

5 Makedonia amo lau hanaia lao murinai, umui dekenai do lau mai, badina lau be Makedonia amo do lau mai+ 6 bona umui ida nega sisina do lau noho, reana ela bona keru negana ia ore. Bona lau umui abia lao bona dala dekenai umui rakatania, vadaeni lau lao gabuna dekenai do lau lao. 7 Lau hanaia noho lalonai lau ura lasi nega sisina sibona umui lau itaia, to lau ura umui ida nega sisina daudau lau noho,+ bema unai be Iehova* ena ura. 8 To lau be Efeso dekenai do lau noho+ ela bona Pentekoste Ena Aria negana, 9 badina lau dekenai gaukara ena iduara badana ia kehoa vadaeni,+ to egu inai taudia be momo.

10 Bema Timoteo+ ia ginidae bona umui ida ia noho, namo lasi gau ta dainai ia gari, badina ia be lau hegeregerena, Iehova* ena gaukara ia karaia noho.+ 11 Unai dainai, namo lasi ta ese ia do ia laloa maragi. To ia umui abia lao bona dala dekenai umui rakatania, bena mai maino danu do ia lao. Vadaeni lau dekenai do ia mai, badina lau be tadikaka ida ia ai naria noho.

12 Iseda tadikaka Apolo+ lau noia ia be tadikaka haida ida umui dekenai do ia mai. Ia be ia ura lasi hari umui dekenai ia mai, to dala ia kehoa neganai umui dekenai do ia mai.

13 Umui noga noho,+ abidadama dekenai umui gini goada,+ umui boga-auka,+ bona umui goada umui lao.+ 14 Namona be umui karaia gaudia ibounai be mai lalokau ida umui karaia.+

15 Umui diba, Akaia dekenai Stepana ena ruma taudia be hahediba taudia ginigunadia* bona idia be sibodia idia henia helaga taudia idia hesiai henia totona. Tadikaka e, hari lau ura umui lau hagoadaia, 16 namona be umui danu ese unai bamona taudia bona unai gaukara idia durua taudia ibounai edia henunai umui noho.+ 17 Stepana,+ Forotunato bona Akaiko be hari lau ida idia noho. Lau moale badina idia be lau ida idia noho, ena be umui mai diba lasi. 18 Idia ese lau bona umui idia hagoadaia bada. Unai dainai, namona be unai bamona taudia umui laloa bada.

19 Asia kongrigeisen ese umui dekenai edia hanamoa hereva idia siaia. Akwila bona Prisikila bona edia ruma ai idia hebou kongrigeisen taudia+ be mai ura bada ida edia Keristani hanamoa hereva idia siaia. 20 Tadikaka ibounai ese umui dekenai hanamoa hereva idia siaia. Ta ta do umui hanamoa mai kisi helagana ida.

21 Lau Paulo ese egu imana amo inai hanamoa hereva lau torea.

22 Bema ta be Lohiabada ia lalokau henia lasi, vadaeni ia be dika tauna. Emai Lohiabada e, oi mai! 23 Namona be Lohiabada Iesu ena hebogahisi hereadaena be umui ida ia noho. 24 Namona be egu lalokau be umui, Keriso Iesu ida umui hakapua taudia ida ia noho.