Sivarai Iharuana

21 Bena Iehosapata be ia mase* bona ena sene taudia idia guria gabuna ai ia idia guria, unai be Davida Ena Siti ai. Bona iena natuna Iehorama be king ai ia lao.+ 2 Iehorama ena tadikakadia, Iehosapata ena natudia memero unai, be Asaraia, Ieiele, Sekaraia, Asaraia, Mikaela, bona Sepataia. Idia ibounai be Israela ena king Iehosapata ena natudia memero. 3 Bona edia tamana ese idia dekenai siliva, golo bona dava bada gaudia be harihari gaudia bamona ia henia, danu Iuda ena siti mai edia magu aukadia ia henia.+ To basileia be Iehorama dekenai ia henia,+ badina ia be vara guna natuna.

4 Iehorama be ena tamana ena basileia ia lohiaia neganai, ia ese ena tadikaka ibounai+ bona Israela ena lohia taudia haida danu be tuari kaia amo ia hamasedia, ena king dagi ia dogoatao noho totona. 5 Iehorama ena mauri lagani be 32 neganai, king ai ia lao, bona lagani 8 lalonai Ierusalema ai ia lohia.+ 6 Iehorama be Israela ena king taudia edia kara ia badinaia,+ Ahaba ena bese taudia hegeregerena, badina ia ese Ahaba ena natuna kekeni ia adavaia.+ Bona Iehova vairanai kara dika ia karaia noho. 7 To Iehova ese Davida ida ia karaia gwaubou dainai,+ ia ura lasi Davida ena bese taudia ia hadikaia. Badina Davida dekenai ia gwauhamata, ia bona ena bese taudia do idia lohia* noho.+

8 Iehorama ena lohia negana lalonai Edoma taudia ese Iuda ena lohia dalana idia dadaraia+ bona sibona edia king idia abia hidi.+ 9 Vadaeni Iehorama bona ena tuari biagudia be edia kariota ibounai ida idia hanaia lao, bona hanuaboi ai Edoma taudia, ia bona ena tuari biagudia idia hagegea taudia unai, idia tuari henia bona idia halusia. 10 To Edoma taudia ese Iuda ena lohia dalana idia dadaraia ema bona hari. Danu unai nega ai Libina taudia+ ese Iehorama ena lohia dalana idia dadaraia, badina ia ese ena sene taudia edia Dirava Iehova ia rakatania.+ 11 Danu Iuda ena ororo ai ia ese ataiai gabudia* ia haginia,+ Ierusalema taudia ia hakaua dirava ma haida idia tomadiho henia,* bona Dirava idia rakatania totona. Bona ia ese Iuda taudia ia hakaua kerere.

12 Vadaeni peroveta tauna Elia+ be Iehorama dekenai revareva ta ia siaia, bona ia gwau: “Emu sene tauna Davida ena Dirava Iehova be inai bamona ia hereva, ‘Oi be emu tamana Iehosapata+ eiava Iuda ena king Asa+ ena kara oi badinaia lasi. 13 To oi be Israela ena king taudia+ edia kara oi badinaia bona Iuda bona Ierusalema taudia oi hakaua dirava ma haida idia tomadiho henia* bona Dirava idia rakatania,+ Ahaba ena bese taudia idia karaia bamona.+ Danu oi ese emu tadikaka,+ emu tamana ena natudia, oi idia hereaia taudia unai, oi hamasedia. 14 Unai dainai, Iehova ese emu taunimanima, emu natudia memero, emu adavadia bona emu kohu ibounai dekenai dika bada do ia havaraia. 15 Bona oi be gorere idauidau do oi davaria, bogana gorere danu, dina ta ta do oi gorere ela bona emu bogarau ibounai do idia raka-lasi.’”

16 Vadaeni Iehova ese Filistia taudia+ bona Arabia taudia,+ Etiopia taudia kahirakahira idia noho taudia unai, edia lalona ia veria+ Iehorama idia badu henia totona. 17 Vadaeni Iuda tanona idia tuari henia, bona king ena ruma lalonai idia noho kohu ibounai idia huaia lao,+ bona Iehorama ena natudia memero bona adavadia danu idia abidia lao. To ena natuna dokona, Iehoahasa+ sibona idia rakatania. 18 Unai gau ibounai idia vara murinai, Iehova ese Iehorama ena bogarau ai ia namo lou diba lasi gorere ta ia havaraia.+ 19 Lagani rua idia ore murinai, ena gorere dainai ena bogarau idia raka-lasi, bona ena gorere amo hisihisi bada ia davaria bena ia mase. Bona ena taunimanima ese ia totona bonana namo muramura idia gabua lasi, guna ena sene taudia totona bonana namo muramura idia gabua bamona.+ 20 Iehorama ena mauri lagani be 32 neganai, ia be king ai ia lao, bona lagani 8 lalonai Ierusalema ai ia lohia. Ia mase neganai, ta ia hebogahisi lasi. Vadaeni ia be Davida Ena Siti ai idia guria,+ to king edia guria gabudia ai idia guria lasi.+