Hahemaoro Taudia

1 Iosua ia mase murinai,+ Israela taudia* be Iehova idia noia, idia gwau:+ “Aiemai huanai daika do ia daekau lao guna, Kanana taudia tuari henia totona?” 2 Iehova ia haere, ia gwau: “Iuda iduhu taudia do idia daekau lao.+ Lau ese unai tano be idia dekenai do lau henia.” 3 Bena Iuda taudia be edia tadikaka Simeona taudia dekenai idia gwau: “Ai ida umui mai bona ai totona idia abia hidi tano dekenai ita lao,+ bona Kanana taudia ita tuari henia. Gabeai do umui abia tano dekenai umui ida do ai lao, umui ai durua totona.” Unai dainai Simeona taudia be idia ida idia lao.

4 Iuda taudia idia daekau lao neganai, Iehova ese Kanana bona Perisi taudia be edia imana dekenai ia atoa,+ bona Beseka ai tatau 10,000 idia halusia. 5 Idia ese Beseka ai Adoni-beseka idia davaria bona idia tuari henia, bona unuseniai Kanana+ bona Perisi taudia+ idia halusia. 6 To Adoni-beseka ia heau neganai, ia murinai idia heau lao bona ia idia dogoatao bona ena imana kwakikwaki badadia bona ena aena kwakikwaki badadia idia utua oho. 7 Bena Adoni-beseka ia gwau: “Lau ese king taudia 70 edia imana kwakikwaki badadia bona aena kwakikwaki badadia lau utudia oho, bona unai king taudia ese egu teibolo henunai idia moru aniani idia ania noho. Lauegu kara hegeregerena, Dirava ese egu davana ia haloua.” Unai murinai Ierusalema dekenai idia abia lao,+ bona unuseni ia mase.

8 Danu Iuda taudia ese Ierusalema idia tuari henia+ bona idia abia. Idia ese unai siti taudia be tuari kaia amo idia alaia mase bona siti be lahi amo idia gabua. 9 Unai murinai, Iuda taudia be ororo gabuna, Negeba, bona Sepala dekenai idia noho Kanana taudia tuari henia totona idia diho lao.+ 10 Vadaeni Iuda taudia be Heberona dekenai Kanana taudia idia tuari henia, (guna Heberona ena ladana be Kiriata-araba), bona Sesai, Ahimana, bona Talamai idia alaia mase.+

11 Unuseni amo idia raka lao bona Debiri taudia idia tuari henia.+ (Guna Debiri ena ladana be Kiriata-sepere.)+ 12 Bena Kaleba+ ia gwau: “Kiriata-sepere ia tuari henia bona ia abia tauna dekenai egu natuna kekeni, Akisa, do lau henia ia adavaia totona.”+ 13 Bona Kaleba ena tadina Kenasa ena natuna+ Otoniele+ ese unai tano ia abia. Vadaeni Kaleba ese ia dekenai ena natuna Akisa ia henia bona ia adavaia. 14 Akisa be ruma dekenai ia lao noho lalonai, ia ese ena adavana ia hamaoroa iena tamana do ia noia tano ta ia henia totona. Vadaeni Akisa be ena doniki amo ia diho.* Bena Kaleba ese ia nanadaia: “Dahaka oi ura?” 15 Akisa be ia dekenai ia gwau: “Mani lau oi hanamoa, badina oi ese lau dekenai saut kahana ai tano sisina* oi henia vadaeni, namona be lau dekenai Guloto-maimo* oi henia danu.” Vadaeni Kaleba ese ia dekenai Ataiai Guloto bona Henunai Guloto ia henia.

16 Vadaeni Kene taudia,+ Mose ena ravana tauna+ ena bese taudia unai, be Iuda taudia ida pama audia idia noho siti amo Iuda ena tano kaukau gabuna dekenai idia daekau lao,+ unai be Arada ena saut kahanai.+ Unuseniai idia be unai gabu taudia huanai idia noho.+ 17 To Iuda be ena tadikaka Simeona ida ia lao bona Sepata ai idia noho Kanana taudia idia hadikaia ore.+ Unai dainai unai siti ena ladana idia hatoa Horoma.*+ 18 Bena Iuda taudia ese Gasa,+ Asakelona,+ bona Ekarona+ edia gabu ibounai idia abia. 19 Iehova be Iuda taudia ida, bona idia ese ororo gabudia idia abia, to idia hegeregere lasi tano palakana ai idia noho taudia idia lulua, badina edia tuari kariota edia wili be mai edia tuari kaia.*+ 20 Idia ese Heberona be Kaleba dekenai idia henia, Mose ia gwauhamata hegeregerena,+ bona ia ese unai gabu amo Anaki ena natudia memero toi ia lulua.+

21 To Beniamina taudia ese Ierusalema ai idia noho Iebusu taudia idia lulua lasi, unai dainai Iebusu taudia be Beniamina taudia ida Ierusalema ai idia noho ema bona hari.+

22 Unai negai danu, Iosepa ena bese taudia+ be Betele tuari henia totona idia lao bona Iehova be idia ida.+ 23 Iosepa ena bese taudia be hehuni ai Betele idia itaia noho (guna unai siti ena ladana be Lusu),+ 24 bona idia itaia tau ta be siti amo ia raka-lasi. Vadaeni ia dekenai idia gwau: “Mani siti ia lao henia dalana be ai dekenai oi hadibaia, bona oi dekenai hebogahisi do ai hahedinaraia.”* 25 Vadaeni unai tauna ese idia dekenai siti ia lao henia dalana ia hahedinaraia, bena idia ese unai siti taudia be tuari kaia amo idia alaia mase, to unai tau bona ena ruma bese taudia ibounai idia hamasea lasi.+ 26 Unai tauna be Hiti taudia edia tano dekenai ia lao bona siti ta ia haginia bona ena ladana ia hatoa Lusu, unai be unai siti ena ladana ema bona hari.

27 Manase ese Bete-seana bona ena badina taonidia, Tanaka+ bona ena badina taonidia, Doro bona ena badina taonidia, Ibileama bona ena badina taonidia, bona Megido bona ena badina taonidia ia abia lasi.+ Bona Kanana taudia idia ura lasi unai tano idia rakatania. 28 Israela besena ia bada neganai, idia ese Kanana taudia be edia igui hesiai taudia ai idia halaoa,+ to idia ibounai be tano amo idia lulua lasi.+

29 Eparaima taudia ese Gesere ai idia noho Kanana taudia idia lulua lasi. Kanana taudia be Gesere ai edia huanai idia noho.+

30 Sebuluno ese Kitarona bona Nahalolo ai idia noho taudia ia lulua lasi.+ Kanana taudia be edia huanai idia noho bona idia ese Kanana taudia be edia igui hesiai taudia ai idia halaoa.+

31 Asere ese Ako, Sidono,+ Alabo, Akasiba,+ Heliba, Apika,+ bona Rehoba ai idia noho taudia ia lulua lasi.+ 32 Unai dainai Asere taudia be unai tano ai idia noho Kanana taudia edia huanai idia do noho, badina idia ese unai taudia be tano amo idia lulua lasi.

33 Napatali ese Bete-semese bona Bete-anata ai idia noho taudia ia lulua lasi,+ to unai tano ai idia noho Kanana taudia huanai idia do noho.+ Bete-semese bona Bete-anata taudia be edia igui hesiai taudia ai idia halaoa.

34 Amoro taudia ese Dano taudia dekenai maoro idia henia lasi tano palakana dekenai idia diho totona, unai dainai ororo gabudia dekenai idia noho.+ 35 Vadaeni Amoro taudia be Heresa Ororo, Aialono,+ bona Salabima dekenai idia noho.+ To Iosepa ena bese taudia edia goada ia bada neganai, idia ese unai taudia be edia igui hesiai taudia ai idia halaoa. 36 Amoro taudia edia tano be Akarabima ororo ena dala amo ia matamaia bona Sela amo danu, bona ataiai kahana dekenai ia daekau lao.+