Hahemaoro Taudia

17 Tau ta be Eparaima ena ororo gabudia amo,+ iena ladana be Mika. 2 Ia be ena sinana dekenai ia gwau: “Oi laloatao, a? Guna ta ese oi amo siliva moni 1,100 ia abia, bona oi ese unai tauna oi gwauraia dika, bona lau ese unai lau kamonai danu. Unai siliva moni be lau dekenai ia noho. Lau ese unai siliva moni lau abia.” Unai neganai ena sinana ia gwau: “Iehova ese egu natuna ia hanamoa be namo.” 3 Vadaeni ia ese siliva moni 1,100 be ena sinana dekenai ia henia lou, to ena sinana ia gwau: “Lau ese Iehova totona inai siliva do lau hahelagaia, unai amo egu natuna ese do ia gaukaralaia laulau ta bona auri kaivakuku ta ia karaia totona.+ Hari oi dekenai inai siliva lau henia lou.”

4 Unai siliva moni be ena sinana dekenai ia henia lou murinai, ena sinana ese siliva moni 200 ia abia bona siliva gaukara ia karaia tauna dekenai ia henia. Bona ia ese laulau ta bona auri kaivakuku ta ia karaia, bona unai gaudia be Mika ena ruma dekenai idia atoa. 5 Inai tauna, Mika, ena ruma ai dirava idauidau idia noho, bona ia ese epodi*+ bona ruma bese ena dirava idauidau*+ ia karaia bona ena natuna mero ta ia abia hidi* ia totona hahelaga gaukara do ia karaia.+ 6 Unai nega ai, Israela dekenai king ta be lasi.+ Idia ta ta be sibona edia ura idia badinaia noho.+

7 Vadaeni Iuda ena Betelehema ai tau matamata ta ia noho,+ ia be Iuda bese amo. Ia be Levi tauna+ bona nega sisina daudau unuseniai ia noho. 8 Ia ese Iuda ena siti Betelehema ia rakatania, bona noho gabuna tahua totona ia lao. Ena laolao lalonai, ia be Mika ena ruma dekenai ia mai, unai be Eparaima ena ororo gabudia ai.+ 9 Bena Mika be ia dekenai ia gwau: “Oi be edeseni amo oi mai?” Ia haere: “Lau be Levi tauna bona Iuda ena Betelehema amo lau mai, bona noho gabuna ta lau tahua noho.” 10 Vadaeni Mika be ia dekenai ia gwau: “Lau ida oi noho bona egu sisiba henia tauna* bona hahelaga tauna ai oi lao. Lagani ta ta ai lau ese oi dekenai siliva moni 10, dabua, bona aniani do lau henia.” Vadaeni unai Levi tauna be ruma lalonai ia vareai. 11 Bena unai Levi tauna be ia lalotamona Mika ida do ia noho, bona inai tau matamata be ena natuna ta bamona ai ia lao. 12 Danu, Mika ese unai Levi tauna ia abia hidi* bona ia ese ia totona hahelaga gaukara ia karaia,+ bona ia be Mika ena ruma ai ia noho. 13 Bena Mika ia gwau: “Hari lau diba Iehova ese lau do ia kara namo henia, badina Levi tauna be lauegu hahelaga tauna ai ia lao.”