Samuela Ginigunana

27 To, Davida be ena lalona dekenai ia gwau: “Dina ta lau be Saulo ena imana dekenai do lau mase. Unai dainai namona be Filistia taudia edia tano dekenai lau heau lao.+ Bena Saulo do ia hesiku Israela ena teritori ibounai lalonai lau ia tahua noho totona,+ bona lau be iena imana amo do lau heau mauri.” 2 Bena Davida bona ia ida idia noho tatau 600 idia toreisi+ bona Maoko ena natuna Akisi dekenai idia lao,+ ia be Gata ena king. 3 Bona Gata dekenai, Davida be Akisi ida ia noho, ia bona ena tatau mai edia ruma bese ida. Bona Davida ena adavana ruaosi be ia ida idia noho. Ta ena ladana be Ahinoama,+ ia be Ieserele amo, bona ma ta be Abigaila,+ ia be Karamele amo. Guna ia be Nabala ena adavana, ia mase vadaeni tauna unai. 4 Haida ese Saulo idia hamaoroa Davida be Gata dekenai ia heau lao neganai, ia ia tahua lou lasi.+

5 Bena Davida be Akisi dekenai ia gwau: “Bema lau oi lalonamo henia, mani siti maragina ta lalonai gabu ta be lau dekenai oi henia, bena unuseniai lau noho diba. Dahaka dainai emu hesiai tauna be king ena siti ai oi ida ia noho?” 6 Vadaeni unai dina ai Akisi ese Davida dekenai Sikilaga+ ia henia. Unai dainai Sikilaga be Iuda taudia edia king edia siti, ema bona hari.

7 Davida be Filistia taudia edia taoni maragina ai ia noho ena daudau be lagani ta bona hua 4.+ 8 Davida bona ena tatau be vaia Gesuru taudia,+ Girisi taudia, bona Amaleka taudia+ tuari henia totona idia lao, badina unai tano taudia be Telama amo ela bona Suhuru+ bona ela bona Aigupito tanona idia noholaia. 9 Davida ese tano ta ia tuari henia neganai, ia ese tatau bona hahine ia hamasedia,+ to mamoe, boromakau, doniki, kamelo, bona dabua ia abidia, unai bamona ia karaia negadia ta ta murinai, ia be Akisi dekenai ia giroa lou. 10 Bena Akisi be vaia ia henanadai: “Hari dina oi be edeseni oi tuari?” Davida do ia haere: “Iuda ena saut kahanai,”+ eiava “Ierahamele taudia edia saut kahanai”+ eiava “Kene taudia edia saut kahanai.”+ 11 Davida ese tau ta eiava hahine ta ia abia mauri lasi Gata dekenai ia mailaia totona, badina ia gwau: “Namo lasi Gata taudia dekenai ita do idia sivarailaia, do idia gwau, ‘Davida be inai bamona ia karaia.’” (Bona Filistia taudia edia taoni maragina ai ia noho negadia ibounai lalonai, unai bamona ia karaia.) 12 Vadaeni Akisi ese Davida ena hereva ia hamomokania, bona sibona dekenai ia gwau: ‘Iena taunimanima ese ia idia inai henia, unai dainai ia be nega ibounai egu hesiai tauna.’