Sivarai Ginigunana

11 Vadaeni Israela ena iduhu ibounai be Davida dekenai idia mai, ia be Heberona ai,+ bona idia gwau: “Itaia, ai be emu rara tamona taudia.+ 2 Guna Saulo be emai king neganai, oi ese tuari dekenai Israela taudia oi gunalaia.+ Bona Iehova emu Dirava be oi dekenai ia gwau: ‘Oi ese egu taunimanima, Israela taudia unai, do oi naria bona edia hakaua tauna ai do oi lao.’”+ 3 Vadaeni Israela ena tau badadia ibounai be king dekenai idia mai, Heberona ai, bona unuseniai Davida ese idia ida gwauhamata ta ia karaia, Iehova vairanai. Bena idia ese Davida idia horoa bona ia be Israela ena king ai ia lao,+ Iehova be Samuela amo ia hereva hegeregerena.+

4 Gabeai Davida bona Israela taudia ibounai be Ierusalema, unai be Iebusu, dekenai idia lao,+ unai tano ai Iebusu taudia idia noho.+ 5 Iebusu taudia ese Davida idia hevasehalaia, idia gwau: “Oi be iniseni oi vareai diba lasi!”+ To, Davida ese Siona ena siti mai magu aukana ia abia,+ gabeai ena ladana idia hatoa Davida Ena Siti.+ 6 Vadaeni Davida ia gwau: “Bema daika ese Iebusu taudia do ia hamasea guna, ia be tuari taudia edia gunalaia tauna ai do ia lao.” Bona Seruia ena natuna Ioaba+ ia daekau lao guna, bona ia be gunalaia tauna ai ia lao. 7 Bena Davida be siti mai magu aukana dekenai ia noho matamaia. Unai dainai idia gwauraia Davida Ena Siti. 8 Davida ese Ororo* badinai siti ena magu bona ruma ia haginidia matamaia, bona Ioaba ese siti ena kahana haida ia hanamoa lou. 9 Vadaeni Davida ena siahu be ia bada ia lao,+ bona tuari oreadia edia Iehova* be ia ida.

10 Inai be Davida ena tuari taudia goadadia edia gunalaia taudia, idia bona Israela taudia ibounai ese Davida idia durua king ai ia lao totona, Iehova ese Israela taudia dekenai ia gwauhamata hegeregerena.+ 11 Davida ena tuari taudia goadadia edia ladana be inai: Iasobeama,+ ia be Hakamoni tauna ena natuna bona unai taudia toi edia kwarana.+ Nega ta, ia ese ena io amo tatau 300 ia hamasea.+ 12 Iasobeama ena badinai be Eleasara ia gini,+ ia be Dodo ena natuna mero, Dodo be Ahohi ena bese tauna.+ Idia toi amo, Eleasara danu be tuari tauna goadana. 13 Ia be Davida ida Pasa-damimi dekenai ia noho,+ unuseniai Filistia taudia be tuari totona idia haboua. Unai gabu ai tano ta be bali amo ia honu, bona Israela taudia be Filistia taudia dainai idia heau. 14 To Eleasara be uma ena huanai ia gini bona unai gabu ia gimaia bona Filistia taudia ia hamasea noho, unai amo Iehova ese idia ia hamauria.+

15 Gunalaia taudia 30 amo tatau toi be nadi ororona dekenai idia lao, Davida be unuseni ia noho, unai be Adulama ena kohua dekenai,+ unai nega ai Filistia taudia edia tuari oreana ta be Repaima Kourana ai ia kamepa noho.+ 16 Davida be hunia gabuna ta dekenai ia noho, bona Filistia tuari taudia be Betelehema dekenai idia noho. 17 Bena Davida ia gwau: “Bema Betelehema ena geiti badinai ia noho ranu guri* amo ranu lau inua be namo!”+ 18 Unai nega ai, tuari taudia goadadia toi be Filistia taudia edia kamepa dekenai idia lao bona Betelehema ena geiti badinai ia noho ranu guri* amo ranu idia abia bona Davida dekenai idia mailaia. To ia ura lasi unai ranu ia inua bona Iehova vairanai ia bubua diho. 19 Ia gwau: “Egu Dirava ena vairanai, lau be inai ranu do lau inua diba lasi! Unai tatau be edia mauri* idia haboioa diba, bona lau ese edia rara do lau inua, a?+ Unai ranu idia abia totona do idia mase diba.” Unai dainai ia ura lasi unai ranu ia inua. Unai be ena tuari tatau goadadia toi ese idia karaia gaudia.

20 Abisai+ be Ioaba ena tadikaka,+ bona ia be tuari tatau ma toi edia gunalaia tauna. Nega ta, ia ese ena io amo tatau 300 ia hamasea, bona ia be tuari taudia goadadia toi hegeregerena.+ 21 Tatau goadadia rua amo, ia be mai ena ladana bada bona ia be edia gunalaia tauna, to ia ese tuari tatau goadadia toi edia dagi ia abia lasi.

22 Iehoiada ena natuna Benaia+ be gari lasi tauna, bona ia be Kabisele dekenai gau momo ia karaia.+ Ia ese Moaba tauna Ariele ena natudia memero rua ia hamasea, bona sinou bada dinana ai ranu guri lalonai ia diho bona laiona ta ia alaia mase.+ 23 Danu ia ese Aigupito tau bada hereana ta, ena lata be 5 kiubit,* ia hamasea.+ Ena be unai Aigupito tauna be io badana* ta ia dogoatao,+ to Benaia ese au ta amo unai Aigupito tauna ia tuari henia bona ena imana amo io ia kokia bona sibona ena io amo unai tauna ia hamasea.+ 24 Iehoiada ena natuna Benaia ese unai gaudia ia karaia, bona ia be tuari taudia goadadia toi hegeregerena. 25 Ena be unai gunalaia taudia 30 amo ia be ladana bada tauna, to ia ese tuari taudia goadadia toi edia dagi ia abia lasi.+ To Davida ese ia ia abia hidi iena gima tauna ta ai ia lao totona.

26 Unai tatau goadadia haida be inai: Ioaba ena tadikaka Asahele,+ Betelehema tauna Dodo ena natuna mero Elehanana,+ 27 Haroda tauna Samota, Pelono tauna Helese, 28 Tekoa tauna Ikese ena natuna mero Ira,+ Anatoto tauna Abiesere,+ 29 Husa tauna Sibekai,+ Ahohi tauna Ilai, 30 Netopa tauna Maharai,+ Netopa tauna Banaha ena natuna mero Helede,+ 31 Itai, ia be Ribai ena natuna. Ribai be Beniamina taudia edia hanua Gibea amo,+ Piratono tauna Benaia, 32 Gaso koura amo ia mai tauna Hurai,+ Arabaha tauna Abiele, 33 Bahurimi tauna Asamavete, Salabima tauna Eliahaba, 34 Gisono tauna Haseme ena natudia memero, Harari tauna Sage ena natuna mero Ionatana, 35 Harari tauna Sakara ena natuna mero Ahiama, Uru ena natuna mero Elipala, 36 Mekerata tauna Hepere, Pelono tauna Ahaisa, 37 Karamele tauna Hesero, Esebai ena natuna mero Narai, 38 Natana ena tadikaka Ioela, Hagiri ena natuna mero Mibihara, 39 Amono tauna Sekele, Beroto tauna Naharai, ia be Seruia ena natuna Ioaba ena tuari kohu huaia tauna. 40 Itiri taudia Ira bona Gareba, 41 Hiti tauna Uria,+ Ahalai ena natuna mero Sabada, 42 Rubena tauna Sisa ena natuna mero Adina, Rubena ena bese ena kwarana tauna, bona tatau 30 be ia ida. 43 Maka ena natuna mero Hanana, Mitini tauna Iosapata, 44 Asataroto tauna Usia, Aroere tauna Hotama ena natudia memero Sama bona Ieile. 45 Simirai ena natuna mero Iediaele, bona ena tadikaka Tisi tauna Ioha, 46 Mahava tauna Eliele, Elinama ena natudia memero Ieribai bona Iosavaia, bona Moaba tauna Itima. 47 Eliele, Obeda, bona Mesoba tauna Iasiela.