Sivarai Ginigunana

13 Davida be tuari orea taudia 1,000 ta ta edia biagudia bona tuari orea taudia 100 ta ta edia biagudia bona gunalaia taudia ibounai ida ia herevahereva.+ 2 Vadaeni Davida ese Israela ena bese taudia ibounai dekenai ia gwau: “Bema umui dekenai ia namo bona iseda Dirava Iehova ese unai ia abia dae, namona be hereva ita siaia, unai amo Israela ibounai dekenai idia noho tadikakadia bona siti mai ena rei gabudia ai idia noho hahelaga taudia bona Levi taudia be ita do idia bamoa.+ 3 Bona namona be iseda Dirava ena Maua do ita abia mai lou.”+ Badina Saulo ena nega ai unai maua idia naria namonamo lasi.+ 4 Israela ena bese taudia ibounai idia lalotamona unai idia karaia totona, badina idia laloa unai be maoro. 5 Vadaeni Davida ese Israela taudia ibounai, Aigupito ena sinavai kahana amo ela bona Lebo-hamata* ai idia noho taudia, ia haboua,+ Kiriata-iearimi amo Dirava momokanina ena Maua idia abia mai totona.+

6 Davida bona Israela taudia ibounai be Iuda ena hanua Ba-alaha, unai be Kiriata-iearimi dekenai idia daekau lao,+ kerubi rua edia ataiai* ia helai Dirava momokani ena Maua idia mailaia totona.+ Unai maua ia noho gabunai taunimanima be Iehova ena ladana ai idia boiboi. 7 Vadaeni idia ese Dirava momokanina ena Maua be treila matamata latanai idia atoa,+ bona Abinadaba ena ruma amo idia abia lao, bona Usa bona Ahio, be treila vairanai idia raka.+ 8 Davida bona Israela besena ibounai be Dirava momokanina ena vairanai idia moale bada noho bona ane idia abia, hap,* miusiki gaudia ma haida mai edia varo, tambarin,+ simbol* idia gadaralaia,+ bona kibi idia hiriria danu.+ 9 To Kidona ena witi moia gabuna ai idia ginidae neganai, Usa ese ena imana amo Dirava momokanina ena Maua ia dogoatao, badina boromakau ese kahirakahira treila ia hagiroa. 10 Unai neganai Iehova be Usa dekenai ia badu momokani, bona ia hamasea, badina ia ese Maua ia dogoatao.+ Unuseniai Dirava ena vairanai ia mase.+ 11 To Davida ia badu,* badina Iehova ena badu be Usa latanai ia diho, bona unai gabu ena ladana idia hatoa Perese-usa ema bona hari.

12 Vadaeni unai dina ai Davida be Dirava momokanina dekenai ia gari bona ia gwau: “Dirava momokanina ena Maua be edena bamona lau dekenai do idia abia mai?”+ 13 Davida ese Maua be ia noho gabuna, Davida Ena Siti dekenai ia abia mai lasi. To Gata tauna Obeda-edoma ena ruma dekenai ia abia lao. 14 Hua toi lalonai Dirava momokanina ena Maua be Obeda-edoma ena ruma dekenai ia noho, bona Iehova ese Obeda-edoma ena ruma bese bona ia biagua gaudia ibounai ia hanamoa noho.+