Salamo
Hereva ta miusiki gunalaia tauna totona. Davida ena ane.
140 Iehova e, kara dika taudia amo lau oi hamauria.
Dagedage taudia amo lau oi gimaia,+
2 Idia be edia kudouna ai palani dikadia idia karaia+
Bona dina ibounai lalonai heai idia havaraia.
3 Edia malana be mai matana, gaigai ena malana bamona.+
Gaigai ena poisini be edia uduna dekenai ia noho.+ (Sela)
4 Iehova e, kara dika taudia edia imana amo lau oi gimaia.+
Dagedage taudia amo lau oi naria,
Idia be palani idia karaia lau idia hamorua totona.
5 Hekokoroku taudia be lau idia hamorua totona tarapu idia atoa.
Dala ai idia ese reke ta mai ena varo idia atoa.+
Lau idia hadikaia totona tarapu idia atoa.+ (Sela)
6 Iehova dekenai lau gwau: “Oi be egu Dirava.
Iehova e, heduru totona egu noinoi mani oi kamonai.”+
7 Siahu Ibounai Lohiabadana bona egu Hamauria Tauna goadana Iehova e,
Oi ese tuari dinana ai lau oi gimaia.+
8 Iehova e, kara dika taudia edia ura gaudia oi henia lasi.
Edia palani dikadia oi koua, unai amo do idia hekokoroku lasi.+ (Sela)
9 Lau idia hagegea taudia ese idia gwauraia dika gaudia
Be idia dekenai do idia vara be namo.+
10 Lahi gidadia be edia latanai ia diho be namo.+
Unai taudia be lahi lalonai idia negea be namo,
11 Ladana hadikaia taudia be tanobada ai idia noho lasi be namo.+
Dagedage taudia be dika idia davaria bona idia mase be namo.
12 Lau diba Iehova be ladana bada lasi tauna do ia durua
Bona ogogami tauna totona kota maoromaoro do ia karaia.+
13 Momokani, kara maoromaoro tauna be emu ladana do ia hanamoa.
Kara maoromaoro tauna be emu vairanai do ia noho.+