Deuteronomi

22 “Bema oi itaia emu tadikaka ena boromakau eiava ena mamoe be ia loa kava, namo lasi mai emu ura ida oi dadaraia.+ Namona be emu tadikaka dekenai oi abia giroa. 2 To bema emu tadikaka be oi kahirakahira ia noho lasi eiava ia oi diba lasi, namona be unai animal be emu ruma dekenai oi abia lao, bona oi ida do ia noho ela bona emu tadikaka ese ia tahua. Bena ia dekenai oi henia lou.+ 3 Bema emu tadikaka ese ena doniki, ena dabua eiava gau ta ia haboioa bona unai gauna ta oi davaria, unai bamona oi karaia be namo. Namo lasi unai gauna oi rakatania.

4 “Bema oi itaia emu tadikaka ena doniki eiava boromakau be dala dekenai ia moru, namo lasi mai emu ura ida oi dadaraia. Namona be ia oi durua ena animal oi abia isi totona.+

5 “Namo lasi hahine ese tau ena dabua ia hahedokilaia, eiava tau ese hahine ena dabua ia hahedokilaia. Badina unai bamona ia karaia tauna be Iehova emui Dirava ese ia inai henia.

6 “Bema dala dekenai manu ta ena ruma oi davaria bona ia lalonai manu ena natudia eiava gatoi idia noho, herevana unai be au dekenai eiava tano ai, bona edia sinana be natudia eiava gatoi latanai ia helai, namo lasi sinana bona ena natudia oi abia.+ 7 Namona be edia sinana oi siaia lao, to natudia oi abia. Unai bamona oi karaia neganai, do oi noho namo bona emu mauri do ia daudau.

8 “Bema ruma matamata oi haginia, namona be emu ruma guhina ena isena ai magu maragina oi karaia danu,+ unai amo ta be guhi amo do ia moru lasi bona emu ruma bese taudia be rara dekenai do idia kerere lasi.

9 “Namo lasi emui vain uma ai uhe idaudia rua umui hadoa.+ Dika umui hadoa uhe amo idia vara aniani ibounai bona vain umana ena anina be dubu helaga dekenai do idia henia.

10 “Namo lasi boromakau bona doniki umui gaukaralaia hebou, tano makohia gauna idia veria totona.+

11 “Namo lasi wulu bona linen* varona amo idia turia hebou dabua umui hahedokilaia.+

12 “Namona be umui hahedokilaia dabua edia dorina ai herahera gaudia umui karaia, unai be edia kona 4 ai.+

13 “Bema tau ta ese hahine ta ia adavaia bona ia ida ia mahuta hebou, to gabeai ia inai henia,* 14 bona unai hahine ena kara ia gwauraia dika bona ena ladana ia hadikaia, ia gwau: ‘Lau ese inai hahine lau adavaia, to ia ida lau mahuta hebou neganai, lau davaria ia be rami-hebou kekeni lasi,’ 15 vadaeni kekeni ena tamana bona sinana ese siti ena geiti ai tau badadia dekenai, kekeni ena rami-hebou ia hamomokania gauna idia hahedinaraia be namo. 16 Namona be kekeni ena tamana be tau badadia dekenai ia gwau, ‘Lau ese egu natuna be inai tauna dekenai lau henia ia adavaia totona, to ia inai henia* 17 bona inai hereva amo ia hahedinaraia egu natuna ena kara be dika, ia gwau: “Lau davaria, emui natuna be rami-hebou kekeni lasi.” To, inai gauna ese ia hamomokania egu natuna be rami-hebou kekeni.’ Bena idia ese siti ena tau badadia vairanai dabua ta do idia kehoa bona idia atoa. 18 Vadaeni siti ena tau badadia+ ese unai tau do idia abia lao bona ia do idia kwadia.+ 19 Idia ese ia do idia hamaoroa 100 siliva sikel* do ia henia bona unai moni be kekeni ena tamana dekenai do idia henia, badina unai tau ese Israela ena rami-hebou kekeni ena ladana ia hadikaia,+ bona unai hahine be unai tau ida do ia noho. Unai tau ena mauri dinadia ibounai lalonai, ia be maoro lasi unai hahine ia divos totona.

20 “Bema unai tau ia gwauraia herevana be momokani, bona gau ta ese ia hamomokania lasi unai kekeni be rami-hebou, 21 idia ese unai kekeni be ena tamana ena ruma ena iduara vairanai do idia abia lao, bona unai siti ena tatau ese nadi amo ia idia hodoa mase be namo, badina Israela lalonai hemarai karana ia karaia,+ ia ese ena tamana ena ruma lalonai matabodaga karana ia karaia.+ Vadaeni umui ese dika gauna be emui huana amo do umui kokia.+

22 “Bema tau ta be tau ma ta ena hahine ida ia mahuta hebou bona idia davaria, unai hahine bona ia ida ia mahuta tauna idia mase be namo.+ Vadaeni Israela ena huana amo dika gauna do umui kokia.

23 “Bema rami-hebou kekeni ta be tau ta ida ia maoheni, bona siti lalonai tau ma ta ese ia hedavari henia bona ia ida ia mahuta hebou, 24 namona be idia ruaosi be siti ena geiti dekenai umui hakaua lao bona nadi amo idia umui hodoa mase. Kekeni do umui hodoa badina siti lalonai ia boiboi lasi, bona unai tau danu badina ia ese ena varavara ena hahine ia hahemaraia.+ Vadaeni emui huana amo dika gauna do umui kokia.

25 “To bema tau ta be siti murimurina ai maoheni kekeni ta ida ia hedavari bona ia goada dainai kekeni ia fosia bona ia reipia, unai tau sibona do umui hamasea, 26 to kekeni dekenai gau ta do umui karaia lasi. Ia be kara dika ta ia karaia lasi ia mase totona. Unai tauna ena kara dika be tau ta ese ena varavara ia alaia karana ida ia hegeregere.+ 27 Badina ia ese maoheni kekeni be siti ena murimuri ai ia davaria bona kekeni ia boiboi, to ta ia noho lasi ia durua totona.

28 “Bema tau ta ese maoheni lasi rami-hebou kekeni ia hedavari henia bena ia dogoatao bona ia ida ia mahuta hebou bona idia davaria,+ 29 unai kekeni ida ia mahuta hebou tauna ese kekeni ena tamana dekenai 50 siliva sikel do ia henia, bona unai kekeni be ena adavana ai do ia lao.+ Ia ese ia hahemaraia dainai, tau ena mauri dinadia ibounai lalonai, ia be maoro lasi unai hahine ia divos totona.

30 “Namo lasi tau ta ese ena tamana ena hahine ia adavaia, dika ena tamana ia hahemaraia.+