Nahumu
3 Rara ia bubua siti be dika do ia davaria!
Ia be koikoi bona henaohenao karadia amo ia honu.
Tuari amo ia dadia kohu amo ia honu!
2 Hosi kwadia varona bona wili edia regena idia daekau noho,
Hosi bona kariota idia heau haraga noho.
3 Hosi ai ia helai tauna, ia hururuhururu tuari kaia bona ia diaridiari io,
Taunimanima momo idia hamasea bona idia haboua
—Mase tauanina be momo herea.
Mase tauanidia latanai idia raka bona idia moru noho.
4 Ariara hahine ena matabodaga karadia dainai unai ia vara,
Ia be mai ena hairai bona laloani herevadia bona meamea karadia ia karaia,
Ena matabodaga karadia amo bese idauidau ia tarapua bona ena meamea karadia ese ruma bese ia koidia.
5 Tuari oreadia edia Iehova* ia gwau: “Itaia! Oi* do lau tuari henia,+
Lau ese emu rami do lau abia isi bona emu vairana do ia koua.
Bese idauidau vairanai emu tauanina do lau hahedinaraia,
Bona basileia idauidau ese emu hemarai do idia itaia.
6 Bona bodaga gaudia be oi latanai do lau negea
Bona oi be gau dika rohorohona ai do lau halaoa.
Taunimanima vairanai oi be anina lasi gauna ai do lau halaoa.+
7 Oi idia itaia taudia ibounai be oi amo do idia heau siri+ bona idia gwau,
‘Nineva be ia dika momokani!
Daika ese do ia hebogahisi henia?’
Edeseni ai oi do idia hagoadaia taudia do lau tahua?
8 Oi ese No-amono,*+ Naila sinavai badinai ia helai siti oi hereaia, a?+
Ranu ese ia hagegea,
Davara be iena taga bona iena magu.
9 Goada bada be Etiopia bona Aigupito amo ia abia danu.
Putu+ bona Libia taudia be oi idia durua taudia.+
10 To No-amono be idia guia,
Bona idia abia lao.+
Dala ena kona* ta ta dekenai iena natudia danu be mai dagedage ida idia hamasedia.
Ladana bada taudia be gadara ta* amo idia haridia,
Bona ena tau badadia ibounai be seini amo idia guia.
11 Oi danu be do oi kekero,+
Bona do oi komu.
Emu inai taudia dainai heau mauri gabuna do oi tahua.
12 Emu magu aukadia ibounai be fig audia mai edia mage huahua ginigunadia bamona,
Idia hamarerea neganai, ania taudia edia uduna lalonai do idia moru.
13 Itaia! Oi huanai emu tuari taudia be hahine bamona.
Emu tano ena geiti do idia kehoa badabada emu inai taudia totona.
Lahi ese emu geiti edia auri do ia gabua ore.
14 Oi do idia koua hegege dainai, ranu oi abia hegaegae!+
Emu magu oi ha-aukadia.
Kopukopu lalonai oi diho lao bona raro oi moia,
Bona biriki karaia gauna oi dogoatao hegaegae.
15 Unuseniai danu lahi ese oi do ia gabua.
Tuari kaia ese oi do ia utua.+
Bona oi do ia haorea, kwadi ese ia karaia bamona.+
Kwadi edia momo bamona oi emu namba do oi habadaia!
Oibe, kwadi edia momo bamona emu namba do oi habadaia!
16 Emu hoihoi taudia edia namba oi habadaia, guba ena hisiu edia namba ia hanaia.
Kwadi ese ena kopina ia kokia bona ia roho lao.
17 Emu gima taudia be kwadi bamona,
Bona emu ofesa taudia be kwadi oreana bamona.
Keru dinana ai idia be nadi magu lalonai idia kamepa,
To dina ia siahu neganai idia roho lao,
Bona ta ia diba lasi idia be edeseni.
18 Asuria ena king e, emu mamoe naria taudia be idia mahuta noho,
Emu lohia taudia be edia ruma lalonai idia noho.
Emu taunimanima be ororo idauidau dekenai idia heau lao,
Bona ta ese idia ia haboua lasi.+
19 Emu dika hanamoa dalana be lasi.
Emu bero be do ia namo diba lasi.