Sivarai Iharuana

23 Lagani namba 7 ai, Iehoiada be mai lalogoada ida ia kara bona tuari taudia 100 ta ta edia gunalaia taudia ida gwauhamata ta ia karaia,+ idia be, Ierohama ena natuna mero, Asaraia, Iehonana ena natuna mero, Isamaela, Obeda ena natuna mero, Asaraia, Adaia ena natuna mero, Maseaia, bona Sikiri ena natuna mero, Elisapata. 2 Bena Iuda tano ibounai dekenai idia lao bona siti lalodiai Levi taudia+ bona Israela ena bese kwaradia ibounai idia haboua. Bona Ierusalema dekenai idia mai neganai, 3 idia haboua taudia ibounai be Dirava momokanina ena ruma dekenai king ida gwauhamata ta idia karaia,+ unai murinai king be idia dekenai ia gwau:

“Kamonai! King ena natuna be do ia lohia, Iehova ese Davida ena natudia memero totona ia karaia gwauhamata hegeregerena.+ 4 Namona be inai umui karaia: Sabati dinana ai do idia mai hahelaga taudia bona Levi taudia be orea toi dekenai do oi haria.+ Orea ta be geiti do ia gimaia,+ 5 orea ta be king ena ruma do ia gimaia,+ bona orea ma ta be geiti ladana “Badina,” do ia gimaia, bona taunimanima ibounai be Iehova ena ruma ena ariara dekenai do idia vareai.+ 6 Ta be Iehova ena ruma lalonai do ia vareai lasi, to hesiai gaukara idia karaia hahelaga taudia bona Levi taudia sibona.+ Idia be orea helagana ta dainai, Dirava ena ruma lalonai do idia vareai, bona taunimanima oredia ibounai be murimuri ai do idia noho, unai amo edia gwauhamata Iehova dekenai idia badinaia. 7 Namona be Levi taudia ese king idia hagegea, bona tuari gaudia do idia dogoatao. Bema ta be dubu helaga ia vareai, do idia hamasea. King ia lao gabudia ibounai dekenai ia idia badinaia.”

8 Levi taudia bona Iuda taudia ibounai be hahelaga tauna Iehoiada ena oda hegeregerena idia karaia. Vadaeni gunalaia taudia ta ta ese edia tatau, Sabati dinana ai idia gaukara taudia bona Sabati dinana ai idia gaukara lasi taudia unai, idia abia bona idia mai,+ badina hahelaga tauna Iehoiada ia ura edia gaukara idia karaia noho.+ 9 Vadaeni hahelaga tauna ese tuari orea 100 ta ta edia gunalaia taudia+ dekenai King Davida ena io bona kesi maragidia* bona kesi kuborudia ia henia,+ unai tuari kohudia be Dirava momokanina ena ruma ai idia noho.+ 10 Bena ia ese taunimanima ibounai be gabu ta ta dekenai ia atoa, mai edia tuari gaudia ida, idia be dubu helaga ena idiba kahana amo ia lao dubu helaga ena lauri kahana bona boubou patana bona dubu helaga badinai idia gini, bona king idia hagegea danu. 11 Vadaeni idia ese king ena natuna+ idia abia mai bona ena kwarana latanai korona idia atoa bona Taravatu bukana*+ be ena kwarana ataiai idia dogoatao,* bona ia be king ai idia halaoa, bona Iehoiada bona ena natudia memero ese idia horoa. Bona idia gwau: “King ia mauri daudau!”+

12 Atalaia be taunimanima idia heau bona king idia hanamoa noho ena regena ia kamonai neganai, karaharaga Iehova ena ruma dekenai idia noho taudia dekenai ia lao.+ 13 Bena ia ese king ia itaia dubu vairana ena du badinai ia gini, vaia idia karaia bamona. Bona lohia taudia+ bona kibi idia hiriria taudia be king ida idia noho,+ bona unai tano taudia ibounai be idia moale bona kibi idia hiriridia, bona ane abia taudia mai edia miusiki gaudia idauidau ida be unai moale negana idia gunalaia. Unai nega ai Atalaia be ena dabua ia darea bona ia boiboi: “Umui ura lau umui hadikaia, a?” 14 Hahelaga tauna Iehoiada ese tuari orea 100 ta ta edia gunalaia taudia ia hakaua mai, bona idia dekenai ia gwau: “Emui huana amo ia umui lulua, bona bema ta be ena murinai ia raka, ia danu be tuari kaia amo umui hamasea!” Badina hahelaga tauna, Iehoiada ia hereva vadaeni, ia gwau: “Iehova ena ruma dekenai ia umui hamasea lasi.” 15 Bena ia idia dogoatao, bona king ena ruma ena vareai gabuna ena geiti ladana “Hosi Iduarana” dekenai idia ginidae neganai, karaharaga unuseniai idia hamasea.

16 Bena Iehoiada ese ia sibona bona taunimanima ibounai bona king huanai gwaubou ta ia karaia, unai amo idia be Iehova ena taunimanima do idia gwauraia noho.+ 17 Unai murinai taunimanima ibounai be Bala ena dubu dekenai idia mai bona iena boubou patadia idia veria diho,+ iena laulau idia hamakohidia ore,+ bona Bala ena hahelaga tauna Matana be boubou patadia vairanai idia hamasea.+ 18 Bena Iehoiada ese hahelaga taudia bona Levi taudia ia abia hidi Iehova ena ruma idia naria totona, idia be guna Davida ese orea ta ta dekenai ia haria, Iehova ena ruma ai gabua bouboudia be Iehova dekenai idia henia,+ Mose ena Taravatu bukana ai ia noho hegeregerena,+ bona mai moale ida ane idia abia danu, Davida ena hereva hegeregerena. 19 Danu ia ese Iehova ena ruma ena geiti ta ta ai geiti naria taudia ia atoa,+ unai amo goeva lasi tauna ta do ia vareai lasi. 20 Ia ese tuari orea 100 ta ta edia gunalaia taudia,+ ladana bada taudia, taunimanima idia lohiaia taudia, bona tano taudia ibounai ia abia bona Iehova ena ruma amo king idia hakaua diho. Bena ataiai geiti amo king ena ruma dekenai idia lao bona king be basileia ena terona+ latanai ia helai.+ 21 Vadaeni tano taudia ibounai idia moale bona siti ai maino ia noho, badina idia ese Atalaia be tuari kaia amo idia hamasea.