Deuteronomi
32 “Guba e, oi kamonai, bona do lau hereva,
Bona namona be tanobada ese egu uduna herevadia ia kamonai.
2 Lauegu hadibaia hereva be medu bamona do ia diho.
Lauegu hereva be daba paripari bamona sisina sisina do ia diho,
Medu be metairametaira rei latanai ia diho bamona
Bona medu bada be tubutubu gaudia latanai ia diho bamona.
3 Lau ese Iehova ena ladana do lau gwauraia.+
Iseda Dirava ena hairai do lau herevalaia!+
Ia be ita abidadama henia diba Diravana+ bona ia kara gageva lasi.+
Iena kara be maoromaoro bona kerere lasi.+
5 To umui be umui kara gageva.+
Umui be iena natudia lasi, kerere be umui sibona dekenai.+
Umui be uru mai koikoina bona dikana!+
Ia be emui Tamana bona umui ia havaraia, ani?+
Ia ese umui ia karaia bona haginia goada, ani?
7 Guna negadia umui laloa lou,
Uru gunadia edia nega umui laloa.
Emui tamana umui nanadaia, bona umui do ia hamaoroa,+
Emui tau badadia umui nanadaia, bona umui do idia hadibaia.
8 Ataiai Momokani Dirava ese bese idauidau dekenai edia ahuna ia henia neganai,+
Bona Adamu ena natudia* be ta ta amo ia hapararadia neganai,+
Ia ese taunimanima totona tano hetoana ia makaia+
Unai amo Israela taudia be edia namba hegeregerena tano idia abia diba.+
9 Badina Iehova ena taunimanima be iena.+
10 Ia ese taunimanima lasi gabuna ai ia davaria+
Oibe, ia noho kava tanona ai, idia boiboi dagedage animal ida ia noho.+
11 Ugava ta ese ena natudia ia hadibaia idia roho totona,
Ena natudia edia ataiai ia roho loaloa,
Ena apena ia kehoa badabada, bona idia ia abia,
Bona ena hanina dekenai idia ia huaia hegeregerena,+
12 Iehova sibona ese Iakobo ia gunalaia,+
Idau diravana ta be ia ida ia noho lasi.+
13 Ia ese ia dekenai maoro ia henia tanobada ena ataiai gabudia* ia biagua,+
Vadaeni ia ese unai tano ena aniani ia ania.+
Ia ese nadi badana amo ia mai hani amo ia ubua
Bona nadi amo ia mai dehoro amo danu,
14 Boromakau ena milika amo idia abia bata bona mamoe amo idia abia milika,
Bona mamoe namo hereana,
Bona Basana ena mamoe bona nanigosi tau,
Bona witi namo hereana ia henia noho,+
Bona greips edia ranu* amo wain ia inua.
15 Iesurunu* e, oiemu tauanina ia bada neganai, oi be mai gwau-edeede ida oi kara.
Oiemu tauanina ia bada, oibe, oi metau, bona aniani amo oi honu.+
Vadaeni Dirava oi rakatania, oi ia karaia tauna unai,+
Bona oi ia hamauria Nadi Badana oi dadaraia.
16 Oi ese idau diravadia amo ia oi habadua.+
Bona gau dika rohorohodia amo ia oi habadua.+
17 Oi ese demoni dekenai boubou gaudia oi henia, to Dirava dekenai lasi,+
Oi diba lasi diravadia unai,
Vanegai sibona idia hedinarai dirava matamatadia,
Emu sene taudia idia diba lasi diravadia unai.
19 Iehova ese unai ia itaia neganai, oi ia dadaraia,+
Badina oiemu natudia memero bona kekeni ese ia idia habadua.
20 Vadaeni ia gwau, ‘Lauegu vairana be oi amo do lau hunia.+
Do lau itaia oi be edena bamona tauna ai do oi lao.
21 Idia ese anina lasi dirava amo lau idia habadua,+
Edia anina lasi kaivakukudia amo lau idia habadua.+
Unai dainai lau ese edia lalona do lau hauraia anina lasi taudia idia mama henia totona.+
Lau ese kavakava besena amo idia do lau habadua.+
22 Egu badu ese lahi ia hamatamaia bamona,+
Unai lahi do ia araia noho ela bona Mase Gurina* ena dobu kahadia dekenai,+
Bona tanobada bona ia lalonai idia noho gaudia do ia araia ore
Bona ororo edia badina do ia araia.
23 Lau ese idia dekenai dika idauidau do lau habadaia,
Lau ese idia dekenai egu peva ena diba ibounai do lau pidia haorea.
24 Idia be hitolo bada dainai do idia manoka+
Bona fiva bada bona dika bada herea ese idia do ia haorea.+
Lau ese idia dekenai dagedage animal do lau siaidia, idia do idia koria totona+
Bona tano kahuna dekenai idia rau poisini gaigai danu.
25 Edia ruma murimuri ai idia noho taudia be tuari kaia ese do ia alaia,+
Bona edia ruma lalonai idia noho taudia do idia gari bada,+
Bona tatau matamata bona rami-hebou kekeni,
Beibi bona buruka taudia danu do idia gari bada.+
26 Lau gwau diba: “Lau ese daudau tanodia dekenai idia do lau lulua lao.
Bona taunimanima ese idia do idia laloa lou lasi,”
27 Lau ese egu inai tauna amo idia mai hadikaia hereva dainai lau laloa momo,+
Badina dika egu inai taudia be lalohadai kerere idia abia.+
Namo lasi idia gwau: “Iseda siahu dainai ita kwalimu.+
Iehova ese unai ibounai ia karaia lasi.”
29 Bema idia aonega,+ idia ese inai gaudia do idia laloa dobu.+
Idia dekenai do ia vara gauna do idia laloa.+
30 Edena dala ai tau tamona ese taunimanima 1,000 ia lulua diba?
Edena dala ai taunimanima rua ese taunimanima 10,000 idia lulua diba?+
Unai ia vara diba bema edia Nadi Badana ese idia ia hoihoilaia,+
Bona Iehova ese idia be edia inai taudia dekenai ia henia.
31 Edia dirava* be iseda Dirava, Nadi Badana unai, bamona lasi,+
Iseda inai taudia danu be unai idia lalopararalaia.+
32 Edia vain auna be Sodoma ena vain auna amo
Bona Gomora ena vain umadia amo.+
Edia greips be poisini gaudia,
Unai greips be dika.+
33 Edia wain be gaigai edia poisini,
Oibe, kobra* ena poisini dikana bamona.
34 Lau ese edia kara do lau koua bona lokaia,
Idia be egu kohu haboua ruma lalonai lau haboua bamona.+
35 Dika ena davana be lauegu, bona panisi danu,+
Nega korikori ai edia aena do ia dedi,+
Badina dika do idia davaria negana be kahirakahira,
Bona idia dekenai do ia vara gauna be do ia mai haraga.’
36 Badina Iehova be iena taunimanima do ia hahemaoro henia,+
Bona bema ia itaia edia goada ia ore,
Bona heduru idia tahua taudia bona manoka taudia sibona idia noho,
Ia ese ena hesiai taudia do ia hebogahisi henia.+
37 Bena do ia gwau, ‘Edia dirava idauidau be edeseni,+
Idia abidadama henia nadina unai,
38 Edia boubou gaudia edia digara be unai dirava idauidau ese idia ania,*
Bona boubou totona idia henia wain be idia ese idia inua, ani?+
Namona be idia toreisi bona umui idia durua.
Namona be idia be emui heau mauri gabuna ai idia lao.
Lau ese ta lau hamasea diba, bona ta lau hamauria diba.+
Lau ese ta lau haberoa diba,+ bona ta lau hanamoa diba,+
Bona egu imana amo ta idia hamauria diba lasi.+
40 Badina egu imana be guba dekenai lau abia isi,
Bona lau gwauhamata: “Lau be lau noho hanaihanai hegeregerena,”+
41 Bema egu tuari kaia, ia diaridiari gauna unai, lau segea
Bona do lau hegaegae hahemaoro lau karaia totona,+
Lau ese egu inai taudia edia dika davana do lau haloua+
Bona lau idia inai henia taudia do lau panisia.
42 Lau ese egu diba be rara amo do lau hakekeroa,
Bona egu tuari kaia be hidio do ia ania,
Idia alaia mase bona guia taudia edia rara do ia inua
Egu inai taudia edia gunalaia taudia edia kwaradia danu do ia ania.’
43 Bese idauidau taudia e, Dirava ena taunimanima ida umui moale,+
Badina ia ese ena hesiai taudia edia rara davana do ia henia,+
Bona iena inai taudia edia davana do ia henia lou+
Bona ena taunimanima edia tano totona kara dika davana karaia boubou do ia henia.”
44 Mose bona Nunu ena natuna, Hosahea*+ idia lao bona Mose ese inai ane ena hereva ibounai be taunimanima edia vairanai ia duahia.+ 45 Mose ese Israela taudia ibounai dekenai unai hereva ibounai ia gwauraia murinai, 46 idia dekenai ia gwau: “Hari dina umui dekenai lau henia hadibaia hereva ibounai be emui kudouna dekenai umui atoa,+ unai amo emui natudia umui oda henia diba inai Taravatu ena hereva ibounai idia badinaia.+ 47 Badina inai be hereva kavakavana lasi, to ia be mauri ia henia herevadia.+ Unai hereva dainai, Ioridane unai kahana ai do umui noholaia tano ai umui mauri daudau diba.”
48 Unai dina ai Iehova ese Mose ia hereva henia, ia gwau: 49 “Abarima ena ororo dekenai oi daekau lao,+ Nebo Ororo unai,+ ia be Moaba tano ai ia noho bona Ieriko ia vaira henia, bona Kanana tano oi itaia, unai tano be Israela taudia dekenai do lau henia.+ 50 Bena oi daekau ororona ai do oi mase bona emu sene taudia idia guria gabuna ai oi do idia guria,* emu tadikaka Arona be Horo Ororo ai+ ia mase bona ena sene taudia idia guria gabuna ai idia guria hegeregerena, 51 badina Kadesi ai ia noho Meriba ranu gabuna,+ Seni ena taunimanima lasi gabuna ai, umui ruaosi be Israela taudia huanai lau umui kamonai henia lasi, bona umui ese Israela taudia vairanai lau umui hahelagaia lasi.+ 52 Israela taudia do lau henia tano be daudau amo do oi itaia, to unai tano lalonai do oi vareai lasi.”+