Hadibaia Tauna

9 Lau ese unai gaudia ibounai lau tahua namonamo bona inai lau davaria: Kara maoromaoro taudia bona aonega taudia, bona idia karaia gaudia danu be Dirava momokanina ena imana lalonai.+ Idia mauri noho taudia be guna idia vara lalokau eiava inai heheni karadia idia diba lasi. 2 Kara maoromaoro tauna bona kara dika tauna,+ kara namo tauna bona helaga tauna bona helaga lasi tauna, boubou idia henia taudia bona boubou idia henia lasi taudia, idia ibounai edia dokona be tamona.+ Kara namo tauna be kara dika tauna ida ia hegeregere. Bona gwauhamata ia karaia haraga tauna be mai gari ida gwauhamata ia karaia tauna ida ia hegeregere. 3 Tanobada dekenai ia vara lalohisihisi gauna be inai: Taunimanima ibounai edia dokona be tamona dainai,+ edia lalona be dika amo ia honu bona edia mauri dinadia lalonai idia be kavakava karadia sibona idia karaia, bena idia mase!

4 Ia mauri noho tauna be mai ena helaro, badina ia mauri noho sisia ese ia mase vadaeni laiona ia hereaia.+ 5 Idia mauri noho taudia idia diba do idia mase,+ to mase taudia be gau ta idia diba lasi,+ bona ahuna* ta do idia abia lasi, badina taunimanima ese idia laloaboio vaitani.+ 6 Edia lalokau, inai henia karana bona lalodika be idia ore vaitani, bona tanobada ai idia vara gaudia dekenai idia be kara ta do idia karaia lasi.+

7 Oi lao, bona mai moale ida oi aniani bona emu wain oi inua,+ badina Dirava momokanina be emu gaukara dekenai ia moale.+ 8 Namona be nega ibounai dabua kurokuro* oi atoa bona hanaihanai dehoro be emu kwarana dekenai do oi dahua.+ 9 Namona be emu lalokau hahinena ida emu anina lasi maurina oi moalelaia.+ Unai anina lasi maurina be Dirava ese oi dekenai ia henia, unai be emu ahuna, badina tanobada dekenai oi gaukara goadagoada.+ 10 Herevana dahaka gaukara oi karaia, namona be mai goada ibounai ida oi karaia, badina Mase Gurina,* oi lao henia gabuna dekenai, gaukara be lasi, palani be lasi, diba be lasi bona aonega be lasi.+

11 Lau ese tanobada dekenai* gau ma ta lau itaia: Heau haraga taudia be hanaihanai heau helulu dekenai idia kwalimu lasi,+ aonega taudia be hanaihanai aniani idia abia lasi, diba bada taudia be hanaihanai idia taga lasi,+ bona diba momo taudia be hanaihanai idia kwalimu lasi,+ badina idia ibounai dekenai dika be nega idauidau ai idia vara kava. 12 Tau ta be iena mase negana ia diba lasi.+ Gwarume be reke lalonai idia kamokau bona manu be tarapu ese ia abia hegeregerena, dika ese taunimanima ia tarapua, idia diba lasi negana ai karaharaga dika idia davaria.

13 Tanobada dekenai ia vara aonega karana ta lau itaia bona lau hoa bada: 14 Siti maragina ta lalonai tatau momo idia noho lasi, bona king goadana be unai siti ia tuari henia totona, siti ia hagegea bona magu badana amo siti ia koua hagegea. 15 Siti lalonai ogogami aonega tauna ta ia noho bona iena aonega amo siti ia hamauria. To tau ta be unai ogogami tauna ia laloatao lasi.+ 16 Bona sibona dekenai lau gwau: ‘Aonega ese goada ia hereaia,+ to ogogami tauna ena aonega idia dadaraia, bona ena hereva idia badinaia lasi.’+

17 Aonega tauna ena hereva ita badinaia be mai ena namo, to kavakava taudia huanai ia lohia tauna ena hereva ita badinaia be mai ena dika.

18 Aonega ese tuari kohu ia hereaia, to kara dika tauna tamona sibona ese kara namodia ibounai ia hadikaia diba.+