Hahemaoro Taudia

15 Nega sisina murinai, witi gogoa negana lalonai, Samson be nanigosi natuna ta ia abia bona ena adavana itaia totona ia lao. Ia gwau: “Lau ura daiutu lalonai lau vareai egu adavana dekenai.” To ena ravana tauna ese ia koua, ia vareai lasi totona. 2 Iena ravana tauna ia gwau: “Lau laloa, ‘Oi be ia oi inai henia momokani.’+ Unai dainai, ia be emu turana dekenai lau henia.+ To iena tadina kekeni ena hairai ese iena hairai ia hereaia, ani? Mani ia oi abia.” 3 To, Samson be idia dekenai ia gwau: “Bema hari Filistia taudia lau hahisia, idia ese lau dekenai kerere do idia atoa lasi.”

4 Vadaeni Samson ia lao bona uda sisia 300 ia abia. Bena ia ese uda sisia rua rua edia iuna ia kwatudia hebou, bona kede be edia iuna huanai ia atodia. 5 Bena unai kede be lahi amo ia gabua bona uda sisia be Filistia taudia edia witi umadia dekenai ia siaia lao. Ia ese idia kwatua witi bona idia do utua lasi witi ibounai be lahi amo ia gabua ore, edia vain umadia bona olive audia danu.

6 Filistia taudia idia henanadai: “Daika ese inai ia karaia?” Haida ese idia hamaoroa, idia gwau: “Unai be Samson, Timunaha tauna ena ravana ese ia karaia, badina ia ese Samson ena adavana ia abia, bona ena turana ta dekenai ia henia.”+ Unai nega ai, Filistia taudia idia lao bona Samson ena adavana bona ena tamana be lahi amo idia gabua.+ 7 Bena Samson be idia dekenai ia gwau: “Bema umui be inai bamona umui karaia, do lau laga-ani lasi ela bona emui davana lau haloua.”+ 8 Vadaeni ia ese idia ia alaia ela bona momo herea ia hamasea, unai murinai ia diho lao bona Etama ena nadi badana ena kohua lalonai ia noho.

9 Gabeai Filistia taudia idia daekau lao bona Iuda ai idia kamepa, bona Lehi dekenai idia lao idia loaloa totona.+ 10 Vadaeni Iuda taudia be idia dekenai idia gwau: “Dahaka dainai umui ura ai umui tuari henia?” Bena idia haere: “Ai be Samson dogoatao totona ai mai, ai ia kara henia hegeregerena, ia dekenai unai bamona do ai karaia danu.” 11 Unai dainai Iuda taudia 3,000 be Etama ena nadi badana ena kohua dekenai idia diho lao bona Samson dekenai idia gwau: “Oi diba lasi Filistia taudia be ita idia lohiaia noho, a?+ Dahaka dainai ita dekenai inai bamona oi karaia?” Idia dekenai ia gwau: “Lau dekenai idia karaia hegeregerena, idia dekenai unai bamona lau karaia.” 12 To idia gwau: “Ai be oi dogoatao totona ai mai bona oi be Filistia taudia dekenai do ai henia.” Bena Samson ia gwau: “Mani lau umui gwauhamata henia, umui ese lau do umui hamasea lasi.” 13 Ia dekenai idia gwau: “Lasi, oi do ai kwatua sibona bona idia dekenai do ai henia, to oi do ai hamasea lasi.”

Vadaeni idia ese varo matamata rua amo ia idia kwatua bona nadi badana amo idia hakaua daekau. 14 Ia be Lehi dekenai ia ginidae bona Filistia taudia ese ia idia itaia neganai, idia be mai moale ida idia boiboi. Bena Iehova ena lauma ese ia hasiahua+ bona iena imana ai idia noho varo be lahi ese ia gabua linen* varodia bamona ai idia lao, bena idia moru.+ 15 Bena ia ese doniki tau ena aukina turia matamatana ia davaria bena ia abia bona tatau 1,000 ia alaia mase.+ 16 Bena Samson ia gwau:

“Doniki ena aukina turia amo lau ese egu inai taudia lau alaia mase bona edia mase tauanina lau haboua.

Doniki ena aukina turia amo lau ese tatau 1,000 lau alaia mase.”+

17 Unai hereva ia gwauraia murinai, ia ese unai aukina turia ia negea bona unai gabu ena ladana ia hatoa, Ramata-lehi.*+ 18 Bena ia ranu mase momokani, bona Iehova ia noinoi henia, ia gwau: “Oi ese emu hesiai tauna oi durua tuari ai ia kwalimu totona. Mani, lau dekenai ranu oi henia unai amo do lau mase lasi. Namo lasi kopina utua lasi taudia ese lau do idia abia lao.” 19 Vadaeni Dirava ese Lehi ai nadi ia makohia bona ranu ia raka-lasi.+ Ia ese ranu ia inua neganai, ena goada ia giroa lou bona ena tauanina ia goada. Unai dainai, unai gabu ena ladana ia hatoa Ene-hakore,* unai be Lehi dekenai ia noho ema bona hari.

20 Bona Filistia taudia edia nega lalonai, Samson be lagani 20 lalonai Israela ai hahemaoro gaukara ia karaia.+