King Taudia Iharuana

20 Unai nega lalonai Hesekaia ia gorere bona kahirakahira do ia mase.+ Peroveta tauna Isaia, Amoso ena natuna, be ia dekenai ia lao bona ia gwau: “Iehova be inai bamona ia hereva: ‘Emu ruma bese taudia oi hadibaia, badina oi be do oi mase. Emu gorere amo do oi namo lou lasi.’”+ 2 Unai nega ai ena vairana ia giroa bona haba ia itaia bona Iehova ia guriguri henia matamaia, ia gwau: 3 “Iehova e, oi dekenai lau noinoi, mai abidadama bona mai kudouna ibounai ida emu vairanai lau raka negadia mani oi laloatao, bona oi vairanai kara maorodia lau karaia.”+ Bena Hesekaia ia tai dikadika.

4 Isaia be king ena ruma ena ariara huanai ia do lao lasi neganai, Iehova be ia dekenai ia gwau:+ 5 “Oi giroa lou bona egu taunimanima edia gunalaia tauna Hesekaia dekenai oi gwau, ‘Emu sene tauna Davida ena Dirava Iehova be inai bamona ia hereva: “Lau ese emu guriguri lau kamonai vadaeni. Emu matana ranu lau itaia vadaeni.+ Oi be emu gorere amo do lau hanamoa.+ Dina ihatoina ai oi be Iehova ena ruma dekenai do oi raka daekau lao.+ 6 Emu mauri be lagani 15 amo do lau halataia, bona lau ese oi bona inai siti be Asuria ena king amo do lau hamauria,+ bona egu ladana bona egu hesiai tauna Davida dainai inai siti do lau gimaia.”’”+

7 Bena Isaia ia gwau: “Fig kakoro amo idia karaia keke umui abia mai.” Vadaeni idia abia mai bona iohururu latanai idia atoa, unai murinai metairametaira ia namo ia lao.+

8 Hesekaia ese Isaia ia nanadaia: “Dahaka toa+ ese do ia hahedinaraia Iehova ese egu gorere do ia hanamoa bona dina toi murinai Iehova ena ruma dekenai do lau daekau lao?” 9 Isaia ia gwau: “Iehova be inai toa amo do ia hahedinaraia, Iehova ia gwauraia herevadia be do ia karaia momokani: Oi ura dina ena laulau be vadavada ai aena atoa gabuna 10 amo do ia daekau eiava aena atoa gabuna 10 amo do ia giroa lou?”+ 10 Hesekaia ia gwau: “Dina ena laulau be vadavada ai aena atoa gabuna 10 amo do ia daekau be auka lasi, to vadavada ai aena atoa gabuna 10 amo do ia giroa lou be auka.” 11 Vadaeni peroveta tauna Isaia be Iehova dekenai ia boiboi, bona Ia ese Ahasa ena ruma ena vadavada ai, dina ena laulau ia hadihoa, aena atoa gabuna 10 amo do ia giroa lou.+

12 Unai nega ai Babulonia ena king Berodaka-baladana, Baladana ena natuna unai, be Hesekaia dekenai revareva haida bona harihari gauna ta ia siaia, badina ia kamonai Hesekaia be ia gorere noho.+ 13 Hesekaia ese idia ia abia dae* bona ena dava bada kohu haboua rumana+ ai idia noho siliva, golo, balsam* oela bona oela namodia ma haida, ena tuari kohudia, bona ena dava bada kohu haboua rumana ai idia noho gaudia ibounai ia hahedinaraia. Hesekaia ese ena ruma lalonai bona ia lohia gabudia dekenai idia noho gaudia ibounai ia hahedinaraia.

14 Unai murinai peroveta tauna Isaia be King Hesekaia dekenai ia mai bona ia nanadaia: “Unai tatau be dahaka idia gwau, bona edeseni amo idia mai?” Vadaeni Hesekaia ia gwau: “Idia be tano daudauna ta amo idia mai, unai be Babulonia.”+ 15 Ma ia nanadaia: “Emu ruma lalonai dahaka gaudia idia itaia?” Hesekaia ia haere: “Egu ruma ai idia noho gaudia ibounai idia itaia. Dava bada kohu haboua rumana lalonai idia noho gaudia ibounai lau hahedinaraia.”

16 Vadaeni Isaia be Hesekaia dekenai ia gwau: “Iehova ena hereva oi kamonai,+ 17 Iehova ia gwau: ‘Kamonai! Nega do ia mai, emu ruma lalonai idia noho gaudia ibounai bona emu sene taudia ese idia haboua gaudia be Babulonia dekenai do idia abia lao.+ Gau ta do idia rakatania lasi.’ 18 ‘Bona emu bese taudia haida be do idia abia lao+ bona Babulonia ena king ena ruma ai ofesa taudia ai do idia lao.’”+

19 Vadaeni Hesekaia ese Isaia ia hamaoroa: “Iehova ena hereva, hari oi gwauraia herevana, be namo.”+ Bena ma ia gwau: “Bema egu mauri dinadia lalonai maino bona noho namo do ia noho, unai be namo.”+

20 Hesekaia ena sivarai ibounai, ena siahu bona ia karaia gohu+ bona ranu ia heau dalana bona siti taudia ese ranu idia abia dalana,+ be Iuda ena king taudia edia buka lalonai idia torea, ani? 21 Bena Hesekaia be ia mase,*+ bona ena natuna Manase+ be king ai ia lao.+