Hadibaia Tauna

11 Emu paraoa be ranu latanai oi negea,*+ badina dina momo murinai do oi itaia lou.+ 2 Emu kohu ena kahana haida be taunimanima 7 eiava 8 dekenai oi henia,+ badina oi diba lasi tanobada ai dahaka dika* do ia vara.

3 Bema ori be ranu amo ia honu, tanobada dekenai medu do ia diho. Bona bema au ta be saut eiava not kahanai ia moru, ia moru gabunai do ia hekure.

4 Lai ia raraia noho tauna be uhe do ia hadoa lasi, bona ori ia itaia noho tauna be uma aniani do ia gogoa lasi.+

5 Sinana ena bogana lalonai ia noho natuna ena turia lalonai mauri siahuna* ia gaukara dalana oi diba lasi hegeregerena,+ Dirava momokanina, gau ibounai ia karaia tauna unai, ena gaukara oi diba lasi.+

6 Daba ai emu uhe oi hadoa bona emu imana do ia laga-ani lasi ela bona adorahi,+ badina oi diba lasi edena do ia tubu namonamo, reana inai eiava unai, eiava idia ruaosi do idia tubu namonamo.

7 Diari be mai ena namo, bona iseda matana amo dina ita itaia be moale gauna. 8 Badina bema tau ta be lagani momo lalonai ia mauri, unai lagani ibounai ia moalelaia be namo.+ To namona be ia laloatao diari lasi negadia be momo bona gabeai do idia vara gaudia ibounai be anina lasi.+

9 Mero e, emu matamata negana do oi moalelaia bona emu matamata dinadia ai emu kudouna do ia moale. Emu kudouna ena ura daladia do oi badinaia bona emu matana ese oi ia hakaua lao gabudia do oi lao. To namona be oi laloatao, Dirava momokanina ese unai gaudia ibounai dainai oi do ia hahemaoro henia.+ 10 Unai dainai emu kudouna amo lalohekwarahi gaudia do oi kokia bona emu tauanina idia hadikaia gaudia do oi dadaraia, badina emu matamata negana be anina lasi.+