Deuteronomi

6 “Iehova emui Dirava ese inai oda herevadia, taravatu, bona hahemaoro herevadia be lau dekenai ia henia umui lau hadibaia totona, vadaeni do umui abia tano dekenai umui hanaia lao neganai, do umui badinaia, 2 unai amo umui, emui natudia, bona emui tubudia ese Iehova emui Dirava do umui gari henia bona ena taravatu bona ena oda herevadia, umui dekenai lau henia gaudia unai,+ be emui mauri dinadia ibounai lalonai do umui badinaia, umui mauri daudau totona.+ 3 Bona Israela taudia e, namona be unai umui kamonai bona badinaia namonamo, unai amo milika bona hani amo ia honu tano dekenai do umui noho namo bona do umui momo herea, Iehova, emui sene taudia edia Dirava ese umui ia gwauhamata henia hegeregerena.

4 “Israela taudia e, umui kamonai: Iehova iseda Dirava be Iehova tamona.+ 5 Namona be Iehova emui Dirava umui lalokau henia mai emui kudouna ibounai, mai emui mauri* ibounai,+ bona mai emui goada ibounai.+ 6 Hari dina umui dekenai lau henia oda hereva be emui kudouna ai idia noho be namo, 7 bona namona be emui natudia dekenai umui hadibaia loulou,+ emui ruma ai umui helai, dala dekenai umui raka, umui hekure, bona umui toreisi neganai, unai do umui herevalaia.+ 8 Emui imana dekenai do umui kwatua umui laloatao totona, bona namona be kwara gauna bamona emui baguna dekenai do umui kwatua.+ 9 Bona emui ruma ena du bona emui siti ena geiti ai do umui torea.

10 “Iehova ese emui sene taudia Aberahamo, Isako, bona Iakobo dekenai ia gwauhamatalaia tano dekenai umui do ia hakaua vareai,+ bona umui dekenai do ia henia tano be mai ena siti badadia bona namodia, umui haginia lasi gaudia unai,+ 11 bona edia ruma be gau namodia idauidau amo idia honu, umui haboua lasi gaudia unai, ranu guridia,* umui geia lasi gaudia unai, bona vain uma bona olive audia, umui hadoa lasi gaudia unai. Bona umui be do umui aniani bona bogakunu.+ 12 To umui naria namonamo, namo lasi Iehova umui laloaboio,+ ia ese umui ia guia tanona, Aigupito amo umui ia hakaua raka-lasi. 13 Namona be Iehova emui Dirava umui gari henia,+ ia umui hesiai henia,+ bona iena ladana ai gwauhamata umui karaia.+ 14 Namo lasi dirava ma haida, umui idia hagegea taudia edia dirava ta umui badinaia,+ 15 badina Iehova emui Dirava be umui huanai ia noho, bona ia ura ia sibona umui tomadiho henia.+ Bema lasi, Iehova emui Dirava ena badu ena siahu do umui mamia+ bona umui be tanobada amo do ia hadikaia ore.+

16 “Namo lasi Iehova emui Dirava umui tohoa,+ Masa ai ia umui tohoa hegeregerena.+ 17 Namona be Iehova emui Dirava ese umui ia oda henia do umui badinaia oda herevadia, hadibaia herevadia, bona taravatu do umui badinaia namonamo. 18 Bona namona be Iehova ena vairanai kara maoro bona kara namo umui karaia, unai amo do umui noho namo bona Iehova ese emui sene taudia dekenai ia gwauhamatalaia tano namona dekenai do umui vareai bona abia,+ 19 umui ese emui inai taudia be emui vairana amo do umui lulua, Iehova ia gwauhamata hegeregerena.+

20 “Bema vaira negai emui natudia idia henanadai, ‘Dahaka dainai Iehova iseda Dirava ese umui dekenai inai hadibaia herevadia, taravatu, bona hahemaoro herevadia ia henia?’ 21 Bena emui natudia dekenai do umui gwau, ‘Aigupito dekenai, ai be Farao ena igui hesiai taudia, to Iehova ese ena imana goadana amo ai be Aigupito amo ia hakaua raka-lasi. 22 Vadaeni emai matana ai Iehova ese Aigupito taudia, Farao, bona ena ruma bese taudia ibounai latanai,+ toa bona hoa karadia ia karaia noho, unai be kara badadia bona dika bada herea idia havaraia.+ 23 Bona Dirava ese Aigupito amo ai ia hakaua raka-lasi, emai sene taudia dekenai ia gwauhamatalaia tano dekenai ai ia hakaua vareai totona.+ 24 Bena Iehova ese ai ia oda henia unai taravatu ibounai ai badinaia bona Iehova emai Dirava ai gari henia totona,+ unai amo do ai mauri daudau bona noho namo,+ hari dina hegeregerena. 25 Ai ia oda henia hegeregerena, bema ai ese unai oda herevadia ibounai ai badinaia namonamo bona Iehova emai Dirava ai kamonai henia, ai do ia gwauraia kara maoromaoro taudia.’+