Deuteronomi

31 Bena Mose ia lao bona Israela taudia ibounai dekenai inai hereva ia gwauraia, 2 ia gwau: “Hari dina egu mauri lagani be 120.+ Lau be hegeregere lasi umui lau gunalaia* totona, badina Iehova be lau ia hamaoroa, ‘Oi be Ioridane do oi hanaia lao lasi.’+ 3 Iehova emui Dirava be umui vairanai ia hanaia lao noho, bona ia sibona ese umui vairanai idia noho besedia do ia hadikaia, bona umui ese do umui luludia lao.+ Iosua ese umui do ia gunalaia,+ Iehova ena hereva hegeregerena. 4 Iehova ese idia do ia hadikaia, guna Amoro taudia edia king, Sihona+ bona Oga,+ bona edia tano dekenai ia karaia hegeregerena.+ 5 Iehova ese umui totona idia do ia halusia, bona umui dekenai lau henia oda hereva ibounai hegeregerena idia do umui kara henia.+ 6 Do umui boga-auka bona goada.+ Bona idia vairanai umui gari lasi,+ badina Iehova emui Dirava be umui ida ia raka noho. Ia ese umui do ia rakatania lasi.”+

7 Bena Mose ese Iosua ia boiria bona Israela taudia ibounai vairanai ia dekenai ia gwau: “Do oi boga-auka bona goada,+ badina inai taunimanima be Iehova ese edia sene taudia dekenai ia gwauhamatalaia tano lalonai do oi hakaua vareai, bona unai tano be idia dekenai do oi henia, edia ahuna bamona.+ 8 Iehova be emu vairanai ia raka noho bona ia be oi ida.+ Ia ese oi do ia rakatania lasi. Namo lasi oi gari.”+

9 Bena Mose ese inai Taravatu ia torea+ bona hahelaga taudia, Iehova ena Taravatu Maua idia huaia Levi taudia, bona Israela ena tau badadia ibounai dekenai ia henia. 10 Mose ese idia ia oda henia, ia gwau: “Lagani 7 ta ta edia dokona ai, abitorehai gwauatao lagani ena nega korikori dekenai,+ Au Raurau Rumadia Ena Aria* lalonai,+ 11 Israela taudia ibounai be Iehova emui Dirava ese ia abia hidi gabuna ai, iena vairanai idia hedinarai neganai,+ namona be inai Taravatu oi duahia, Israela taudia ibounai idia kamonai totona.+ 12 Taunimanima do oi haboua,+ tatau, hahine, natudia,* bona emui siti lalodiai idia noho idau taudia, unai amo Iehova emui Dirava do idia kamonai henia, ia do idia dibaia bona gari henia, bona inai Taravatu ena hereva ibounai do idia badinaia namonamo. 13 Bena edia natudia, inai Taravatu idia diba lasi natudia unai, ese Iehova emui Dirava do idia kamonai henia+ bona gari henia, Ioridane do umui hanaia bona noholaia tano ai umui noho dinadia ibounai lalonai.”+

14 Bena Iehova be Mose dekenai ia gwau: “Itaia, nega ia kahirakahira vadaeni oi mase totona.+ Iosua oi boiria, bona hebou dubu dekenai umui lao,* unai amo ia be gunalaia tauna ai do lau halaoa.”+ Vadaeni Mose bona Iosua be hebou dubu dekenai idia lao. 15 Bena Iehova be ori amo palai ruma dekenai ia hedinarai, bona unai ori be palai ruma ena vareai gabuna ai ia gini.+

16 Vadaeni Iehova be Mose dekenai ia gwau: “Itaia, oi be kahirakahira do oi mase,* bona inai taunimanima be idia lao henia tano ena idau diravadia ida matabodaga karadia idia karaia matamaia.*+ Idia ese lau do idia rakatania+ bona idia ida lau karaia gwaubou do idia makohia.+ 17 Unai neganai egu badu mai siahuna be idia latanai do ia diho,+ bona lau ese idia do lau rakatania+ bona egu vairana be idia amo do lau hunia+ ela bona idia dika momokani. Bena dika badadia bona hisihisi idia davaria murinai,+ do idia gwau, ‘Iseda Dirava be ita huanai ia noho lasi dainai inai dika badadia ita davaria noho, ani?’+ 18 To unai dina ai lau ese egu vairana do lau hunia, badina idia ese dirava ma haida badinaia totona kara dika momo idia karaia.+

19 “Vadaeni inai ane be umui sibona totona oi torea+ bona Israela taudia dekenai oi hadibaia.+ Idia ese do idia dibaia,* bona inai ane amo Israela taudia be egu hadibaia herevadia idia laloatao diba.+ 20 Edia sene taudia dekenai lau gwauhamatalaia tano, milika bona hani amo ia honu tano unai, lalonai idia lau hakaua vareai+ bona idia aniani bona bogakunu bona edia noho ia namo neganai,+ idia be dirava ma haida do idia badinaia bona hesiai henia bona lau do idia matauraia lasi bona egu taravatu do idia utua.+ 21 Dika badadia bona hisihisi idia davaria neganai,+ inai ane amo egu hadibaia hereva do idia laloatao, (namo lasi edia uru gabedia ese idia laloaboio), badina idia dekenai lau gwauhamatalaia tano lalonai idia lau do hakaua vareai lasi neganai, idia abia matamaia lalohadai lau diba vadaeni.”+

22 Vadaeni Mose ese unai dina ai inai ane ia torea bona Israela taudia dekenai ia hadibaia.

23 Bena Dirava ese Nunu ena natuna Iosua be gunalaia tauna ai ia halaoa+ bona ia gwau: “Do oi boga-auka bona goada,+ badina oi ese Israela taudia be lau gwauhamatalaia tano lalonai do oi hakaua vareai,+ bona lau be oi ida do lau noho.”

24 Mose ese inai Taravatu ena hereva ibounai be buka ta lalonai ia torea haorea.+ 25 Bena Mose ese Iehova ena Taravatu Maua idia huaia Levi taudia ia oda henia, ia gwau: 26 “Inai Taravatu buka umui abia+ bona Iehova emui Dirava ena Taravatu Maua ena badinai umui atoa,+ bona ia be Dirava ena hereva hamomokania tauna bamona, emui kerere do ia gwauraia hedinarai. 27 Badina lau diba inai taunimanima be gwau-edeede+ bona kwara auka taudia.+ Bema idia ida lau do noho lalonai Iehova idia gwau-edeede henia, vadaeni lau mase murinai edia kara do idia hanamoa, a? 28 Emui iduhu edia tau badadia bona ofesa taudia ibounai be lau dekenai do idia mai, bona edia vairanai inai hereva lau gwauraia be namo, bona guba bona tanobada ai idia noho taudia ibounai be unai hereva hamomokania taudia.+ 29 Badina lau diba momokani lau mase murinai umui be momokani kara dika do umui karaia+ bona umui dekenai lau hadibaia dalana do umui rakatania. Bona vaira nega ai dika do umui davaria,+ badina umui ese Iehova ena vairanai kara dika do umui karaia bona emui imana gaukaradia amo ena lalona do umui hahisia.”

30 Bena Israela taudia ibounai edia vairanai Mose ese inai ane ena hereva ia duahia, matamana amo ela bona dokona:+