IOBU
1 Usu tanona ai tau ta ia noho, ena ladana be Iobu.*+ Ia be kara maoromaoro bona abidadama tauna.+ Ia be Dirava ia gari henia bona kara dika ia dadaraia.+ 2 Iena natudia memero be 7 bona natudia kekeni be toi. 3 Iena animal be momo herea, mamoe ibounai be 7,000, kamelo ibounai be 3,000, boromakau ibounai be 1,000, doniki ibounai be 500, bona ena hesiai taudia be momo herea, unai dainai Ist tanodia ai idia noho taudia ibounai amo ia be ladana bada tauna.
4 Ena natudia memero ta ta be idia abia hidi dinana ai edia ruma ai aria idia karaia. Idia ese edia taihudia toi idia boiria bona idia ida idia aniani bona inuinu hebou. 5 Aria dinadia idia ore murinai, Iobu ese ena natudia dekenai hereva ia siaia idia goeva totona. Bena ia be daba momokani ai ia toreisi bona idia ta ta totona Dirava dekenai gabua bouboudia ia henia.+ Badina ia gwau: “Reana egu natudia be idia kara dika bona edia kudouna ai Dirava idia hanamoa lasi.” Iobu be hanaihanai unai bamona ia karaia.+
6 Dina ta ai aneru*+ be Iehova ena vairanai idia gini totona idia vareai neganai,+ Satani+ danu be idia huanai ia vareai.+
7 Bena Iehova be Satani dekenai ia gwau: “Oi be edeseni amo oi mai?” Satani ese Iehova ia haere henia: “Lau be tanobada ibounai dekenai lau loaloa noho, lau sekea totona.”+ 8 Bona Iehova be Satani dekenai ia gwau: “Oi be egu hesiai tauna Iobu oi itaia vadaeni, a? Tanobada ai tau ta be ia bamona lasi. Ia be kara maoromaoro bona abidadama tauna,+ Dirava ia gari henia bona kara dika ia dadaraia noho.” 9 Vadaeni Satani ese Iehova ia haere henia: “Bema Iobu be oi amo gau ta ia abia lasi, oi do ia gari henia, a?+ 10 Oi ese ia oi gimaia,+ ena ruma bona ena kohu ibounai oi naria, ani? Oi ese ena gaukara oi hanamoa,+ bona ena animal be tanobada ai idia momo herea. 11 To, bema ia biagua gaudia ibounai be ia amo oi kokia, vadaeni ia ese oi do ia gwauraia dika.” 12 Bena Iehova be Satani dekenai ia gwau: “Kamonai! Ia biagua gaudia ibounai be emu siahu henunai idia noho. To ia sibona be do oi hadikaia lasi.” Vadaeni Satani be Iehova ena vairana amo ia raka siri.+
13 Vadaeni ena natudia memero bona natudia kekeni be edia kakana ena ruma ai idia aniani bona wain idia inua noho dinana ai,+ 14 hesiai tauna ta be Iobu dekenai ia mai bona ia gwau: “Boromakau be tano idia makohia bona doniki be rei idia ania noho lalonai, 15 Sabea taudia ese ai idia tuari henia bona unai animal idia abidia lao, bona tuari kaia amo hesiai taudia idia hamasedia. Lau sibona lau heau mauri bona lau mai oi lau hadibaia totona.”
16 Unai hesiai tauna ia do hereva noho lalonai, hesiai tauna ma ta ia mai bona ia gwau: “Dirava amo ia mai lahi* be guba amo ia diho, mamoe bona hesiai taudia ibounai ia gabua ore! Lau sibona lau heau mauri bona lau mai oi lau hadibaia totona.”
17 Unai hesiai tauna ia do hereva noho lalonai, hesiai tauna ma ta ia mai bona ia gwau: “Kaledea taudia+ be orea toi ai idia haboua, bona ai idia tuari henia bona kamelo ibounai idia abia, bona hesiai taudia be tuari kaia amo idia hamasedia. Lau sibona lau heau mauri bona lau mai oi lau hadibaia totona.”
18 Unai hesiai tauna ia do hereva noho lalonai, ma ta ia mai bona ia gwau: “Emu natudia memero bona natudia kekeni be emu vara guna natuna mero ena ruma ai idia aniani bona wain idia inua noho. 19 Karaharaga lai badana be taunimanima lasi gabuna amo ia mai, bona ruma ia hamarerea badabada, vadaeni unai ruma be emu natudia edia latanai ia moru bona idia mase. Lau sibona lau heau mauri bona lau mai oi lau hadibaia totona.”
20 Vadaeni Iobu ia toreisi bona ena dabua ia darea bona ena huina ia utua. Bena ia tui diho bona tano dekenai kwarana ia atoa diho 21 bona ia gwau:
“Lau be egu sinana ena bogana amo lau vara neganai, gau ta lau mailaia lasi,
Bona imana kavakava do lau mase.+
Iehova ese ia henia,+ bona Iehova ese ia abia lou.
Iehova ena ladana ita hanamoa noho be namo.”
22 Ena be Iobu dekenai unai ibounai idia vara, to ia kara dika lasi bona Dirava ia gwauraia dika lasi.
2 Dina ma ta ai, aneru*+ be Iehova ena vairanai idia gini totona idia vareai neganai,+ Satani danu ia vareai Iehova ena vairanai ia gini totona.+
2 Bena Iehova be Satani dekenai ia gwau: “Oi be edeseni amo oi mai?” Satani ese Iehova ia haere henia: “Lau be tanobada ibounai dekenai lau loaloa noho, lau sekea totona.”+ 3 Bona Iehova be Satani dekenai ia gwau: “Oi be egu hesiai tauna Iobu oi itaia vadaeni, a? Tanobada ai tau ta be ia bamona lasi. Ia be kara maoromaoro bona abidadama tauna,+ Dirava ia gari henia bona kara dika ia dadaraia noho.+ Ena be lau oi doria ia lau hadikaia kava totona,+ to ia be iena abidadama ia dogoatao noho.” 4 To Satani be Iehova dekenai ia haere, ia gwau: “Kopina ena davana be kopina. Tau ta be ena gau ibounai do ia henia ena mauri* ia dogoatao totona. 5 To, hari bema oi sibona ese gorere dikana amo ena tauanina oi hahisia, vadaeni ia ese oi do ia gwauraia dika.”+
6 Bena Iehova be Satani dekenai ia gwau: “Kamonai! Ia be emu siahu henunai ia noho! To ena mauri* do oi kokia lasi!” 7 Vadaeni Satani be Iehova ena vairana amo ia raka siri bona Iobu ena tauanina dekenai iohururu dikadia ia havaraia,+ ena aena amo ia lao ena kwarana. 8 Bona Iobu be ia makohi uro ena kahana ta ia abia bona ena tauanina ia kakasia, bona lahi kahu gabuna dekenai ia helai noho.+
9 Vadaeni Iobu ena adavana be ia dekenai ia gwau: “Oi be Dirava oi do badinaia noho, a? Dirava oi gwauraia dika bona oi mase!” 10 To Iobu be ena adavana ia hamaoroa: “Oi be kavakava hahine ta bamona oi hereva noho. Bema Dirava momokanina amo gau namodia ita abia dae, vadaeni idia vara gau dikadia danu ita abia dae, ani?”+ Ena be Iobu dekenai unai ibounai idia vara, to ia be hereva kererena ta ia gwauraia lasi.+
11 Iobu ena turadia toi, Temana tauna Elipasa,+ Suhi tauna+ Biledada,+ bona Namata tauna Sopara,+ be Iobu dekenai idia vara hisihisi idauidau idia kamonai. Vadaeni idia be edia noho gabudia idia rakatania, badina idia lalotamona do idia haboua bona Iobu dekenai do idia lao, hebogahisi idia hahedinaraia bona ia idia hagoadaia totona. 12 Daudau amo Iobu idia itaia neganai, ena toana be ia idau. Idia taitai badabada matamaia bona edia dabua idia darea, bona kahu idia negea daekau bona edia kwarana latanai ia moru.+ 13 Bena dina 7 bona hanuaboi 7 lalonai ia ida tano ai idia helai. Bona ia dekenai hereva ta idia gwauraia lasi, badina idia itaia Iobu ena hisihisi be bada herea.+
3 Unai murinai Iobu ia hereva matamaia bona ena vara dinana ia gwauraia dika.+ 2 Iobu ia gwau:
3 “Egu vara dinana lau gwauraia dika,+
Bema hanuaboi ai ta ia gwau, ‘Natuna mero ta ia vara,’ unai hanuaboi danu lau gwauraia dika.
4 Unai dina ia dibura be namo.
Dirava ese unai dina ia laloa lasi be namo.
Unai dina ai diari ta ia noho lasi be namo.
5 Dibura masemase ese unai dina ia koua be namo.
Medu ena ori koremana ese unai dina ia koua be namo.
Dina tubu ai dibura ese unai dina ia koua momokani be namo.
6 Unai hanuaboi ia dibura be namo.+
Unai dina ai ta ia moale lasi be namo,
Bona hua ta ta edia dina ida do idia duahia lasi be namo.
7 Momokani! Unai hanuaboi ai ta ia vara lasi be namo.
Unai hanuaboi ai moale regena ta be lasi.
8 Dina idia gwauraia dika taudia ese unai hanuaboi idia gwauraia dika be namo,
Huala* idia hanogaia diba taudia ese idia gwauraia dika danu.+
9 Namona be unai hanuaboi ai hisiu idia dibura.
Unai hanuaboi be dina ena diari totona ia naria, to do ia mai lasi,
Bona daba ena diari ia naria, to ia mai lasi.
10 Unai dina ai egu sinana ese lau ia havaraia,+
Bona lau ese hekwakwanai lau davaria noho.
11 Dahaka dainai lau vara negana ai lau mase lasi?
Dahaka dainai egu sinana ena bogana lalonai lau noho neganai, lau mase lasi?+
12 Dahaka dainai egu sinana ena mamuna ai lau hekure
Bona ena ratana amo lau ia ubua?
13 Unai nega ai bema lau mase, hari lau be maino ai lau hekure.+
Bona lau mahuta noho bona laga-ani+
14 Tanobada ena king taudia bona edia sisiba henia taudia ida,
Idia ese edia noho gabudia idia haginia, to hari idia dika vadaeni,*
15 Eiava mai edia golo lohia taudia ida,
Edia ruma be siliva amo ia honu.
16 Eiava lau do vara lasi lalonai lau mase be namo,
Diari ia itaia lasi natuna ta bamona.
17 Mase guria gabudia ai, kara dika taudia edia lalohekwarahi ia ore danu.
Unuseniai manoka taudia idia laga-ani noho.+
18 Unai gabu ai dibura ruma taudia ibounai be idia laga-ani.
Gaukara totona idia ia doria tauna ena gadona idia kamonai lasi.
19 Unuseniai ladana maragi taudia bona ladana bada taudia be hegeregere,+
Bona igui hesiai tauna be ena biaguna amo idia ruhaia.
20 Dahaka dainai Dirava ese hisihisi ia davaria tauna dekenai mauri ia henia*
Bona lalohisihisi bada taudia dekenai mauri ia henia danu?+
21 Dahaka dainai idia ura idia mase, to unai ia vara lasi?+
Idia ese mase idia tahua noho, unai kara ese dava bada kohu tahua karana ia hereaia,
22 Idia moale bada taudia,
Idia moale badina mase guria gabuna idia davaria, ani?
23 Dahaka dainai Dirava ese ia boio tauna dekenai diari ia henia,
Bema Dirava ese ena dala ia koua?+
25 Lau gari dikadika gauna be lau dekenai ia vara,
Oibe, lau garilaia gauna be lau dekenai ia vara noho.
26 Lau dekenai maino be lasi, regerege lasi negana be lasi, bona lau laga-ani lasi,
To hekwakwanai be lau dekenai idia vara noho.”
4 Bena Temana tauna Elipasa+ ia haere, ia gwau:
2 “Bema tau ta ia ura oi ia hereva henia, do oi badu, a?
Badina lau be do lau hereva noho.
3 Oi ese taunimanima momo edia kara oi hamaoromaoroa vadaeni,
Bona oi ese manoka taudia oi hagoadaia vadaeni.
4 Emu hereva ese manoka taudia ia hagoadaia noho,
Bona oi ese tuina manoka taudia oi hagoadaia noho.
5 To hari, hisihisi ibounai be oi dekenai idia vara noho, bona oi haheauka diba lasi.
Unai hisihisi oi davaria, bona oi lalomanoka.
6 Oi be Dirava oi matauraia dainai oi goada diba, ani?
Dirava oi badinaia dainai,+ ia oi abidadama henia diba, ani?
7 Mani inai oi laloa: Kerere lasi tauna be do ia boio kava, a?
Nega ta kara maoromaoro tauna idia hadikaia, a?
8 Lau itaia dika idia geia* taudia
Bona dika idia hadoa taudia be anina dikana sibona do idia gogoa.
9 Dirava ia hahodi neganai, idia boio,
Bona ena badu siahuna ese ia hamasedia ore.
10 Laiona ia boiboi badabada, bona laiona natuna ia boiboi,
To laiona goadadia* edia isena ia makohi diba.
11 Laiona be vamu ia ania lasi neganai, ia mase,
Bona ena natudia be gabu idauidau idia heau lao.
12 Hehuni dalanai hereva ta be lau dekenai idia abia mai,
Bona egu taiana dekenai unai hereva be gado maragina ai idia gwauraia.
13 Hanuaboi ai, taunimanima idia mahuta boio neganai,
Lau itaia matahanai ese lalohadai dikadia ia havaraia,
14 Lau gari dikadika bona lau heudeheude,
Bona egu turia ibounai idia manoka.
15 Gau* ta be egu vairana amo ia hanaia.
Gari dainai egu kopina huina idia gini.
16 Unai gauna ia gini maoromaoro,
To ena toana lau itaia namonamo lasi.
Gau ta be egu matana ia koua.
Regerege ta be lasi, bena gado ta lau kamonai:
17 ‘Tau ta be Dirava hegeregerena do ia kara maoromaoro diba, a?
Tau ta be ena Havaraia Tauna hegeregerena do ia goeva momokani, a?’
18 Kamonai! Dirava be ena hesiai taudia ia abidadama henia lasi,
Bona iena aneru* edia kerere ia tahua noho.
19 Raro rumadia lalonai idia noho taudia edia kerere be bada,
Edia ruma be miri latanai idia haginia,+
Bona manumanu* bamona idia dika haraga!
20 Daba amo ela bona adorahi, idia be dika momokani.
Idia ore momokani, bona ta ese idia ia itaia lasi.
21 Idia be idia moru, palai ruma be ena varo idia kokia dainai ia moru bamona,
Idia mase neganai, idia be aonega lasi.
5 “Mani oi boiboi, ta ese oi do ia haere henia, a?
Edena aneru* amo heduru do oi tahua?
2 Badina kavakava tauna be badu karana ese do ia hamasea,
Bona aonega lasi tauna be mama karana ese do ia hamasea.
3 Lau itaia kavakava tauna be ia noho namonamo,
To daudau lasi iena noho gabuna ia dika.
4 Iena natudia memero totona heau mauri gabuna be lasi,
Bona siti ena geiti ai dika idia davaria+ bona ta ese idia ia durua lasi.
5 Kavakava tauna ese ia gogoa aniani be hitolo tauna ese ia ania,
Ena be ava ginigini huanai aniani ia gogoa,
Bona ia bona ena natudia memero ese idia biagua gaudia be ma haida ese idia abia.
6 Gau dikadia be tano amo idia tubu lasi,
Bona hekwakwanai be tano amo ia tubu lasi.
7 Lahi ia araia noho hegeregerena,
Tau ta ena mauri be hekwakwanai amo ia honu.
8 To, lau be Dirava dekenai do lau noinoi,
Bona ia dekenai egu samania hereva do lau gwauraia,
9 Ia ese ita diba lasi kara badadia ia karaia,
Bona ita duahia diba lasi gau namo hereadia ia karaia.
10 Ia ese tano dekenai medu ia hadihoa,
Bona uda gabudia dekenai ranu ia siaia lao.
11 Ia ese ladana maragi tauna ia abia isi,
Bona lalohisihisi tauna ia hamauria.
12 Ia ese koikoi taudia edia palani ia hadikaia,
Vadaeni edia gaukara ena anina ia guguru lasi.
13 Ia ese aonega taudia ia koua lasi edia koikoi daladia ese idia ia tarapua totona,+
Unai amo edia palani do ia dika.
14 Dina dekenai idia be dibura ese ia hagegea,
Dina tubua ai idia raka kerere, hanuaboi ai idia raka bamona.
15 Ia ese edia malana be tuari kaia bamona idia gaukaralaia taudia amo taunimanima ia hamauria,
Goada tauna ena imana amo ogogami tauna ia hamauria,
16 Vadaeni ladana maragi tauna dekenai helaro ia noho,
To kara maoromaoro lasi tauna be ena uduna ia koua.
17 Kamonai, Dirava ese ia matahakani henia tauna be ia moale.
Unai dainai Siahu Ibounai Diravana ese ia henia sisiba oi dadaraia lasi!
18 Badina Dirava sibona ese ta ia hahisia, to ena bero ia kumia.
Ia ese bero ia havaraia, to ia sibona ese ia hanamoa.
19 Ia ese dika idauidau 6 amo oi do ia hamauria,
Dika namba 7 ese oi do ia hadikaia lasi.
20 Hitolo bada negana ai, mase amo oi do ia hamauria,
Bona tuari lalonai tuari kaia ena siahu amo oi do ia hamauria.
21 Hereva dikadia idia gwauraia taudia amo oi do ia gimaia,+
Bona dika ia mai neganai, do oi gari lasi.
22 Oi ese dika eiava hitolo dainai do oi laloa momo lasi,
Bona tanobada ena uda animal dekenai do oi gari lasi.
23 Tano ena nadi ese oi do idia hadikaia lasi,*
Bona animal dikadia be oi ida maino ai do idia noho.
24 Oi be emu palai ruma lalonai mai maino ida do oi noho,
Bona emu rei gabudia dekenai oi lao neganai, do oi itaia animal oreana amo ta do ia boio lasi.
25 Natudia momo do oi havaraia,
Bona emu bese be do ia bada herea, tanobada ena ava hegeregerena.
26 Oi do goada noho neganai guria gabuna dekenai do oi lao,
Witi be ena gogoa negana ai idia haboua bamona.
27 Kamonai! Ai gwauraia herevadia ai tahua bona idia be momokani.
Inai hereva oi kamonai bona oi abia dae.”
6 Bena Iobu ia gwau:
2 “Madi o, bema egu lalohisihisi+ ena metau
Bona lau davaria dika ena metau be sikele gauna latanai idia atoa,
3 Hari unai ena metau ese kone ena miri ena metau ia hereaia.
Unai dainai lau laloa namonamo lasi bona lau hereva kava.+
4 Badina Siahu Ibounai Diravana ena peva ese lau ia pidia,
Bona unai peva edia poisini lau inua noho.+
Dirava ese lau ia hadikaia noho, bona lau gari dikadika.
5 Bema uda doniki+ be rei ia noho ia ania totona, do ia boiboi, a?
Eiava bema boromakau be mai ena aniani ia ania totona, do ia boiboi, a?
6 Bema aniani ai damena be lasi, aniani ena mamina do ia namo, a?
Eiava gatoi ena kurokuro gauna ena mamina be namo, a?
7 Lau ura lasi unai bamona gaudia lau dogoatao.
Idia be egu aniani idia hadikaia gaudia bamona.
8 Mani Dirava ese egu noinoi ia haerelaia
Bona egu ura gauna ia henia!
9 Lau ura Dirava ese lau ia hamasea,
Bona ena imana amo egu mauri ia kokia!+
10 Unai ia vara neganai, lau dekenai unai be namo,
Ena be lau hisihisi, to do lau moale bada,
Badina lau ese Helaga Tauna ena hereva lau dadaraia lasi.+
11 Egu goada be hegeregere lasi do lau naria noho totona, ani?+
Bona bema lau mauri noho, dahaka namo do lau davaria?
12 Egu goada be nadi hegeregerena, a?
Eiava egu hidio be kopa amo idia karaia, a?
13 Ta ese lau ia durua lasi dainai,
Sibona lau durua totona dala ta ia noho, a?
14 Bema ta be ena tadikaka dekenai lalokau* ia hahedinaraia lasi,+
Ia ese Siahu Ibounai Diravana do ia rakatania.+
15 Egu turadia* be koikoi taudia,+ keru negana ai ia aru haraga sinavai ta bamona,
Idia be keru negana ai sinavai ena ranu ia kaukau haraga bamona.
16 Sinavai ena ranu be aisi dainai ia korema,
Bona sinou be ia lalonai ia veve noho.
17 To siahu negana ai unai sinavai edia ranu ia ore.
Gabu ia siahu neganai, sinavai idia kaukau.
18 Unai sinavai edia ranu be dala idauna ai idia aru lao.
Unai ranu be tano kaukau gabuna dekenai idia aru lao bona idia boio.
19 Tema amo idia mai loaloa taudia+ be ranu idia tahua.
Bona Sabea amo idia mai tatau+ danu be unai ranu idia tahua.
20 Idia hemarai badina idia laloa ranu do idia davaria.
Unuseni idia ginidae neganai ranu idia davaria lasi bona idia lalohisihisi.
21 Momokani, lau dekenai umui be unai sinavai bamona.+
Lau davaria gau dikadia umui itaia bona umui gari.+
22 Lau be umui lau noia gau ta umui henia totona, a?
Eiava lau noinoi emui kohu amo harihari gauna ta umui henia totona, a?
23 Lau be umui lau noia egu inai tauna ena imana amo lau umui hamauria totona, a?
Eiava dagedage taudia amo lau umui hamauria totona, a?
24 Lau umui hamaoroa dahaka do lau karaia, bona do lau kamonai.+
Lau umui durua egu kerere lau lalopararalaia totona.
25 Hereva momokani ese ta ia hahisia lasi!+
To emui sisiba hereva ese namo ia havaraia lasi.+
26 Umui ura lau gwauraia herevadia dainai lau umui gwauraia dika, a?
Umui gwau lau diba lasi dahaka lau karaia+ bona lau gwauraia herevadia be lai ese ia odaia lao.
27 Bona umui ese tama sina idia mase natuna be gadara ta* amo umui hoihoilaia+
Bona emui turana korikori umui hoihoilaia!+
28 Vadaeni lau umui itaia bona umui kamonai,
Badina lau be do lau koikoi lasi.
29 Mani egu hereva umui laloa namonamo, lau umui gwauraia kerere lasi,
Oibe, umui laloa namonamo, badina lau be kerere ta lau karaia lasi.
30 Egu uduna amo lau gwauraia herevadia be maoro lasi, a?
Umui laloa ia vara hekwakwanai lau diba lasi, a?
7 “Tanobada ai, taunimanima edia mauri be hekwarahi amo ia honu, ani?
Bona edia mauri dinadia be davana abia totona ia gaukara tauna ena bamona, ani?+
2 Ia be igui hesiai tauna bamona gabu keruma ia ura henia noho,
Bona davana abia totona ia gaukara tauna bamona, ena davana ia naria noho.+
3 Unai dainai hua momo lalonai egu mauri be anina lasi,
Bona hanuaboi momo lau lalohisihisi.+
4 Lau hekure neganai lau henanadai, ‘Edena negai do lau toreisi?’+
To hanuaboi ia daudau bona lau giroagiroa ela bona daba ia rere.
5 Lauegu tauanina be gaigai maragidia bona miro ese ia koua.+
Egu tauanina ai toto edia kopina be momo bona hura amo ia honu.+
6 Lauegu dina idia ore haraga, turituri tauna ese nila ia gaukaralaia haragaharaga bamona,+
Bona unai dina idia ore, bona helaro be lasi.+
7 Dirava e, oi laloatao, lauegu mauri be lai bamona,+
Bona lauegu matana be gau namona ta do ia itaia lou lasi.
8 Lau ia itaia tauna ena matana be lau do ia itaia lou lasi.
Emu matana be lau do ia tahua, to do lau noho lasi.+
9 Ori be ia ore lao bona ia boio bamona,
Mase Gurina* dekenai ia diho lao tauna be do ia daekau lou lasi.+
10 Ia be ena ruma dekenai do ia giroa lou lasi,
Bona ena gabu taudia be ia do idia laloaboio.+
11 Unai dainai, egu uduna do lau koua lasi.
Lauegu lalona ia hisihisi dainai do lau hereva.
Bona egu hemami ia dika momokani dainai do lau maumau!+
12 Lau be davara eiava davara ena dagedage gauna badana ta, a?
Unai dainai lau ia gimaia tauna ta oi atoa, a?
13 Bema lau gwau, ‘Egu hekure gabuna ese lau dekenai laga-ani namona do ia henia,
Bona egu bedi ese egu hisihisi do ia hamaragia,’
14 Bena nihi amo lau oi hagaria bada,
Bona matahanai amo lau oi hagaria,
15 Vadaeni lau mase be namo badina egu hahodi ia doko.
Oibe, lau mase be namo, to egu tauanina be inai bamona ia noho be namo lasi.+
16 Egu mauri lau ura henia lasi momokani.+ Lau ura lasi lau mauri noho.
Lau umui rakatania, badina egu mauri be kwalahu* bamona.+
17 Dahaka dainai taunimanima dekenai oi laloa momo,
Bona idia oi laloa bada?+
18 Dahaka dainai daba ibounai idia oi sekea,
Bona nega ibounai idia oi tohoa?+
19 Ia namo lau oi itaia noho lasi,
Bona nega sisina sibona lau oi rakatania?+
20 Bema lau kara dika, edena dala ai oi, taunimanima oi itaia Diravana, lau hahisia?
Dahaka dainai lau oi makaia oi hahisia totona?+
Lau be oi dekenai gau metauna ta bamona, a?
21 Dahaka dainai egu kara dika oi gwauatao lasi
Bona egu kerere oi kokia lasi?
Lau be kahirakahira kahu lalonai do lau hekure,+
Bona lau do oi tahua, to do lau noho lasi.”
8 Bena Suhi tauna,+ Biledada,+ ia haere:
2 “Inai bamona do oi hereva noho ela bona edena negai?+
Emu uduna amo oi gwauraia herevadia be lai goadana bamona!
3 Dirava ese hahemaoro goeva do ia hagagevaia, a?
Eiava Siahu Ibounai Diravana ese kara maoromaoro do ia hagagevaia, a?
4 Bema emu natudia be Dirava dekenai idia kara dika,
Ia ese edia gwau-edeede karana dainai idia ia panisia.
5 To bema Dirava oi tahua,+
Bona Siahu Ibounai Diravana ena lalonamo abia totona oi noinoi,
6 Bona bema oi be kara goeva bona kara maoromaoro tauna,+
Ia ese oi do ia kamonai henia,
Bona emu gabu maorona dekenai oi do ia atoa lou.
7 Bona ena be matamanai oi abia namo be sisina sibona,
To emu vaira nega ai namo bada do oi abia.+
8 Mani emu kara uru gunadia oi nanadaia,
Bona edia sene taudia ese idia davaria gaudia oi kamonaia.+
9 Ita be varani sibona ita vara, bona gau ta ita diba lasi,
Badina tanobada ai iseda mauri be kwadogi sibona.
10 Idia ese oi do idia hadibaia
Bona idia diba gaudia be oi do idia hamaoroa, ani?
11 Ranu lalonai ia tubu rei be gabu kaukauna ai do ia tubu, a?
Siriho be ranu lasi gabunai do ia tubu, a?
12 Ena be flaoaflaoa ia hedinarai, bona idia do utua lasi,
To ia be tubutubu gaudia ma haida amo do ia kakoro guna.
13 Dirava idia laloaboio taudia ibounai dekenai unai do ia vara,
Badina Dirava idia diba lasi taudia edia helaro be do ia boio,
14 Idia abia dae gauna be anina lasi,
Bona idia abidadama henia gauna be ia goada lasi, spaida ena ruma bamona.
15 Idia be edia ruma dekenai do idia tabekau, to unai ruma be do ia moru.
Do idia dogoatao toho, to unai ruma be do ia gini lasi.
16 Ia be dina ai ranu ia abia noho tubutubu gauna bamona,
Bona ena raurau matamatadia be uma gabu ena kahana ibounai ia lao.+
17 Iena ramudia be haboua nadidia idia koua hagegea.
Ia be unai nadi huanai ruma ia tahua.*
18 To iena gabu amo idia kokia neganai,
Unai gabu ese ia do ia dadaraia, bona do ia gwau, ‘Guna oi lau itaia lasi.’+
19 Oibe, ia be unai dala ai do ia boio.+
Bena ena gabu ai tubutubu gaudia ma haida do idia tubu.
20 Momokani, Dirava ese ia idia abidadama henia taudia do ia dadaraia lasi,
Bona kara dika taudia do ia durua lasi,
21 To Dirava ese oi do ia hamoalea lou,
Bona oi be mai moale ida do oi boiboi.
22 Oi idia inai henia taudia be do idia hemarai,
Bona kara dika taudia edia palai ruma be do ia noho lasi.”
9 Iobu ia haere:
2 “Momokani, emu hereva be maoro.
To edena dala ai tau ta be Dirava vairanai ia maoromaoro diba?+
3 Bema tau ta ia ura Dirava ia kota henia,+
Unai tauna ese Dirava ena henanadai tausen do ia haerelaia diba lasi.
4 Ia be mai ena aonega bona ena siahu be bada herea.+
Daika be ia do ia tuari henia bona dika do ia davaria lasi?+
5 Ia ese ororo ia kokidia neganai, tau ta ia diba lasi.
Ia badu neganai, unai ororo ia hagirodia.
6 Ia ese tanobada ia hamarerea,
Vadaeni ena badina aukadia idia heudeheude.+
7 Ia ese dina ia oda henia ia diari lasi totona
Bona ia ese hisiu edia diari ia koua.+
8 Ia ese guba be dabua ta bamona ia kehoa badabada,+
Bona davara ena hurehure badadia edia ataiai ia raka.+
9 Ia ese hisiu oreadia, Asa, Kesili, bona Kima ia karaia,+
Bona saut kahana ena hisiu oreadia ia karaia.
10 Ia ese kara badadia, ita lalopararalaia diba lasi gaudia unai, ia karaia,+
Bona gau namo herea momo, duahia diba lasi gaudia, ia karaia.+
11 Ia be lau kahirakahira ia raka hanaia, to ia lau itaia diba lasi.
Ia be lau ia hanaia, to unai lau diba lasi.
12 Ia ese gau ta ia abia neganai, daika ese ia koua diba?
Daika be ia dekenai do ia gwau, ‘Oi be dahaka oi karaia noho?’+
13 Ena be Rahaba* ena durua taudia+ be Dirava dekenai idia tui diho,
To unai ese Dirava ena badu do ia koua lasi.+
14 Edena dala ai ia do lau haere henia,
Edena dala ai egu hereva lau abia hidi namonamo ia do lau haere henia totona?
15 Ena be egu hereva be maoro, to ia do lau haere henia lasi.+
Lau karaia gauna tamona be egu hahemaoro tauna lau noia lau ia hebogahisi henia totona.
16 Bema ia dekenai lau boiboi, lau do ia haere henia, a?
Lau diba ia be egu gadona do ia kamonai lasi,
17 Badina ia ese lai gubana amo lau ia hadikaia
Bona lau dekenai bero momo ia henia kava.+
18 Ia ese egu hahodi dalana ia koua.
Ia ese lau davaria hisihisi latanai hisihisi ma haida ia atoa noho.
19 Bema Dirava ida egu siahu lau hahegeregerea, Dirava ena siahu be bada herea.+
Bema lau ura ia be kota dekenai lau abia lao, Dirava do ia gwau: ‘Daika ese lau do ia kota henia?’
20 Bema lau be maoro, egu uduna ese lau ia gwauraia kerere.
Ena be lau be kerere lasi, to ia ese lau do ia gwauraia kerere.
21 Ena be Dirava lau badinaia,* to lau diba lau be hegeregere lasi.
Egu mauri lau ura henia lasi.
22 Idia ibounai be hegeregere. Unai dainai lau gwau,
‘Ia ese kerere lasi taudia bona kara dika taudia ia hadikaia.’
23 Bema ia aru haraga abata ese tau ta ia hamasea,
Dirava be kerere lasi tauna ia davaria hisihisi dainai do ia kiri.
24 Ia ese tanobada be dika taudia dekenai ia henia.+
Ia ese tanobada ai diadi taudia edia matana ia koua.
Bema ia ese ia karaia lasi, vadaeni daika ese unai ia karaia?
25 Egu mauri dinadia be heau tauna ta bamona.+
Bona lau ese namo ta lau davaria lasi.
26 Egu mauri dinadia be siriho amo idia karaia vanagi ia heau haraga bamona,
Bona ugava manu be ena aniani abia totona ia roho diho haraga bamona.
27 Bema lau gwau, ‘Egu hisihisi dainai lau gwauraia herevadia do lau laloaboio,
Lau ese egu kara do lau haidaua bona do lau moale,’
28 Lau davaria hisihisi ibounai dainai lau gari noho,+
Bona lau diba oi ese lau do oi gwauraia kerere.
29 Lau be do oi gwauraia kerere.
Vadaeni dahaka dainai egu maoro hamomokania totona lau hekwarahi kava?+
30 Bema ia veve sinou ena ranu dekenai lau digu,
Bona sopu dekenai egu imana lau huria,+
31 Bena oi ese guri mirona lalonai lau oi atoa,
Unai neganai egu dabua ese lau do idia ura henia lasi.
32 Bema Dirava be taunimanima, ia lau haere henia diba,
Bona ai ruaosi be kota dekenai ai lao diba.+
33 Tau ta ia noho lasi emai hereva ia hamaoromaoroa totona,
Daika be emai diadi tauna ai ia lao diba?
34 Bema ia ese lau ia botaia noho lasi
Bona lau idia hagaria gaudia ia koua,+
35 Vadaeni mai gari lasi ida ia do lau hereva henia,
Badina lau ura unai bamona ia do lau hereva henia.
10 “Egu mauri lau ura henia lasi.+
Egu maumau herevadia do lau gwauraia noho.
Mai lalohisihisi bada ida egu hereva do lau gwauraia!
2 Dirava dekenai do lau gwau: ‘Lau oi gwauraia kerere lasi.
Lau ida oi hepapahuahu ena badina be lau dekenai oi gwauraia.
3 Lau oi kara auka henia ese oi dekenai namo ia havaraia, a?
Oi karaia gaudia oi dadaraia be namo, a?+
Bona oi ese kara dika taudia edia sisiba oi ura henia, a?
4 Emu matana be taunimanima edia matana bamona, a?
Eiava oi be taunimanima idia itaia bamona oi itaia, a?
5 Emu mauri dinadia be taunimanima edia mauri dinadia bamona, a?
Eiava emu mauri lagani be taunimanima edia mauri lagani bamona, a?+
6 Oi ese egu kerere do oi tahua
Bona egu dika do oi tahua noho, a?+
8 Oi ese emu imana amo lau oi karaia,+
To hari lau oi hadikaia momokani.
10 Oi ese egu sinana ena bogana ai lau oi atoa
Bona unuseniai egu tauanina ibounai oi karaia, a?*
11 Egu tauanina ena kopina bona hidio oi karaia,
Bona turia bona masolo oi karaia.+
12 Oi ese lau dekenai mauri oi henia bona lalokau* oi hahedinaraia.
Oi ese egu mauri oi gimaia namo herea.+
13 To hehuni dalanai oi ura lau dekenai gau dikadia oi havaraia.
Lau diba inai gau dikadia be oi ese oi havaraia.
14 Bema kara dika lau karaia, oi ese unai do oi itaia,+
Bona unai kara dika do oi gwauatao lasi.
15 Bema lau kara dika, lau be dika momokani!
Bona bema lau be kerere lau karaia lasi, egu kwarana do lau abia isi lasi,+
Badina ta be lau ia matauraia lasi bona hisihisi lau davaria noho.+
16 Bema egu kwarana lau abia isi, lau oi lulua, laiona be ena aniani ia tahua bamona,+
Bona emu siahu oi gaukaralaia lau oi tuari henia totona.
17 Samania taudia ma haida oi mailaia, lau oi hamorua totona
Bona lau dekenai emu badu oi habadaia,
Lau dekenai dika momo herea idia vara noho danu.
18 Vadaeni dahaka dainai sinana ena bogana amo lau oi abia raka-lasi?+
Ta ese lau ia do itaia lasi neganai, lau mase be namo.
19 Unai be hegeregere lau mauri lasi.
Unai be hegeregere sinana ena bogana amo maoromaoro mase gurina dekenai lau lao.’
20 Egu mauri dinadia be kwadogi sibona, ani?+ Dirava ese lau ia rakatania be namo.
Bona lau amo iena matana ia kokia, unai amo lau moale diba.+
21 Do lau lao gabuna amo do lau giroa mai lasi,+
Unai tano be dibura masemase gabuna,+
22 Unai tano be hanuaboi ena dibura bamona,
Unai tano ai dibura bona daradara ia noho,
Unuseniai diari be ia dibura bamona.”
11 Namata tauna Sopara+ ia haere, ia gwau:
2 “Ta ese unai hereva ibounai do ia haerelaia lasi, a?
Eiava ta ena hereva momo karana dainai, ia do idia gwauraia maoro, a?
3 Oi gwauraia anina lasi herevadia ese taunimanima edia uduna do ia koua, a?
Emu kavakava herevadia dainai oi do idia gwau henia lasi, a?+
5 To bema Dirava be ena uduna ia kehoa
Bona oi ia hereva henia,+
6 Vadaeni ia ese ia hunia aonega be oi dekenai ia hahedinaraia diba,
Badina aonega be mai ena kahana idauidau.
Bena do oi laloparara Dirava ese oiemu kerere haida ia gwauatao.
7 Oi ese Dirava ena aonega dobuna oi davaria diba, a?
Eiava Siahu Ibounai Diravana ena kara badadia edia hetoana oi davaria diba, a?
8 Iena aonega be ataiai herea, guba ena ataiai hegeregerena. Oi ese unai aonega do oi abia diba lasi, ani?
Unai aonega be dobu momokani, Mase Gurina* ena dobu hegeregerena. Unai aonega oi davaria diba lasi, ani?
9 Unai aonega be tanobada ena lata ia hanaia
Bona davara ena bada ia hanaia.
10 Bema Dirava ia raka hanaia bona ta ia dogoatao bona kota dekenai ia abia lao,
Daika ese ia do ia koua?
11 Badina taunimanima idia koikoi neganai, unai ia diba.
Kara dika ia itaia neganai, unai do ia laloa lasi, a?
12 To uda doniki be tau ta ia havaraia diba, a?
Unai dainai kavakava tauna ese gau ta do ia lalopararalaia diba lasi.
13 Bema emu kudouna oi hegaegaelaia
Bona Dirava dekenai emu imana oi abia isi,
14 Bema emu imana ese kerere ia karaia noho, gabu daudau dekenai oi atoa,
Bona bema emu palai ruma ai kara maoromaoro lasi taudia idia noho lasi,
15 Vadaeni emu kwarana do oi abia isi, do oi hemarai lasi.
Do oi gini goada, bona gari lasi.
16 Bena emu hekwakwanai do oi laloaboio.
Oibe, unai hekwakwanai do oi laloaboio, sinavai ena ranu ia aru lao bamona.
17 Emu mauri dinadia be do idia diari, dina tubua ena diari bamona.
Emu mauri ena dibura negadia be daba ena diari bamona do ia diari.
18 Do oi lalogoada badina helaro ia noho,
Bona gabu ibounai do oi itaia bona mai maino ida do oi hekure.
19 Oi hekure neganai, ta ese oi do ia hagaria lasi,
Bona taunimanima momo be emu lalonamo do idia tahua.
20 To kara dika taudia edia matana be do ia dika.
Bona idia totona mauri abia gabuna ta be lasi,
Bona idia be mase sibona do idia naria.”+
12 Bena Iobu ia haere:
2 “Momokani umui be aonega bada taudia,
Bona umui mase neganai, aonega taudia do idia ore.
3 To lau danu be mai egu diba.
Umui ese lau umui hereaia lasi.
Daika be umui herevalaia gaudia ia diba lasi?
Kara maoromaoro bona kerere lasi tauna be haida ese idia kirikirilaia.
5 Ta ena mauri ia namo neganai, ia laloa ia be dika do ia davaria lasi,
Ia laloa edia aena idia dedi taudia sibona be dika idia davaria.
6 Henaohenao taudia be maino dekenai idia noho,+
Bona Dirava idia habadua taudia be idia noho namonamo,+
Idia be edia imana ai edia kaivakuku diravadia idia dogoatao.
7 To mani animal haida oi nanadaia, bona oi do idia hadibaia.
Manu danu oi nanadaia, bona oi do idia hamaoroa.
8 Eiava tanobada ai idia noho gaudia oi itaia,* bona oi do idia hadibaia.
Bona davara ena gwarume ese oi dekenai hereva momokani do idia gwauraia.
9 Lau gwauraia gaudia ibounai idia diba
Iehova ese idia ibounai ia karaia, ani?
10 Iena imana ai mauri gaudia ibounai idia noho
11 Malana ese aniani ia mamia hegeregerena,
Taiana ese hereva ena mamina ia tohoa.+
12 Burukadia dekenai aonega ia noho, ani?+
Bona idia mauri daudau taudia be mai edia laloparara, ani?
13 Dirava ena aonega bona goada be bada.+
Ia ese sisiba namona ia henia bona ia be mai ena laloparara.+
14 Ia ese gau ta ia makohia diho neganai, ta ese do ia haginia lou lasi.+
Ia ese gau ta ia koua neganai, ta ese ia kehoa diba lasi.
15 Ia ese medu ia koua neganai, gau ibounai idia kaukau.+
Ia ese medu ia siaia neganai, tanobada ia abata.+
16 Dirava ena goada bona aonega be bada.+
Dala kererena ia badinaia tauna bona unai tauna ia hakaua kerere tauna be iena siahu henunai idia noho.
17 Dirava ese sisiba henia taudia ia hahemaraia,*
Bona hahemaoro taudia be kavakava taudia ai ia halaoa.+
18 Ia ese king taudia edia siahu ia kokia,+
Bona idia be hesiai taudia ai ia halaoa.
20 Ia ese sisiba henia taudia namodia edia uduna ia koua
Bona tau badadia amo aonega ia kokia.
21 Dirava ese ladana bada taudia dekenai hemarai ia havaraia,+
Bona ia ese siahu taudia edia siahu ia kokia.
22 Ia ese dobu gaudia be dibura amo ia hahedinaraia,+
Bona ia ese dibura momokani gabuna be diari ai ia halaoa.
23 Ia ese bese idauidau edia goada ia habadaia, idia ia hadikaia ore totona.
Ia ese bese idauidau ia habadaia, unai amo tano ma ta dekenai ia abidia lao.
24 Ia ese taunimanima edia gunalaia taudia edia laloa namonamo karana ia kokia
Bona ia siaidia lao taunimanima lasi gabudia ai idia loa kava totona.+
25 Dibura be bada bona diari be lasi dainai idia hekwarahi kava noho,+
Ia siaidia lao bona kekero tatau bamona idia loaloa.+
13 “Momokani, egu matana amo inai gaudia ibounai lau itaia,
Egu taiana amo unai lau kamonai bona lau laloparara.
2 Umui diba gauna be lau danu lau diba.
Umui ese lau umui hereaia lasi.
3 Lau sibona ese Siahu Ibounai Diravana do lau hereva henia.
Lau ura egu kara maoromaoro be Dirava vairanai lau gwauraia hedinarai.+
4 To umui ese koikoi herevadia amo lau umui hadikaia.
Umui ibounai be anina lasi doketa taudia.+
5 Bema hereva ta umui gwauraia lasi,
Unai ese do ia hahedinaraia umui be mai emui aonega.+
6 Mani emui kara, egu hereva umui kamonai,
Bona egu uduna amo lau gwauraia noinoi herevadia umui kamonai.
7 Umui ura Dirava ena ladana dekenai maoro lasi herevana ta umui gwauraia, a?
Bona ia dainai koikoi herevana ta do umui gwauraia, a?
8 Umui be iena kahana ai do umui gini, a?
Eiava kara maoromaoro badinaia karana dekenai umui ura Dirava momokanina umui durua, a?
9 Bema ia ese emui kara ia tahua namonamo, namo do umui davaria, a?+
Umui ese ia be taunimanima ta bamona do umui koia, a?
10 Momokani Dirava ese umui do ia gwau henia
Bema koikoi dalanai iena kahanai umui gini.+
11 Iena siahu bada ese umui do ia hagaria, ani?
Bona ia dainai umui gari, ani?
12 Emui aonega herevadia be lahi ena kahu bamona.
Emui koua herevadia be goada lasi, idia be uro manokana amo idia karaia kesi bamona.
13 Egu vairanai hereva ta umui gwauraia lasi, unai amo do lau hereva.
Bena lau dekenai do ia vara gauna be do ia vara!
14 Lau be dika do lau davaria diba, ani?
Bona egu mauri lau haboioa diba, ani?
15 Ena be Dirava ese lau ia hamasea diba, to ia dekenai do lau naria noho.+
Iena vairanai egu kara maoromaoro do lau gwauraia hedinarai.
16 Vadaeni Dirava be egu hamauria tauna ai do ia lao,+
Badina kara dika tauna* be iena vairanai ia gini diba lasi.+
17 Egu hereva umui kamonai namonamo.
Namona be umui kamonai.
18 Lau be egu kota herevana lau hegaegaelaia vadaeni.
Lau diba lau be maoro.
19 Daika be lau ida do ia hepapahuahu?
Bema hereva ta lau gwauraia lasi, do lau mase!
20 Dirava e, lau ura oi amo gau rua lau noia,
Bena emu vairana amo do lau hunia lasi.
21 Emu imana metauna be lau amo oi kokia momokani,
Bona emu hagaria karadia amo lau oi hagaria lasi.+
22 Oi hereva guna bona emu hereva do lau haerelaia,
Eiava do lau hereva, bona lau do oi haere henia.
23 Lau be dahaka kerere bona kara dikadia lau karaia?
Egu kerere bona kara dika be lau dekenai oi hahedinaraia.
24 Dahaka dainai lau amo emu vairana oi hunia?+
Bona dahaka dainai lau be emu inai tauna bamona oi laloa?+
25 Lau be lai ese ia odaia lao raurau ta sibona,
Lau be witi ena anina ia kakoro gauna sibona,
Dahaka dainai emu hagaria gaudia amo lau oi hagaria bona lau oi lulua?
26 Oi ese lau dekenai idia gwauraia samania herevadia be buka lalonai oi torea,
Bona egu matamata negana ai lau karaia kara dikadia dainai lau oi hahisia noho.
27 Oi ese au metaudia huanai egu aena oi atoa,
Oi ese egu raka daladia ibounai oi itaia namonamo,
Bona egu aena gabudia ta ta oi makaia.
2 Ia be flaoaflaoa bamona ia hedinarai bena ia boio.*+
Ia be dina ena laulau bamona ia heau haraga bona ia boio.+
4 Goeva tauna be goeva lasi tauna amo ia vara diba, a?+
Lasi!
5 Ta ena mauri dinadia be momo lasi,
Vadaeni hua hida do ia mauri be oi ese oi gwauraia.
Ena mauri dinadia edia daudau be oi ese oi atoa.+
6 Ia oi itaia noho lasi, unai amo do ia laga-ani,
Ela bona dina ena dokonai do ia moale, davana abia totona ia gaukara tauna be dina dokonai ia moale bamona.+
7 Au be mai ena mauri dalana.
Bema idia utua, do ia tubu lou,
Bona ena rigi matamatadia do idia vara lou.
8 Bema tano lalonai ena ramuna idia dika
Bona au ena badina ia mase,
9 Ranu sisina ia noho neganai, do ia tubu lou.
Bona rigi momo do ia havaraia, idia hadoa tubutubu gauna matamatana bamona.
10 To tau ta ia mase neganai, gau ta ia karaia diba lasi.
Tau ta ia mase neganai, ia be edeseni ia lao?+
11 Davara ena ranu ia boio,
Bona sinavai ena ranu ia kaukau.
12 Danu taunimanima idia hekure bona idia toreisi lasi.+
Do idia noga lasi, ela bona guba ia boio,
Oibe, edia mahuta amo do idia noga lasi.+
13 Mase Gurina* dekenai lau do oi hunia,+
Lau do oi hunia ela bona emu badu ia ore,
Bena oi ese lau totona nega korikori do oi gwauraia bona lau do oi laloatao!+
14 Bema tau ta ia mase, do ia mauri lou, a?+
Igui hesiai gaukara lau karaia dinadia ibounai lalonai do lau naria noho
Ela bona lau do ia ruhaia negana ia ginidae.+
15 Oi be do oi boiboi, bona do lau haere.+
Do oi ura dikadika oi karaia gauna oi itaia lou totona.
16 To hari, oi be lau karaia gaudia ibounai oi itaia namonamo noho.
Oi be egu kara dika sibona oi tahua.
17 Egu kara kerere be puse lalonai oi koua auka
Bona oi ese egu kerere be glu amo oi koua auka.
18 Ororo ia moru bona ia makohi maragimaragi
Bona nadi badana be ena gabu amo ia kokia,
19 Ranu ese nadi ia hamaragidia noho
Bona ranu ena aru goadana ese tano ia huria oho hegeregerena,
Oi ese taunimanima edia helaro oi hadikaia vadaeni.
20 Oi ese tau ta oi biagua auka noho ela bona ia boio.+
Iena toana ia dika ia lao, bona mase gurina dekenai oi siaia lao.
21 Iena natudia be ladana namona idia abia eiava lasi,
Ia be unai ia diba lasi.+
22 Ia do mauri lalonai hisihisi ia davaria noho.
Ia mauri lalonai ia taitai noho.”
15 Temana tauna Elipasa+ ia haere, ia gwau:
2 “Aonega tauna be anina lasi herevadia do ia gwauraia noho, a?
Eiava ena lalona be hahisia herevadia amo do ia hahonua, a?
3 Bema ena hereva amo ta ia sisiba henia, unai be anina lasi,
Badina ena hereva ese namo ta ia havaraia lasi.
4 Emu kara dainai, Dirava gari henia karana ia ore,
Bona emu kara dainai, Dirava laloa bada karana ia boio.
5 Emu kerere dainai unai bamona oi hereva noho,
Bona koikoi hereva mai mamina namodia oi gwauraia.
6 Emu uduna herevadia ese oi ia hadikaia, to lau lasi.
Emu hereva ese oi ia hahemaoro henia.+
7 Oi be ta ia do vara lasi neganai oi vara, a?
Eiava ororo idia do noho lasi neganai oi vara, a?
8 Oi ese Dirava ena hunia herevadia oi kamonai henia, a?
Eiava oi laloa oi sibona be mai emu aonega, a?
9 Oi be gau haida oi diba, to ai be ai diba lasi, a?+
Oi be gau haida oi lalopararalaia, to ai be ai laloparara lasi, a?
10 Huina kurokuro buruka taudia be ita huanai idia noho,+
Edia mauri lagani ese emu tamana ena mauri lagani idia hanaia.
11 Dirava ese oi ia hagoadaia neganai, unai be hegeregere lasi, a?
Eiava oi ia hereva henia namonamo neganai, oi ura lasi, a?
12 Dahaka dainai emu hemami ese oi ia biagua?
Bona dahaka dainai oi badu neganai, emu matana ia bada?
13 Oi be Dirava dekenai oi badu,
Bona unai bamona herevadia oi gwauraia.
14 Taunimanima be edena bamona idia goeva diba?
Eiava hahine ena bogana amo ia vara tauna be edena bamona ia kara maoromaoro diba?+
15 Kamonai! Dirava be ena helaga taudia ia abidadama henia lasi,
Bona ena matana ai guba be goeva lasi.+
16 Vadaeni kara bodaga bona kara gageva taudia be edena bamona do idia goeva?+
Idia be kara dika idia ura henia bada, ranu mase tauna ese ranu ia ura henia bamona!
17 Oi do lau hadibaia. Lau oi kamonai henia!
Lau itaia gaudia be oi do lau hamaoroa,
18 Aonega taudia ese edia tamadia amo idia dibaia gaudia be idia herevalaia,+
Idia ese unai gaudia idia hunia lasi.
19 Tano be edia tamadia dekenai idia henia,
Bona idia huanai idau tauna ta ia hanaia lasi.
20 Kara dika tauna ena mauri dinadia ibounai lalonai hisihisi ia ania,
Bona ena mauri laganidia ibounai lalonai hekwakwanai sibona ia davaria.
21 Iena taiana dekenai hagaria gaudia edia regena ia kamonai.+
Maino negana ai, henaoa taudia ese ia idia hadikaia.
22 Ia diba ia be dibura gabuna amo do ia heau mauri lasi.+
Ia be tuari kaia amo do idia hamasea.
23 Ia be aniani ia tahua noho bona ia gwau, ‘aniani be edeseniai?’
Ia diba momokani dibura negana be ia kahirakahira.
24 Lalometau bona hisihisi ese ia idia hagaria noho,
Ia idia biagua noho, king ta be tuari karaia totona ia hegaegae bamona.
25 Badina ia be ena imana ia abia isi Dirava ia tuari henia totona,
Bona ia ura Siahu Ibounai Diravana ia halusia.
26 Ia ese Dirava ia dagedage henia bada,
Mai ena kesi badana bona goadana ida.
27 Ena vairana be ia bada,
Bona ena bogana be ia bada.*
28 Ia be do idia dika siti lalodiai ia noho,
Ta ese do ia noholaia lasi rumadia dekenai ia noho,
Unai gabu be nadi idia haboua gabudia ai do idia lao.
29 Ia be taga tauna ai do ia lao lasi, bona ena kohu be do idia momo lasi,
Bona ia biagua gaudia be tano ibounai dekenai do idia abia lao lasi.
30 Ia be dibura gabuna amo do ia heau mauri lasi.
Ia be au ta bamona, ena rigi be lahi ese ia araia ore,
Bona Dirava ena uduna ena siahu amo do ia boio.+
31 Namo lasi ia raka siri bona anina lasi gaudia ia abidadama henia,
Badina unai kara ese ia dekenai gau namona ta do ia havaraia lasi.
32 Ia dekenai unai do ia vara haraga,
Bona ia be au ta bamona, ena rigi do idia tubu lasi.+
33 Ia be vain auna bamona, ena huahua be kasiri bona idia moru,
Bona olive au bamona, ena flaoaflaoa be lai ese ia odaia lao.
34 Dirava idia inai henia taudia edia hebou be gau namona ta ia havaraia lasi,+
Bona henaoa taudia edia palai ruma be lahi ese do ia araia ore.
35 Idia be gau dikadia idia laloa bona hanaihanai ma haida dekenai dika idia karaia,
Bona edia kudouna ai koikoi gaudia sibona idia laloa.”
16 Iobu ia haere:
2 “Guna lau ese inai bamona herevadia lau kamonai.
Umui ese emui hereva amo lau umui hahisia noho!+
3 Anina lasi herevadia be do idia ore, a?
Dahaka dainai inai bamona oi haere?
4 Lau be umui bamona lau hereva diba.
Bema lau dekenai ia vara gauna be umui dekenai ia vara,
Umui dekenai hahisia hereva lau gwauraia diba
Bona umui dekenai egu kwarana lau hamarerea diba.+
5 Lau be unai bamona do lau karaia lasi, to egu hereva amo umui do lau hagoadaia,
Bona egu heduru herevadia amo goada do umui abia.+
6 Bema lau hereva, egu hisihisi do ia ore lasi,+
Bona bema lau hereva lasi, egu hisihisi be edena bamona do lau kokia?
8 Danu ia ese lau ia dogoatao, bona haida be unai idia itaia,
Unai dainai egu tauanina ia maragi momokani ese ia hahedinaraia lau be kerere tauna.
9 Dirava ena badu ese lau ia darea maragimaragi, bona lau ia inai henia noho.+
Lau dekenai ena isena ia koria auka masemase.
Lau ia inai henia tauna be lau ia raraia auka.+
10 Idia ese edia uduna idia kehoa badabada lau idia hadonoa totona,+
Bona mai hemataurai lasi ida egu vairana idia pataia.
Idia haboua noho lau idia dagedage henia totona.+
11 Dirava ese lau be memero edia imana dekenai ia atoa,
Bona kara dika taudia edia huanai lau ia doria lao.+
12 Lau noho namo, to ia ese egu mauri ia hadikaia.+
Egu aiona ena murina ia dogoatao bona lau ia hamakohia.
Ia ese ena diba amo lau ia pidia noho.
13 Dirava ena peva gaukaralaia taudia ese lau idia hagegea.+
Ia ese egu kidni ia gwadaia+ bona ia hebogahisi lasi.
Ia ese egu golbleda* be tano dekenai ia bubua.
14 Lau be haba ta bamona ia hamakohia loulou.
Ia be tuari tauna ta bamona lau dekenai ia heau mai haraga.
16 Lau tai momo dainai egu vairana ia kakakaka,+
Bona egu matana ena kopina idia korema momokani,
17 Lau be dagedage karadia lau karaia lasi
Bona egu guriguri be mai momokani ida lau gwauraia.
18 Tano e, egu rara oi koua lasi!+
Bona egu taitai karana oi hadokoa lasi!
19 Hari, egu hereva ia hamomokania tauna be guba ai ia noho.
Lau totona do ia hereva tauna be ataiai ia noho.
21 Namona be ta ese Dirava bona tau ta huanai abia hidi maorona ia karaia
Ta ese tatau rua huanai abia hidi ia karaia hegeregerena.+
22 Badina vaira laganidia be momo lasi,
Bona do lau lao bona do lau giroa mai lasi.+
17 “Egu mauri ia dika, egu dina idia ore idia lao.
Mase gurina be lau ia naria noho.+
2 Lau idia hevasehalaia taudia ese lau idia hagegea,+
Bona egu matana ese edia gwau-edeede karadia ia itaia noho.
3 Mani lau dekenai oi gwauhamata oi ese lau do oi durua.
Daika ese lau do ia durua?+
4 Oi ese edia lalona oi koua bona idia laloparara lasi.+
Unai dainai idia dekenai kwalimu do oi henia lasi.
5 Tau ta be ena turadia dekenai ia biagua gaudia ia henia,
To ena natudia be idia hitolo noho.
6 Dirava ese taunimanima huanai lau be kirikirilaia gauna ai ia halaoa vadaeni,+
Unai dainai egu vairana idia kanudia.+
7 Egu lalohisihisi dainai, lau itaia namonamo lasi,+
Bona egu tauanina ibounai be ia maragimaragi.
8 Kara maoromaoro taudia be unai idia itaia neganai, idia hoa,
Bona kerere lasi tauna be Dirava idia diba lasi taudia edia kara dainai ia lalometau.
9 Kara maoromaoro tauna be kara maoromaoro do ia badinaia noho,+
Bona kerere lasi tauna be ia goada ia lao noho.+
10 To umui mai bona emui hepapahuahu herevadia umui gwauraia lou,
Badina lau itaia umui huanai aonega tauna ta ia noho lasi.+
11 Lau be do lau mauri daudau lasi.+
Egu palani, egu kudouna ena ura idauidau unai, be idia ore vadaeni.+
12 Idia ese hanuaboi be diari ai idia halaoa noho,
Idia gwau noho, ‘Diari be kahirakahira, to lau be dibura sibona lau itaia.’
13 Do lau naria sisina, bona Mase Gurina* be egu noho gabuna ai do lau halaoa.+
Egu mahuta patana be dibura lalonai do lau atoa.+
14 Lau ese guri do lau boiboi henia,+ do lau gwau, ‘Oi be egu tamana!’
Bona gaigai maragina dekenai do lau gwau, ‘Oi be egu sinana bona egu taihuna!’
15 Vadaeni egu helaro be edeseniai?+
Ta ese lau totona helaro ia itaia, a?
16 Egu helaro be Mase Gurina* ena geiti dekenai do ia diho lao,
Ai be kahu dekenai do ai lao hebou.”+
18 Suhi tauna Biledada+ ia haere, ia gwau:
2 “Do umui* hereva noho ela bona edena negai do umui doko?
Umui herevalaia gaudia umui laloa namonamo, unai amo ai hereva diba.
3 Dahaka dainai umui laloa ai be animal bamona?+
Bona dahaka dainai ai be kavakava* taudia bamona umui laloa?
4 Oi badu dainai emu mauri oi hadikaia noho,
Oi dainai taunimanima ese tanobada do idia rakatania, a?
Eiava nadi be ena gabu amo do ia siri, a?
5 Oibe, kara dika taudia edia diari be do idia habodoa,
Bona do ia diari lou lasi.+
6 Edia palai ruma ai ia noho diari be do ia dibura,
Bona edia ataiai ia noho lamepa do ia bodo.
7 Idia raka noho ela bona edia goada ia ore,
Bona sibodia idia karaia palani ese idia do ia hadikaia.+
8 Badina edia aena be reke ese do ia abia,
Bona reke lalonai do idia vareai.
9 Tarapu ese edia aena geduna do ia dogoatao.
Tarapu ese animal ia dogoatao bamona, idia do ia dogoatao.+
10 Unai taudia totona tano ai varo ta idia hunia,
Bona idia raka gabuna ai tarapu ta idia atoa.
11 Gabu ibounai amo gari havaraia gaudia ese unai taudia idia hagaria noho+
Bona idia luludia lao noho.
12 Edia goada idia ore idia lao,
Bona dika bada+ dainai do idia raka namonamo lasi.
13 Gorere ese edia kopina ia hadikaia.
Taunimanima ia hamasea diba gorere ese edia imana bona aena ia hadikaia noho.
14 Idia ese idia abidadama henia gaudia be edia palai ruma amo do idia kokia+
Bona gari ia havaraia king* dekenai idia raka lao.
15 Kara dika taudia edia ruma ai idau taudia do idia noho.
16 Idia be au bamona, edia ramuna do ia mase,
Bona edia rigi be do idia kakoro.
17 Tanobada ai taunimanima ese idia do idia laloatao lasi,
Bona edia hanua ai edia ladana do idia laloatao lou lasi.
18 Taunimanima ese diari amo idia do idia veria lao dibura gabunai
Bona tano namona amo idia be do idia lulua lao.
19 Edia taunimanima huanai idia be natudia bona tubudia lasi,
Bona idia noho gabuna* ai roho mauri tauna ta do ia noho lasi.
20 Edia dina ia ginidae neganai, west kahana ai idia noho taudia be do idia hoa dikadika,
Bona ist kahana ai idia noho taudia be gari dainai do idia heudeheude.
21 Kerere karaia taudia edia palai ruma dekenai unai ia vara
Bona Dirava idia diba lasi taudia edia gabu dekenai unai ia vara danu.”
19 Iobu ia haere, ia gwau:
2 “Lau umui hahisia noho ela bona edena negai?+
Dahaka dainai emui hereva amo lau umui hahisia noho?+
3 Umui be nega 10 lau umui gwau henia vadaeni.*
Lau umui kara auka henia neganai, umui hemarai lasi, a?+
4 Bona bema kerere ta lau karaia,
Egu kerere davana be lau sibona ese do lau abia.
5 Bema umui laloa umui be maoro bona lau be kerere,
Bona umui gwau lau kerere dainai dika lau davaria,
6 Vadaeni, namona be umui diba Dirava ese lau ia hakaua kerere,
Bona ena reke amo lau ia tarapua.
7 Kamonai, lau be egu hisihisi dainai lau taitai noho, to haere ta lau abia lasi.+
Lau be kota maoromaoro totona lau taitai, to heduru be lasi.+
8 Dirava ese egu dala be nadi magu amo ia koua, bona lau hanaia diba lasi.
Ia ese egu raka dalana be dibura amo ia koua.+
9 Ia ese lau biagua gaudia ibounai be lau amo ia abia oho
Bona lau abia ladana namona ia kokia.*
10 Ia ese egu mauri ia hadikaia ela bona lau boio.
Ia ese egu helaro ia kokia, au ta be tano amo idia kokia bamona.
11 Ia ese lau ia badu henia momokani,
Bona lau be iena inai tauna bamona ia laloa.+
12 Iena tuari taudia be lau idia tuari henia totona idia haboua,
Bona idia be egu palai ruma kahirakahira idia kamepa.
13 Ia ese egu tadikaka korikoridia be lau amo ia abia lao daudau,
Bona lau idia diba taudia be lau idia rakatania vadaeni.+
14 Egu turana korikoridia* be lau idia rakatania,
Bona lau diba namonamo taudia be lau idia laloaboio vadaeni.+
15 Egu ruma ai idia noho vadivadi taudia+ bona egu hesiai kekenidia ese lau be idau tauna ta bamona idia kara henia.
Edia vairanai lau be idau bese tauna ta bamona.
16 Lau be egu hesiai tauna totona lau boiboi, to ia haere lasi.
Ia dekenai lau noinoi, lau do ia hebogahisi henia totona.
17 Egu adavana be egu hahodi ena bonana ia ura henia lasi,+
Bona egu tadikaka korikoridia dekenai lau be bonana dika gauna ta bamona.
18 Natudia maragidia ese lau idia kirikirilaia danu.
Lau toreisi neganai, lau idia hevasehalaia matamaia.
19 Egu turana namodia ese lau idia inai henia,+
Bona lau lalokau henia taudia be lau idia ura henia lasi.+
20 Egu tauanina ia maragi momokani bona egu turia idia hedinarai,+
Bona kahirakahira lau mase.
21 Egu turadia e, lau umui hebogahisi henia,
Badina Dirava ese ena imana amo lau ia hahisia.+
22 Dahaka dainai lau umui dagedage henia noho, Dirava ese lau ia dagedage henia hegeregerena?+
Lau umui hahisia totona umui hesiku lasi, a?+
23 Bema lau gwauraia herevadia idia torea,
Oibe, bema buka ta ai idia torea be namo!
24 Eiava nadi ta latanai idia koroa do ia noho hanaihanai,
Bona auri amo idia karaia toretore gauna bona ledi idia gaukaralaia!
25 Lau diba momokani lau ia hoia lou tauna+ be ia noho.
Ia be gabeai do ia mai bona tanobada latanai do ia gini.
26 Egu tauanina ia dika vadaeni,
To lau do mauri noho lalonai, lau ese Dirava do lau itaia.
27 Lau sibona ese ia do lau itaia,
Oibe, egu matana korikori amo ia do lau itaia, ta ese do ia itaia lasi.+
To egu lalona ia goada lasi!
28 Badina umui gwau, ‘Edena dala ai ia ai hadikaia noho?’+
Unai amo umui hahedinaraia kerere be lau ese lau havaraia.
29 Tuari kaia dainai do umui gari,+
Badina tuari kaia ese kerere taudia ia panisia.
Namona be umui diba diadi tauna ta ia noho.”+
20 Namata tauna Sopara+ ia haere, ia gwau:
2 “Emu hereva ese egu lalona ia hahekwarahia dainai, lau ura oi lau haere henia,
Badina lau lalohisihisi danu.
3 Lau kamonai sisiba aukadia ese lau idia hadikaia.
Bona emu hereva lau lalopararalaia hegeregerena oi lau haere henia.
4 Momokani do lau herevalaia gauna be oi diba vadaeni,
Badina Dirava ese tanobada ai taunimanima ia havaraia negana amo, unai bamona ia vara noho,+
5 Kara dika taudia edia moale be nega sisina sibona do ia noho
Bona Dirava diba lasi taudia edia moale be do ia noho daudau lasi.+
6 Ena be edia ladana ia bada daekau ela bona guba,
Bona edia kwarana be ori dekenai ia kamokau,
7 To idia be momoru bamona do idia boio momokani,
Guna unai taudia idia itaia taudia do idia gwau: ‘Idia be edeseni?’
8 Idia be nihi bamona do idia boio, bona do idia davaria lasi,
Idia be do idia boio, hanuaboi ena matahanai ia boio haraga bamona.
9 Kara dika taudia ese idia do idia itaia lou lasi,
Bona edia noho gabuna ai idia noho taudia ese do idia itaia lou lasi.+
10 Edia natudia ese ogogami taudia edia lalonamo do idia tahua,
Bona ma haida amo idia abia kohu be do idia henia lou.+
11 Edia turia edia goada be tatau matamata edia bamona,
To edia goada be kahu ai do ia lao.
12 Bema edia uduna dekenai mamina dika gauna ena mamina be namo herea,
Bona unai be edia malana henunai idia hunia,
13 Bema metairametaira idia ania bona idia ura lasi idia negea
To edia uduna dekenai idia dogoatao noho,
14 Vadaeni unai aniani ena mamina do ia dika.
Idia dekenai unai aniani be kobra gaigai ena poisini bamona.
15 Idia ese taga do idia hadonoa, to do idia mumuta,
Dirava ese edia bogana amo do ia kokia.
16 Idia ese kobra gaigai edia poisini do idia inua.
Gaigai ese ena malana amo idia do ia hamasea.
17 Idia ese ia aru sinavai do idia itaia lasi,
Unai sinavai dekenai hani bona milika idia aru.
18 Idia abia gaudia be do idia gaukaralaia lasi, to do idia henia lou.
Idia hoihoilaia gaudia amo idia abia moni bona kohu do idia moalelaia lasi.+
19 Badina idia ese ogogami taudia idia hadikaia bona idia rakatanidia.
Idia ese idia haginia lasi ruma idia abia kava.
20 To idia be maino ai do idia noho lasi.
Edia kohu ese idia do ia hamauria lasi.
21 Gau ta do ia noho lasi idia abia totona.
Unai dainai edia kohu be do idia noho daudau lasi.
22 Edia kohu do idia momo herea neganai, idia be lalohekwarahi amo do idia honu.
Gau dikadia momo be idia dekenai do idia vara.
23 Kara dika taudia idia moale noho lalonai,
Dirava ena badu mai siahuna be edia latanai do ia diho,
Gau dikadia be edia latanai do idia diho, medu bamona.
24 Idia be auri amo idia karaia tuari kohudia amo idia heau neganai,
Kopa peva amo idia siaia diba ese idia do ia pidia.
25 Idia ese peva ena diba be edia doruna amo idia kokia,
Peva ena diba mai diaridiari be edia golbleda* amo idia kokia,
Bona hagaria gaudia dainai do idia gari dikadika.+
26 Edia kohu ibounai do idia haboioa.
Lahi mai siahuna ese idia do ia araia ore.
Edia palai ruma ai idia noho heau mauri taudia be dika do idia davaria.
27 Guba ese edia dika do ia hahedinaraia.
Tanobada be do ia toreisi idia ia tuari henia totona.
28 Abata ese edia ruma do ia kokia.
Dirava ena badu dinana ai sinavai ena aru be do ia goada.
29 Unai be kara dika taudia edia ahuna Dirava amo,
Dirava ese idia totona ia gwauraia davana unai.”
21 Iobu ia haere, ia gwau:
2 “Lau hereva neganai, umui kamonai namonamo.
Unai bamona umui karaia neganai, lau do umui hagoadaia.
3 Lau hereva neganai, umui hereva lasi.
Egu hereva ia ore murinai, lau umui hevasehalaia diba.+
4 Lau be tau ta dekenai lau maumau, a?
Bema tau ta dekenai lau maumau, do lau haheauka lasi, ani?
5 Mai hoa danu lau umui itaia noho,
Emui imana amo emui uduna umui koua.
6 Idia vara gaudia lau laloa neganai, lau gari
Bona egu tauanina ibounai ia heudeheude.
8 Edia natudia be hanaihanai idia ida idia noho,
Bona idia ese edia natudia edia bese taudia idia itaia.
9 Edia ruma be gau ta ese ia hadikaia lasi, bona idia gari lasi,+
Bona Dirava ese idia ia panisia lasi.
10 Kara dika taudia edia boromakau be mai edia natudia momo,
Badina edia boromakau idia mara neganai, natuna ta ia mase lasi bona momo idia vara.
11 Edia natudia memero be ruma amo idia heau raka-lasi, mamoe oreana bamona,
Bona edia natudia idia roho isi noho.
12 Idia be ane idia abia bona tambarin bona hap* idia gadaralaia
Bona fluti ena regena dekenai idia moale.+
13 Idia ese edia mauri dinadia idia moalelaia
14 To Dirava momokanina dekenai idia gwau, ‘Ai oi rakatania!
Ai ura lasi emu dala ai dibaia.+
15 Do ai hesiai henia Siahu Ibounai Diravana be daika?+
Bema ia ida ai herevahereva, dahaka namo do ia vara?’+
16 To lau diba idia be edia goada amo sibona totona namo idia havaraia diba lasi.+
Lau be edia laloa hegeregerena lau laloa lasi.+
17 Kara dika taudia edia lamepa be nega hida ia bodo vadaeni?+
Nega hida idia dekenai dika ia vara vadaeni?
Nega hida Dirava ese ena badu ai idia ia hadikaia ore?
18 Idia be rei kakoro bamona lai ese ia odaia lao
Bona witi momoru bamona lai dikana ese ia abia lao, a?
19 Dirava ese kara dika taudia edia davana be edia natudia dekenai do ia henia.
To Dirava ese edia dika davana ia henia be namo, unai amo mamina do idia abia.+
20 Edia matana amo dika idia itaia be namo,
Bona idia ese Siahu Ibounai Diravana ena badu idia mamia be namo.+
21 Bema edia mauri dinadia be kwadogi sibona,
Do idia mase murinai edia natudia dekenai idia vara gaudia do idia laloa, a?+
22 Bema Dirava ese ataiai idia noho taudia ia hahemaoro henidia,+
Vadaeni daika be Dirava ia hadibaia diba?+
23 Tau ta be ia ura henia gaudia ibounai ia abia murinai ia mase,+
Ia be maino ai ia noho bona lalohekwarahi gaudia be lasi neganai ia mase,+
24 Bona unai neganai iena mamuna be idia bada
Bona ena turia idia goada.
25 To tau ma ta be ia lalometau bona ia mase,
Bona gau namona ta ia moalelaia lasi.
27 Kamonai, lau diba momokani umui be dahaka umui laloa noho,
Bona lau umui gwauraia dika totona* umui karaia palani lau diba vadaeni.+
28 Badina umui gwau, ‘Ladana bada taudia edia ruma be edeseniai?
Bona kara dika taudia idia noho palai ruma be edeseniai?’+
29 Umui ese laolao taudia umui nanadaia, a?
Idia gwauraia gaudia umui lalohadailaia namonamo, a?
30 Idia gwau, kara dika taudia be dika bada dinana ai do idia mauri,
Bona hisihisi bada dinana ai do idia roho mauri.
31 Edia kara dikadia be daika ese do ia hamaoromaoroa?
Bona idia karaia karana dainai daika ese edia davana do ia henia?
32 Guria gabuna dekenai idia huaia lao neganai,
Ta ese edia guria gabuna do ia naria.
33 Kara dika taudia be tanobada ena koura edia ororo maragidia dekenai idia laga-ani namo herea,*+
Bona taunimanima ibounai be edia murinai idia raka,+
Edia vairanai idia raka taudia momo herea hegeregerena.
34 Vadaeni dahaka dainai lau dekenai anina lasi hagoadaia herevadia umui gwauraia?+
Umui gwauraia haeredia be momokani lasi!”
22 Temana tauna Elipasa+ ia gwau:
2 “Tau ta be Dirava totona gau ta ia karaia diba, a?
Tau ta be ena aonega amo Dirava ia durua diba, a?+
3 Oi kara maoromaoro dainai, unai ese Siahu Ibounai Diravana ia hamoalea, a?
Eiava ia oi badinaia noho dainai, ia ese unai ia laloa bada, a?+
4 Ia oi matauraia bada dainai, ia ese kota dekenai oi do ia abia lao
Bona oi do ia panisia, a?
5 Oi ia panisia badina oiemu kara dika be bada herea
Bona emu kerere be momo.+
6 Badina emu tadikakadia oi gwauhamata henia kava bona edia kohu oi abia,
Bona taunimanima edia dabua oi abia dainai, idia be dabua lasi.+
7 Oi ese hesiku tauna dekenai ranu oi henia lasi,
Bona hitolo tauna dekenai aniani oi henia lasi.+
8 Ladana bada tauna ese tano ia biagua,+
Bona ia sibona be unai tano dekenai ia noho.
9 To oi ese vabu taudia dekenai gau ta oi henia lasi bona oi siaidia lao,
Bona oi ese tamana lasi natudia* oi hahisia.
10 Unai dainai tarapu momo ese oi idia hagegea,+
Bona gari havaraia gaudia ese oi idia hagaria.
11 Gabu be ia dibura momokani dainai gau oi itaia namonamo lasi,
Bona abata ranu ese oi ia koua.
12 Dirava be guba ena ataiai momokani dekenai ia noho, ani?
Bona guba ena hisiu ibounai be ataiai idia noho.
13 To oi gwau: ‘Dirava be taunimanima ese idia karaia gaudia ia diba, a?
Ia be ori koremadia amo hahemaoro ia karaia diba, a?
14 Ia be ori ese ia koua,
Bona guba ena ataiai momokani gabuna ai ia raka loaloa dainai ia itaia namonamo lasi.’
15 Oi ese kara dika taudia edia raka dalana,
Dala gunana unai, oi badinaia, a?
16 Kara dika taudia be edia matamata negana ai idia mase,
Abata ese idia ia abia lao.+
17 Idia be Dirava momokanina dekenai idia gwau: ‘Ai oi rakatania!’
Bona ‘Siahu Ibounai Diravana be ai dekenai dahaka do ia karaia?’
18 To, ia ese edia ruma be gau namodia amo ia hahonua.
(Lau ese unai bamona lalohadai dikadia lau abia lasi.)
19 Kara maoromaoro tauna ese idia dekenai do ia vara dika ia itaia bona ia moale,
Bona kerere lasi tauna ese idia do ia kirikirilaia bona ia gwau:
20 ‘Ita idia inai henia taudia be dika idia davaria,
Bona idia karaia gaudia ibounai be do idia ore momokani, lahi ese ia araia ore bamona.’
21 Dirava oi tura henia, bona maino dekenai do oi noho.
Bena gau namodia do oi abia.
22 Ia gwauraia taravatu oi abia dae,
Bona ia gwauraia herevadia be emu kudouna ai oi atoa.+
23 Bema Siahu Ibounai Diravana dekenai oi giroa lou, oi haboioa gaudia do oi abia lou.+
Bema emu palai ruma amo kara maoromaoro lasi karadia oi kokia,
24 Bona bema emu golo be kahu lalonai oi negea lao
Bona Opiri ena golo+ be nadi koura gabuna ai oi negea lao,
25 Vadaeni Siahu Ibounai Diravana be emu golo ai do ia lao,
Bona ia be emu siliva namo hereana ai do ia lao.
26 Badina oi be Siahu Ibounai Diravana dainai do oi moale,
Bona mai lalogoada ida Dirava do oi itaia noho.
27 Ia do oi noinoi henia, bona oi do ia kamonai henia.
Bona oi karaia gwauhamata be do oi hagugurua.
28 Oi ura karaia gaudia dekenai do oi kwalimu,
Bona emu raka dalana be do ia diari.
29 Mai hekokoroku ida oi hereva neganai, oi do idia gwauraia dika,
To ia ese manau tauna do ia hamauria.
30 Ia ese kerere lasi tauna ia hamauria.
Vadaeni bema oi be kerere ta oi karaia lasi, oi do ia hamauria.”
23 Iobu ia haere, ia gwau:
2 “Hari danu do lau maumau noho badina emui hereva lau abia dae lasi.+
Lau tai momo dainai, egu goada ia ore.
3 Bema Dirava ena noho gabuna lau diba,+
Ena noho gabuna dekenai do lau lao.+
4 Vadaeni kota herevana be ia vairanai do lau gwauraia
Bona egu maoro totona hereva momo do lau gwauraia.
5 Lau dekenai do ia gwauraia herevadia do lau kamonai
Bona ena hereva do lau laloa.
6 Dirava be ena goada bada do ia gaukaralaia, lau ia tuari henia totona, a?
Lasi, unai bamona do ia karaia lasi, to egu hereva do ia kamonai.+
7 Bena kara maoromaoro tauna ese ena kota herevana be Dirava vairanai do ia hamaoromaoroa,
Bona egu Hahemaoro Tauna ese lau do ia gwauraia maoromaoro.
8 To bema ist kahana lau lao, ia be unuseniai ia noho lasi.
Bena west kahana lau lao, to ia lau davaria lasi.
9 Bema ia be not kahana ai ia gaukara, ia lau itaia diba lasi,
Bena ia be saut kahana ia lao, to ia lau itaia lasi.
10 To egu raka dalana ia diba namonamo.+
Lau ia tohoa murinai, lau be golo goevana bamona do lau hedinarai.+
11 Lau be iena raka daladia lau badinaia namonamo.
Iena dala amo lau raka siri lasi.+
12 Iena uduna amo idia mai oda herevadia lau dadaraia lasi.
Ia gwauraia hereva ibounai be mai ura bada ida lau badinaia.+
13 Ena lalona ia hadaia neganai, daika ese do ia koua?+
Ia ura gau ta ia karaia neganai, do ia karaia.+
14 Lau totona ia gwauraia gaudia be do ia karaia momokani,
Bona ia ese unai bamona gaudia momo ia laloa noho.
15 Unai dainai lau be ia lau laloa noho.
Dirava ena kara lau laloa neganai, ia lau matauraia bada.
16 Dirava ese egu goada ia haorea,
Bona Siahu Ibounai Diravana ese lau ia hagaria.
17 Egu vairana be dibura ese ia koua.
To do lau hereva noho.
24 “Dahaka dainai Siahu Ibounai Diravana be kota dinana ta ia abia hidi lasi?+
Dahaka dainai Dirava idia diba taudia be unai dina totona idia naria kava?
2 Taunimanima be tano ena hetoana idia makaia gauna idia kokia,+
Mamoe oreadia idia henaoa bona edia mamoe oreadia ida idia haboua.
3 Tama lasi natudia edia doniki idia lulua lao
Bona vabu be ena abitorehai ia haloua totona, ia amo ena boromakau idia abia.+
4 Idia ese ogogami taudia be dala amo idia doria siri
Idia ese unai bamona taudia idia hagaria bona idia heau boio.+
5 Ogogami taudia be aniani idia tahua noho, taunimanima lasi gabuna ai idia noho uda doniki+ bamona.
Idia be tano kaukauna ai edia natudia totona aniani idia tahua.
6 Ogogami taudia be ma ta ena uma ai aniani idia haboua*
Bona kara dika tauna ena vain uma amo huahua oredia idia gogoa.
7 Hanuaboi ai idia mahuta neganai, idia be dabua lasi.+
Idia keru neganai, dabua be lasi idia hetaru totona.
8 Medu bada ena keru dainai idia heudeheude.
Ruma be lasi dainai nadi badadia badinai idia gini noho.
9 Tamana lasi natuna be ena sinana ena kemena amo idia dadia.+
Bona ogogami tauna be ena abitorehai haloua totona, ena dabua idia abia,+
10 Idia ese ogogami taudia idia doria kopina kavakava idia loaloa totona,
Bona idia hitolo, to idia haboua vadaeni witi idia huaia.
11 Dina ena siahu lalonai idia be ororo ai idia noho nadi magudia huanai idia gaukara.*
Idia ese wain karaia totona greips huahua idia moia, to idia ranu mase noho.+
12 Kahirakahira do idia mase taudia be siti lalonai idia hisihisi noho.
Dika bada idia davaria taudia be heduru totona idia taitai noho,+
To Dirava ese unai ia laloa bada lasi.
13 Haida be diari idia ura henia lasi.+
Diari daladia idia diba lasi,
Bona unai dala dekenai idia raka lasi.
14 Daba ia rere neganai ala-ala tauna ia toreisi.
Ia ese manoka taudia bona ogogami taudia ia alaia,+
Hanuaboi ai ia henaohenao.
Bona ena vairana be dabua amo ia koua.
16 Dibura negana ai idia be ruma lalodiai idia vareai henaohenao totona.
Bona diari negadia ai idia be edia ruma lalodiai idia noho.
Idia be diari idia diba lasi.+
17 Idia dekenai daba ena diari be dibura momokani bamona,
Idia be hanuaboi ena gari gaudia dainai idia gari lasi.
18 To ranu ese idia ia abia lao haraga.
Edia tano ese anina do ia havaraia lasi.+
Idia be edia vain umadia dekenai do idia giroa lou lasi.
19 Siahu bada negana ai, sinou ia veve bona ia boio bamona,
20 Kara dika tauna ena sinana ese ia do ia laloaboio. Biluga ese ia do idia ania.
Taunimanima ese ia do idia laloatao lasi.+
Bona kara maoromaoro lasi tauna be au hegeregerena do idia utua oho.
21 Ia ese natuna lasi hahinena ia kara namo henia lasi,
Bona vabu ia kara auka henia.
22 Dirava be ena siahu do ia gaukaralaia siahu taudia ia hadikaia ore totona.
Ena be dagi bada do idia abia lou, to idia diba lasi mauri do idia abia eiava lasi.
23 Dirava ese idia ia koua lasi dainai sibona edia ura idia karaia noho bona idia noho namo,+
To idia karaia gaudia ibounai ia itaia noho.+
24 Idia be nega sisina lalonai ladana namona idia abia, bena idia boio.+
Idia be do idia mase+ taunimanima ibounai bamona.
Idia be witi bamona do idia utua oho.
25 Hari daika ese lau do ia gwauraia koikoi
Eiava egu hereva do ia hakoikoia?”
25 Suhi tauna Biledada+ ia gwau:
2 “Lohia siahuna be iena, bona ia ita gari henia.
Ia ese guba dekenai maino ia havaraia.
3 Iena tuari orea taudia ita duahia diba, a?
Ia henia diarina be taunimanima ibounai latanai ia hedinarai, ani?
4 Vadaeni edena dala ai tau ta be Dirava ena vairana ai do ia kara maoromaoro?+
Eiava hahine ena bogana amo ia vara tauna be edena dala ai ia kerere lasi?+
5 Iena vairana ai hua ia diari momokani lasi
Bona hisiu be idia goeva momokani lasi,
6 Vadaeni taunimanima, biluga bamona, be edena bamona?
Bona edia natudia, gaigai maragidia bamona, be edena bamona?”
26 Iobu ia haere, ia gwau:
2 “Ia manoka tauna be edena bamona oi durua diba?
Ena goada ia ore tauna be edena bamona oi hamauria diba?+
3 Aonega lasi tauna dekenai dahaka sisiba namona oi henia diba?+
Bona emu aonega bada be edena bamona oi gwauraia hedinarai diba?
4 Oi be lau oi hereva henia, a?
Bona daika ese oi ia hagoadaia unai bamona oi hereva totona?
5 Mase taudia* be Dirava vairanai idia gari.
Idia be ranu bona ranu lalonai idia noho gaudia henunai idia noho.
6 Dirava vairanai Mase Gurina* lalonai idia noho taudia ibounai idia hunia lasi,+
Bona ia ese dika gabuna dekenai gau ibounai ia itaia.
7 Ia ese guba ia karaia bona ena padana be bada herea,+
Tanobada be gau ta latanai ia atoa lasi.
8 Ia ese ori lalonai ranu ia haboua namonamo,+
Unai amo ranu ena metau ese ori idia hamakohia lasi.
9 Ia ese ena terona ia koua bona ita itaia lasi,
Oibe, ori amo ia koua.+
10 Ia ese guba bona davara edia huanai hetoana ia atoa.+
Ia ese diari bona dibura edia hetoana ia atoa.
11 Guba ena du idia mareremarere,
Bona iena gadona ia habadaia neganai idia gari.
12 Ia ese ena siahu amo davara ia hamarerea bada,+
Bona ena aonega amo davara ena dagedage gauna ia hamakohia maragimaragi.+
13 Ia ese lai amo guba ia hagoevaia.
Ia rau gaigaina ia hamasea.
14 Kamonai, inai be ia karaia gaudia edia kahana maragina sibona.+
Bona iena sivarai haida sibona ita kamonai!
Vadaeni guba ena boiboi goadana ia vara dalana be daika ese ia lalopararalaia diba?”+
27 Iobu ia do hereva noho, ia gwau:
2 “Unai bamona lau hereva diba, badina egu ahuna ena maoro ia kokia Diravana+
Bona lau ia hahisia Siahu Ibounai Diravana ia mauri noho,+
3 Lau do hahodi noho
Bona Dirava ese lau dekenai ia henia laga ia noho,+
4 Egu uduna amo kara maoromaoro lasi gaudia do lau gwauraia lasi.
Bona egu malana amo koikoi herevadia do lau gwauraia lasi!
5 Lau ese umui do lau gwauraia maoromaoro lasi!
Lau ese egu Dirava do lau badinaia noho ela bona lau mase!+
6 Lau be kara maoromaoro do lau badinaia bona do lau rakatania lasi.+
Lau mauri noho lalonai, egu kudouna ese lau do ia hahemaoro henia lasi.
7 Egu inai tauna be kara dika tauna bamona idia panisia be namo,
Lau idia hadikaia taudia be kara maoromaoro lasi taudia bamona idia panisia be namo.
8 Dirava idia diba lasi taudia be do idia mase, idia be helaro lasi+
Dirava ese edia mauri* do ia kokia.
9 Hisihisi idia davaria neganai,
Dirava ese edia taitai do ia kamonai, a?+
10 Eiava Siahu Ibounai Diravana totona do idia moale, a?
Idia be nega ibounai Dirava dekenai do idia guriguri, a?
11 Lau be umui dekenai Dirava ena siahu* do lau hadibaia.
Siahu Ibounai Diravana ena dala ibounai do lau gwauraia hedinarai.
12 Bema umui be matahanai ibounai umui itaia,
Dahaka dainai umui gwauraia herevadia be anina lasi?
13 Dirava ese kara dika tauna ena davana do ia henia,+
Bona Siahu Ibounai Diravana ese dagedage taudia dekenai do ia henia davana be inai:
14 Bema edia natudia do idia momo, tuari kaia amo do idia hamasedia,+
Bona edia bese taudia dekenai aniani be momo lasi.
15 Iena natudia memero be gorere dikadia dainai do idia mase,
Bona edia adavadia be idia totona do idia taitai lasi.
16 Ena be siliva momo idia haboua, kopukopu idia haboua bamona
Bona dabua namodia idia haboua, raro idia haboua bamona,
17 Ena be kara dika taudia ese dabua namodia idia haboua,
To kara maoromaoro taudia ese unai dabua do idia karaia,+
Bona kerere lasi taudia ese kara dika taudia edia siliva do idia haria.
18 Idia haginia ruma be goada lasi, manumanu* edia ruma bamona,
Gima tauna ese ia haginia au raurau ruma maragina bamona.+
19 Ia mahuta neganai ia be taga tauna, to gau ta ia haboua lasi.
Ena matana ia kehoa neganai, gau ibounai idia boio.
20 Gari bada ese ia do ia abia lao abata bamona.
Hanuaboi ai lai badana ese ia abia lao.+
21 Ist kahana amo ia mai lai badana ese ia do ia odaia lao, bona do ia boio,
Lai badana ese ena gabu amo ia do ia kokia.+
22 Mai hebogahisi lasi ida, lai badana ese ia do ia odaia lao+
Ia hekwarahi bada lai badana amo ia hunia totona.+
23 Lai be ia dekenai ena imana ia patapataia
28 “Siliva idia tahua gabuna ia noho
Bona golo be mai edia hagoevaia gabuna.+
2 Auri be tano amo idia abia
Bona idia havevea nadi amo kopa idia abia.+
3 Taunimanima be dibura gabudia idia hadiaria.
Idia be dibura momokani gabuna dekenai idia lao,
Dava bada nadi idia tahua totona.
4 Idia ese tano ai guri karaia tulu ta idia siaia diho, taunimanima edia noho gabuna amo ia daudau,
Unai gabu ai tau ta ia loaloa lasi.
Tatau haida be varo amo unai tano lalonai idia diho bona idia gaukara.
5 Tanobada ai aniani idia tubu,
To tano ena lalona be ia dika, lahi ese ia hadikaia bamona.
6 Unuseniai sapairo nadi idia noho,
Bona kahu lalonai golo maragimaragidia idia noho.
7 Ugava manu be unai gabu lao henia daladia idia diba lasi.
Bogibada koremana ena matana ese unai gaudia ia itaia lasi.
8 Uda animal be unai tano ai idia loaloa lasi.
Laiona ena natuna be unuseniai ia loaloa lasi.
9 Taunimanima ese edia hama amo nadi badadia idia hamakohia.
Idia ese ororo edia badina idia hadikaia.
10 Idia ese ranu ena heau dalana+ be nadi badadia lalonai idia karaia.
Edia matana ese gau namo hereana idia itaia.
11 Idia ese sinavai edia heau dalana idia koua
Bona hunia gaudia be diari dekenai idia hedinarai.
13 Ta ese aonega ena namo ia lalopararalaia diba lasi,+
Bona taunimanima huanai aonega be lasi.
14 Ranu dobudia idia gwau, ‘Aonega be lau dekenai ia noho lasi!’
Bona davara ia gwau, ‘Aonega be lau dekenai ia noho lasi!’+
15 Aonega be golo goevana amo idia hoia diba lasi,
Idia sikelea siliva amo aonega idia hoia diba lasi.+
16 Opiri amo idia mailaia golo ese aonega idia hoia diba lasi+
Bona onuku nadi bona sapairo nadi amo aonega idia hoia diba lasi.
17 Golo bona galasi be aonega ida idia hahegeregerea diba lasi.
Bona uro lalonai idia udaia golo namo hereana ese aonega ia hoia diba lasi.+
18 Korol bona galasi nadi be aonega ida idia hegeregere lasi,+
To aonega ese pel nadi momo herea ia hereaia.
19 Etiopia* amo idia mailaia topasio nadi+ be aonega ida idia hahegeregerea lasi.
Aonega be golo goevana amo idia hoia diba lasi.
20 To aonega be edeseni amo ia mai?
Bona laloparara ena badina be edeseni amo ia mai?+
21 Aonega be taunimanima bona animal amo ia hunia+
Bona atai manudia amo ia hunia.
22 Dika gabuna bona mase idia gwau,
‘Emai taiana amo ena sivarai be sisina sibona ai kamonai.’
23 Dirava be aonega davaria dalana ia lalopararalaia.
Ia sibona ese aonega ena noho gabuna ia diba,+
24 Badina ia be tanobada ena dokona gabudia ibounai ia itaia,
Bona guba henunai idia noho gaudia ibounai ia itaia.+
25 Ia ese lai dekenai goada ia henia+
Bona ia ese tanobada ena ranu ia hahetohoa neganai,+
26 Ia ese medu ena diho negadia+
Bona guba boiboi mai kevaru negana ia havaraia,+
27 Unai nega ai ia ese ia karaia gaudia amo aonega ia itaia bona ia gwauraia hedinarai.
Ia ese aonega ia haginia auka bona ena namo ia tohoa.
28 Bona ia be taunimanima dekenai ia gwau:
‘Itaia, Iehova gari henia karana be aonega karana,+
Bona laloparara tauna be dika amo ia raka siri.’”+
29 Iobu be ena hereva* ia gwauraia noho, ia gwau:
2 “Bema egu noho dalana be guna lau noho hegeregerena,
Unai negadia ai Dirava ese lau ia naria,
3 Dirava ena lamepa ese egu kwarana ia hadiaria neganai,
Dibura lalonai iena lamepa ena diari ai lau raka neganai,+
4 Lau be tau matamata neganai,
Dirava be turana namona ta bamona hanaihanai lau ida ia noho,+
5 Siahu Ibounai Diravana be lau ida ia noho,
Egu natudia* ibounai be lau ida idia noho,
6 Egu raka gabudia be milika amo ia honu,
Bona lau totona nadi badadia amo olive dehoro bada herea ia raka-lasi.+
7 Lau be siti ena iduara badana dekenai lau lao+
Bona ariara gabuna dekenai lau helai neganai,+
8 Tatau matamata be lau idia itaia bona egu dala amo idia siri,*
Bona tau burukadia idia toreisi bona do idia gini noho.+
9 Lohia taudia be hereva ta idia gwauraia lasi,
Edia imana amo edia uduna idia koua.
10 Danu ladana bada taudia edia gadona ta lau kamonai lasi.
Idia hereva totona, edia malana idia metau.
11 Egu sivarai ia kamonai tauna be lau ia hanamoa,
Bona lau idia itaia taudia ese egu kara namodia idia herevalaia.
12 Badina heduru totona ia noinoi ogogami tauna lau durua,+
Bona tamana lasi natuna bona ia hisihisi tauna lau durua danu.+
14 Lau ese kara maoromaoro be dabua bamona lau karaia.
Egu hahemaoro karadia be dabua latana bona kwara kumia dabua bamona.
15 Lau be matakepulu taudia edia matana
Bona aena dika taudia edia aena.
17 Lau ese kerere karaia taudia lau koua,+ idia be dagedage animal ta bamona
Bona idia ese idia hadikaia taudia be lau ese lau hamauria.
18 Nega momo lau gwau, ‘Lau be egu ruma dekenai do lau mase,+
Bona egu mauri dinadia be do idia momo herea, kone ena miri bamona.
19 Lau be au ta bamona, ena ramuna be ranu lalonai do idia diho lao,
Bona hanuaboi ibounai lalonai iena rigidia dekenai daba ena paripari do ia noho.
20 Egu hairai ia boio lasi,
Bona egu imana ai ia noho peva do lau pidia loulou.’
21 Taunimanima idia ura bada egu hereva idia kamonai,
Mai regerege lasi ida egu sisiba herevadia totona idia naria.+
22 Lau hereva ore murinai, idia be gau ta idia gwauraia lasi.
Edia taiana dekenai egu hereva be namo herea.
23 Idia ese lau idia naria, taunimanima ese medu ena nega idia naria bamona.
Idia ura dikadika egu hereva idia kamonai, ta ese medu ena nega ia naria noho bamona.+
24 Idia dekenai kiri toana lau hahedinaraia neganai edia lalona ia namo,
Egu moale toana idia itaia dainai, goada idia abia.*
25 Lau be gunalaia tauna bamona idia dekenai sisiba lau henia,
Bona lau be king ta bamona, iena tuari taudia huanai ia noho,+
Lau be taitai taudia hagoadaia tauna ta bamona.+
30 “Tatau haida, edia mauri lagani be egu mauri lagani henunai,
Idia ese lau idia kirikiri laia,+
Lau ese edia tamadia lau dadaraia diba,
Egu mamoe orea idia naria sisia ida idia gaukara hebou totona.
2 Lau idia kirikirilaia tatau be edena dala ai lau do idia durua?
Badina edia goada ia ore.
3 Idia manoka bona hitolo bada.
Idia ese tano kaukauna idia ania
Unai tano ia dika vadaeni bona ta ia noho lasi.
4 Idia ese uda amo damena raudia idia haboua.
Bona uda audia edia ramuna idia ania.
5 Taunimanima ese idia be hanua amo idia lulua raka-lasi.+
Bona henaohenao taudia bamona idia lulua lao.
6 Idia be ororo badinai idia noho koura dekenai idia noho,
Tano bona nadi badadia lalonai matu idia karaia bona idia noho.
7 Uda lalodia amo idia boiboi
Bona ava ginigini latadia huanai idia hebou.
8 Idia be aonega lasi bona anina lasi taudia dainai,
Tano amo idia lulua raka-lasi.
9 To hari lau idia kirikirilaia, edia ane lalonai unai idia karaia,+
Idia ese lau be edia hevaseha gauna ai idia halaoa.+
11 Badina Dirava ese lau amo tuari gaudia ia kokia bona lau ia hamanokaia,
Idia ese gau ibounai idia karaia lau idia hahisia totona.
12 Egu idiba kahana amo idia be orea ta bamona idia mai,
Lau idia lulua lao
Bona lau hadikaia totona egu raka gabudia ai koua gaudia idia atoa.
13 Egu raka daladia ibounai idia hadikaia
Bona lau davaria hisihisi idia habadaia,+
Ta ese idia ia koua lasi.
14 Idia be magu ai ia noho matu badana amo idia heau vareai bamona,
Lau dekenai idia mai bona lau davaria vadaeni dika idia habadaia noho,
15 Lau gari bada,
Egu dagi bada ia boio, lai ese ia abia lao bamona,
Bona egu mauri namona ia boio, ori bamona.
18 Egu dabua be lau amo idia veria auka dainai, dabua toana ia dika,*
Egu aiona ena muko ese egu aiona ia gigia bamona.
19 Dirava ese kopukopu lalonai lau ia negea.
Lau be tano ena kahu bamona ai lau lao.
20 Oi dekenai heduru totona lau boiboi, to oi haere lasi.+
Lau gini, to oi be lau oi raraia sibona.
21 Oi be mai dagedage ida lau oi inai henia,+
Emu imana goadana amo lau oi heatu henia.
22 Lau oi abia isi bona lai lalonai lau oi abia lao,
Bena lai gubana lalonai lau oi negea lao negea mai noho.
23 Lau diba oi ese lau do oi hamasea,
Mauri taudia idia lao henia gabuna dekenai lau oi siaia lao.
24 Dika ia davaria tauna be heduru totona ia boiboi noho
To tau ta ese ia durua lasi.+
25 Nega aukadia idia davaria taudia totona lau taitai lasi, a?
Lau be ogogami taudia totona lau lalohisihisi lasi, a?+
26 Lau be namo lau ura henia, to dika sibona lau davaria,
Lau ura diari, to dibura sibona ia mai noho.
27 Egu lalohekwarahi ia ore lasi,
Dina ta ta lalonai lau hisihisi noho.
28 Mai lalometau ida lau raka loaloa,+ dina ena diari ia hedinarai lasi.
Idia hebou taudia huanai lau toreisi bona heduru totona lau noinoi.
31 Egu hap* be taitai ane abia sibona totona idia gaukaralaia.
Bona egu fluti ena regena be taitai ena regena ai ia lao.
31 “Lau be egu matana ida gwauhamata ta lau karaia.+
Unai dainai edena dala ai ura dikana ida hahine ma ta do lau raraia?+
2 Bema unai bamona lau karaia, vadaeni Dirava amo egu ahuna be dahaka?
Ataiai ia noho Siahu Ibounai Diravana amo dahaka ahuna do lau abia?
3 Kerere karaia tauna be dika do ia davaria, ani?
Bona dika karaia tauna be dika do ia davaria, ani?+
4 Dirava ese egu raka daladia ibounai ia itaia,+
Bona lau karaia gaudia ibounai ia itaia noho, ani?
5 Lau be lau koikoi, a?*
Nega ta, lau be tau ta lau koia, a?+
6 Namona be Dirava ese sikele maorona amo lau ia sikelea,+
Bena ia lau badinaia karana do ia dibaia.+
7 Bema lau be dala kererena dekenai lau raka+
Eiava egu matana ese ia itaia gaudia be egu kudouna ese ia badinaia,+
Eiava egu imana ese gau dikadia ia karaia,
8 Namona be lau hadoa uhe be haida ese idia ania,+
Bona lau hadoa gauna be haida ese idia kokia.*
9 Bema hahine ta ese egu lalona ia veria+
Bona lau be egu dekena tauna ena iduara badinai lau naria,+
10 Vadaeni egu adavana be tau ma ta ena witi do ia moia be namo,
Bona ia be tatau ma haida ida do ia mahuta hebou.+
11 Badina bema unai lau karaia, unai be hemarai karana,
Bona unai kara dainai hahemaoro taudia ese lau do idia panisia.+
12 Unai be hegeregere lahi ese gau ibounai ia hadikaia ore,+
Bona lau biagua gaudia ibounai ia araia ore.
13 Bema egu hesiai tatau bona hesiai hahine be lau dekenai idia maumau,
To idia totona kota maorona lau karaia lasi,
14 Vadaeni Dirava be lau ia kota henia neganai, dahaka do lau karaia?
Lau ia nanadaia neganai, edena bamona do lau haere?+
15 Egu sinana ena bogana ai lau ia karaia Diravana ese idia ia karaia danu, ani?+
Bona ita do vara lasi neganai, Dirava ese ita ia karaia, ani?+
16 Bema ogogami taudia edia ura gaudia lau henia lasi+
Eiava bema egu kerere dainai vabu taudia idia lalohisihisi,+
17 Bema lau be sibona egu aniani lau ania,
To tamana lasi natudia* dekenai aniani lau henia lasi,+
18 (Badina egu matamata negana amo, unai mero ese lau be ena tamana bamona ia laloa,
Bona lau maragi negana amo, lau ese vabu lau durua.)
19 Bema lau itaia tau ta be keru dainai kahirakahira ia mase,
Eiava ogogami tauna be hetaru dabua lasi,+
20 Bema keru dainai idia dekenai egu wulu dabua lau henia,
Bona lau idia hanamoa lasi,+
21 Bema siti ena geiti+ ai tamana lasi natuna be egu heduru totona ia noinoi,*
To mai badu ida ia lau kara auka henia,+
22 Vadaeni egu pagana amo egu imana ia kokia be namo,
Bona egu imana ena diuna ia makohi be namo.
23 Badina Dirava amo do ia mai dika dainai lau gari,
Bona iena siahu bada dainai lau be hegeregere lasi iena vairanai lau gini.
24 Bema lau ese golo lau abidadama henia
Eiava golo namo hereana dekenai lau gwau, ‘Oi dainai do lau noho namo!’+
25 Bema egu kohu be bada herea,
Bona lau be gau momo herea lau biagua dainai lau moale,+
26 Bema lau itaia dina ia diari noho
Eiava guba ai hua ena hairai lau itaia,+
27 Bona ta ese hehuni ai egu lalona ia veria,
Bona unai gaudia lau tomadiho henia,*+
28 Unai kara dika dainai hahemaoro taudia ese lau idia panisia be namo,
Badina lau ese Dirava momokanina lau dadaraia.
29 Egu inai tauna be dika ia davaria neganai, unai lau moalelaia, a?+
Eiava ia dekenai gau dikana ta ia vara neganai, lau moale bada, a?
30 Egu uduna amo lau kerere lasi,
Badina gwauhamata ta lau karaia lasi egu inai tauna ena mauri* lau hadikaia totona.+
31 Egu palai rumana ai idia gaukara taudia idia gwau,
‘Ia hegaegaelaia aniani* amo ia ese taunimanima ibounai ia ubua, ani?’+
32 Hanuaboi ai, idau tauna be dala ai do ia mahuta lasi,+
Hanaihanai loaloa taudia be egu ruma dekenai lau boiria.
33 Lau be taunimanima haida bamona egu kara dika lau hunia,+
Egu kerere be egu dabua lalonai lau hunia bamona, a?
34 Lau be hutuma edia kara dainai lau gari, a?
Eiava bese ma haida edia hagaria karadia ese lau ia hagaria,
Unai dainai hereva ta lau gwauraia lasi bona lau gari egu ruma amo lau raka-lasi totona, a?
35 Bema ta ese egu hereva ia kamonai be namo!+
Egu hereva hamomokania totona lau ese pepa dekenai egu ladana do lau sainia.
Siahu Ibounai Diravana ese lau ia haere henia be namo!+
Bema lau ia samania tauna ese pepa ta ai ena samani herevadia ibounai ia torea be namo!
36 Lau ese unai samani herevadia be egu pagana dekenai do lau huaia,
Bona korona bamona egu kwarana dekenai do lau atoa.
37 Lau karaia karadia ibounai be Dirava ena vairanai do lau gwauraia hedinarai.
Lohia tauna ta bamona, mai lalogoada ida ena vairanai do lau gini.
38 Bema lau dainai egu tano be ia taitai
Bona lau geia gabudia be idia hisihisi hebou,
39 Bema tano ena huahua ena davana lau karaia lasi bona lau ania kava,+
Eiava tano ena biaguna lau hahisia,+
40 Vadaeni lau totona witi do idia tubu lasi to ava ginigini do idia tubu
Bona bali do idia tubu lasi, to bonana dika avadia do idia tubu.”
Iobu ena hereva be iniseniai ia doko.
32 Unai tatau toi be Iobu idia haere henia lou lasi, badina ia laloa ia be kara maoromaoro ia badinaia.+ 2 To Elihu be Iobu dekenai ia badu momokani, badina Iobu be sibona ia gwauraia maoromaoro to Dirava ia gwauraia maoromaoro lasi.+ Elihu be Barakele ena natuna, Rama ena bese amo ia mai Busu tauna.+ 3 Danu Elihu be Iobu ena turadia toi dekenai ia badu momokani, badina idia ese haere maorona idia davaria diba lasi, to Dirava idia gwauraia dika.+ 4 Elihu be Iobu ia haere henia haraga lasi, badina edia mauri lagani be bada.+ 5 Elihu ia itaia unai tatau toi be Iobu idia haere henia lasi neganai, iena badu ia bada. 6 Vadaeni Busu tauna Barakele ena natuna Elihu ia hereva matamaia, ia gwau:
“Egu mauri lagani be maragi
Bona emui mauri lagani be bada.+
Umui lau matauraia dainai lau hereva lasi,+
Bona lau gari lau dibaia gauna lau gwauraia totona.
7 Lau laloa, ‘Tau badadia idia hereva be namo,
Bona mauri lagani bada taudia ese aonega herevadia idia gwauraia be namo.’
8 To Dirava ese taunimanima dekenai lauma helaga ia henia,
Oibe, Siahu Ibounai Diravana ena lauma amo idia dekenai laloparara ia henia.+
9 Aonega be mauri lagani bada taudia sibona ese idia davaria lasi,
Bona laloparara be tatau burukadia sibona dekenai ia noho lasi.+
10 Vadaeni lau gwau, ‘Lau oi kamonai henia,
Bona lau dibaia gauna be oi do lau hamaoroa.’
11 Umui hereva neganai, lau naria,
Emui lalohadai lau kamonai noho.+
Umui ura herevalaia gaudia umui tahua noho lalonai,+ lau kamonai noho.
12 Lau ese emui hereva lau kamonai namonamo,
To emui hereva amo umui hamomokania lasi Iobu ia kerere
Eiava ena hereva umui haerelaia lasi.
13 Vadaeni umui gwau lasi, ‘Ai be aonega ai davaria vadaeni,
Bona Dirava sibona ese do ia hahedinaraia Iobu be kerere, taunimanima lasi.’
14 Iobu be umui ia hereva henia, to lau lasi,
Unai dainai ia dekenai umui gwauraia herevadia do lau gwauraia lasi.
15 Inai tatau be idia diba lasi edena bamona do idia haere.
Hereva ma haida idia gwauraia lasi.
16 Idia hereva totona lau naria, to gau ta idia gwauraia lasi,
Unuseniai idia gini sibona, haere ta idia henia lasi.
17 Unai dainai do lau hereva,
Bona lau dibaia gaudia do lau gwauraia danu,
18 Badina lau ura gau momo lau herevalaia,
Egu lalona ai unai ura be ia goada.
19 Egu lalona be wain puse lalonai ia noho wain bamona, ia honu momokani,
Wain puse matamata be kahirakahira do ia makohi bamona.+
20 Mani lau hereva, unai amo egu lalona do ia namo!
Egu uduna do lau kehoa bona lau hereva.
21 Lau be maka tamona ai umui do lau hereva henia,+
Ta do lau hanamoa koikoi lasi,
22 Lau be tau ta hanamoa koikoi dalana lau diba lasi,
Bema unai lau karaia, egu Havaraia Tauna ese lau do ia hamasea haraga.
33 “Iobu e, mani egu hereva oi kamonai,
Lau gwauraia gaudia ibounai oi kamonai.
2 Mani lau oi kamonai henia! Do lau hereva.
Egu uduna ia hereva be namo.
3 Mai laloa maoromaoro ida egu hereva do lau gwauraia,+
Bona mai momokani ida do lau hereva.
4 Dirava ese ena lauma amo lau ia karaia,+
Bona Siahu Ibounai Diravana ena laga ese lau dekenai mauri ia henia.+
5 Bema oi hegeregere lau oi haere henia diba,
Emu maumau herevadia oi gwauraia, bona oi hegaegae lau oi haere henia totona.
6 Dirava momokanina ena vairanai lau be oi hegeregerena.
Lau danu be raro amo ia karaia.+
7 Unai dainai lau oi gari henia lasi,
Bona egu hereva metaudia ese oi do ia hahisia lasi.
8 To, oi gwauraia herevadia lau kamonai,
Oi be inai bamona oi hereva noho,
9 ‘Lau be goeva momokani, kara dika ta lau karaia lasi,+
Lau be goeva, kerere ta lau karaia lasi.+
10 To Dirava be dala ia tahua lau ia tuari henia totona,
Badina ia laloa lau be ena inai tauna.+
11 Ia ese au metaudia huanai egu aena ia atoa,
Ia ese egu raka daladia ibounai ia itaia namonamo.’+
12 To oi be maoro lasi unai bamona oi hereva, unai dainai oi do lau haere henia:
Dirava ese taunimanima ibounai ia hereaia.+
13 Dahaka dainai oi be Dirava dekenai oi maumau?+
Ia be emu hereva ibounai ia haerelaia lasi dainai, a?+
14 Dirava be ena hadibaia herevadia ia gwauraia loulou,
To ta ia kamonai lasi,
15 Ia ese nihi lalonai, eiava hanuaboi ena matahanai lalonai+ taunimanima ia hereva henia,
Idia mahuta boio neganai,
Oibe, edia bedi ai idia mahuta lalonai ia hereva henia.
16 Bena edia taiana ia kehoa+
Bona ena hadibaia herevadia be idia dekenai ia hahedinaraia noho,
17 Tau ta be kara dika ia rakatania totona+
Bona ia hekokoroku lasi totona.+
19 Bema ta be mai hisihisi ida ena bedi latanai ia hekure
Bona ena turia be hanaihanai idia hisihisi neganai, matahakani ia abia.
20 Vadaeni ia ura lasi paraoa ia ania,
Bona aniani namodia ia dadaraia.+
21 Iena kopina ia maragi ia lao,
Bona iena turia idia hedinarai.
22 Ia be kahirakahira ia mase,
Haida ese ia idia alaia totona dala idia tahua.
23 Bema ia totona gwaukau tauna* ta ia noho,
Unai gwaukau tauna be taunimanima tausen huana amo ia mai,
Unai tauna dekenai kara maorona ia gwauraia totona,
24 Bena Dirava ese unai tauna ia lalonamo henia bona ia gwau,
‘Mase gurina amo ia umui hamauria!+
Lau ese mauri davana karaia dalana ta lau davaria vadaeni!+
25 Namona be unai tau ena tauanina do ia matamata* lou, natuna maragina ena tauanina bamona.+
Namona be ia matamata negana ai ia abia goada do ia abia lou.’+
26 Ia be Dirava dekenai do ia noinoi,+ bona Dirava ese do ia abia dae,
Bona mai moale bada ida Dirava ena vairana do ia itaia,
Bona Dirava ese ia do ia gwauraia maoromaoro.
27 Vadaeni unai tauna be taunimanima dekenai do ia gwau,
‘Lau be kara dika lau karaia+ bona kara maorona lau karaia lasi,
To unai kara ena davana dikana lau abia lasi.
28 Ia ese egu mauri ia hoia lou, unai dainai lau be mase gurina dekenai lau diho lao lasi,+
Bona hari lau mauri noho.’
29 Momokani, Dirava ese unai tauna totona unai gaudia ibounai ia karaia,
Bona unai ia karaia loulou.
30 Unai tauna ia hamauria dainai, mase gurina dekenai do ia diho lasi,
Vadaeni ia be mauri ena diari do ia moalelaia.+
31 Iobu e, mani egu hereva oi kamonai!
Hereva ta oi gwauraia lasi, unai amo do lau hereva noho.
32 Bema oi ura gau ta oi gwauraia, vadaeni oi hereva.
Badina lau ura hamomokania oi be kerere lasi.
33 Bema oi be gau ta do oi herevalaia lasi, vadaeni namona be egu hereva oi kamonai,
Hereva ta oi gwauraia lasi, unai amo oi dekenai aonega dalana do lau hadibaia.”
34 Elihu ia hereva noho, ia gwau:
2 “Aonega taudia e, egu hereva umui kamonai.
Diba bada taudia e, mani egu hereva umui kamonai.
3 Badina taiana ese hereva ena mamina ia tohoa,
Unai hegeregerena malana ese aniani ia mamia toho.
4 Namona be dahaka be maoro ita herevalaia hebou,
Namona be ita abia hidi edena hereva be namo.
6 Do lau koikoi bona lau gwau kota maorona lau abia be namo lasi, a?
Ena be kara dika ta lau karaia lasi, to egu bero be do ia namo lou lasi.’+
7 Iobu hegeregerena tauna ta be lasi,
Ia ese haida edia hadikaia herevadia ia abia dae sibona.
8 Ia be kerere karaia taudia ia bamoa
Bona kara dika taudia ida ia raka hebou.+
9 Badina ia gwau, ‘Bema tau ta be Dirava hamoalea karadia ia karaia,
Ia be namo do ia davaria lasi.’+
10 Aonega taudia e, egu hereva umui kamonai:
Dirava momokanina be kara dika ta ia karaia diba lasi,+
Bona Siahu Ibounai Diravana be kerere ta ia karaia diba lasi!+
11 Dirava ese tau ta ena kara hegeregerena davana do ia henia+
Bona ena mauri dalana hegeregerena davana do ia abia.
12 Momokani, Dirava be kara dika ia karaia diba lasi,+
Siahu Ibounai Diravana be ena kota maoromaoro karana ia hagagevaia diba lasi.+
13 Daika ese Dirava dekenai siahu ia henia tanobada ia naria totona?
Bona daika ese Dirava ia abia hidi tanobada ibounai ia lohiaia totona?
14 Bema Dirava ese taunimanima ia dadaraia,
Bona bema edia mauri siahuna ia kokia,+
15 Vadaeni taunimanima ibounai be do idia mase,
Bona tano ena kahu dekenai do idia giroa lou.+
16 Bema oi be aonega tauna, mani oi kamonai.
Lau gwauraia hereva oi kamonai namonamo.
17 Momokani Dirava be kara maoromaoro ia inai henia, a?
Eiava oi ese koikoi dalanai siahu ibounai Diravana oi gwauraia dika noho, a?
18 Oi be king ta dekenai oi gwau, ‘Oi be anina lasi,’ a?
Eiava ladana bada taudia dekenai oi gwau, ‘Umui be kara dika taudia,’ a?+
19 To Dirava be lohia taudia sibona ia durua lasi
Bona ia ese taga taudia bona ogogami taudia be maka tamona dekenai ia kara henia,+
Badina idia ibounai be ena imana amo ia karaia.+
20 Idia be idia mase haraga,+ hanuaboi lalonai,+
Idia mareremarere bona idia boio.
Dirava ese siahu taudia ia kokia, to taunimanima ese idia karaia lasi.+
21 Badina Dirava ese taunimanima idia karaia karadia ia itaia,+
Edia raka daladia ibounai ia itaia danu.
22 Dibura gabuna ta be lasi,
Kerere karaia taudia idia hunia totona.+
23 Badina Dirava ese taunimanima totona nega ta ia abia hidi lasi,
Idia ia hahemaoro henia totona.
24 Ia ese siahu taudia edia kara ia tahua guna lasi, to ia kokidia sibona
Bona edia gabu ai ma haida ia atoa.+
26 Edia kara dika dainai Dirava ese ia hamasedia,
Taunimanima ibounai edia vairanai.+
27 Badina idia be Dirava idia badinaia lasi+
Bona iena dala idia laloa bada lasi.+
28 Idia ese ogogami taudia idia hahisia, bona ogogami taudia be Dirava dekenai idia taitai,
Bena ia ese idia hisihisi noho taudia edia taitai ia kamonai.+
29 Bema Dirava be kara ta ia karaia lasi, daika ese ia do ia gwauraia kerere?
Iena vairana ia hunia neganai, daika ese heduru do ia henia?
Bema bese ta eiava tau ta amo ia hunia, idia be heduru do idia abia lasi.
30 Vadaeni Dirava diba lasi tauna be do ia lohia lasi+
Eiava taunimanima hadikaia dalana do ia karaia lasi.
31 Badina oi be Dirava dekenai do oi gwau,
‘Lau be kerere ta lau karaia lasi, to oi ese lau oi panisia.+
32 Lau diba lasi gauna mani lau oi hadibaia.
Bema gau ta lau karaia kerere, vadaeni unai do lau karaia lou lasi.’
33 Oi be Dirava ena kara oi ura henia lasi dainai, emu ura gauna ia henia diba, a?
Oi sibona oi abia hidi, lau lasi.
Oi diba namonamo gauna mani lau oi hamaoroa.
34 Laloparara taudia bona egu hereva ia kamonai aonega tauna
Be lau dekenai do ia gwau,
35 ‘Iobu be gau ta ia diba lasi, to ia hereva noho,+
Bona iena hereva lau lalopararalaia lasi.’
36 Namona be Iobu ena hereva ibounai umui tahua namonamo
Badina ia gwauraia herevadia be kara dika taudia edia hereva bamona!
37 Ia be ia kara dika bona ia gwau-edeede.+
Iseda vairanai hevaseha dalanai ena imana ia patapataia
Bona Dirava momokanina dekenai maumau herevadia momo ia gwauraia!”+
35 Elihu ia hereva noho, ia gwau:
2 “Oi laloa oi be maoro dainai oi gwau,
‘Egu kara maoromaoro ese Dirava ena kara maoromaoro ia hereaia,’ a?+
3 Ma oi gwau, ‘Bema lau kara maoromaoro, oi* ese unai do oi laloa bada, a?
Bema kara dika lau karaia, egu noho do ia namo, a?’+
4 Lau ese oi do lau haere henia
Bona emu turadia+ danu do lau haere henidia.
5 Guba oi itaia,
Ori oi itaia namonamo,+ idia be ataiai momokani, oi be idia henunai.
6 Bema oi kara dika, oi ese Dirava do oi hahisia lasi.+
Bema emu kara dikadia be momo, unai ese ia dekenai dika do ia havaraia, a?+
7 Bema oi kara maoromaoro, ia dekenai dahaka do oi henia?
Ia be oi amo dahaka do ia abia?+
8 Oiemu kara dika ese taunimanima sibona ia hahisia,
Bona emu kara maoromaoro ese taunimanima ia durua.
9 Taunimanima be dagedage bada dainai idia taitai,
Siahu taudia idia kara auka dainai taunimanima be heduru totona idia taitai.+
10 To tau ta ia gwau lasi, ‘Egu Dirava, Havaraia Tauna unai, be edeseniai?+
Ia karaia gaudia dainai taunimanima be hanuaboi ai hanamoa anedia idia abia, ani?’+
11 Ia ese ita ia hadibaia,+ vadaeni ita ese tanobada ena dagedage animal ita hereaia,+
Bona ita dekenai aonega ia henia, vadaeni ita ese manu ibounai ita hereaia.
12 Taunimanima idia taitai noho, to Dirava ese ia haere henidia lasi,+
Badina kara dika taudia idia hekokoroku.+
13 Oibe, Dirava ese koikoi taudia edia taitai ia kamonai lasi,+
Siahu Ibounai Diravana ese unai bamona taudia ia durua lasi.
14 Dahaka dainai oi gwau ia ese oi ia laloa lasi?+
Oiemu kota herevana ia diba dainai, ia totona oi naria noho be namo.+
15 Badina Dirava be mai badu ida oi do ia panisia lasi,
Bona oi gwauraia hereva kereredia ia laloa bada lasi.+
16 Iobu be ena uduna ia kehoa kava,
Ia laloa namonamo lasi bona hereva momo ia gwauraia.”+
36 Elihu ma ia gwau:
2 “Mani nega sisina oi henia lau hereva noho totona,
Badina lau ura Dirava totona hereva ma haida lau gwauraia.
3 Lau diba gaudia be do lau gwauraia hedinarai namonamo,
Bona do lau hahedinaraia egu Havaraia Tauna be kara maoromaoro Diravana.+
4 Momokani, lau be hereva koikoi do lau gwauraia lasi.
Gau ibounai ia diba Diravana+ be hari oi ia itaia noho.
5 Momokani, Dirava ena siahu be bada herea,+ to ia ese ta ia inai henia lasi.
Iena laloparara karana be bada herea.
6 Ia ese kara dika taudia edia mauri do ia gimaia lasi,+
To ia ese hisihisi idia davaria taudia totona kota maoromaoro ia karaia.+
7 Ia ese kara maoromaoro taudia ia itaia noho.+
Idia dekenai king dagi ia henia,+ bona idia ia hanamoa ela bona hanaihanai.
8 To bema idia be seini amo idia lokaia
Bona hisihisi ena varo amo idia hahisia,
9 Dirava ese idia karaia karana be idia dekenai ia hahedinaraia,
Edia hekokoroku dainai kara dikadia idia karaia.
10 Ia ese edia taiana do ia kehoa, bona idia ia hadibaia,
Bona idia do ia hamaoroa edia kara dika idia rakatania totona.+
11 Bema Dirava idia badinaia bona hesiai henia,
Idia be mauri namona do idia abia,
Bona edia mauri dinadia do idia moalelaia.+
12 To bema Dirava idia badinaia lasi, tuari kaia amo do idia mase,+
Gau ta idia diba lasi bona idia mase.
13 Dirava idia inai henia taudia be idia badu noho.
Ena be idia ia panisia, to heduru totona idia boiboi lasi.
15 To Dirava ese hisihisi taudia be edia hisihisi amo ia hamauria
Dagedage idia davaria neganai, ia ese edia taiana ia kehoa.
16 Ia ese hisihisi amo oi ia hakaua siri+
Bona gabu namona, dika do oi davaria lasi gabuna unai, dekenai oi ia hakaua lao+
Bona emu aniani patana be aniani amo do ia honu.+
17 Bena kara dika taudia ia hahemaoro henia neganai, do oi moale,+
Unai hahemaoro karana be dala maorona ai ia karaia.
18 To naria namonamo, namo lasi badu dainai oi ura ta oi hadikaia,+
Bona namo lasi laloani moni bada oi abia dainai dala kererena oi badinaia.
19 Oi be heduru totona do oi boiboi, a?
Eiava hisihisi hanaia totona oi hekwarahi neganai, unai ese oi ia durua, a?+
20 Hanuaboi totona do oi naria lasi,
Unai nega ai taunimanima be edia gabu amo idia boio.
21 Namo lasi kara dika oi karaia,
To hisihisi oi haheaukalaia.+
22 Dirava ena siahu be bada herea.
Hadibaia tauna ta ia hegeregerena ia noho, a?
23 Daika ese Dirava ia hamaoroa kara ta ia karaia totona?*+
Eiava daika be ia dekenai ia gwau, ‘Oi karaia gauna be kerere’?+
24 Ia karaia gaudia dainai ia oi hanamoa karana oi laloaboio lasi,+
Taunimanima ese unai kara namodia idia anelaia.+
25 Taunimanima ibounai ese Dirava ia karaia gaudia idia itaia,
To unai gaudia ia karaia dalana idia diba lasi.
26 Oibe, Dirava ena diba be bada herea, ita lalopararalaia diba lasi.+
27 Ia ese tano amo ranu ia veria daekau.+
Bona ori lalonai medu ranu ia haboua.
28 Bena ori amo medu ia diho,+
Bona taunimanima latanai ia diho.
29 Daika ese ori edia bada ia lalopararalaia diba?
Bona daika ese Dirava ena noho gabuna* amo guba ena boiboi ena bada ia diba?+
30 Iena diari ese ori idia hadiaria+
Bona davara ena dobu gabudia ia hadiaria.
31 Unai gaudia amo Dirava ese taunimanima ia durua.*
Ia ese idia dekenai aniani momo herea ia henia.+
32 Dirava ese kevaru ia biagua bona ena imana amo ia koua,
Bona ia makaia gabuna dekenai kevaru ia siaia lao.+
33 Guba regena ese ia hahedinaraia Dirava ia noho,
Danu animal edia kara amo taunimanima idia diba daika* ia mai noho.
37 “Egu kudouna ia marere noho
Bona ia roho isi haragaharaga.
2 Dirava ena gado regena
Bona ena uduna amo ia mai guba boiboi oi kamonai namonamo.
3 Ia ese kevaru be guba ena henuna amo ia halasia
Bona tanobada ena kahana ibounai dekenai ia siaia lao.+
4 Unai murinai rege bada ia vara,
Iena gado regena be guba ena boiboi bamona,+
Bona ia hereva lalonai, kevaru ia hedinarai noho.
5 Dirava ena gadona be guba ena boiboi bamona,+ ena regena be namo herea,
Ia ese kara badadia ia karaia, bona unai ita lalopararalaia diba lasi.+
6 Ia be sinou dekenai ia gwau, ‘Tanobada latanai oi diho,’+
Bona medu bada dekenai ia gwau, ‘Oi diho badabada.’+
7 Dirava ese taunimanima edia ima gaukaradia ibounai ia hadokoa,
Unai amo idia ese ia karaia gaukara do idia diba.
8 Uda animal idauidau be edia noho gabudia lalonai idia vareai
Bona unuseniai idia hunia.
9 Lai gubana be ia haboua gabuna amo ia toa badabada,+
Bona not kahana ena lai ese paraka ia mailaia.+
11 Oibe, ia ese ori be ranu amo ia hahonua,
Bona kevaru be ori amo ia siaia raka-lasi.+
12 Ia siaia gabudia ai idia giroagiroa,
Bona iena oda hegeregerena+ tanobada ibounai dekenai edia gaukara idia hagugurua.
13 Ia ese ori ia gaukaralaia, taunimanima ia panisia totona,+ eiava tano latanai medu ia mailaia totona,
15 Dirava ese ori ia biagudia dalana
Bona ori amo kevaru ia halasia dalana oi diba, a?
16 Ori be ataiai idia heau bona idia moru lasi dalana oi diba, a?+
Unai be gau ibounai ia diba Diravana ena gaukara namo hereadia.+
17 Saut kahana amo ia mai lai ese tanobada ia hamarerea lasi neganai,
Dahaka dainai emu dabua idia siahu?+
18 Oi ese guba oi habadaia diba, Dirava ese ia karaia hegeregerena, a?+
Bona ena goada be ia diaridiari auri* hegeregerena oi halaoa diba, a?
19 Ai oi hadibaia ia dekenai dahaka do ai gwauraia,
Ai haere diba lasi, badina ai be dibura dekenai ai noho.
20 Bema lau ura Dirava lau hereva henia, ia do lau hadibaia guna, a?
Eiava ta be mai anina bada gauna ta ia gwauraia, bona Dirava ia diba be namo, a?+
21 Taunimanima ese dina ena diari idia itaia diba lasi,
Ena be guba ai ia diari noho,
To lai ese ori ia abidia lao neganai, diari idia itaia.
22 Not kahana amo diari ta ia hedinarai, golo ena diari bamona,
Dirava ena hairai+ be idau momokani.
23 Siahu Ibounai Diravana ena siahu ita lalopararalaia diba lasi,+
Iena siahu be bada herea,+
Bona hanaihanai kota maoromaoro ia karaia+ bona ia kara maoromaoro.+
24 Unai dainai, taunimanima ese Dirava idia gari henia be namo.+
Badina sibona idia gwauraia aonega taudia be ia ura henia lasi.”+
38 Bena Iehova be lai gubana amo Iobu ia hereva henia, ia gwau:+
2 “Daika ese egu sisiba herevadia dekenai daradara ia havaraia noho?
Bona daika be ia laloa namonamo lasi bona ia hereva noho?+
3 Mani oi gini, tau goadana ta bamona,
Oi do lau nanadaia, bona lau oi haere henia.
4 Tanobada lau karaia neganai, oi be edeseni?+
Bema oi laloa unai oi lalopararalaia, vadaeni lau oi hamaoroa.
5 Daika ese tanobada ena bada ia gwauraia diba? Haere oi diba, a?
Eiava daika ese tanobada ena lata bona lababa be tohoa varo amo ia tohoa?
6 Tanobada ena badina nadi be dahaka ese ia dogoatao?
Eiava daika ese ena kona nadi ia atoa?+
7 Daba ena hisiu momo+ be mai moale ida nega tamona idia boiboi
Bona aneru* ibounai+ be idia boiboi neganai, oi be edeseni oi noho?
8 Bona davara be ena mai gabuna* amo ia mai neganai,
Daika ese iduara ia koudia, davara be ena maka ia hanaia lasi totona?+
9 Ori be dabua bamona davara ena ataiai lau atoa
Bona dibura momokani amo lau koua,
10 Davara ena doko gabuna lau atoa
Bona auri bona iduara lau atoa,+
11 Bona davara dekena lau gwau, ‘Oi mai bona inai gabu dekenai do oi doko, oi hanaia lasi.
Inai gabu dekenai emu hurehure do ia doko.’ Unai neganai oi be edeseni oi noho?+
12 Oi ese nega ta daba oi oda henia do ia toreisi totona, a?
Eiava daba oi hadibaia edeseni amo do ia hedinarai, a?+
13 Oi ese daba ena diari oi hamaoroa tanobada ena dokona dekenai ia lao,
Bona kara dika taudia ia kokia, a?+
14 Tanobada ia diari neganai, ena toana ia hedinarai, maka atoa gauna ese raro ai maka ia karaia bamona,
Bona tanobada ena toana be dabua ai ia noho laulau hairaina bamona.
15 To kara dika taudia edia diari be idia dekenai ia hedinarai lasi,
Bona idia ese taunimanima idia hahisia lou lasi.
16 Davara ena mai gabuna dekenai oi lao vadaeni, a?
Eiava davara ena dobu gabudia dekenai oi lao vadaeni, a?+
17 Mase ena iduara+ be oi dekenai idia hahedinaraia vadaeni, a?
Eiava dibura masemase gabuna ena iduara oi itaia vadaeni, a?+
18 Tanobada ena pada oi lalopararalaia vadaeni, a?+
Bema inai ibounai oi diba, mani lau oi hamaoroa.
19 Diari be edena kahana dekenai ia noho?+
Bona dibura ena gabu be edeseni?
20 Edia noho gabuna dekenai oi abia lao diba, a?
Bona edia noho gabuna dekenai ia lao dala oi diba, a?
21 Oi be idaunegai oi vara dainai unai oi diba, a?
Bona emu mauri lagani be momo herea dainai unai oi diba, a?
22 Sinou idia haboua rumadia dekenai oi vareai vadaeni, a?+
Eiava aisi nadi idia haboua rumadia oi itaia vadaeni, a?+
23 Unai gaudia be dika bada negana,
Bona tuari dinana totona lau hegaegaelaia.+
25 Daika ese medu ranu ena heau dalana
Bona guba boiboi ena dala ia karaia,+
26 Unai amo tau ta ia noho lasi gabuna ai
Bona tano kaukauna ai medu ia hadihoa?+
27 Daika ese tano kaukauna ena nadi gabudia ai ranu ia henia
Bona rei idia tubu?+
29 Daika be aisi ena tamana?
Guba ena aisi be daika ese ia havaraia?+
30 Daika ese ranu ena koua gauna be nadi bamona ai ia halaoa?
Bona daika ese ranu dobudia edia ataiai be aisi ai ia halaoa?+
31 Oi ese hisiu orea ladana Kima be varo amo oi kwatua hebou diba, a?
Eiava hisiu orea ladana Kesili be varo amo oi ruhaia diba, a?+
32 Oi ese hisiu orea ladana Masaroto oi hakaua diba, edia nega hegeregerena, a?
Eiava hisiu orea ladana Asa bona ena natudia oi hakaua diba, a?
33 Guba gaudia idia biagua taravatudia oi diba, a?+
Eiava oi ese tanobada dekenai unai gaudia edia taravatu do oi biagua diba, a?
34 Oi be ori dekenai do oi boiboi,
Unai amo abata ranu idia mailaia, oi ia koua totona, a?+
35 Oi ese kevaru do oi siaia lao edia gaukara karaia totona, a?
Bona kevaru do idia giroa mai bona oi dekenai do idia gwau, ‘Emai gaukara ai hagugurua vadaeni!’
37 Daika be mai ena aonega ori ia duahidia totona?
Eiava daika ese guba ena ranu hodu ia bubua diho diba?+
38 Kahu be kopukopu ai ia halaoa
Bona tano ida idia haboua.
39 Laiona ta ena aniani oi tahua diba, a?
Eiava laiona maragidia idia bogakunu totona aniani oi henia diba, a?+
40 Edia noho gabudia ai idia noho neganai,
Eiava edia hunia gabudia ai idia noho neganai, daika ese ia ubudia?
41 Daika ese galo manudia edia aniani ia hegaegaelaia?+
Edia natudia be Dirava ena heduru totona idia boiboi
Bona idia roho loaloa neganai, daika ese edia aniani ia henia?
39 “Ororo nanigosi edia mara negana oi diba, a?+
Dia ese edia natuna idia havaraia neganai, idia oi itaia vadaeni, a?+
2 Edia natuna be hua hida bogana lalonai ia noho oi diba, a?
Edia mara negana oi diba, a?
3 Idia hekure diho bena edia natuna idia havaraia,
Bena edia mara ena hisihisi ia ore.
4 Edia natudia be idia goada idia lao bona uda lalonai idia bada,
Bona edia sinana idia rakatania bona idia giroa lou lasi.
5 Daika ese uda doniki ena varo ia kokia,+
Bona ia ruhaia?
6 Lau ese tano kaukau palakana
Bona damena tanona be doniki ena noho gabuna ai lau halaoa.
7 Uda doniki be siti taudia edia regerege amo ia noho daudau
Ia ese ena biaguna ena boiboi ia kamonai lasi danu.
8 Ororo dekenai idia daekau, rei gabudia dekenai idia lao,
Bona ava idauidau idia tahua.
9 Uda boromakau do ia ura oi do ia hesiai henia, a?+
Hanuaboi ai emu animal edia aniani rumana ai do ia mahuta, a?
10 Oi ese uda boromakau be varo amo do oi hakaua emu uma ena tano ia geia totona, a?
Eiava oi ia badinaia, koura dekenai tano ia geia totona, a?
11 Boromakau ena goada bada dainai do oi abidadama henia, a?
Bona emu gaukara metaudia do ia karaia, a?
12 Oi laloa boromakau ese emu uma ena anina do ia abia mai, a?
Bona emu witi moia gabuna ai do ia haboua, a?
13 Ostris* be mai moale ida ena apena ia hamarerea,
To iena hanina bona huina be noko manu ida ia hegeregere, a?+
14 Badina kasowari ese ena gatoi be tano ai ia rakatania,
Bona tano ese ia hasiahua diba.
15 Ia laloa lasi taunimanima ese edia aena amo gatoi idia makohia diba
Eiava uda animal ta ese ia moia diba.
16 Kasowari ese ena natudia ia dagedage henia, idia be hegeregere ena natudia lasi.+
Ia laloa ena natuna havaraia hisihisi ena hekwarahi be anina lasi.
17 Badina lau, Dirava, ese ia dekenai aonega lau henia lasi
Bona laloparara danu lau henia lasi.
18 To kasowari ia gini bona ena apena ia botaia bona ia heau,
Kasowari ese hosi bona ena guia tauna ia halusia diba.
19 Oi ese hosi dekenai goada oi henia, a?+
Hosi ena aiona ai huina latana oi atoa, a?
20 Hosi be kwadi bamona ia roho totona, oi ese goada oi henia, a?
Bona ena boiboi bada ese taunimanima ia hagaria.+
21 Koura ai hosi be ena aena amo tano ia botaia bona ena goada ia hahedinaraia+
Bona tuari totona ia heau lao.+
22 Hosi be gau ta dekenai ia gari lasi.+
Ia be tuari kaia dainai ia heau siri lasi.
23 Hosi be diba udaia gauna ia huaia dainai, ia heau neganai ena regena ia daekau,
Bona dina ena diari dainai io idia diaridiari.
24 Mai ura bada ida ia heau lao haraga,
Kibi ena regena ia kamonai bona tuari totona ia heau.
25 Kibi idia hiriria neganai, ia boiboi badabada,
Gabu daudau amo tuari ena bonana ia abia
Bona tuari biagudia edia boiboi bona tuari taudia edia gadona ia kamonai.+
26 Oi ese bogibada dekenai roho dalana oi hadibaia, a?
Bona ia oi hadibaia saut kahana dekenai ia roho lao totona, a?
27 Eiava emu oda dainai ugava be ia roho daekau+
Bona ena ruma be ataiai gabudia ai ia karaia, a?+
28 Ugava be ororo badana ena isena dekenai ia noho,
Nadi badana lalonai ia noho.
29 Unai gabu amo aniani ia tahua+
Bona ena matana be gabu daudau momokani ia itaia diba.
30 Ugava be mase tauanidia idia noho gabudia ai idia haboua,
Bona ena natudia be rara idia inua,”+
40 Iehova ese Iobu ma ia haere henia, ia gwau:
2 “Kerere ia tahua tauna be Siahu Ibounai Diravana ida do ia hepapahuahu, a?+
Ia ura Dirava ia gwauraia kerere tauna ese unai ia haerelaia be namo.”+
3 Iobu ese Iehova ia haere henia, ia gwau:
4 “Lau be anina lasi.+
Edena bamona oi lau haere henia diba?
Egu imana amo egu uduna lau koua.+
5 Lau hereva loulou, to hari do lau hereva lou lasi,
Gau ta do lau gwauraia lasi.”
6 Bena Iehova be lai badana amo ia hereva, Iobu dekenai ia gwau:+
7 “Mani oi gini, tau goadana ta bamona.
Oi do lau nanadaia, bona lau oi haere henia.+
8 Egu hahemaoro goevana do oi henanadailaia, a?
Lau do oi gwauraia kerere, unai amo sibona do oi gwauraia maoro, a?+
9 Emu goada be Dirava momokanina ena goada hegeregerena, a?+
Eiava emu gadona be egu gadona bamona, guba ena boiboi bamona, a?+
10 Mani emu hairai bona emu goada oi hahedinaraia,
Mani emu hemataurai bona siahu bada oi hahedinaraia.
11 Emu badu oi hahedinaraia.
Hekokoroku taudia ibounai oi itaia, bona idia oi hahemaraia.
12 Hekokoroku taudia ibounai oi itaia, bona idia oi hamanaua.
Bona kara dika taudia be edia gini gabuna ai oi moia diho.
13 Idia ibounai be kahu lalonai oi hunia,
Hunia gabudia ai idia oi lokaia,
14 Bena unai neganai oi dekenai hanamoa hereva do lau gwauraia,
Unai be emu imana idibana ese oi do ia hamauria.
15 Inai be hipopotomas,* lau ese lau karaia, oi lau karaia bamona.
Hipopotomas be rei ia ania, boromakau bamona.
16 Hipopotomas ena koekoena ena goada
Bona ena bogana ena masolo mani oi itaia!
17 Iena iuna ia ha-aukaia, sida au bamona,
Ena mamuna varovaro be idia kwatua hebou.
18 Iena turia be kopa bamona
Bona ena aena be auri bamona.
19 Dirava ese ia karaia gaudia ibounai amo ia be ginigunana bona goada herea,
To lau, iena Havaraia Tauna, sibona ese tuari kaia amo lau hamasea diba.
20 Ororo ai idia tubu aniani ia ania,
Unuseniai uda animal ibounai idia gadara.
21 Au maragidia mai edia ginigini henunai ia hekure,
Swampa ena siriho gabudia ai.
22 Ia be au maragidia mai edia ginigini ena keruma gabuna ai ia noho,
Bona koura ai idia noho popla au ese idia hagegea.
23 Bema sinavai ia abata, unai ia garilaia lasi.
Ia be goada, ena be Ioridane sinavai+ ena ranu be ia vairanai ia aru haraga.
24 Oi ia itaia lalonai, oi dogoatao diba, a?
Eiava oi ese huku amo ena udu baubau oi gwadaia diba, a?
41 “Oi ese huala*+ be kimai varo amo oi veria diba, a?
Eiava ena malana be varo amo oi kwatua diba, a?
2 Oi ese kwanau be ena udu baubau amo oi veria hanaia diba, a?
Eiava huku amo ena aukina oi gwadaia diba, a?
3 Ia ese oi do ia noia loulou oi hebogahisi henia totona, a?
Eiava oi do ia hereva henia namonamo, a?
4 Leviatano be oi ida gwauhamata ta ia karaia diba,
Hanaihanai emu hesiai gaukara ia karaia totona, a?
5 Oi be Leviatano ida do oi gadara, manu ta ida oi gadara bamona, a?
Eiava varo amo oi kwatua emu natuna kekeni maragidia ida ia gadara totona, a?
6 Hoihoi taudia ese Leviatano ena davana do idia hepapahuahulaia, a?
Eiava do idia utua maragimaragi bona edia huanai idia haria diba, a?
7 Oi ese io* momo amo Leviatano ena kopina do oi gwadaia, a?+
Eiava ena kwarana be karaudi amo do oi pidia, a?
8 Ia latanai emu imana oi atoa
Bona ena dagedage toana do oi itaia, vadaeni unai bamona do oi karaia lou lasi!
9 Bema oi ura Leviatano oi dogoatao, unai oi karaia diba lasi.
Iena toana sibona ese oi do ia hagaria bada.
10 Ta ia ura lasi Leviatano ia habadua.
Vadaeni daika be hegeregere egu vairanai ia gini totona?+
11 Daika ese lau dekenai gau ta ia henia guna, unai amo ia dekenai davana lau henia diba?+
Guba ena henunai idia noho gaudia ibounai be lauegu.+
12 Lau ese Leviatano ena aena edia goada do lau herevalaia noho,
Bona iena goada bada bona ena tauanina ia vara dalana do lau gwauraia noho.
13 Daika ese Leviatano ena kopina ia kokia vadaeni?
Daika be iena uduna lalonai do ia vareai?
14 Daika ese Leviatano ia doria ena uduna ia kehoa totona?
Iena isena ibounai ese gari ia havaraia.
15 Iena doruna be mai ena unana*
Idia hakapua hebou, bona ia auka.
16 Iena unana be ta ta kahirakahira idia noho,
Unai amo hodahoda ia vareai diba lasi.
17 Unai unana be idia kamokau,
Bona idia hakapua hebou bona idia parara diba lasi.
18 Leviatano ia asimana neganai, diari ia hedinarai,
Bona ena matana ena diari be daba ena dina ia daekau bamona.
19 Iena uduna amo kevaru bamona diari idia raka-lasi,
Bona lahi maragimaragidia idia raka-lasi.
20 Iena udu baubau amo kwalahu ia raka-lasi,
Lahi gabuna amo ia mai siriho ena kwalahu bamona.
21 Ia hahodi neganai, lahi gida idia araia lou,
Bona ena uduna amo lahi idia raka-lasi.
22 Iena aiona be goada momokani,
Bona ia idia itaia animal ibounai idia gari dikadika.
23 Iena bogana ena kopina be auka momokani,
Bona ia be goada kopa auri bamona, oi kokia diba lasi.
24 Iena kudouna be auka momokani,
Oibe, ia auka momokani, witi moia nadina bamona.
25 Ia toreisi neganai, animal goadadia idia gari,
Bona mai dagedage ida ia marere neganai, gari ia havaraia.
26 Tuari kaia amo idia halusia diba lasi,
Bona io eiava peva ena diba mai ena matana be do idia hegeregere lasi.+
27 Ia dekenai auri be witi momoru bamona
Bona kopa be au manokana ta bamona.
28 Peva ena diba ese Leviatano ia hagaria diba lasi.
Bona ia dekenai vilipopo ena nadi be witi momoru bamona.
29 Ia dekenai kwadia au be goada lasi,
Bona ia dekenai idia negea lao io be anina lasi.
30 Leviatano ena bogana ena kopina be idia makohi uro ena kahana ta bamona,
Kopukopu ai ia rau neganai, ena maka be witi moia gauna* ese ia karaia maka bamona.+
31 Leviatano be davara ia hamarerea neganai, toana be ranu ia boela bamona.
Davara ia marere ena toana be pani lalonai ia boela noho oela bamona.
32 Davara lalonai ia nahu lao neganai, gwaragwara idia hedinarai.
Unai gwaragwara ena toana be huina kurokuro bamona.
33 Tanobada dekenai animal ta be unai bamona lasi,
Leviatano ia gari diba lasi.
34 Ia be dagedage animal ibounai dekenai ia gari lasi.
Ia be dagedage animal badadia ibounai edia king.”
42 Vadaeni Iobu ese Iehova ia haere henia, ia gwau:
2 “Hari lau diba oi be hegeregere gau ibounai oi karaia totona
Bona oi ura oi karaia gaudia danu be gau ta ese ia koua diba lasi.+
3 Oi gwau, ‘Daika ese egu sisiba herevadia dekenai daradara ia havaraia noho bona ia laloa namonamo lasi?’+
Unai dainai lau hereva, to lau laloparara lasi
Lau totona gau namodia be momo herea, to unai lau diba lasi.+
4 Oi gwau, ‘Mani oi kamonai, bona do lau hereva.
Oi do lau nanadaia, bona lau oi haere henia.’+
5 Lau ese emu sivarai lau kamonai,
To hari oi lau itaia.
6 Unai dainai lau gwauraia herevadia be maoro lasi,+
Bona lau helalo-kerehai totona, tano bona lahi kahuna dekenai lau helai.”+
7 Iehova be Iobu ia hereva henia murinai, Iehova be Temana tauna Elipasa dekenai ia gwau:
“Lau be oi bona emu turadia rua dekenai lau badu momokani,+ badina lau umui herevalaia neganai, hereva momokani umui gwauraia lasi,+ to egu hesiai tauna Iobu be hereva momokani ia gwauraia. 8 Vadaeni boromakau 7 bona mamoe tau 7 umui abia bona egu hesiai tauna Iobu dekenai umui lao, bona umui sibona totona gabua boubou umui henia. Bona egu hesiai tauna Iobu be umui totona do ia guriguri,+ badina ia be lau totona hereva momokani ia gwauraia. Lau ese iena noinoi do lau abia dae, unai amo lau totona umui gwauraia hereva kereredia dainai umui do lau panisia lasi.”
9 Vadaeni Temana tauna Elipasa, Suhi tauna Biledada, bona Namata tauna Sopara be Iehova ena hereva hegeregerena idia karaia. Bona Iehova be Iobu ena guriguri ia abia dae.
10 Iobu be ena turadia totona ia guriguri murinai,+ Iehova ese Iobu ena hisihisi ia kokia+ bona kohu momo bona animal ia henia lou. Iehova ese Iobu dekenai gau momo ia henia, guna ia biagua gaudia be nega rua ia habadaia.+ 11 Iobu ena tadikaka bona taihu ibounai bona turadia gunadia ibounai+ be ia dekenai idia mai bona ena ruma ai idia aniani hebou. Iobu dekenai idia hebogahisi bona ia idia hagoadaia, badina ia davaria dika idauidau be Iehova ese ia koua lasi. Idia ta ta ese ia dekenai moni bona golo rini ta idia henia.
12 Vadaeni Iehova ese Iobu ena mauri ia hanamoa lou, guna ena mauri namona ia hereaia,+ bona Iobu be mamoe ibounai 14,000, kamelo 6,000, boromakau 2,000, bona doniki hahine 1,000 ia abia lou.+ 13 Iobu be natudia memero 7 bona natudia kekeni toi ia abia lou.+ 14 Iobu ese ena natudia kekeni edia ladana ia hatoa, ginigunana be Iemima, iharuana be Kesaia, bona ihatoina be Kerene-hapuku. 15 Iobu ena natudia kekeni edia hairai ese unai tano ai idia noho hahine ibounai edia hairai ia hereaia, bona Iobu ese idia bona edia tadikakadia dekenai ahuna ia henia.
16 Bena Iobu be lagani 140 ma ia mauri noho, bona ia ese natudia bona ena tubudia ia itaia, ena bese ena uru ibounai 4 ia itaia. 17 Iobu ia mauri daudau bona ena mauri ia moalelaia, bena ia mase.
Reana anina be “Idia Inai Henia Tauna.”
Heb., “Dirava ena natudia.”
Eiava reana, “Kevaru.”
Heb., “Dirava ena natudia.”
Diksenari ai, “Ne′phesh; Psy·khe′” itaia.
Diksenari ai, “Ne′phesh; Psy·khe′” itaia.
Heb., “Leviatano.”
Eiava reana, “taunimanima idia noho lasi gabudia be sibona totona idia haginia lou.”
Heb., “diari ia henia.”
Eiava “palanilaia.”
Eiava “laiona natudia.”
Eiava “Lauma.” Diksenari ai, “Ru′ach; Pneu′ma” itaia.
Eiava “gwaukau taudia.”
Israela ai ia noho. Ia be kaubebe bamona, ena apena be 4. Ena apena idia do vara lasi neganai, ia be dabua ia ania.
Heb., “helaga taudia.”
Eiava “Tano ena nadi be oi ida gwaubou ta do umui karaia.”
Eiava “noho hanaihanai lalokauna.” Diksenari itaia.
Heb., “tadikakadia.”
Diksenari itaia.
Eiava “Sheol,” unai be, mase taudia guria gabuna. Diksenari itaia.
Heb., “hahodi ta.”
Eiava “Ia ese nadi amo idia karaia ruma ia itaia.”
Reana davara ena dagedage animal badana.
Eiava “Ena be lau be mai egu kerere lasi.”
Heb., “Lau be milika bamona oi bubua bona sisi bamona lau oi giroa.”
Eiava “noho hanaihanai lalokauna.” Diksenari itaia.
Eiava “Sheol,” unai be, mase taudia guria gabuna. Diksenari itaia.
Eiava reana, “hereva henia.”
Eiava “laga.”
Eiava “edia gau ibounai ia kokia.”
Eiava “Dirava badinaia karana ia rakatania tauna.”
Heb., “ia,” unai be Iobu ia herevalaia.
Israela ai ia noho. Ia be kaubebe bamona, ena apena be 4. Ena apena idia do vara lasi neganai, ia be dabua ia ania.
Eiava reana, “bona idia utua oho.”
Heb., “lau.”
Eiava “Sheol,” unai be, mase taudia guria gabuna. Diksenari itaia.
“Bada” ese noho namo, sibona hamoalea karadia, bona hekokoroku ia laulaulaia.
Eiava “lau ida idia hebou taudia.”
Ia be liva ena idiba kahanai ia noho puse maragina. Ia lalonai be ielo bona grin bamona ranu iditana. Unai ese bogana lalonai aniani ia hapararaia.
Eiava reana, “lau itaia noho, lau mahuta lasi.”
Eiava “Sheol,” unai be, mase taudia guria gabuna. Diksenari itaia.
Eiava “Sheol,” unai be, mase taudia guria gabuna. Diksenari itaia.
Reana Iobu bona ia bamona taudia eiava ia idia hebogahisi henia taudia ia herevalaia.
Eiava reana, “goeva lasi.”
Eiava “mase dikana.”
Eiava “ia araia noho salipa.”
Eiava “nega sisina do idia noho gabuna.”
Eiava “hahisia vadaeni.”
Heb., “egu kwarana amo korona ia kokia.”
Eiava “egu varavara.”
Ia be liva ena idiba kahanai ia noho puse maragina. Ia lalonai be ielo bona grin bamona ranu iditana. Unai ese bogana lalonai aniani ia hapararaia.
Miusiki gauna ta mai ena varo, gita bamona, to ena toana be idau.
Eiava “karaharaga,” anina be, mase ia vara haraga bona hisihisi ta be lasi.
Eiava “Sheol,” unai be, mase taudia guria gabuna. Diksenari itaia.
Eiava reana, “lau umui dagedage henia totona.”
Heb., “Ia dekenai tanobada kourana edia ororo maragidia edia mamina be namo herea.”
Eiava “tama sina idia mase natudia.”
Eiava reana, “uma ai animal ena aniani idia haboua.”
Eiava reana, “Ororo ena kahana ai nadi magudia huanai olive oela idia karaia noho.”
Eiava “Sheol,” unai be, mase taudia guria gabuna. Diksenari itaia.
Eiava “mase dekenai mai edia siahu lasi taudia.”
Eiava “Sheol,” unai be, mase taudia guria gabuna. Diksenari itaia.
Diksenari ai, “Ne′phesh; Psy·khe′” itaia.
Eiava reana, “ena imana amo ia karaia.”
Israela ai ia noho. Ia be kaubebe bamona, ena apena be 4. Ena apena idia do vara lasi neganai, ia be dabua ia ania.
Eiava reana, “Edia gabu amo ia dekenai edia imana idia patapataia bona idia wisili.”
Eiava “Kusu.”
Heb., “aonega herevadia.”
Eiava “hesiai taudia.”
Heb., “idia hunia.”
Eiava reana, “Idia ese egu vairana ena diari idia hadiburaia lasi.”
Eiava reana, “Lau davaria hisihisi badana ese egu toana ia hadikaia.”
Eng., ostrich. Ia be kokokoko bamona.
Eiava reana, “fiva gorere.”
Miusiki gauna ta mai ena varo, gita bamona, to ena toana be idau.
Eiava reana, “koikoi taudia lau bamoa, a?”
Eiava “egu bese taudia idia kokia be namo.”
Eiava “tama sina idia mase natudia.”
Eiava reana, “Lau itaia siti ena geiti ai lau be heduru lau henia neganai.”
Heb., “Bona egu uduna ese egu imana ia kisi henia,” anina be, lau tomadiho henia.
Diksenari ai, “Ne′phesh; Psy·khe′” itaia.
Heb., “vamu.”
Eiava “tuari gauna ta.”
Eiava “aneru.”
Eiava “goada.”
Dirava ia herevalaia.
Eiava reana, “ia gwauraia kerere; hahemaoro henia totona.”
Eiava “ita davaria diba lasi.”
Eiava “ena palai ruma.”
Eiava reana, “durua totona ia hereva.”
Eiava reana, “dahaka.”
Eiava “noho hanaihanai lalokauna.” Diksenari itaia.
Eiava “auri amo idia karaia hevarivari.”
Heb., “Dirava ena natudia.”
Heb., “beibi pusena.”
Eng., ostrich. Ia be kokokoko bamona.
Heb., “Behemoto.”
Heb., “Leviatano.”
Inai idia gaukaralaia gwarume badadia gwadaia totona.
Eiava reana, “Iena unana be momo dainai ia heagi.”
Diksenari ai, “Witi moia gabuna” itaia.