LALOHISIHISI ANE
א [Aleph]*
1 Guna Ierusalema be taunimanima amo ia honu, to hari ta ia noho lasi!+
Guna bese ibounai huanai iena taunimanima be momo, to hari ia be vabu ta bamona ai ia lao!+
Guna provinsi* ibounai huanai ia be lohia hahinena ta bamona, to hari ia be igui hesiai hahinena!+
ב [Beth]
2 Hanuaboi ai ia taitai,+ bona ena matana ranu be medena dekenai ia diho.
Guna ia idia ura henia taudia ta ese ia idia durua lasi.+
Iena turadia ibounai ese ia idia koia,+ vadaeni iena inai taudia ai idia lao.
ג [Gimel]
3 Iuda besena be mai dagedage ida idia abidia lao igui hesiai gaukara idia karaia totona.+
Bese idauidau huanai do ia noho;+ laga-ani gabuna ta ia davaria lasi.
Ia idia dagedage henia besedia ibounai ese ia dekenai hisihisi bada idia henia.
ד [Daleth]
4 Siona dekenai idia lao daladia be idia taitai noho, badina ta be aria totona ia lao lasi.+
Ena geiti be idia dika+ bona ena hahelaga taudia be idia lalohisihisi.
Ena rami-hebou kekenidia be idia taitai noho, bona ia be ia lalohisihisi bada.
ה [He]
5 Hari ena inai taudia ese idia biagua bona ena inai taudia idia lalohekwarahi lasi.+
Badina iena kara dika momo dainai, Iehova ese ia dekenai hisihisi ia mailaia.+
Ena natudia be ena inai taudia ese idia guia.+
ו [Waw]
6 Siona ena natuna kekeni ena hairai ibounai be ia boio.+
Iena lohia taudia be ava gabuna namona idia davaria lasi dia bamona.
Edia inai taudia vairanai mai goada lasi ida idia raka.
ז [Zayin]
7 Ierusalema be hisihisi ia davaria bona ena noho gabuna be lasi neganai,
Ia laloatao, guna negadia ai ia be mai ena dava bada kohudia momo herea.+
To ena taunimanima be tuari taudia edia imana lalonai idia moru bona tau ta ese idia ia durua lasi dainai,+
Ena inai taudia ese unai idia itaia bona idia kirikirilaia.+
ח [Heth]
8 Ierusalema be kara dika bada ia karaia.+
Unai dainai ia be miro gauna ai ia lao.
Guna ia idia matauraia taudia ese idia dadaraia, badina idia itaia ia be kopina kavakava.+
Ia taitai mai lalohisihisi danu+ bona mai hemarai ida ena vairana ia giroa.
ט [Teth]
9 Ena kara mirodia be iena dabua dekenai.
Iena vaira nega ia laloa lasi.+
Iena moru be hoa gauna bona ena durua tauna be lasi.
Iehova e, egu hisihisi mani oi itaia, badina egu inai tauna ena goada be bada.+
י [Yod]
10 Tuari taudia be iena dava bada kohudia idia dadia.+
Badina ia itaia bese idaudia be iena dubu helaga lalonai idia vareai,+
Ena be oi ese taravatu oi atoa idia be oiemu taunimanima huanai do idia vareai lasi.
כ [Kaph]
11 Iena taunimanima ibounai be mai lalohisihisi ida idia taitai bona aniani idia tahua noho.+
Idia aniani bona mauri noho totona, edia dava bada kohudia idia henia.
Iehova e, mani lau oi itaia, lau be anina lasi hahinena* ta bamona ai lau lao.
ל [Lamed]
12 Dala ai umui raka hanaia taudia ibounai e, inai be gau ta lasi, a?
Mani umui itaia!
Lau davaria hisihisi be bada herea momokani,
Badina Iehova ese ena badu bada dinana ai lau ia panisia.+
מ [Mem]
13 Guba amo lahi ia siaia diho egu turia ta ta ia gabua ore totona.+
Reke ia negea egu aena tarapua totona bona egu dala be lasi dainai lau giroa.
Ia ese lau be lalohisihisi hahinena ai ia halaoa.
Dina ibounai lau gorere.
נ [Nun]
14 Egu kara dika be metau gauna bamona egu aiona dekenai ia atoa, iena imana amo ia kwatua.
Egu aiona dekenai ia atoa bona egu goada ia ore.
Lau tuari henia diba lasi taudia edia imana lalonai Iehova ese lau ia atoa.+
ס [Samekh]
15 Iehova ese egu huanai idia noho goada taudia ia kokia.+
Ia ese hutuma ia haboua tau matamatadia idia tuari henia totona.+
Iehova ese greips moia gabuna ai Iuda bese ena rami-hebou natuna kekeni ia moia.+
ע [Ayin]
16 Unai gaudia dainai lau taitai+ bona egu matana ranu ia diho noho.
Lau ia hagoadaia tauna eiava durua tauna be gabu daudau ai ia noho.
Egu natuna memero be idia daradoko badina egu inai taudia idia kwalimu.
פ [Pe]
17 Siona be iena imana ia abia isi,+ to hagoadaia tauna ta be lasi.
Iehova ese Iakobo ena inai taudia ia oda henia Iakobo do idia tuari henia.+
Idia dekenai Ierusalema be gau dikana ta ai ia lao.+
צ [Tsade]
18 Iehova be kara maoromaoro,+ iena taravatu* dekenai lau gwau-edeede.+
Taunimanima ibounai e, umui kamonai bona egu hisihisi umui itaia.
Egu rami-hebou kekeni bona tau matamata be inai taudia ese idia abia mauri.+
ק [Qoph]
19 Lau idia lalokau henia taudia dekenai lau boiboi, to idia ese lau idia koia.+
Siti lalonai egu hahelaga taudia bona egu tau badadia idia mase,
Badina idia mauri noho totona, aniani idia tahua to idia davaria lasi.+
ר [Resh]
20 Iehova e, mani oi itaia, lau be hisihisi bada herea lau mamia noho.
Egu bogana* ia giroagiroa.
Egu lalona ia hisihisi, badina lau be lau gwau-edeede bada.+
Ariara ai tuari kaia amo taunimanima idia alaia noho,+ bona ruma lalonai mase ia vara noho.
ש [Shin]
21 Taunimanima be egu taitai idia kamonai, to lau ia hagoadaia tauna ta be lasi.
Egu inai taudia ibounai ese egu dika ena sivarai idia kamonai.
Idia moale, badina oi ese unai dika oi havaraia.+
To oi gwauraia dinana oi mailaia neganai,+ unai dina ai idia ese lau abia hisihisi do idia mamia.+
ת [Taw]
22 Mani edia kara dika ibounai be oi vairanai do idia hedinarai, bona idia do oi panisia,+
Egu kara dika ibounai dainai lau oi panisia hegeregerena.
Badina lau lalohisihisi bada, bona egu lalona ia manoka.
א [Aleph]
2 Iehova be ia badu bada dainai, Siona ena natuna kekeni be ori koremana amo ia koua!
Israela ena hairai be guba amo tanobada dekenai ia negea diho.+
Iena badu dinana ai iena aena atoa gabuna ia laloaboio.+
ב [Beth]
2 Iehova be mai hebogahisi lasi ida Iakobo ena noho gabudia ibounai ia hadikaia.
Ia badu dikadika dainai Iuda ena natuna kekeni ena magu aukadia ia hamakohidia.+
Iuda basileia+ bona ena lohia taudia+ ia hamorudia bona ia hahemaraidia.
ג [Gimel]
3 Iena badu siahuna ai ia ese Israela ena goada* ibounai ia utua diho.
Edia inai taudia idia mai neganai, ia ese iena imana idibana ia kokia,+
Bona Iakobo dekenai ia badu dikadika, lahi ese gau ibounai ia araia ore bamona.+
ד [Daleth]
4 Tuari tauna bamona ia hegaegae ena diba do ia pidia bona inai tauna bamona iena imana idibana be tuari totona ia hegaegaelaia.+
Emai lalokau taudia ibounai ia hamasea noho.+
Bona Siona ena natuna kekeni ena palai ruma lalonai+ ena badu be lahi bamona ia bubua diho.+
ה [He]
5 Iehova be inai tauna bamona ai ia lao.+
Ia ese Israela ia hadonoa.
Iena kohoro aukadia ibounai ia hadonoa,
Iena magu aukadia ibounai ia hamakohia ore.
Ia ese Ierusalema siti lalonai taitai bona lalohisihisi ia habadaia.
ו [Waw]
6 Ia ese iena dubu helaga ia veria diho,+ uma ena ruma maragina idia veria diho bamona.
Ia ese iena aria ia hadokoa.+
Iehova ese Siona dekenai aria bona sabati dinana laloatao karana ia kokia,
Bona ia badu dikadika dainai king taudia bona hahelaga taudia ia matauraia lasi.+
ז [Zayin]
7 Iehova be iena boubou patana ia dadaraia,
Bona iena dubu helaga ia dadaraia danu.+
Ia ese Siona ena kohoro aukadia be ena inai tauna ena imana dekenai ia atoa.+
Iehova ena ruma lalonai idia boiboi bada,+ aria ta dekenai idia boiboi bamona.
ח [Heth]
8 Iehova be ena lalona ia hadaia, Siona ena magu do ia hadikaia totona.+
Hahetoho varona ia veria vadaeni.+
Dika ia mailaia totona iena imana ia koua lasi.
Unai dainai tano bona nadi magudia idia taitai.
Badina edia goada be hegeregere lasi.
ט [Teth]
9 Iena geiti be tano dekenai idia moru.+
Ia ese ena auri ia hadikadia.
Iena king taudia bona lohia taudia be idau bese huanai idia noho.+
Taravatu* be lasi, iena peroveta taudia be Iehova amo matahanai idia abia lasi.+
י [Yod]
10 Siona ena natuna kekeni ena tau badadia be mai regerege lasi ida tano dekenai idia helai.+
Edia kwarana dekenai kahu idia negea bona puse dabua idia atoa.+
Ierusalema ena rami-hebou kekenidia be tano dekenai idia goru diho.
כ [Kaph]
11 Lau taitai momo dainai egu matana idia hisihisi.+
Egu lalona ia hisihisi bada.
Egu taunimanima be hisihisi bada idia davaria bona natu maragidia be ariara dekenai idia maserea dainai,+
Egu kudouna* ia hisihisi bada.+
ל [Lamed]
12 Edia sinana idia nanadaia noho, “Aniani bona ranu be edeseni?”+
Bero ia davaria tauna bamona, siti ena ariara ai idia maserea bona idia hekure,
Sinadia ese idia rosia lalonai idia manoka idia lao bena idia mase.
מ [Mem]
13 Edena haheitalai be oi dekenai lau hahedinaraia diba,
Eiava Ierusalema ena natuna kekeni e, oi be dahaka ida lau hahegeregerea diba?
Siona ena rami-hebou natuna kekeni e, oi hagoadaia totona, oi be daika ida lau hahegeregerea diba?
Badina oiemu dika be bada herea davara hegeregerena.+ Daika ese oi do ia durua diba?+
נ [Nun]
14 Emu peroveta taudia be oi dekenai matahanai koikoidia bona anina lasi herevadia idia gwauraia,+
Bona oiemu kerere idia gwauraia hedinarai lasi dainai, oiemu inai taudia edia igui amo oi idia koua lasi,+
To oi dekenai hereva koikoidia idia gwauraia bona oi idia hakaua kerere.+
ס [Samekh]
15 Dala ai idia raka hanaia taudia be mai kiri ida edia imana idia patapataia.+
Ierusalema ena natuna kekeni dekenai idia hoa dainai idia wisili+ bona edia kwarana idia davea, idia gwau:
“Ia, inai be hairai bada herea bona tanobada taudia ibounai dekenai moale ia mailaia siti, a?”+
פ [Pe]
16 Emu inai taudia ibounai ese oi idia kirikirilaia.
Idia wisili bona edia isena idia koria bona idia gwau: “Ia ai hadonoa vadaeni.+
Ai naria dinana be inai!+ Ia ginidae bona ai itaia vadaeni!”+
ע [Ayin]
17 Iehova ese iena ura ia hagugurua+ bona iena hereva ia hamomokania,+
Idaunegai unai ia herevalaia.+
Hebogahisi lasi ida oi ia hadikaia.+
Ia ese emu inai taudia edia goada* ia habadaia bona oi idia hadikaia karana idia moalelaia.
צ [Tsade]
18 Siona ena natuna kekeni ena magu e, taunimanima edia kudouna be Iehova dekenai idia taitai noho.
Dina ai bona hanuaboi ai edia matana ranu idia heau diho sinavai goadana ta bamona.
Emu matana be taitai amo do ia laga-ani lasi.
ק [Qoph]
19 Toreisi! Hanuaboi ibounai do oi taitai.
Iehova vairanai emu lalohisihisi gaudia be ranu bamona oi bubua.
Emu natudia be hitolo bada dainai dala dekenai idia maserea noho.
Edia mauri totona ia dekenai emu imana oi abia isi.+
ר [Resh]
20 Iehova e, mani emu taunimanima oi itaia, oi ese mai dagedage ida oi kara henidia.
Hahine be sibodia edia natudia do idia ania noho,+ a?
Eiava hahelaga taudia bona peroveta taudia be Iehova ena dubu helaga lalonai do idia hamasea, a?+
ש [Shin]
21 Mero maragi bona tau buruka idia mase bona dala ai idia hekure.+
Kaia amo rami-hebou kekeni bona memero matamata idia hamasedia.+
Emu badu dinana ai mai hebogahisi lasi ida idia oi hamasea.+
ת [Taw]
22 Aria ta oi karaia hegeregerena,+ oi ese gari ia havaraia karadia be gabu ibounai amo oi boiria mai.
Iehova ena badu dinana ai, tau ta ia heau mauri diba lasi.+
Lau ese lau havaraia bona naria natudia be egu inai tauna ese ia hamasea ore.+
א [Aleph]
3 Dirava ia badu momokani dainai ai ia panisia, bona unai hisihisi lau mamia.
2 Ia ese lau ia lulua bona dibura dekenai lau raka, diari be lasi.+
3 Oibe, dina ibounai lau ia kara auka henia.+
ב [Beth]
4 Ia ese egu tauanina bona egu kopina ia hahisia bada,
Ia ese egu turia ia hamakohidia.
5 Ia ese magu amo lau ia hagegea bona poisini avadia bona hekwakwanai amo lau ia koua.+
6 Ia ese lau ia doria dibura gabudia dekenai lau helai totona, idaunegai idia mase tatau bamona.
ג [Gimel]
7 Magu amo lau ia koua, unai amo lau heau mauri diba lasi,
Metau bada kopa auri amo lau ia guia.+
8 Bona mai lalohisihisi ida heduru totona lau taitai neganai, lauegu guriguri ia dadaraia.+
9 Egu raka dalana be nadi amo ia koua,
Ia ese egu raka dalana ia hagagevaia.+
ד [Daleth]
10 Ia be laiona bamona ia hunia noho,+ bona bea bamona ia naria noho lau ia tarapua totona.
11 Ia ese dala amo lau ia veria lao bona lau ia darea maragimaragi,
Bena lau ia dadaraia.+
12 Ia be ena peva ia veria hegaegae bona ena diba amo lau ia makaia.
ה [He]
13 Iena bosea amo diba* ia abia bona egu kudouna ia pidia.
14 Taunimanima ibounai be dina ibounai ane idia abia bona lau idia kirikirilaia.
15 Ia ese hisihisi amo lau ia hahonua, bona mamina dika avadia amo lau ia ubua.+
ו [Waw]
16 Ia ese egu isena be nadi maragidia amo ia hamakohia,
Bona lahi ena kahu lalonai lau ia doria diho.+
17 Lau amo maino oi kokia, lau ese moale ena mamina lau laloaboio.
18 Unai dainai lau gwau, “Egu hairai ia ore bona Iehova dekenai egu helaro ia boio.”
ז [Zayin]
19 Lau oi laloatao badina lau be lau hisihisi bona lau be hanua lasi,+ mamina dika bona poisini ava lau ania.+
20 Do oi laloatao bona do oi tui diho lau oi durua totona.+
21 Egu kudouna ai unai do lau laloa, unai dainai mai haheauka ida oi do lau naria.+
ח [Heth]
22 Iehova ena lalokau* dainai ita be ita mase lasi,+
Badina iena hebogahisi karadia be idia doko diba lasi.+
23 Daba ibounai ia ese hebogahisi karadia ia hahedinaraia,+ ia noho hegaegae ita ia durua totona.+
24 Lau gwau vadaeni: “Iehova be egu ahuna,+ unai dainai ia do lau naria noho.”+
ט [Teth]
25 Iehova dekenai ia tabekau eiava ia tahua noho tauna be ia ese do ia hanamoa.+
26 Unai dainai mai haheauka ida Iehova ena hahemauri ia naria tauna be namo.+
27 Ena matamata neganai hisihisi ia huaia tauna be namo.+
י [Yod]
28 Bema Dirava ese ia dekenai ia vara dika ia koua lasi, namona be ia sibona ia helai bona ia maumau lasi.+
29 Do ia goru diho bona iena vairana be kahu dekenai do ia atoa,+ reana helaro ia do noho.+
30 Ia botaia tauna dekenai ena medena do ia henia, hisihisi ibounai do ia abia dae sibona.
כ [Kaph]
31 Badina Iehova be hanaihanai ita do ia dadaraia lasi.+
32 Ena be ia ese lalohisihisi ia havaraia, to iena lalokau* bada dainai ia ese hebogahisi do ia hahedinaraia danu.+
33 Badina ia ura lasi taunimanima edia natudia ia hahisia eiava hadikaia.+
ל [Lamed]
34 Dirava be inai kara ia ura henidia lasi: Tanobada ena dibura taudia idia moia karana,+
35 Ataiai momokani Diravana ena vairanai tau ta ena kota herevana idia koua karana,+
36 Bona kerere lasi tauna ena kota dalana idia hagagevaia karana,
Iehova be unai bamona kara ia inai henia.
מ [Mem]
37 Vadaeni, daika be ia hereva bona ia karaia diba? Iehova sibona be unai ia karaia diba.
38 Ataiai momokani Diravana ena uduna amo,
Hereva namodia sibona ia gwauraia.
39 Dahaka dainai ia mauri noho tauna be iena kara dika dainai ia davaria hisihisi ia maumauraia?+
נ [Nun]
40 Iseda kara do ita tahua namonamo,+ bona Iehova dekenai do ita giroa lou.+
41 Mani eda kudouna ibounai ida guba Diravana do ita guriguri henia bona iseda imana do ita abia isi.+
42 “Ai be ai kara dika bona ai gwau-edeede,+ bona oi ese aiemai kerere oi gwauatao lasi.+
ס [Samekh]
43 Oi badu dainai emai guriguri oi abia dae lasi;+
Hebogahisi lasi ida ai oi lulua bona ai oi alaia mase.+
44 Ori amo sibona oi koua, unai amo emai guriguri be oi dekenai ia daekau lasi.+
45 Bese idauidau huanai ai be momoru bamona oi halaoa.”
פ [Pe]
46 Emai inai taudia ibounai ese ai idia kirikirilaia.+
47 Nega ibounai ai gari dikadika badina ai be guri lalonai ai moru,+ bona emai bese be dika bada ia davaria.+
48 Egu taunimanima be dika bada idia davaria dainai, egu matana ranu be sinavai bamona idia heau noho.+
ע [Ayin]
49 Egu taitai be ia doko lasi,+
50 Ela bona Iehova be guba amo ena taunimanima edia hisihisi do ia itaia.+
51 Egu taunimanima edia hisihisi lau itaia dainai lau daradoko.+
צ [Tsade]
52 Lau be kerere ta lau karaia lasi, to egu inai taudia be manu bamona lau idia pidia.
53 Guri lalonai lau idia negea bona nadi amo lau idia hodoa.
54 Ranu ese egu kwarana ia koua bona lau gwau: “Do lau mase inai!”
ק [Qoph]
55 Guri dobu masemase amo, Iehova e, emu ladana dekenai lau boiboi.+
56 Heduru totona lau boiboi neganai emu taiana do ia kamonai.
57 Egu boiboi dinana ai lau kahirakahira oi mai bona oi gwau: “Oi gari lasi.”
ר [Resh]
58 Iehova e, kota dekenai lau totona oi hereva, bona dika amo lau oi hamauria.+
59 Iehova e, lau dekenai idia karaia kara gageva oi itaia vadaeni, mani lau totona hahemaoro maoromaoro oi karaia.+
60 Mai badu ida lau dekenai idia karaia dagedage karadia bona edia palani ibounai be oi itaia vadaeni.
ש [Sin] eiava [Shin]
61 Iehova e, lau dekenai idia gwauraia hereva dikadia bona edia palani ibounai be oi kamonai vadaeni,+
62 Dina ibounai lau idia dagedage henia taudia be gado maragi ai idia gwauraia hereva be oi kamonai vadaeni.
63 Idia oi itaia, ena be idia gini eiava idia helai, edia ane amo lau idia kirikirilaia!
ת [Taw]
64 Iehova e, edia kara hegeregerena edia davana do oi henia.
65 Oi ese idia do oi hadikaia, edia kudouna do oi ha-aukaia.
66 Mai emu badu ida idia do oi lulua bona Iehova, oiemu guba henuna amo idia do oi haorea momokani.
א [Aleph]
4 Dava bada golo ena diaridiari ia ore!+
Dubu Helaga ena nadi+ be dala ena kona* ai idia noho kava!+
ב [Beth]
2 Guna Siona ena natuna memero be dava bada golo bamona,
To hari idia be hodu bamona,
Uro karaia tauna ese raro amo idia ia karaia!
ג [Gimel]
3 Uda sisia be edia natuna dekenai rata idia henia,
To egu taunimanima ena natuna kekeni be ia dagedage,+ taunimanima lasi gabuna ai ia noho ostris* bamona.+
ד [Daleth]
4 Beibi ena uduna ia kaukau badina rata ia inua lasi.
Natudia be aniani totona idia noinoi,+ to ta ese ia henidia lasi.+
ה [He]
5 Guna aniani digaradia idia ania taudia be mai hitolo bada danu dala ai idia hekure.+
Guna dava bada dabua idia atoa taudia+ be lahi ena kahu ai idia hekure.
ו [Waw]
6 Egu taunimanima edia dika davana* be Sodoma ena dika davana ia hanaia momokani,+
Dirava ese ia hadikaia haraga, bona bese ta ese ia durua diba lasi.+
ז [Zayin]
7 Siona ena Nasiri taudia+ be goeva momokani sinou bamona, bona edia kopina be kurokuro momokani milika bamona.
Edia kopina be kakakaka momokani korol bamona, bona idia diaridiari sapairo nadi bamona.
ח [Heth]
8 Edia toana be korema momokani, lahi ena guma bamona,
Dala ai edia toana do oi diba lasi.
Edia tauanina ia maragimaragi bona edia turia ia hedinarai,+ edia kopina ia kaukau au ia kakoro bamona.
ט [Teth]
9 Tuari kaia amo idia mase taudia be namo, to hitolo dainai idia mase taudia be dika bada idia davaria,+
Aniani lasi dainai idia turia kavakava bona idia mase, tuari kaia ese idia ia gwadaia bamona.
י [Yod]
10 Guna hebogahisi idia hahedinaraia sinadia ese edia natudia idia nadua.+
Egu taunimanima be dika idia davaria negana ai, edia natudia idia ania.+
כ [Kaph]
11 Iehova ese iena badu ia halasia,
Iena badu siahuna ia bubua diho.+
Bona ia ese Siona ai lahi ia havaraia bona ena badina nadidia ia araia.+
ל [Lamed]
12 Tanobada ena king taudia bona tanobada ai idia noho taudia ibounai idia hoa,
Badina idia laloa tuari taudia be Ierusalema ena geiti ai do idia vareai lasi.+
מ [Mem]
13 Unai ia vara badina ena peroveta taudia idia kara dika bona hahelaga taudia idia kerere,+
Idia ese hanua lalonai kara maoromaoro taudia idia alaia.+
נ [Nun]
14 Unai peroveta taudia bona hahelaga taudia be dala ai idia loa kava, matakepulu taudia bamona.+
Rara ese edia dabua ia hamiroa,+
Unai dainai taunimanima idia ura lasi edia dabua idia dogoatao.
ס [Samekh]
15 Idia dekenai idia boiboi: “Umui lao! Miro! Umui lao! Umui lao! Ai umui dogoatao lasi!”
Badina idia be ruma lasi bona idia loa kava.
Idau bese taudia idia gwau: “Idia be ita ida do idia noho lasi.*+
פ [Pe]
16 Iehova ese idia ia hapararaia,+
Idia do ia lalonamo henia lou lasi.
Tatau ese hahelaga taudia do idia matauraia lasi,+ bona tau badadia do idia lalonamo henidia lasi.”+
ע [Ayin]
17 Dala ai itaia noho ta ese ai ia durua totona, to ai naria kava.+
Ai do ia durua besena ta ai tahua, to ai do ia hamauria diba lasi.+
צ [Tsade]
18 Emai inai taudia ese ai idia tahua noho,+ unai dainai ariara dekenai ai raka loaloa diba lasi.
Emai mauri dokona be ia kahirakahira vadaeni, emai mase dinana be ia ginidae inai!
ק [Qoph]
19 Ai idia lulua taudia idia heau haraga momokani, guba ai idia roho ugava bamona.+
Ororo dekenai ai idia lulua bona tano kaukau gabuna dekenai ai idia dogoatao.
ר [Resh]
20 Iehova ese ia horoa tauna, emai mauri ena laga,+ be guri badana lalonai idia guia,+
Guna ia ai herevalaia ai gwau: “Iena gimaia henunai bese idaudia huanai do ai noho.”
ש [Sin]
21 Usu tano dekenai oi noho Edoma siti e, oi moale.+
To oi dekenai danu kapusi do ia mai,+ do oi kekero bona emu dabua oi kokia, kopina kavakava do oi noho.+
ת [Taw]
22 Siona e, Dirava ese oi ia panisia karana ia hadokoa vadaeni.
Igui hesiai taudia ai umui do ia halaoa lou lasi.+
To Edoma siti e, Dirava ese emu kerere do ia itaia.
Emu kara dika do ia hahedinaraia.+
5 Iehova e, mani ai dekenai idia vara gaudia oi laloatao.
Emai hemarai oi itaia.+
2 Emai tano be ai diba lasi taudia ese idia abia, bona emai ruma be idau tano taudia ese idia abia.+
3 Ai be tama sina idia mase natudia bamona, bona emai sinadia be vabu bamona.+
4 Ai inua ranu bona emai lahi au be moni amo ai hoidia.+
5 Ai idia lulua taudia be kahirakahira momokani aiemai aiona do idia dogoatao,
Ai hesiku bada, to ai dekenai laga-ani idia henia lasi.+
6 Aniani totona Aigupito+ bona Asuria+ dekenai ai noinoi.
7 Aiemai sene taudia ese kara dikadia idia karaia bona hari idia noho lasi, to hari ai ese edia kerere ena ahuna ai huaia.
8 Ladana maragi taudia ese ai idia biagua noho, bona tau ta be edia imana amo ai idia ruhaia diba lasi.
9 Mai gari ida aniani ai tahua,+ badina taunimanima lasi gabuna ai tuari kaia amo ai idia alaia diba.
10 Ai hitolo bada dainai, emai kopina be lahi badana bamona ia siahu.+
11 Siona ai idia noho hahine bona Iuda ai idia noho rami-hebou kekeni idia hadikadia.*+
12 Gunalaia taudia edia imana idia kwatua bona idia tauadae,+ bona tau badadia dekenai hemataurai idia hahedinaraia lasi.+
13 Tau matamatadia be witi moia nadi idia huaia, bona memero be au metaudia idia huaia dainai idia raka namonamo lasi.
14 Tau badadia be siti ena geiti dekenai idia noho lasi,+ bona memero matamatadia be edia miusiki idia gadaralaia lasi.+
15 Emai kudouna ia moale lasi bona emai mavaru be taitai ai ia lao.+
16 Korona be emai kwarana amo ia moru. Ai lalohisihisi badina kara dika ai karaia!
18 Bona Siona Ororo ai ta ia noho lasi dainai,+ uda sisia be unuseniai idia loaloa.
19 To oi, Iehova e, oi be emu terona ai oi helai ela bona hanaihanai.
Emu terona be do ia noho hanaihanai.+
20 Dahaka dainai ai oi laloaboio bona nega daudau lalonai ai oi dadaraia?+
21 Iehova e, mani ai oi abia dae bona oi dekenai do ai giroa lou.+
Emai dina oi hamatamataia lou, guna negadia bamona.+
22 To oi ese ai oi dadaraia momokani.
Oi ese ai oi badu henia momokani noho.+
Karoa 1 ia lao 4 be taitai anedia bona Heberu gado ena alfabet idia badinaia.
Eiava “distrik.”
Unai be Ierusalema ia laulaulaia.
Heb., “uduna.”
Heb., “bogarau.”
Heb., “doana ibounai.”
Eiava “hadibaia herevana.”
Heb., “egu asena be tano dekenai ia bubua.”
Heb., “doana.”
Heb., “natuna memero.”
Eiava “noho hanaihanai lalokauna.” Diksenari itaia.
Eiava “noho hanaihanai lalokauna.” Diksenari itaia.
Heb., “dala ibounai edia kwarana!”
Eng., ostrich. Ia be kokokoko bamona.
Heb., “kerere.”
Eiava “idau taudia bamona ita ida do idia noho lasi.”
Eiava “reipia.”