SEFANAIA
1 Iehova ese ena hereva be Sefanaia* dekenai ia henia. Sefanaia be Kusi ena natuna mero, Kusi be Gedalaia ena natuna mero, Gedalaia be Amaraia ena natuna mero, bona Amaraia be Hesekaia ena natuna mero. Unai nega ai Amona+ ena natuna mero Iosaia+ be Iuda ena king:
2 Iehova ia gwau: “Lau ese tano dekenai idia noho gaudia ibounai do lau haorea momokani.”+
3 Iehova ia gwau: “Lau ese taunimanima bona animal do lau haorea.
Lau ese guba ai idia roho manu bona davara ena gwarume do lau haoredia,+
Bona taunimanima idia tarapua gaudia*+ bona kara dika taudia do lau haorea,
Bona lau ese tanobada latanai taunimanima do lau haorea.”
4 “Lauegu imana do lau abia isi Iuda besena lau hadikaia totona
Bona Ierusalema ai idia noho taudia danu,
Bona lau ese inai gabu amo Bala idia tomadiho henia karadia ibounai do lau haorea momokani,+
Dirava idaudia idia tomadiho henia hahelaga taudia edia ladana, bona kaivakuku idia tomadiho henia hahelaga taudia do lau hamasea ore,+
5 Bona guhi ataiai amo guba ai idia noho gaudia ibounai* dekenai idia tui diho taudia,+
Bona idia gwauhamata Iehova do idia badinaia bona tomadiho henia,+
To Malikama ena ladana ai gwauhamata idia karaia taudia danu.+
7 Siahu Ibounai Lohiabadana Iehova vairanai umui regerege lasi, badina Iehova ena dina be kahirakahira.+
Iehova ese boubou gauna ta ia hegaegaelaia, ia boiria taudia ia hahelagaia totona.
8 “Egu boubou dinana ai, lau, Iehova, ese lohia taudia, king ena natudia,+
Bona idau bese taudia edia dabua idia hahedokilaia taudia ibounai do lau panisia.
9 Unai dina ai terona ena badinai idia gini taudia,
Bona edia biaguna ena ruma be dagedage bona koikoi karadia amo idia hahonua taudia do lau kota henia.”
10 Iehova ia gwau: “Unai dina ai,
Gwarume Iduarana amo taitai bada ena regena do ia daekau,+
Siti ena Kahana Iharuana dekenai do idia taitai badabada,+
Bona ororo ena kahana amo regerege bada do ia daekau.
11 Makatesa* ai umui noho taudia e, umui taitai badabada,
Badina hoihoi taudia be idia ore vadaeni,
Siliva idia sikelea taudia be idia mase ore vadaeni.
12 Unai nega ai lamepa do lau abia bona Ierusalema do lau sekea,
Vadaeni inai bamona taudia do lau kota henidia: Sibona edia mauri idia moalelaia taudia* bona edia kudouna dekenai idia gwau,
‘Iehova be gau namona ta do ia karaia lasi, bona gau dikana ta do ia karaia lasi.’+
13 Haida ese edia taga do idia dadia bona edia ruma do idia hadikaia.+
Edia ruma do idia haginia, to do idia noholaia lasi,
Bona vain umadia do idia karaia, to unai uma ena wain do idia inua lasi.+
14 Iehova ena dina badana be ia kahirakahira!+
Oibe, ia be kahirakahira bona ia mai haraga noho!+
Iehova ena dina ia mai ena regena be mai garina danu.+
Unai nega ai tuari tauna do ia taitai bada.+
15 Unai dina be Dirava ena badu bada dinana,+
Unai dina be lalohekwarahi bona lalohisihisi bada dinana,+
Unai dina be lai gubana bona hadikaia dinana,
Unai dina be diari lasi bona dibura dinana,+
Unai dina be ori korema bona dibura bada dinana,+
16 Unai dina ai taunimanima ese kibi do idia hiriria bona tuari totona do idia boiboi badabada,+
Bona siti mai edia magu aukadia bona kohoro badadia do idia tuari henia.+
17 Taunimanima dekenai lau ese lalometau do lau havaraia,
Bona idia be matakepulu taudia bamona do idia raka loaloa,+
Badina idia be Iehova idia kara dika henia.+
18 Iehova ena badu bada dinana ai edia siliva eiava golo ese idia do ia hamauria lasi.+
Badina iena badu be lahi bamona tanobada ibounai do ia gabua ore,+
Badina tanobada taudia ibounai do ia hadikaia ore, oibe, unai dina be do ia dika momokani.”+
2 Dirava ena hahemaoro dinana ia do ginidae lasi neganai,
Unai dina be witi momoru bamona lai ese ia do odaia lao lasi neganai,
Iehova ena badu siahuna be umui latanai ia do ginidae lasi neganai,+
Iehova ena badu dinana be umui dekenai ia do ginidae lasi neganai,
3 Tanobada ena manau taudia ibounai e, Iehova umui tahua,+
Umui be iena kara maoromaoro taravatudia* umui badinaia taudia.
Kara maoromaoro bona manau karana umui tahua.
Sedira Iehova ena badu dinana ai komu gabuna ta do umui davaria.+
4 Gasa siti be taunimanima ese do idia noholaia lasi,
Bona Asakelona be do ia noho kava.+
Asadoda taudia be dina tubu ai tuari taudia ese do idia luludia lao,
Bona Ekarona be do ia kokia ore momokani.+
5 “Kone badinai umui noho Kereti besena e, dika do umui davaria!+
Iehova be umui ia hahemaoro henia vadaeni.
Kanana, Filistia tanona e, oi do lau hadikaia,
Bona tau ta do ia mauri lasi.
6 Bona kone gabudia be animal edia aniani gabudia ai do idia lao,
Mamoe naria taudia totona ranu guri do idia noho bona mamoe totona nadi magu do idia noho.
7 Unai tano be idia mauri noho Iuda besena ena tatau edia tano ai do ia lao, idia be mamoe bamona,+
Unuseniai do idia aniani.
Hanuaboi ai Asakelona ena siti edia ruma lalonai do idia hekure.
Badina Iehova edia Dirava ese idia do ia laloa,*
Bona idia guia taudia be Dirava ese do ia abidia mai lou.”+
8 “Lau ese Moaba+ ena badu herevadia bona Amono taudia+ edia hereva dikadia lau kamonai vadaeni,
Idia ese egu taunimanima idia gwauraia dika bona mai hekokoroku ida idia gwau edia tano do idia abia.”+
9 Tuari oreadia edia Iehova,* Israela bese ena Dirava, ia gwau: “Lau mauri noho hegeregerena,
Moaba be Sodoma bamona ai do ia lao,+
Bona Amono taudia be Gomora bamona ai do idia lao.+
Ia be ava ginigini, damena ena guri, bona anina lasi gabuna bamona do ia noho hanaihanai.+
Egu taunimanima, idia do mauri noho tatau ese edia kohu do idia dadia,
Bona egu bese taudia oredia ese edia tano do idia abia.
10 Idia hekokoroku dainai idia dekenai unai do ia vara,+
Badina idia ese tuari oreadia edia Iehova ena taunimanima dekenai hereva dikadia idia gwauraia bona sibodia edia ladana idia abia isi.
11 Iehova dainai do idia gari dikadika,
Badina ia ese tanobada ena dirava ibounai do ia haorea,
Bona bese idauidau edia motumotu ibounai be edia gabu ta ta ai,+
Ia do idia tomadiho henia.
12 Umui Etiopia taudia danu be egu tuari kaia amo do lau alaia mase.+
13 Iena imana do ia abia isi not kahana dekenai bona Asuria do ia hadikaia,
Bona ia ese Nineva be taunimanima lasi gabuna ai do ia halaoa, bona tano kaukauna ai do ia lao.+
14 Animal seridia, dagedage animal idauidau* be ia lalonai do idia hekure.
Hanuaboi ai bogibada bona migu be du lalonai do idia mahuta.
Windo amo manu* be ane do idia abia.
Iduara ena raka vareai gabuna be nadi ese do ia koua,
Bona ia ese sida au amo idia karaia haba do ia kokia.
15 Guna unai siti be ia hekokoroku bona gau ta dekenai ia gari lasi,
Ena kudouna ai ia gwau, ‘Lau sibona be siti goadana, bona ma ta be lau bamona lasi.’
Idia itaia taudia be do idia hoa momokani,
Ia be dagedage animal edia hekure gabuna!
Idia raka hanai taudia ibounai be ia do idia kirikirilaia bona edia kwarana do idia davea.”*+
3 Ia gwau-edeede, ia miro bona ena taunimanima ia hahisia siti be dika do ia davaria!+
2 Ia ura lasi hereva ia kamonai+ bona matahakani ia abia dae lasi.+
Iehova ia abidadama henia lasi+ bona Dirava kahirakahira ia lao lasi.+
3 Ia huanai idia noho lohia taudia edia natudia be laiona bamona idia boiboi.+
Iena hahemaoro taudia be hanuaboi ai idia labana uda sisia bamona.
Turia ta idia ania noho lasi ela bona daba ia rere, badina ibounai idia ania haorea vadaeni.
4 Iena peroveta taudia be hemataurai lasi, koikoi taudia.+
5 Ia huanai Iehova be ia kara maoromaoro,+ kara dika ta ia karaia lasi.
Daba ibounai taunimanima dekenai iena hahemaoro maoromaoro ia hahedinaraia.+
Daba rere ena diari ia hedinarai hanaihanai bamona.
To kara dika taudia be hemarai idia diba lasi.+
6 “Bese idauidau lau haoredia, kona ai idia gini kohoro lau hamakohidia.
Edia dala ibounai lau hadikaia, unai amo ta ia raka vareai lasi.
Edia siti lau hadikaia ore, unai dainai taunimanima ese idia noholaia lasi.+
7 To lau gwau: ‘Hari lau do oi gari henia bona egu matahakani do oi abia dae.’+
Bema unai bamona ia karaia, iena siti do lau hadikaia lasi+
Lau ese iena kara dika ibounai dainai do lau kota henia lasi.
To, idia ura bada kara dika idia karaia noho.+
8 “Iehova ia gwau: ‘Unai dainai lau do umui naria noho mai haheauka ida+
Ela bona do lau toreisi, idia lau tuari henia bona edia kohu do lau dadia.*
Badina egu hahemaoro maoromaoro be bese idauidau bona basileia idauidau do lau haboua,
Idia latanai egu hereva aukadia bona badu siahuna do lau bubua.+
Badina egu badu be lahi bamona tanobada ibounai do ia gabua ore.+
9 Unai nega ai, lau ese taunimanima dekenai gado goevadaena ta do lau henia,
Unai amo idia ibounai ese Iehova ena ladana ai do idia boiboi,
Bona mai lalotamona ida ia do idia hesiai henia.’+
10 Etiopia ena sinavai gabudia amo,
Lau idia noinoi henia taudia, egu taunimanima, tano idauidau ai idia noho ese lau dekenai harihari gauna ta do idia mailaia.+
11 Unai dina ai lau dekenai oi karaia kara dikadia dainai
Oi do lau hahemaraia lasi,+
Badina lau ese oiemu huanai amo hekokoroku taudia do lau kokia,
Bona egu ororo helagana ai do oi hekokoroku lou lasi.+
12 Emu huanai manau taudia do lau hamauridia,+
Bona Iehova ena ladana be edia hahemauri gabuna ai do ia lao.
13 Israela ena bese taudia oredia+ be kara dika do idia karaia lasi.+
Do idia koikoi lasi bona edia uduna amo taunimanima do idia koia lasi.
Do idia aniani bona idia hekure bona ta ese idia do ia hagaria lasi.”+
14 Siona ena natuna kekeni e, mai moale ida oi boiboi!
Israela e, oi kwalimu dainai oi boiboi!+
Ierusalema ena natuna kekeni e, mai kudouna ibounai ida oi moale bona oi boiboi!+
15 Iehova be umui dekenai ia henia panisi ena hisihisi ia kokia.+
Emui inai tauna ia lulua.+
Iehova, Israela ena King, be umui huanai ia noho.+
Dika dainai do umui gari lasi.+
16 Unai dina ai Ierusalema be inai hereva do ia kamonai:
“Siona e, oi gari lasi.+
Emu imana do oi hamanokaia lasi.
17 Iehova emui Dirava be umui huanai ia noho.+
Tuari Tauna goadana bamona umui do ia hamauria.
Umui dainai do ia moale bada.+
Umui ia lalokau henia dainai, ia be do ia lalohekwarahi lasi.
Umui dainai mai moale ida do ia boiboi bada.
18 Aria dekenai idia mai lasi dainai idia lalohisihisi taudia do lau haboua.+
Aria dekenai idia lao lasi badina mai hemarai ida idau tano dekenai idia noho.+
19 Itaia! Unai nega ai oi idia hahisia taudia do lau tuari henia,+
Aena dika taudia do lau hamauria,+
Bona gabu idauidau ai idia noho taudia do lau haboua.+
Idia do lau hanamoa bona ladana bada do lau henidia
Edia hemarai idia itaia tanodia ibounai ese unai do idia diba.
20 Unai nega ai oi do lau hakaua mai,
Unai nega ai umui do lau haboua.
Tanobada taudia ibounai huanai oi do lau hanamoa bona ladana bada do lau henia,+
Bona emu taunimanima be igui tanona amo lau abia giroa mai dalana do oi itaia,” Iehova be unai bamona ia hereva.+
Anina be “Iehova ese Ia Hunia (Dava Bada Kohu Ia Hunia).”
Unai be, kaivakuku tomadiho henia karana ai idia gaukaralaia gaudia.
Heb., “guba ena tuari orea ibounai.”
Reana unai gabu be Ierusalema ena hanua lalonai, Gwarume Iduarana ena badinai.
Eiava “wain ena hodu henunai idia noho momoru bamona idia mareremarere lasi taudia.”
Eiava “hidio.”
Heb., “iena hahemaoro herevadia.”
Eiava “idia do ia naria.”
Diksenari ai, “Tuari oreadia edia Iehova” itaia.
Heb., “bese ta ena dagedage animal ibounai.”
Eiava reana, “lai ena regena o animal ta ena boiboi.”
Heb., “idia wisili bona edia imana kwakikwaki idia lokua bona idia davea.”
Eiava reana, “hereva hamomokania tauna bamona do lau gini.”