HAGAI

1 King Dariuse ena lohia lagani iharuana ai, hua namba 6 ena dina ginigunana ai, Iehova ese ena hereva be peroveta tauna Hagai*+ dekenai ia henia. Bona Hagai ese unai hereva be Iuda ena gavana Serubabele,+ ia be Sealetiele ena natuna, bona hahelaga tauna badana Iosua, Iehosadaka ena natuna dekenai ia gwauraia. Ia gwau:

2 “Tuari oreadia edia Iehova* ia gwau, ‘Inai taudia idia gwau, “Iehova ena ruma* haginia* negana be ia do ginidae lasi.”’”+

3 Iehova be peroveta tauna Hagai+ amo ma ia gwau: 4 “Hari umui be ruma hairaidia dekenai umui noho, to lauegu ruma be ia dika, unai bamona umui karaia be namo, eiava?+ 5 Vadaeni tuari oreadia edia Iehova ia gwau, ‘Mani emui kara umui lalohadailaia. 6 Umui be uhe momo umui hadoa, to aniani sisina sibona umui gogoa.+ Umui aniani to umui bogakunu lasi. Wain umui inua to umui hegeregere lasi. Dabua umui atoa, to umui keru noho. Moni gaukara ia karaia tauna ena moni be puse mai ena matu momo lalonai ia udaia.’”

7 “Tuari oreadia edia Iehova ia gwau, ‘Emui kara umui lalohadailaia.’

8 “Iehova ia gwau, ‘Ororo dekenai umui daekau bona au umui abia mai.+ Bona egu ruma umui haginia,+ unai amo unai ruma do lau moalelaia bona taunimanima ese lau do idia hanamoa.’”+

9 Tuari oreadia edia Iehova ia gwau: “‘Umui laloa aniani momo do umui gogoa to sisina sibona umui abia, bona emui ruma lalonai umui abia vareai neganai, lau ese lau hiriria lao.+ Dahaka dainai? Badina egu ruma be ia dika, to umui ta ta be sibona emui ruma umui haginia noho.+ 10 Unai dainai guba ese daba paripari ia henia lasi, bona tano be aniani ia havaraia lasi. 11 Lau ese medu lau hadihoa lasi, tanobada, ororo, witi, wain matamata, oela, tano ai idia tubu gaudia, taunimanima bona animal latanai bona emui imana edia hekwarahi ibounai dekenai.’”

12 Sealetiele+ ena natuna Serubabele+ bona hahelaga tauna badana Iosua, ia be Iehosadaka+ ena natuna, bona taunimanima ibounai ese Iehova edia Dirava ena gadona bona peroveta tauna Hagai ena hereva idia kamonai, badina Iehova edia Dirava ese Hagai ia siaia. Bona taunimanima ese Iehova idia gari henia matamaia.

13 Bena Iehova ena gwaukau tauna Hagai be Iehova ese ia oda henia hegeregerena, inai hereva be taunimanima dekenai ia gwauraia: “Iehova ia gwau, ‘Lau be umui ida lau noho.’”+

14 Iehova ese Sealetiele ena natuna Serubabele, Iuda ena gavana unai,+ ena lalona ia hagoadaia,+ bona Iehosadaka ena natuna Iosua, hahelaga tauna badana unai,+ bona taunimanima ibounai edia lalona ia hagoadaia; bona idia ibounai idia mai bona edia Dirava, tuari oreadia edia Iehova, ena ruma idia haginia matamaia.+ 15 Unai be King Dariuse ena lohia lagani iharuana ena hua namba 6 ena dina namba 24 ai ia vara.+

2 Hua namba 7 ena dina namba 21 ai, Iehova ese ena hereva be peroveta tauna Hagai+ dekenai ia henia. Ia gwau: 2 “Mani Iuda ena gavana Serubabele,+ ia be Sealetiele ena natuna,+ bona hahelaga tauna badana Iosua,+ Iehosadaka+ ena natuna unai, bona taunimanima ibounai oi nanadaia: 3 ‘Umui daika be inai ruma* hairaina ena toana gunana umui itaia?+ Umui dekenai hari ena toana be edena bamona? Hari ena hairai be guna bamona lasi, ani?’+

4 “Iehova ia gwau, ‘Serubabele e, oi goada. Bona hahelaga tauna badana Iosua, Iehosadaka ena natuna e, oi goada.’

“Iehova ma ia gwau: ‘Umui taunimanima ibounai e, umui goada bona umui gaukara.’+

“Tuari oreadia edia Iehova* ia gwau: ‘Lau be umui ida lau noho.+ 5 Aigupito amo umui raka lasi neganai umui dekenai lau gwauhamatalaia gauna do umui laloatao,+ bona egu siahu amo umui lau hakaua noho.+ Umui gari lasi.’”+

6 “Tuari oreadia edia Iehova be inai bamona ia hereva: ‘Daudau lasi lalonai, lau ese guba, tanobada, davara bona tano do lau hamarerea lou.’+

7 “Tuari oreadia edia Iehova ia gwau: ‘Lau ese bese iboudiai do lau hamarerea bona edia dava bada kohudia be inai ruma lalonai do idia vareai mai,+ bona lau ese hairai amo do lau hahonua.’+

8 “Tuari oreadia edia Iehova ia gwau: ‘Siliva be lauegu bona golo be lauegu.’

9 “Tuari oreadia edia Iehova ia gwau: ‘Vaira negana ai inai ruma ena hairai ese guna negana ena hairai do ia hereaia.’+

“Tuari oreadia edia Iehova ia gwau: ‘Bona inai gabu ai maino do lau mailaia.’”+

10 King Dariuse ena lohia lagani iharuana ai, hua namba 9 ena dina namba 24 ai, Iehova ese ena hereva be peroveta tauna Hagai+ dekenai ia henia. Ia gwau: 11 “Tuari oreadia edia Iehova ia gwau: ‘Mani emu kara, hahelaga taudia dekenai taravatu totona oi henanadai:+ 12 “Bema tau ta ese vamu helagana be ena dabua dekenai ia kumia, bena ena dabua be paraoa eiava vasiahu eiava wain eiava oela eiava aniani gauna ma ta ia daua toho, unai gaudia be do idia helaga, a?”’”

Hahelaga taudia idia haere: “Lasi!”

13 Hagai ia henanadai lou, ia gwau: “Bema tau ta be mase tauanina ta ia dogoatao dainai ia goeva lasi, bona ia ese unai gaudia ta ia daua toho neganai, unai gaudia danu be do idia goeva lasi, a?”+

Hahelaga taudia idia haere: “Idia be do idia goeva lasi.”

14 Vadaeni Hagai ma ia gwau: “Iehova ia gwau: ‘Inai taudia be unai bamona, bona egu vairanai inai bese be unai bamona, bona edia imana amo idia karaia gaukara ibounai be unai bamona. Idia bouboulaia gaudia be idia goeva lasi.’

15 “‘To hari, mani emu kara inai dina amo ela bona nega vairai inai oi laloa namonamo: Iehova ena dubu helaga haginia totona nadi ta be nadi ta latanai idia do atoa lasi neganai,+ 16 idia vara gaudia mani oi laloa. Unai nega ai ta be witi haboua gabuna dekenai ia mai bona ia ura 20 kilogram witi ia abia, to 10 kilogram sibona ia noho. Bona ta be wain moia gabuna dekenai ia mai bona ia ura 50 lita wain ia abia, to 20 lita sibona ia noho.+ 17 Lau ese tubutubu gaudia, emui imana gaukara ibounai, be lai siahuna, gorere,+ bona aisi nadi amo lau hadikaia, to umui ta be lau dekenai umui giroa mai lasi.’ Unai be Iehova ena hereva.

18 “‘Hua namba 9 ena dina namba 24 ai, Iehova ena dubu helaga ena badina idia haginia dinana amo ela bona vaira negana ai,+ mani emu kara inai oi laloa namonamo: 19 Aniani haboua rumana* ai uhe idia noho, a?+ Vain, fig auna, pomogranet auna* bona olive auna be huahua idia havaraia vadaeni, a? Inai dina amo lau ese hahenamo do lau siaia.’”+

20 Hua ena dina namba 24 ai nega iharuana Iehova ese ena hereva be Hagai dekenai ia henia.+ Ia gwau: 21 “Iuda ena gavana, Serubabele dekenai oi gwau, ‘Lau ese guba bona tanobada do lau hamarerea.+ 22 Lau ese basileia idauidau edia terona do lau hadikaia bona bese idauidau edia basileia edia goada do lau haorea momokani.+ Kariota bona edia guia taudia do lau hadikaia, danu hosi bona edia guia taudia be do idia mase, badina idia ta ta ese tuari kaia amo ta ta do idia alaia mase.’”+

23 “Tuari oreadia edia Iehova ia gwau, ‘Egu hesiai tauna, Sealetiele ena natuna,+ Serubabele e,+ unai dina ai oi do lau abia hidi bona dava bada rini bamona oi do lau halaoa. Badina be lau ese oi lau abia hidi vadaeni,’ Iehova be unai bamona ia hereva. Unai hereva ibounai be tuari oreadia edia Iehova ese ia gwauraia.”