SEKARAIA
1 Dariuse ena lohia lagani iharuana ena hua namba 8 ai,+ Iehova be peroveta tauna Sekaraia,*+ Berekaia ena natuna, Ido ena tubuna dekenai, inai hereva ia gwauraia: 2 “Iehova be emui tamadia dekenai ia badu dikadika.+
3 “Oi lao bona idia oi hamaoroa, tuari oreadia edia Iehova* ia gwau: ‘Lau be tuari oreadia edia Iehova. Lau dekenai umui giroa mai bona lau be umui dekenai do lau giroa lou.’+ Lau, tuari oreadia edia Iehova be umui dekenai inai gaudia lau gwauraia.”
4 “‘Emui tamadia edia kara bamona umui karaia lasi, guna peroveta taudia be idia dekenai idia gwau: “Tuari oreadia edia Iehova ia gwau, ‘Mani, emui kara dikadia umui rakatania.’”’+
“Ma Iehova ia gwau, ‘to idia kamonai lasi bona egu hereva idia badinaia lasi.’”+
5 “‘To hari emui tamadia be edeseni? Bona peroveta taudia be idia mauri noho, a? 6 Emui tamadia lau hadibaia edena taravatu do idia badinaia. Lau ese egu hesiai taudia, peroveta taudia unai, lau siaia bona idia hadibadia dahaka do ia vara bema unai taravatu idia utua bona unai ibounai be idia dekenai idia vara momokani, ani?’+ Unai dainai idia be lau dekenai idia giroa mai bona idia gwau: ‘Tuari oreadia edia Iehova ese guna ia gwauraia hegeregerena, iseda kara dika hegeregerena davana be ita dekenai ia henia vadaeni.’”+
7 Dariuse ena lohia laganina iharuana ena hua namba 11 ai, unai be Sabata* hua ena dina namba 24 ai,+ Iehova ese ena hereva be peroveta tauna Sekaraia, Berekaia ena natuna, Ido ena tubuna dekenai ia henia. 8 Sekaraia ia gwau: “Hanuaboi ai matahanai ta lau itaia. Tau ta be hosi kakakakana latanai ia helai bona koura gabuna ai metol audia* huanai ia gini, bona ia murinai be hosi kakakaka, hosi braon, bona hosi kurokuro idia gini.”
9 Bena lau gwau: “Egu lohia e, unai hosi ai idia guia taudia be daidia?”
Lau ia hereva henia aneru be ia haere ia gwau: “Oi dekenai do lau hahedinaraia idia be daidia.”
10 Vadaeni metol audia huanai ia gini noho tauna ia gwau: “Inai taudia be Iehova ese ia siaia tanobada ena kahana ibounai idia itaia totona.” 11 Bena idia ese Iehova ena aneru, metol audia huanai ia gini noho tauna dekenai, idia gwau: “Tanobada ena kahana ibounai dekenai ai lao vadaeni, bona ai itaia tanobada ibounai be maino ai ia noho bona hekwakwanai ta be lasi.”+
12 Vadaeni Iehova ena aneru ia gwau: “Tuari oreadia edia Iehova e, Ierusalema bona Iuda ena siti ibounai be lagani 70 lalonai oi badu henia.+ Edena negai emu hebogahisi do oi hahedinaraia lou?”+
13 Iehova ese lau ia hereva henia aneruna dekenai hagoadaia herevadia ia gwauraia. 14 Bena lau ia hereva henia aneru ese lau ia hamaoroa: “Do oi boiboi oi gwau, ‘Tuari oreadia edia Iehova be inai bamona ia gwau: “Ierusalema bona Siona totona lau lalohekwarahi bada.+ 15 Idia noho namo idau bese lau badu henia bada.+ Lau be egu bese taudia dekenai lau badu sisina,+ to unai idau bese taudia ese idia dagedage henidia bada.”’+
16 “Unai dainai Iehova be inai bamona ia gwau: ‘“Lau be Ierusalema dekenai hebogahisi do lau hahedinaraia lou,+ bona egu ruma be unuseniai do lau haginia lou,+ bona hahetohoa varona be Ierusalema ibounai dekenai do idia veria lao.”’+ Unai be tuari oreadia edia Iehova ena hereva.”
17 “Ma do oi boiboi oi gwau, ‘Tuari oreadia edia Iehova be inai bamona ia gwau: “Egu siti iboudiai be namo do idia davaria lou, bona Iehova ese Siona do ia hagoadaia+ bona Ierusalema do ia abia hidi lou.”’”+
18 Bena matahanai ta amo doana 4 lau itaia.+ 19 Vadaeni lau ia hereva henia aneru lau nanadaia: “Unai doana 4 be dahaka?” Ia haere ia gwau: “Inai doana 4 ese Iuda, Israela,+ bona Ierusalema+ taudia be tano idauidau dekenai idia abidia lao.”+
20 Bena Iehova ese lau dekenai auri gaukaralaia taudia 4 ia hahedinaraia. 21 Vadaeni lau henanadai: “Inai taudia be dahaka karaia totona idia mai?”
Ia gwau: “Unai doana 4 ese Iuda taudia be tano idauidau dekenai idia luludia lao dainai, idia ta be ia hegeregere lasi ena kwarana ia abia isi totona. Auri gaukaralaia taudia 4 be do idia mai bona bese idauidau do idia hagaria bona edia doana do idia hadikaia, badina idia ese Iuda tanona idia hadikaia bona ena taunimanima be tano idauidau dekenai idia luludia lao.”
2 Ma lau ese tau ta lau itaia, ena imana ai hahetohoa varona ia dogoatao.+ 2 Bona lau nanadaia: “Oi be edeseni oi lao noho?”
Ia haere: “Lau lao Ierusalema dekenai, ena lababa bona ena lata lau makaia totona.”+
3 Bona lau ia hereva henia aneru be ia raka lao bona aneru ma ta ia mai bona idia hedavari. 4 Unai aneru ese ia hamaoroa: “Oi heau lao unuseni bona unai tau matamata oi hamaoroa, ‘“Ierusalema be magu lasi hanuana bamona taunimanima ese do idia noholaia,+ badina tatau bona ubua animal be do idia momo herea.”+ 5 Iehova ia gwauhamata ia gwau, “Lau be Ierusalema ena lahi maguna hegeregerena ai do lau lao,+ bona ia huanai lauegu hairai do ia hedinarai.”’”+
6 Iehova ia gwau: “Umui Mai! Umui Mai! Not tanona umui rakatania.”+
Iehova ma ia gwau: “Badina lau ese umui ibounai be tano idauidau* dekenai lau lulua lao vadaeni.”+
7 “Siona e, oi mai! Babulonia ai oi noho, oi heau mauri.+ 8 Tuari oreadia edia Iehova* be hanamoa ia abia murinai, emui kohu idia dadia besedia dekenai lau ia siaia, bona ia gwau:+ ‘Umui ia hadikaia tauna be egu matana* ia daua toho noho.+ 9 Hari lau ese egu imana be idia dekenai do lau abia isi, bona edia hesiai taudia ese edia tano do idia dadia.’+ Bona do oi diba momokani tuari oreadia edia Iehova ese lau ia siaia.
10 Iehova ia gwau: “Siona e, mai moale ida oi boiboi,+ badina lau mai noho+ bona emu huanai do lau noho.”+ 11 “Unai dina ai bese idauidau ese Iehova do idia bamoa,+ bona idia be egu taunimanima ai do idia lao, bona lau be edia huanai do lau noho.” Bona do idia diba momokani tuari oreadia edia Iehova ese lau ia siaia. 12 Iehova ese Iuda besena do ia abia, iena bese helagana ai do ia halaoa, bona Ierusalema do ia abia lou.+ 13 Taunimanima ibounai e, Iehova vairanai umui regerege lasi, badina ia be ena gabu helagana amo kara ta ia karaia noho.
3 Bona ia* ese lau dekenai Iosua, hahelaga tauna badana ia hahedinaraia.+ Iosua be Iehova ena aneru vairanai ia gini, bona Satani+ be ena idiba kahanai ia gini, ia koua totona. 2 Bena Iehova ena aneru ese Satani ia hamaoroa: “Satani e,+ Iehova ese oi ia gwau henia! Oibe, mani Iehova, Ierusalema ia abia hidi tauna,+ ese oi do ia gwau henia! Iosua be lahi amo ia kokia lahi auna bamona, ani?”
3 Iosua be dabua mirodia ia hahedokilaia bona aneru vairanai ia gini. 4 Bena aneru ese ena vairanai idia gini aneru ma haida ia hamaoroa: “Iena dabua mirodia umui kokia.” Bena aneru ese Iosua ia hamaoroa: “Itaia, oiemu kara dika be oi amo lau kokia vadaeni, bona dabua goevadia do oi hahedokilaia.”+
5 Vadaeni lau gwau: “Iosua ena kwarana dekenai kwara kumia dabua umui atoa.”+ Bona idia ese ia dekenai kwara kumia dabua goevana bona dabua goevadia idia atoa. Bona Iehova ena aneru be kahirakahira ia gini. 6 Bena Iehova ena aneru ese Iosua ia hamaoroa: 7 “Tuari oreadia edia Iehova* be inai bamona ia gwau, ‘Bema egu dala dekenai oi raka bona egu oda herevadia oi badinaia, oi ese egu taunimanima do oi hahemaoro henia+ bona egu dubu helaga ena ariara do oi naria.* Bona iniseniai idia gini taudia hegeregerena oi danu be lauegu vairanai do oi gini diba.’
8 “‘Hahelaga Tauna Badana Iosua e, mani oi bona oi ida idia helai hahelaga taudia, umui kamonai. Umui be toa ta bamona. Itaia! Lau ese egu hesiai tauna,+ ena ladana be Rigi,+ do lau abia mai! 9 Tuari oreadia edia Iehova be inai bamona ia gwau: ‘Iosua vairanai lau atoa nadi oi itaia! Inai nadi dekenai matana 7 idia noho. Bona lau ese unai nadi latanai hereva ta do lau koroa bona lau ese dina tamona lalonai unai tano ena kara dika do lau kokia.’+
10 Tuari oreadia edia Iehova ia gwau: “‘Unai dina ai, umui ta ta be emui dekena taudia do umui boiria mai, emui vain audia bona fig audia henunai umui helai hebou totona.’”+
4 Lau ida ia herevahereva aneru be ia giroa mai bona lau ia hanogaia, tau ta be mahuta amo ia hanogaia hegeregerena. 2 Bena lau ia nanadaia: “Dahaka oi itaia?”
Ma lau haere: “Golo amo idia karaia lamepa atoa gauna ta lau itaia,+ ena ataiai be disi ta ia noho. Unai lamepa atoa gauna be mai ena lamepa 7.+ Unai lamepa 7 be mai edia paipa 7. 3 Bona unai lamepa atoa gauna ena badinai be olive audia rua idia gini,+ ta be idibana kahanai bona ta be laurina kahanai.”
4 Vadaeni, lau ia hereva henia aneru lau nanadaia: “Egu lohia e, inai gaudia edia anina be dahaka?” 5 Bena lau ia hereva henia aneru ese lau ia nanadaia: “Oi be inai gaudia edia anina oi diba lasi, a?”
Lau haere: “Lasi, egu lohia.”
6 Bena lau dekenai ia gwau: “Iehova ena hereva Serubabele dekenai be inai: “‘Tuari oreana ena goada amo lasi, eiava taunimanima edia siahu amo lasi,+ to egu siahu amo inai gaudia ibounai do idia vara.”+ Unai be tuari oreadia edia Iehova* ena hereva. 7 Ororo badana e, oi be daika? Serubabele+ vairanai oi be tano palakana ai do oi lao.+ Bona ia ese ataiai ia noho nadi do ia abia isi taunimanima vairadiai, bona mai moale ida do idia boiboi: “Namo herea! Namo herea!”’”
8 Iehova be lau dekenai ma ia gwau: 9 “Serubabele ese ena imana amo inai ruma ena badina ia haginia,+ bona ia sibona ese do ia haorea.+ Bena do oi diba momokani tuari oreadia edia Iehova ese lau be oi dekenai ia siaia. 10 Dubu helaga haginia gaukara ena matamana be daika ese ia gwauraia dika diba?+ Taunimanima be do idia moale badina Serubabele ena imana ai hahetohoa varona* idia itaia, bona matana 7 ese unai ia itaia danu. Unai matana 7 be Iehova ena matana, bona idia be tanobada ibounai idia itaia noho.”+
11 Bena ia lau nanadaia: “Unai lamepa atoa gauna ena badinai idia gini olive audia rua, ta be idibana kahanai bona ta be laurina kahanai edia anina be dahaka?”+ 12 Ma nega iharuana lau nanadaia: “Unai olive audia rua edia rigi maragidia* amo oela, ena kala be golo bamona, be golo paipa rua lalonai idia bubua diho ena anina be dahaka?”
13 Lau ia nanadaia: “Oi be inai gaudia edia anina oi diba lasi, a?”
Lau haere: “Lasi, egu lohia.”
14 Ia gwau: “Unai au rua ese horoa taudia rua ia laulaulaia bona idia be tanobada ibounai ena Lohiabada badinai idia gini.”+
5 Egu kwarana lau abia isi neganai, ia roho lao noho lokua toretore ta lau itaia. 2 Aneru ese lau ia nanadaia: “Dahaka oi itaia?”
Lau haere: “Ia roho lao noho lokua toretore ta lau itaia. Iena lata be 20 kiubit* bona iena lababa be 10 kiubit.”*
3 Bena lau dekenai ia gwau: “Inai be tanobada ibounai dekenai do ia vara dika. Badina ena be lokua toretore ena kahana ta ai ia hahedinaraia henaohenao taudia be panisi do idia abia,+ to panisi idia do abia lasi. Danu, lokua toretore ena kahana ma ta ai ia hahedinaraia gwauhamata koikoi idia karaia taudia be panisi do idia abia,+ to panisi idia do abia lasi. 4 Tuari oreadia edia Iehova* be inai bamona ia hereva: ‘Lau ese inai dika do lau siaia lao bona henaoa tauna ena ruma bona egu ladana ai gwauhamata koikoi ia karaia tauna ena ruma lalonai do ia vareai, bona ena ruma lalonai do ia noho ela bona ena timba bona ena nadi do ia hadikaia ore.’”
5 Lau ia hereva henia aneru be ia mai bona lau ia hamaoroa: “Emu kwarana oi abia isi bona ia hedinarai gauna oi itaia.”
6 Bena lau nanadaia: “Unai be dahaka?”
Ia haere: “Ia hedinarai gauna be witi sikelea urona.”* Bona ma ia gwau: “Tanobada ibounai dekenai edia toana be unai bamona.” 7 Bena lau itaia ledi amo idia karaia koua gauna kuboruna idia abia isi, bona uro lalonai hahine ta ia helai noho. 8 Vadaeni aneru ia gwau: “Inai hahine be Kara Dika ia laulaulaia.” Bena unai hahine be uro lalonai ia doria diho lou, bona ledi koua gauna metauna amo uro ia koua.
9 Bena egu kwarana lau abia isi bona hahine rua idia mai noho lau itaia, idia be lai lalonai idia roho mai. Edia apena be noko manu edia apena bamona. Bona idia ese unai uro be ataiai* dekenai idia abia isi lao. 10 Lau ia hereva henia aneru lau nanadaia: “Witi sikelea urona be edeseniai idia abia lao?”
11 Ia haere: “Sinara*+ tanona dekenai idia abia lao ena ruma idia haginia totona, bona idia hegaegaelaia murinai, unuseni ena gabu korikori ai do idia atoa.”
6 Bena egu kwarana lau abia isi lou bona lau itaia ororo rua huana amo kariota 4 idia heau mai. Unai ororo be kopa ororodia. 2 Kariota ginigunana be hosi kakakakadia ese idia veria bona kariota iharuana be hosi koremadia ese idia veria.+ 3 Kariota ihatoina be hosi kurokurodia ese idia veria, bona kariota namba 4 be hosi mai edia maka maragidia* ese idia veria.+
4 Lau ia hereva henia aneru lau nanadaia: “Egu lohia e, unai kariota edia anina be dahaka?”
5 Aneru be lau ia haere henia, ia gwau: “Unai be guba ena aneru oreadia 4.+ Bona idia be tanobada ena Lohiabada vairanai idia hedinarai murinai idia heau mai.+ 6 Hosi koremadia ese idia veria kariota be tanobada ena not kahanai idia lao,+ hosi kurokurodia ese idia veria kariota be west kahanai* idia lao, bona hosi mai edia maka maragidia ese idia veria kariota be tanobada ena saut kahanai idia lao. 7 Bona hosi mai edia revareva be idia ura tanobada ibounai dekenai idia raka loaloa.” Bena ia gwau: “Umui lao tanobada ibounai dekenai umui raka loaloa.” Bena idia be tanobada ibounai dekenai idia raka loaloa matamaia.
8 Vadaeni lau dekenai ia boiboi, ia gwau: “Itaia, tanobada ena not kahana ai ia lao kariota ese unai kahana dekenai Iehova ena badu ia hamaragia.”
9 Iehova be lau dekenai ma ia gwau: 10 “Oi lao Heledai, Tobaisa bona Iedaia amo Babulonia dekenai idia noho taudia ese idia siaia harihari gaudia oi abia, bona unai dina ai, idia ida Sefanaia ena natuna Iosaia ena ruma dekenai umui lao. 11 Siliva bona golo do oi abia bona korona* ta do oi karaia, bena hahelaga tauna badana Iosua,+ Iehosadaka ena natuna, ena kwarana dekenai oi atoa. 12 Bona ia dekenai do oi gwau:
“‘Tuari oreadia edia Iehova* be inai bamona ia hereva: “Inai tauna ena ladana be Rigi.+ Ia be iena gabu dekenai do ia tubu, bona Iehova ena dubu helaga do ia haginia.+ 13 Ia ese Iehova ena dubu helaga do ia haginia bona lohia dagina do ia abia. Ena terona dekenai do ia helai bona ia be king bona hahelaga tauna ai do ia lao,+ bona unai dagi rua amo maino do ia mailaia. 14 Bona unai korona be Iehova ena dubu helaga dekenai do idia atoa, bona Ia ese Heleme,* Tobaisa, Iedaia+ bona Sefanaia ena natuna Heni* ese idia karaia gauna do ia laloatao. 15 Bona gabu daudau ai idia noho taudia do idia mai bona Iehova ena dubu helaga do idia haginia.” Bona unai do ia vara momokani, bema umui ese Iehova emui Dirava ena hereva umui badinaia. Bena do umui diba momokani tuari oreadia edia Iehova ese umui dekenai lau ia siaia.’”
7 King Dariuse ena lohia lagani namba 4 ai, hua namba 9 ena ladana Kisileve* ena dina namba 4 ai, Iehova ese Sekaraia ia hereva henia.+ 2 Unai nega ai Betele taudia ese Saresere bona Regeme-meleka bona ena tatau idia siaia lao Iehova ena lalonamo abia totona do idia noinoi. 3 Tuari oreadia edia Iehova* ena dubu helaga ai hahelaga taudia bona peroveta taudia dekenai idia henanadai: “Lagani momo gunanai ai karaia bamona, hua namba 5 ai do ai taitai+ bona dina haida lalonai do ai aniani lasi, a?”
4 Tuari oreadia edia Iehova be lau dekenai ma ia gwau: 5 “Taunimanima ibounai bona hahelaga taudia ibounai dekenai oi gwau, ‘Lagani 70 lalonai umui be hua namba 5 bona hua namba 7 ai mai boiboi ida umui taitai bona aniani lasi taravatu* umui badinaia neganai,+ umui be momokani lau dainai unai bamona umui karaia, a? 6 Bona umui aniani bona inuinu neganai, unai be umui sibona hamoalea totona umui aniani bona inuinu, ani? 7 Guna negadia ai taunimanima be Ierusalema bona ena badina hanuadia ai mai maino ida idia noho, bona Negebe bona Sepala ai taunimanima idia noho neganai, Iehova ese ena peroveta taudia amo ia gwauraia herevadia umui badinaia be namo, ani?’”+
8 Iehova be Sekaraia dekenai ma ia gwau: 9 “Tuari oreadia edia Iehova ia gwau, ‘Mai hahemaoro maoromaoro ida kota umui karaia,+ bona mai lalokau*+ bona hebogahisi ida ta ta umui kara henia. 10 Namo lasi koikoi dalanai vabu bona tamana lasi natuna,*+ idau tauna+ eiava ogogami tauna+ edia kohu umui dadia, bona namo lasi emui lalona ai ta hadikaia ena palani umui karaia.’+ 11 To idia ura lasi idia kamonai.+ Edia doruna idia henia bona edia taiana idia koua,+ unai amo do idia kamonai lasi.+ 12 Edia kudouna idia ha-aukaia nadi bamona dainai,+ tuari oreadia edia Iehova ese ena lauma helaga amo peroveta taudia gunadia ia siaia ena hereva bona taravatu* idia harorolaia neganai idia badinaia lasi.+ Unai dainai tuari oreadia edia Iehova be idia dekenai ia badu dikadika.”+
13 Tuari oreadia edia Iehova ia gwau: “‘Lau boiboi neganai idia kamonai lasi hegeregerena,+ idia boiboi neganai lau danu do lau kamonai lasi.+ 14 Bona lau ese lai gubana amo bese idauidau dekenai idia lau lulua lao.+ Edia tano be ia noho kava bona tau ta be unuseni ia lao eiava giroa lou lasi,+ badina idia ese edia tano namona be tano dikana ai idia halaoa.’”
8 Tuari oreadia edia Iehova* be ma ia gwau: 2 “Tuari oreadia edia Iehova be inai bamona ia hereva, ‘Lau be Siona totona do lau lalohekwarahi bada,+ bona ia do lau gimaia bona ena inai taudia do lau badu henia.’”
3 “Iehova be inai bamona ia hereva: ‘Siona dekenai do lau giroa lou+ bona Ierusalema ai do lau noho.+ Ierusalema do idia gwauraia hereva momokani ena siti+ bona tuari oreadia edia Iehova ena ororo do idia gwauraia, ororo helagana.’”+
4 “Tuari oreadia edia Iehova be inai bamona ia hereva: ‘Tatau bona hahine burukadia be Ierusalema ena ariara gabudia ai do idia helai lou. Idia ta ta mai ena raka auna ida, badina edia mauri lagani be bada.*+ 5 Bona unai siti ena ariara be memero kekeni maragidia ese do idia hahonua. Unuseniai do idia gadara.’”+
6 “Tuari oreadia edia Iehova be inai bamona ia hereva: ‘Ena be unai nega ai, Ierusalema dekenai idia giroa mai taudia do idia laloa unai gaudia do idia vara lasi, to lau dekenai unai be auka, a?’ Unai hereva be tuari oreadia edia Iehova ena hereva.”
7 “Tuari oreadia edia Iehova be inai bamona ia hereva: ‘Lau be ist bona west tanodia* amo egu taunimanima do lau hamauria.+ 8 Idia do lau abia mai bona Ierusalema dekenai do idia noho,+ idia be egu taunimanima ai do idia lao bona lau be edia Dirava ai do lau lao,+ mai egu kara maoromaoro bona momokani ida.’”
9 “Tuari oreadia edia Iehova be inai bamona ia hereva: ‘Hari peroveta taudia edia hereva umui kamonai taudia e,+ gaukara totona emui imana umui hagoadaia.*+ Unai hereva be tuari oreadia edia Iehova ena dubu helaga ena badina idia haginia dinana ai idia gwauraia danu. 10 Unai nega ia do ginidae lasi neganai, taunimanima bona animal be edia gaukara ena davana idia abia lasi,+ bona idia raka lao bona raka mai diba lasi, badina lau ese idia ta ta edia lalona lau veria idia inai heheni totona.’
11 “Tuari oreadia edia Iehova be ia hereva: ‘To hari lau ese idia giroa mai taudia be guna bamona do lau kara henia lasi.+ 12 Maino ena uhe do idia hadoa, vain au be ena huahua do ia atoa bona tano be aniani do ia havaraia,+ bona guba amo daba ena paripari do ia diho. Lau ese idia giroa mai taudia dekenai unai gaudia do lau henia.+ 13 Iuda besena bona Israela besena e, bese idauidau idia gwau umui be dika do umui davaria,+ to lau ese umui do lau hamauria bona emui ladana be hanamoa herevana bamona do idia gwauraia.+ Umui gari lasi!+ Gaukara totona emui imana umui hagoadaia.’+
14 “Badina lau, tuari oreadia edia Iehova be inai bamona lau hereva: ‘“Guna emui tubudia ese lau idia habadua dainai, egu lalona lau hadaia umui dekenai dika lau mailaia, bona lau hebogahisi lasi. Unai be tuari oreadia edia Iehova ena hereva.+ 15 To hari egu lalona lau hadaia Ierusalema bona Iuda besena dekenai namo do lau havaraia.+ Umui gari lasi!”’+
16 “‘Namona be inai gaudia umui karaia: Umui ta ta dekenai hereva momokani umui gwauraia,+ bona emui geiti ai kota umui karaia neganai hereva momokani umui badinaia bona hahemaoro umui karaia neganai, namona be maino umui habadaia.+ 17 Emui lalona dekenai ta ta hadikaia palani umui laloa lasi,+ bona gwauhamata koikoidia umui karaia lasi,+ badina lau ese unai bamona kara iboudiai lau inai henia.’+ Unai be Iehova ena hereva.”
18 Tuari oreadia edia Iehova be lau dekenai ma ia gwau: 19 “Tuari oreadia edia Iehova be inai bamona ia hereva, ‘Iuda besena dekenai hua namba 4 ena aniani lasi negana,+ hua namba 5 ena aniani lasi negana,+ hua namba 7 ena aniani lasi negana,+ bona hua namba 10 ena aniani lasi negana+ be moale negadia. Idia be moale ariadia.+ Unai dainai hereva momokani bona maino do umui ura henia.’
20 “Tuari oreadia edia Iehova be inai bamona ia hereva: ‘Vaira negana ai, bese idauidau bona siti idauidau taudia be do idia mai, 21 bona siti ta amo idia mai taudia be ma siti ta amo idia mai taudia dekenai do idia lao bona idia gwau: “Oibe, ita lao! Iehova ena lalonamo totona do ita noinoi bona tuari oreadia edia Iehova do ita tahua goadagoada. Ai danu do ai lao.”+ 22 Bona taunimanima ibounai bona bese badadia be tuari oreadia edia Iehova tahua totona Ierusalema dekenai do idia mai,+ bona Iehova ena lalonamo abia totona do idia noinoi.’
23 “Tuari oreadia edia Iehova be inai bamona ia hereva, ‘Unai dina ai, bese idauidau edia gado ibounai amo tatau 10 do idia mai+ bona Iuda tauna ena dabua* do idia dogoatao. Oibe, do idia dogoatao auka bona do idia gwau: “Ai ura oi ida do ai mai,+ badina ai kamonai Dirava be umui ida ia noho.”’”+
9 Mai anina bada herevana ta:
“Iehova ena hadikaia herevana be Haderaka tanona dekenai ia gwauraia,
Bona Damaseko dekenai ia siaia diho,*+
Badina Iehova ena matana be tanobada taudia ia itaia noho,+
Bona Israela ena iduhu iboudiai ia raraia noho.
2 Unai hadikaia herevana be Hamata dekenai,+ ia be Israela ena hetoana dekenai ia noho,
Bona ena be Turo+ bona Sidono+ be mai edia aonega,+ to idia danu be dika do idia davaria.
3 Turo be ia sibona totona magu aukana ia haginia.
Siliva momo herea ia haboua, kahu edia momo bamona
Bona golo momo herea ia haboua, dala ai ia noho kopukopu ena bada bamona.+
4 Itaia! Iehova ese ena kohu ibounai do ia abia lao,
Bona ena tuari oreana be davara lalonai* do ia hamasedia,+
Bona Turo be lahi amo do ia gabua.+
5 Asakelona be unai ia itaia bona ia gari,
Gasa be ia lalohekwarahi bada,
Bona Ekarona danu, badina ia abidadama henia siti be ia moru.
Gasa amo king do ia boio,
Bona Asakelona ai taunimanima do idia noho lasi.+
6 Asadoda ai idau bese tauna do ia noho,
Bona lau ese Filistia ena hekokoroku karana do lau hadokoa.+
7 Lau ese iena uduna amo rara do lau kokia
Bona iena isena amo aniani bodagadia do lau kokia,
Bona ia be do idia rakatania iseda Dirava totona,
Bona ia be Iuda iduhu ena gunalaia tauna ai do ia lao,+
Bona Ekarona be Iebusu tauna bamona ai do ia lao.+
8 Bona lau be gima tauna bamona egu ruma do lau gimaia,+
Unai amo tau ta do ia vareai lasi eiava raka-lasi lasi,
Bona gaukara naria tauna* be do ia vareai lou lasi,+
Badina egu matana amo idia dekenai ia vara gaudia* lau itaia.
9 Siona ena natuna kekeni e, oi moale.
Ierusalema ena natuna kekeni e, mai moale ida oi boiboi.
Itaia! Emu king be oi dekenai ia mai noho.+
Ia be kara maoromaoro tauna, bona hahemauri* do ia mailaia,
Ia be manau tauna+ bona doniki latanai ia guia,
10 Eparaima amo tuari kariota do lau kokia
Bona Ierusalema amo hosi do lau kokia.
Tuari tauna ena peva do lau kokia.
Bona ia ese bese idauidau dekenai maino do ia harorolaia,+
Iena lohia gabuna be davara ta amo ela bona davara ma ta
11 Hahine e, rara amo oi bona lau huanai ita karaia gwaubou dainai,
Lau ese emu dibura taudia be ranu lasi gurina amo do lau ruhaia.+
12 Mai emui helaro dibura taudia e, kohoro goadana dekenai umui giroa lou.+
Hari dina umui lau hamaoroa,
‘Siona e, emui ahuna be nega rua amo do lau habadaia.+
13 Lau ese Iuda be egu peva bamona do lau hagagevaia.*
Eparaima be diba bamona peva dekenai do lau atoa,
Siona e, emu natudia memero do lau hatorea isi,
Gris ena natuna memero tuari henia totona,
Siona e, tuari tauna ena tuari kaia bamona oi do lau halaoa.’
14 Iehova do ia hahedinaraia ia be iena taunimanima ia gunalaia,
Bona iena diba be kevaru bamona do ia pidia.
Siahu Ibounai Lohiabadana Iehova ese kibi do ia hiriria,+
Bona ia be saut kahana ena lai gubana bamona ena inai taudia tuari henia totona do ia lao.
Do idia moale bona boiboi bada, wain amo idia kekero bamona,
Do idia honu momokani uro ia honu bamona,
Boubou patana ena kona ta ta idia honu bamona.+
16 Unai dina ai, Iehova edia Dirava ese idia do ia hamauria
Mamoe naria tauna ese iena mamoe ia hamauria bamona,+
Idia be korona ena hairai nadidia bamona iena tano dekenai do idia diaridiari.+
17 Badina iena kara namo be bada herea,+
Bona ia be hairai momokani!
Witi ese tau matamata dekenai goada ia henia,
Bona wain ese rami-hebou kekeni dekenai lalogoada ia henia.”+
10 “Tubutubu gaudia idia tubu lou negana ena medu totona Iehova umui noia.
Iehova ese ori koremadia ia havaraia,
Ia ese taunimanima totona medu ia siaia,+
Bona ibounai totona tubutubu gaudia ia havaraia.
2 Badina edia ruma bese ena dirava* ese koikoi herevadia ia gwauraia,
Bona vaira nega idia gwauraia taudia edia matahanai be koikoi.
Idia be anina lasi nihi idia gwauraia,
Bona idia ura taunimanima idia hagoadaia, to ta be goada ia abia lasi.
Unai dainai mamoe bamona do idia loa kava.
Hisihisi do idia davaria, badina mamoe naria tauna be lasi.
3 Mamoe naria taudia dekenai lau badu dikadika,
Dagedage gunalaia taudia* do lau hahemaoro henidia,
Badina tuari oreadia edia Iehova* be ena mamoe oreana, Iuda besena unai, ia durua,+
Bona tuari lalonai hosi goadana bona hairaina bamona ia halaoa.
4 Iuda besena amo gunalaia tauna* ta do ia mai,
Ia amo heduru henia lohia tauna* ta do ia mai,
Ia amo tuari ena peva do ia mai,
Bona ia amo gaukara naria taudia ibounai do idia mai.
5 Bona idia be tuari taudia goadadia bamona ai do idia lao,
Tuari lalonai dala ena kopukopu idia moidia diho.
Idia ese tuari do idia karaia, badina Iehova be idia ida ia noho,+
Bona edia inai taudia, hosi ai idia guia taudia unai, be do idia hemarai.+
6 Lau ese Iuda besena be bese goadana ai do lau halaoa,
Iosepa ena bese be lau ese do lau hamauria.+
Edia tano dekenai idia do lau hakaua giroa lou,
Lau ese idia do lau hebogahisi henia,+
Idia do lau dadaraia lou lasi, guna lau karaia bamona,+
Badina lau be Iehova edia Dirava, bona idia do lau durua.
7 Eparaima taudia be tuari tauna goadana bamona ai do idia lao,
Edia lalona do idia moale, wain idia inua bona idia moale bamona.+
Edia natudia ese unai do idia itaia bona do idia moale,
Iehova dainai edia kudouna be do ia moale.+
8 ‘Idia dekenai do lau wisili bona idia do lau haboua,
Badina idia do lau ruhaia,+ bona do idia momo idia lao,
Bona edia namba be do ia bada noho.
9 Ena be uhe bamona bese idauidau huanai idia lau lulua lao,
Daudau gabudia dekenai lau do idia laloa noho,
Idia bona edia natudia do idia goada bona giroa lou.
10 Aigupito tano amo idia do lau hakaua mai
Bona Asuria tano amo idia do lau haboua,+
Bena Gileada+ bona Lebanona tanona dekenai idia do lau hakaua vareai,
Bona tano ibounai do idia hahonua momokani.+
11 Davara ese edia raka dalana ia koua neganai,
Do lau raka hanaia bona hurehure do lau botaia,+
Naila Sinavai ese edia dala ia koua neganai, ena ranu do lau hakaukaua.
12 Lau, Iehova ese idia dekenai goada do lau henia,+
Bona egu ladana dekenai do idia raka,’+ unai be Iehova ena hereva.”
11 “Lebanona e, oiemu iduara do oi kehoa,
Unai amo lahi ese oiemu sida audia do ia gabua ore.
2 Iunipa audia e, umui taitai badina sida audia idia moru vadaeni,
Unai au hairaidia be idia hadikaia vadaeni!
Basana ena ouki audia e, umui taitai,
Badina uda badana idia utua diho vadaeni!
3 Kamonai! Mamoe idia naria taudia idia taitai,
Edia rei namodia idia hadikaia vadaeni.
Kamonai! Laiona ena natuna ia boiboi noho,
Badina Ioridane badinai idia noho uda badadia be idia hadikaia vadaeni.
4 “Lauegu Dirava Iehova be inai bamona ia hereva: ‘Do idia alaia mase mamoe oreana do oi naria,+ 5 mamoe idia hoia taudia ese mamoe idia alaia,+ to panisi idia abia lasi. Bona mamoe idia hoihoilaia taudia+ idia gwau: “Iehova lau hanamoa, badina lau be taga tauna ai do lau lao.” Bona edia mamoe naria taudia ese idia hebogahisi henidia lasi.’+
6 “Iehova ia gwau: ‘Lau ese unai tano dekenai idia noho taudia do lau hebogahisi henia lasi. Taunimanima ta ta be iena dekena tauna bona iena king ena siahu henunai do lau atoa. Bona idia ese tano do idia hadikaia, bona lau ese edia imana amo idia do lau hamauria lasi.’”
7 Umui hisihisi noho mamoe e, umui dainai do idia alaia mase mamoe oreana lau gimaia.+ Bona lau ese itotohi rua lau abia bona ta lau gwauraia Hebogahisi, bona ma ta lau gwauraia Hatamonaia,+ bena lau ese mamoe lau naridia matamaia. 8 Bona hua tamona lalonai lau ese mamoe naria taudia toi lau hadokodia, badina idia dekenai lau hesiku bona idia be lau idia inai henia. 9 Bona lau gwau: “Lau ese umui do lau naria lasi. Ia mase noho mamoe do ia mase, bona ia manoka ia lao noho mamoe do ia mase. Bona mamoe oredia be ta ta edia hidio do idia ania.” 10 Vadaeni, lau ese egu Hebogahisi ena itotohi+ lau abia bona lau utua maragimaragi. Taunimanima ibounai ida lau karaia gwauhamata lau makohia. 11 Unai dina ai unai gwauhamata lau makohia, bona idia hisihisi noho mamoe be lau idia raraia noho bona idia laloparara unai be Iehova ena hereva.
12 Bena idia dekenai lau gwau: “Bema umui dekenai ia hegeregere, egu davana umui karaia, to bema lasi, umui karaia lasi.” Bena idia ese egu gaukara davana idia henia,* unai be 30 siliva moni.+
13 Bena Iehova be lau dekenai ia gwau: “Moni haboua gabuna lalonai unai moni oi negea. Unai be lau idia laloa bada ena davana.”*+ Vadaeni lau ese unai 30 siliva moni lau abia bona Iehova ena ruma ena moni haboua gabuna lalonai lau negea.+
14 Bena egu Hatamonaia ena itotohi+ lau utua maragimaragi, unai amo Iuda bona Israela be tadikaka bamona idia noho karana lau hapararaia.+
15 Bena Iehova be lau dekenai ia gwau: “Hari, mamoe naria tauna dikana ena tulu oi kokia.+ 16 Badina inai tano dekenai mamoe naria tauna ta do ia gini bona lau ese ia do lau koua lasi. Idia manoka noho mamoe do ia naria lasi,+ mamoe maragidia do ia tahua lasi, bero mamoe do ia hanamodia lasi+ eiava idia gini diba mamoe do ia ubudia lasi. To, tauanina bada mamoe do ia ania+ bona mamoe edia aena ia darea.+
17 Egu mamoe naria tauna ese mamoe ia dadaraia, ia be dika do ia davaria!+
Tuari kaia ese iena imana bona matana idibana do ia gwadaia.
Iena imana be do ia kakoro haraga,
Bona iena matana idibana be do ia kepulu momokani.”
12 Mai anina bada herevana ta:
Iehova ia gwau: “Inai be Iehova ena hereva Israela totona.”
Ia ese guba be dabua ta bamona ia kehoa badabada,+
Ia be tanobada ena badina ia haginia,+
Bona ia ese tau dekenai mauri siahuna ia henia.
2 “Lau ese Ierusalema be kapusi* ta ai do lau halaoa bona ia badinai idia noho taudia ese idia inua neganai, kekero taudia bamona do idia raka. Bona Iuda bona Ierusalema be edia inai taudia ese do idia hagegea.+ 3 Unai dina ai taunimanima ibounai dekenai lau ese Ierusalema be nadi metauna ai do lau halaoa. Nadi idia abia isi taudia be bero dikana do idia davaria,+ bona tanobada ena bese ibounai do idia haboua Ierusalema idia tuari henia totona.+ 4 Iehova ia gwau: “Unai dina ai lau ese hosi ibounai do lau hagaria bona edia guia taudia be do idia kavakava. Egu matana be Iuda besena do ia raraia noho, to lau ese edia inai taudia edia hosi ibounai edia matana do lau hakepulua. 5 Iuda iduhu ena lohia taudia be sibona edia lalona ai do idia gwau: ‘Ierusalema ai idia noho taudia be emai goada, bona unai be tuari oreadia edia Iehova* amo ia mai.’+ 6 Unai dina ai lau ese Iuda iduhu ena lohia taudia be lahi amo ia honu uro bamona ai do lau halaoa, bona idia utua witi matamata ia gabua lahi bamona ai do lau halaoa.+ Bona idia ese idiba bona lauri kahana ai idia noho taudia ibounai do idia araia ore.+ Bona Ierusalema be ena gabu* ai do ia gini lou, bona taunimanima ese do idia noholaia lou.+
7 “Iehova ese Iuda ena palai rumadia do ia gimaia guna, unai amo Davida ena bese ena hahenamo* bona Ierusalema taudia edia hahenamo* ese Iuda besena ena do ia hereaia lasi. 8 Unai dina ai Iehova be Ierusalema taudia edia kesi ai do ia lao.+ Bona unai dina ai idia huanai do ia moru tauna* be do ia goada Davida bamona. Bona Davida ena bese be Iehova ena aneru bamona taunimanima ia hakaua noho.+ 9 Unai dina ai lau ese Ierusalema idia tuari henia besedia ibounai do lau hadikaia ore momokani.+
10 “Lau ese egu lauma helaga be Davida ena bese bona Ierusalema taudia edia latanai do lau bubua, bona idia do lau lalonamo henia bona edia taitai do lau kamonai. Bona idia gwadaia tauna do idia itaia+ bona ia totona do idia taitai, ia vara natuna mero tamona totona idia taitai bamona. Bona ia totona do idia taitai dikadika, ia vara guna natuna mero totona idia taitai bamona. 11 Unai dina ai Ierusalema dekenai taitai be bada herea, Megido ena tano palakana Hadada-rimono dekenai idia taitai bamona.+ 12 Tano be do ia taitai. Bese ta ta be sibona do idia taitai. Davida ena bese be sibona do idia taitai, bona edia hahine be sibodia edia orea dekenai do idia taitai. Unai bamona do ia vara Natana+ ena bese dekenai, 13 Levi ena bese be sibona do idia taitai,+ bona edia hahine be sibodia edia orea dekenai do idia taitai. Simei ena bese be sibona do idia taitai,+ bona edia hahine be sibodia edia orea dekenai do idia taitai. 14 Bona idia noho bese oredia ibounai, bese ta ta be sibona do idia taitai bona edia hahine be sibodia edia orea dekenai do idia taitai.
13 Unai dina ai Davida ena bese taudia bona Ierusalema ai idia noho taudia totona ranu guri ta do idia geia, bona unai ranu ese edia kara dika do ia huria.+
2 Tuari oreadia edia Iehova* ia gwau: “Unai dina ai, lau ese inai tano amo kaivakuku edia ladana do lau kokia vaitani,+ bona taunimanima ese do idia lalodia lou lasi. Bona lau ese peroveta taudia ibounai+ bona kara mirodia idia karaia taudia do lau kokia.” 3 Bona bema ta be ia peroveta lou, ia idia havaraia tama sina ese ia do idia hamaoroa, ‘Oi be do oi mase, badina Iehova ena ladana ai hereva koikoidia oi gwauraia.’ Peroveta herevadia ia gwauraia dainai ena tama sina ese do idia gwadaia.+
4 “Unai dina ai peroveta taudia ta ta be iena matahanai ia perovetalaia totona do ia hemarai, bona taunimanima idia koia totona peroveta tauna ena dabua+ do idia atoa lasi. 5 Bona idia ta ta do idia gwau, ‘Lau be peroveta tauna lasi, to lau be biru tauna. Badina lau matamata neganai tau ta ese hesiai tauna bamona lau ia hoia.’ 6 Bona bema ta ese idia ia nanadaia, ‘Emu pagana* ai idia noho bero be dahaka?’ Do ia haere, ‘Inai bero be egu turadia* edia ruma dekenai lau davaria.’”
7 Tuari oreadia edia Iehova ia gwau, “Tuari kaia e, oi toreisi, egu mamoe naria tauna do oi tuari henia,+
Egu turana do oi hadikaia.
Mamoe naria tauna oi alaia+ bona mamoe serina be gabu idauidau dekenai do idia heau lao,+
Bona lau ese anina lasi taudia dekenai egu imana do lau abia isi.”
8 Iehova ia gwau, “Tano ibounai dekenai,
Taunimanima ena orea toi amo orea rua be do idia utua oho bona do idia mase,
Bona orea tamona sibona be do ia mauri noho.
9 Bona lau ese taunimanima ena orea ihatoina be lahi amo do lau hagoevaia,
Siliva idia hagoevaia bamona idia do lau hagoevaia,
Bona golo idia tohoa bamona idia do lau tohoa.+
Idia be egu ladana dekenai do idia boiboi,
Bona lau ese idia do lau haere henia.
Do lau gwau, ‘Idia be egu taunimanima,’+
Bona do idia gwau, ‘Iehova be aiemai Dirava.’”
14 “Kamonai! Iehova ena dina do ia mai, unai dina ai emui kohu do idia dadia bona emui vairanai do idia haria. 2 Ierusalema tuari henia totona bese ibounai do lau haboua, siti do idia abia bona ruma edia kohu do idia dadia bona hahine do idia reipia. Bona siti dekenai idia noho taudia ena kahana ta be do idia abia lao, to ena kahana ta be siti dekenai do idia rakatania.
3 “Iehova be unai bese iboudiai tuari henia totona do ia lao,+ tuari dinana ai ia tuari bamona.+ 4 Unai dina ai iena aena be Olive Ororona latanai do ia atoa,+ unai be Ierusalema ena ist kahana dekenai. Bona Olive Ororona be kahana rua ai do ia parara, ist kahana* ia lao west kahana* bona koura bada herea ta ia vara. Bona ororo ena kahana ta be not kahana dekenai bona kahana ma ta be saut kahana dekenai. 5 Oi be egu ororo ena koura dekenai do oi heau lao, badina unai koura be do ia lao ela bona Asele dekenai. Iuda ena king, Usaia, ena dina ai tano mareremarere amo oi heau mauri bamona do oi heau.+ Bona Iehova, egu Dirava, be do ia mai bona helaga taudia ibounai be ia ida do idia noho.+
6 “Unai dina ai diari be lasi+ bona gau ibounai be aisi bamona do idia auka. 7 Bona unai dina be Iehova ena dina ai do ia lao.+ Ia be dina eiava hanuaboi bamona lasi, badina hanuaboi negana ai gabu be do ia diari noho. 8 Unai dina ai Ierusalema amo mauri ena ranu do ia aru lao+ ist kahana ena davara* dekenai+ bona ena kahana ma ta be west kahana ena davara* dekenai do ia aru lao.+ Unai be sama* bona winta* ai do ia vara. 9 Bona Iehova be tanobada ibounai dekenai King ai do ia lao.+ Unai dina ai taunimanima ibounai be Iehova sibona do idia tomadiho henia,+ bona iena ladana sibona do idia hanamoa.+
10 “Tano ibounai be Arabaha+ bamona ai do ia lao, Geba+ amo ia lao Rimono,+ Ierusalema ena saut kahana unai. Ierusalema be do idia haginia lou bona do idia noholaia,+ Beniamina Iduarana+ amo ela bona Geiti Ginigunana dekenai, unuseni amo ela bona Kona Iduarana, bona Hananele Kohorona+ amo ela bona king ena wain moia gabuna. 11 Bona taunimanima be Ierusalema do idia noholaia, bona ia latanai hadikaia hereva ta be lasi,+ bona Ierusalema taudia be gau ta dekenai do idia gari lasi.+
12 “Bona Iehova ese inai gorere dikana be Ierusalema idia tuari henia taudia dekenai do ia havaraia:+ Edia aena ai idia do gini noho lalonai edia tauanina ena hidio do ia bodaga, edia matana do idia bodaga bona edia uduna lalonai edia malana do idia bodaga.
13 “Unai dina ai idia huanai Iehova ese gari bada herea do ia havaraia, bona idia ta ta be edia turana ena imana do idia dogoatao bona do idia ala-ala heheni.+ 14 Tuari ai Iuda be Ierusalema do ia durua, bona badinai idia noho besedia edia kohu momo herea, golo, siliva bona dabua ibounai do idia dadia.+
15 “Bona unai bamona gorere dikana ese edia inai taudia edia kamepa lalonai idia noho hosi, doniki, kamelo bona animal ibounai do ia hadikaia danu.
16 “Ierusalema idia tuari henia besedia amo idia do mauri noho taudia be lagani ta ta ai Ierusalema dekenai do idia daekau lao,+ tuari oreadia edia Iehova,* King unai, idia tomadiho henia+ bona Au Raurau Rumadia Ena Aria* idia moalelaia totona.+ 17 To bema tanobada besedia amo tau ta be Ierusalema dekenai ia daekau lao lasi, tuari oreadia edia Iehova, King unai, ia tomadiho henia totona, edia tano ai medu do ia diho lasi.+ 18 Bona bema Aigupito besena be idia daekau mai bona idia vareai lasi, edia tano dekenai medu do ia diho lasi. To, Iehova ese idia dekenai gorere dikana do ia henia, Au Raurau Rumadia Ena Aria moalelaia totona idia mai lasi idau bese taudia dekenai ia karaia bamona. 19 Unai panisi be Aigupito bona idau bese taudia edia kerere ena davana, badina idia be Au Raurau Rumadia Ena Aria moalelaia totona idia mai lasi.
20 “Unai dina ai inai hereva, ‘Helaga karana be Iehova ena,’+ be hosi edia aiona ai idia kwatua gaba maragidia dekenai do idia torea. Bona Iehova ena ruma lalonai idia noho uro badadia+ be do idia helaga, boubou patana vairanai idia gaukaralaia uro bamona.+ 21 Bona Ierusalema bona Iuda ai idia gaukaralaia uro iboudiai be tuari oreadia edia Iehova ena bona idia be helaga, bona boubou idia karaia taudia be do idia mai bona unai uro haida do idia gaukaralaia edia boubou gauna nadua totona. Unai dina ai Kanana tauna* ta be tuari oreadia edia Iehova ena ruma lalonai do ia noho lasi.”+
Anina be “Iehova ese Ia Laloatao.”
Diksenari ai, “Tuari oreadia edia Iehova” itaia.
Ap. B15 itaia.
Au maragina ta, ena raurau be idia diaridiari bona ena flaoaflaoa be kurokuro bona mai bonana namona.
Heb., “guba ena lai 4.”
Diksenari ai, “Tuari oreadia edia Iehova” itaia.
Eiava “egu matana nadinadi.”
Reana unai be Iehova.
Diksenari ai, “Tuari oreadia edia Iehova” itaia.
Eiava “gimaia.”
Diksenari ai, “Tuari oreadia edia Iehova” itaia.
Heb., “nadi, tini.” Inai varo ena dokona ai metau gauna ta ia noho, bona idia gaukaralaia idia haginia gauna idia sekea, bema ia gini maoromaoro eiava lasi.
Unai be, olive auna ena rigi maragidia mai edia huahua.
Kiubit ta be 44.5 cm. Ap. B14 itaia.
Kiubit ta be 44.5 cm. Ap. B14 itaia.
Diksenari ai, “Tuari oreadia edia Iehova” itaia.
Heb., “ifa.” Inai uro eiava bosea idia gaukaralaia ifa ena mesament idia abia totona. Ifa ta be 22 L. Ap. B14 itaia.
Heb., “tanobada bona guba edia huana.”
Unai be, Babulonia.
English ai, “speckled.”
Eiava “davara kahanai.”
Eiava “korona hairaina.”
Diksenari ai, “Tuari oreadia edia Iehova” itaia.
“Siri 10 ai ia be Heledai.”
“Siri 10 ai ia be reana Iosaia.”
Ap. B15 itaia.
Diksenari ai, “Tuari oreadia edia Iehova” itaia.
Diksenari itaia.
Eiava “noho hanaihanai lalokauna.” Diksenari itaia.
Eiava “tama sina idia mase natuna.”
Eiava “hadibaia herevana.”
Diksenari ai, “Tuari oreadia edia Iehova” itaia.
Heb., “badina edia mauri dinadia be momo.”
Eiava “dina ia daekau kahana amo bona dina ia diho kahana amo.”
Eiava “umui gari lasi.”
Eiava “rami ena dokona.”
Heb., “laga-ani gabuna.”
Eiava reana, “latanai.”
Eiava “dagedage tauna.”
Unai be, ena taunimanima ese idia davaria hisihisi.
Eiava “ena inai taudia ia halusia; bona haida ia hamauria.”
Eiava “doniki tau.”
Unai be, Euperate.
Eiava “peva ena kahana ta idia moia diho unai amo ena kahana ma ta dekenai varo idia kwatua diba.”
Diksenari ai, “Tuari oreadia edia Iehova” itaia.
Heb., “terafimi kaivakuku.” Diksenari itaia.
Heb., “nanigosi tatau.”
Diksenari ai, “Tuari oreadia edia Iehova” itaia.
Heb., “kona ai ia gini kohoro,” unai be mai anina bada tauna ia laulaulaia.
Heb., “palai ruma ena ikoko,” unai ese heduru ia henia tauna o lohia tauna ia laulaulaia.
Heb., “itotohi.”
Heb., “idia sikelea.”
Ma danu, unai ese edia hemami Dirava dekenai ia hahedinaraia danu.
Eiava “disi.”
Diksenari ai, “Tuari oreadia edia Iehova” itaia.
Eiava “ena gabu korikori ai.”
Eiava “hairai.”
Eiava “hairai.”
Eiava “ia manoka momokani tauna.”
Diksenari ai, “Tuari oreadia edia Iehova” itaia.
Heb., “imana ruaosi huanai.” Unai be, kemena eiava doruna dekenai.
Eiava “lau idia lalokau henia taudia.”
Eiava “dina daekau kahana.”
Heb., “davara.”
Unai be, Mase Davara.
Unai be, Meditereinien Davara.
Lagani ena siahu negana.
Lagani ena keru negana.
Diksenari ai, “Tuari oreadia edia Iehova” itaia.
Diksenari ai, “Au Raurau Rumadia Ena Aria” itaia.
Eiava reana, “hoihoi tauna.”