MALAKI
1 Mai anina bada herevana ta:
Malaki* amo Iehova ese inai hereva be Israela dekenai ia gwauraia:
2 Iehova ia gwau: “Lau ese umui dekenai lalokau lau hahedinaraia.”+
To umui gwau: “Edena dala ai emu lalokau be ai dekenai oi hahedinaraia?”
Iehova ia gwau: “Esau be Iakobo ena tadikaka, ani?+ To lau ese Iakobo lau lalokau henia, 3 bona Esau lau ura henia lasi,+ bona iena ororo gabudia lau hadikaia+ bona iena tano be uda sisia edia noho gabuna ai lau halaoa.”+
4 “Ena be Edoma ia gwau, ‘Emai hanua idia hadikaia momokani, to do ai giroa bona haginia lou.’ Tuari oreadia edia Iehova* ia gwau, ‘Do idia haginia, to lau ese do lau veria diho, bona taunimanima ese edia tano do idia gwauraia “kara dika tanona” bona “idia be hanaihanai Iehova ese ia badu henia besena.”+ 5 Oiemu matana amo do oi itaia, bona do oi gwau: “Israela tanona ibounai dekenai Iehova do idia hanamoa bada.”’”
6 Tuari oreadia edia Iehova be iena ladana idia hadikaia hahelaga taudia dekenai inai bamona ia hereva: “‘Natuna mero ese tamana ia matauraia+ bona hesiai tauna ese iena biaguna ia matauraia. Vadaeni bema lau be tamana,+ emui hemataurai lau dekenai be edeseni?+ Bona bema lau be Biaguna,* emui gari* lau dekenai be edeseni?’+
“‘To oi gwau: “Edena dala ai emu ladana ai hadikaia?”’
7 “‘Aniani* mirona be egu boubou patana dekenai umui mailaia.’
“‘Bona umui gwau: “Edena dala ai oi ai hamiroa?”’
“‘Inai bamona umui gwau: “Iehova ena boubou patana+ be anina lasi gauna.” 8 Bona matakepulu animal umui bouboulaia neganai, umui gwau: “Unai be kerere lasi.” Bona aena dika animal o gorere animal umui bouboulaia neganai, umui gwau: “Unai be kerere lasi.”’”+
Tuari oreadia edia Iehova ia gwau: “Mani unai animal be emui gavana dekenai umui henia. Ia be mai lalonamo ida umui do ia abia dae, a?”
9 Tuari oreadia edia Iehova ia gwau: “Vadaeni, hari, mani emui kara Dirava umui noia,* ita ia lalonamo henia totona. Emui imana amo unai bamona boubou gaudia umui henia dainai, ia be mai lalonamo ida umui do ia abia dae, a?”
10 Tuari oreadia edia Iehova ia gwau: “Bona umui huanai daika be mai ena ura ida dubu helaga ena iduara do ia koudia?+ Badina egu boubou patana ena lahi umui karaia be mai davana danu.+ Lau be umui dekenai lau moale lasi, bona emui boubou gaudia lau moalelaia lasi.”+
11 Tuari oreadia edia Iehova ia gwau: “Dina ena daekau ela bona ena diho ai,* bese ibounai huanai egu ladana do idia matauraia.+ Gabu ibounai lalonai egu ladana dekenai boubou lahi do idia gabua bona boubou gaudia, harihari gauna namona do idia henia; badina bese ibounai huanai egu ladana do idia matauraia.”+
12 “To umui ese egu ladana* umui matauraia lasi,+ badina umui gwau: ‘Iehova ena boubou patana be ia miro bona ia latanai idia atoa au huahua bona aniani be dika herea.’+ 13 Bona ma umui gwau, ‘Herevana! Inai gaukara ai hesikulaia vadaeni!’ Bona umui laloa ia be anina lasi gaukara dainai, emui vairana umui hadikaia.” Unai be tuari oreadia edia Iehova ena hereva. Bona Iehova ma ia gwau: “Umui ese henaoa animal, aena dika gaudia, bona gorere animal umui mailaia. Oibe, unai gaudia be harihari gaudia bamona umui mailaia! Unai gaudia do lau abia dae, a?”+
14 Tuari oreadia edia Iehova ia gwau: “Iena mamoe orea lalonai mamoe goevana ta ia noho, to Iehova dekenai toto* gauna ia bouboulaia tauna be dika do ia davaria. To lau be King badana+ bona bese ibounai ese egu ladana do idia matauraia.”+
2 “Hahelaga taudia e, inai oda hereva be umui totona.+ 2 Bema lau umui kamonai henia lasi bona egu ladana umui hahelagaia lasi, emui hahenamo do umui haboioa bona dika do umui davaria.+ Oibe, emui hahenamo umui haboioa vadaeni, bona dika umui davaria vadaeni, badina mai emui kudouna ibounai ida egu hereva umui badinaia lasi.” Unai be tuari oreadia edia Iehova* ena hereva.
3 “Itaia, lau ese emui uhe do lau hadikaia,+ bona emui aria edia kukuri be emui vairanai do lau negea, bona idia bouboulaia animal edia kukuri idia negea gabuna dekenai umui do idia abia lao. 4 Bena do umui diba lau ese umui dekenai inai hahegani lau henia, unai amo Levi ida lau karaia gwauhamatana be do ia gini noho,”+ unai be tuari oreadia edia Iehova ena hereva.
5 “Levi ida lau karaia gwauhamatana be iena mauri ia gimaia bona ia durua mai maino ida ia noho totona. Unai hahenamo dainai lau ia gari henia.* Lauegu ladana ia abia isi dainai ia ura lasi ia karaia karana ta ese lau ia habadua. 6 Hereva momokani ena taravatu* be iena uduna ai,+ bona iena udu bibina dekenai hereva dikana ta be lasi. Lau ida maino bona kara maoromaoro ai ia raka,+ bona momo ia durua edia kara dika idia rakatania totona. 7 Badina hahelaga tauna ena udu bibina ese diba ia gimaia be namo, bona taunimanima be ena uduna amo taravatu* do idia tahua,+ badina ia be tuari oreadia edia Iehova ena gwaukau tauna.
8 “To, umui be egu dala amo umui raka siri. Taravatu* amo momo umui hakaua kerere.+ Levi ida lau karaia gwauhamatana umui hadikaia,”+ unai be tuari oreadia edia Iehova ena hereva. 9 “Unai dainai taunimanima ibounai vairanai, umui do lau hahemaraia bona emui ladana do lau hadikaia, badina lauegu dala umui badinaia lasi to egu taravatu haida sibona umui badinaia.”+
10 “Ita ibounai eda tamana be tamona, ani?+ Dirava tamona ese ita ia karaia, ani? Vadaeni dahaka dainai ita be mai koikoi ida ta ta ita kara henia,+ bona iseda tubudia edia gwauhamata ita hadikaia? 11 Iuda be mai koikoi ida ia kara, bona Israela bona Ierusalema ai kara dika rohorohona ta ia karaia, badina Iuda be Iehova ena helaga* karana ia hadikaia,+ bona dirava idaudia ia tomadiho henia kekenina ia adavaia.+ 12 Herevana ia be daika,* bona herevana ia be tuari oreadia edia Iehova dekenai boubou gauna ta ia henia, to Iakobo ena palai rumana lalonai unai bamona ia karaia tauna be Iehova ese do ia hamasea.”+
13 “Bona umui ese gau iharuana ma ta umui karaia dainai, Iehova ena boubou patana be emu lalohisihisi bona taitai ena mata ranu ese ia haparia. Unai kara dainai Ia be emui boubou gauna ia laloa bada lasi, eiava umui henia gauna ta ia abia dae lasi.+ 14 Bona umui gwau, ‘Dahaka dainai?’ Badina be Iehova ia itaia, umui matamata neganai umui adavaia hahinena dekenai badinaia lasi karana umui karaia, ena be unai hahine be emui turana bona ia ida gwauhamata umui karaia.*+ 15 To umui huanai haida be edia lalona idia hadaia unai bamona do idia karaia lasi. Badina idia ura idia havaraia natudia be Dirava ena bese ena kahana ai idia lao. Unai taudia be Dirava ena lauma helaga ese ia hakaudia noho. Namona be umui danu, emui kudouna umui sekea bona lalohadai maorona umui abia. Emui lalona do umui hadaia emui tau matamata neganai umui adavaia hahinena dekenai umui kara koikoi lasi totona. 16 Iehova, Israela ena Dirava ia gwau: “Badina lau be divos karana lau inai henia*+ bona dagedage karana be dabua bamona ia atoa* tauna lau inai henia. Bona emui lalohadai do umui gimaia, bona do umui kara koikoi lasi.”+ Tuari oreadia edia Iehova be unai bamona ia hereva.
17 “Umui emui hereva dekenai Iehova ia hesiku vadaeni.+ To umui gwau, ‘Edena dala ai emai hereva dekenai ia hesiku?’ Badina umui gwau: ‘Iehova ena vairanai kara dika idia karaia taudia ibounai be namo, bona idia dekenai ia moale,’+ eiava umui gwau, ‘Kota maoromaoro Diravana be edeseni?’”
3 Tuari oreadia edia Iehova* ia gwau: “Kamonai! Lau ese egu hereva gwauraia tauna lau siaia egu dala do ia hegaegaelaia.+ Bena umui tahua noho tauna, Lohiabada be kara haraga iena dubu helaga dekenai do ia mai.+ Bona gwaubou herevana ia mailaia tauna, umui ura henia tauna do ia mai. Itaia! Ia be do ia mai momokani.
2 “Daika be iena mai dinana do ia haheaukalaia diba, bona ia hedinarai neganai daika do ia gini diba? Ia be auri ia havevea bona miro ia kokia lahi bamona bona ia be dabua huria sopu bamona.+ 3 Bona ia be do ia helai bona siliva ia havevea bona hagoevaia tauna bamona+ Levi ena natudia do ia hagoevaia, bona idia be golo bona siliva bamona do ia hagoevaia, bona idia be Iehova vairanai mai kara maoromaoro ida boubou gaudia idia henia taudia ai do idia lao. 4 Bona Iuda bona Ierusalema ese idia henia boubou gaudia be Iehova ese do ia moalelaia, idaunegai ia moalelaia bamona.”+
5 Tuari oreadia edia Iehova ia gwau: “Hahemaoro karaia totona lau be umui kahirakahira do lau mai, bona lau be vada taudia,+ heudahanai taudia, gwauhamata koikoi taudia,+ gaukara taudia edia davana idia henia lasi taudia,+ vabu, tamana lasi natuna,*+ bona idau tauna idia ura lasi durua* taudia+ be haraga momokani do lau hahemaoro henidia. Unai taudia be lau idia gari henia lasi.”
6 Tuari oreadia edia Iehova ia gwau: “Lau be Iehova. Lauegu kara lau haidaua lasi.+ Bona umui be Iakobo ena natudia, unai dainai umui mase ore lasi. 7 Emui sene taudia edia nega amo umui be egu taravatu umui dadaraia bona umui badinaia lasi.+ Lau dekenai do umui giroa mai, bona lau be umui dekenai do lau giroa lou.”+
To umui gwau: “Edena dala ai oi dekenai do ai giroa mai?”
8 “Tau ta be Dirava amo ia henaohenao diba, a? To umui be lau amo umui henaohenao noho.”
Bona umui gwau: “Edena dala ai oi amo ai henaohenao?”
“Umui ese kahana 10 edia kahana ta ta bona harihari gaudia umui abia mai lasi. 9 Umui be dika do umui davaria,* badina umui be lau amo umui henaohenao. Oibe, bese ibounai be unai bamona idia karaia noho. 10 Kahana 10 ena kahana ta ibounai do umui abia mai aniani haboua rumana ai,+ unai amo egu ruma dekenai aniani do ia noho.+ Bona mani emui kara inai dala ai lau do umui tohoa, bona do umui itaia bema lau ese guba ena geiti do lau kehoa+ bona hahenamo be medu bamona do lau bubua diho ela bona emui dabu gaudia ibounai do lau hagugurua momokani.”+ Tuari oreadia edia Iehova be unai bamona ia hereva.
11 Tuari oreadia edia Iehova ia gwau: “Lau ese kwadi do lau koudia, bona idia ese emui tano ena huahua gaudia do idia hadikaia lasi, bona emui vain audia be huahua do idia atoa.”+
12 Tuari oreadia edia Iehova ia gwau: “Bese iboudiai ese umui do idia hanamoa,+ badina emui tano do idia ura henia.”
13 Iehova ia gwau: “Lau dekenai hereva aukadia umui gwauraia.”
Bona umui gwau: “Edena dala ai oi dekenai hereva aukadia ai gwauraia?”+
14 “Umui gwau, ‘Dirava hesiai henia karana be anina lasi.+ Tuari oreadia edia Iehova ena taravatu ai badinaia bona ai helalo-kerehai dainai, mai lalohisihisi ida ai raka ena namo be dahaka? 15 Hari inai nega amo do ai gwau, hekokoroku taudia be idia moale bona kara dika idia karaia noho taudia be idia kwalimu.+ Idia ese Dirava idia tohoa bona idia ia panisia lasi.’”
16 Unai nega ai Iehova idia gari henia taudia ta ta be edia turana ida idia herevahereva, bona Iehova be edia hereva ia kamonai noho. Bona iena vairanai buka ta idia torea,+ unai buka ai Iehova ese ia laloatao taudia bona iena ladana idia laloa bada taudia edia ladana idia torea.+
17 Tuari oreadia edia Iehova ia gwau: “Bona idia be lauegu,+ badina unai nega ai lau ese idia be egu lalokau taudia ai do lau halaoa.+ Lau ese idia dekenai hebogahisi do lau hahedinaraia, tama ta ese iena hesiai natuna mero dekenai hebogahisi ia hahedinaraia bamona.+ 18 Bona umui ese kara maoromaoro tauna bona kara dika tauna, Dirava ia hesiai henia tauna bona ia hesiai henia lasi tauna, edia idau do umui itaia.”+
4 Tuari oreadia edia Iehova* ia gwau: “Kamonai! Dina be ia mai noho, ia be lahi badana bamona,+ hekokoroku taudia bona kara dika idia karaia noho taudia be rei kakoro bamona do ia gabua ore. Ia mai noho dinana ese idia do ia gabua ore, bona edia ramuna bona rigina ta do ia noho lasi. 2 To umui, egu ladana umui matauraia* taudia dekenai dina ena diari be kara maoromaoro do ia halasia, unai diari* ese umui do ia hanamoa bona mai moale ida do umui roho isi kopina bada boromakau natuna bamona.”
3 Tuari oreadia edia Iehova ia gwau: “Unai lau karaia dinana ai, umui ese kara dika taudia be emui aena amo do umui moia, bona emui aena palapala henunai idia be kahu bamona ai do idia lao.”
4 “Horeba ai Israela besena ibounai ese do idia badinaia totona, egu hesiai tauna Mose dekenai lau henia taravatu, oda herevadia bona hahemaoro herevadia do umui laloatao.+
5 “Kamonai! Iehova ena dina badana mai garina ia do ginidae lasi neganai,+ lau ese peroveta tauna Elia be umui dekenai do lau siaia.+ 6 Bona ia ese tamadia edia lalona be natudia memero edia lalona bamona do ia halaoa,+ bona natudia memero edia lalona be tamadia edia lalona bamona do ia halaoa,* unai amo lau be do lau giroa mai lasi tanobada lau hadikaia ore totona.”
(Heberu bona Aramia Toretoredia ena dokona, bona Keristani Grik Toretoredia ena matamana)
Anina be “Lauegu Hereva Gwauraia Tauna.”
Diksenari ai, “Tuari oreadia edia Iehova” itaia.
Eiava “biaguna badana.”
Eiava “hemataurai.”
Heb., “paraoa.”
Eiava “ena vairana umui hamanokaia.”
Eiava “ist amo ia lao west.”
Eiava reana, “lau.”
Eiava “dika.”
Diksenari ai, “Tuari oreadia edia Iehova” itaia.
Eiava “matauraia.”
Eiava “hadibaia herevana.”
Eiava “hadibaia herevana.”
Eiava reana, “emui hadibaia herevana.”
Eiava reana, “dubu helaga.”
Heb., “ia noga noho tauna bona ia haere tauna.”
Eiava “ia be emu adavana korikorina.”
Heb., “ia inai henia.”
Eiava “dagedage karana ia karaia.”
Diksenari ai, “Tuari oreadia edia Iehova” itaia.
Eiava “tama sina idia mase natuna.”
Eiava “idau taudia edia durua gaudia abia dalana idia koua.”
Eiava reana, “Umui be hereva dikadia amo lau umui gwauraia dika noho.”
Diksenari ai, “Tuari oreadia edia Iehova” itaia.
Heb., “gari henia.”
Heb., “apena.”
Eiava “ia ese tamadia edia lalona do ia giroa natudia memero do idia laloa, bona natudia memero edia lalona do ia giroa edia tamadia idia laloa totona.”