Davara Kakakakana Idia Hanaia

LAULAU dekenai ia vara noho gauna mani oi itaia! Mose ese ena au be Davara Kakakakana ataiai ia abia isi. Ia danu idia roho mauri taudia be Israela taudia. To Farao bona ena tuari oreana be davara lalonai idia maloa mase. Unai ia vara dalana mani ita itaia.

Ita diba bamona, Dirava ese hisihisi namba 10 be Aigupito taudia dekenai ia siaia murinai, Farao ese Israela taudia ia hamaoroa Aigupito do idia rakatania. Israela tatau 600,000 bamona ese gabu idia rakatania, hahine bona natudia danu. Iehova idia abidadama henia idau bese taudia momo ese Israela taudia idia bamoa danu. Idia ibounai ese edia mamoe, nani bona boromakau danu idia abia lao.

Idia do lao lasi neganai, Israela taudia be Aigupito taudia dekenai dabua, bona golo bona siliva amo idia karaia gaudia totona idia noinoi. Hisihisi ginigabena dainai, Aigupito taudia idia gari dikadika. Unai dainai Israela taudia idia noia gaudia ibounai idia henia.

Dina haida murinai, Israela taudia be Davara Kakakakana dekenai idia ginidae. Unuseniai idia laga-ani. To unai neganai, Farao bona ena tatau idia lalohisihisi badina Israela taudia idia siaia. Idia gwau: ‘Iseda hesiai taudia ita siaia vadaeni!’

Unai dainai Farao ese ena lalona ia haidaua lou. Karaharaga ena tuari kariota bona tuari oreana ia hegaegaelaia. Bena Israela taudia murinai ia heau lao, mai ena kariota namodia 600 bona Aigupito ena kariota ibounai danu.

Israela taudia ese Farao bona ena tuari oreana idia itaia idia murinai idia mai neganai, idia gari bada herea. Heau dalana be lasi. Davara be edia kahana ta dekenai, bona kahana ma ta dekenai Aigupito taudia idia heau mai noho. To Iehova ese ena taunimanima bona Aigupito taudia huanai ori ta ia atoa. Unai dainai Aigupito taudia ese Israela taudia idia itaia diba lasi dainai idia tuari henidia lasi.

Bena Iehova ese Mose ia hamaoroa ena au be Davara Kakakakana ataiai do ia abia isi. Unai bamona ia karaia neganai, Iehova ese lai goadana ta ist kahana amo ia siaia. Bena davara ia hapararaia bona ranu be kahana kahana dekenai ia gini.

Bena Israela taudia be tano kaukauna dekenai idia raka hanai matamaia. Unai taunimanima milioni momo mai edia animal danu be hora momo lalonai davara huanai idia raka. Gabeai Aigupito taudia ese Israela taudia ma idia itaia lou. Edia hesiai taudia be idia heau gwauraia! Unai dainai edia murinai davara huanai idia heau vareai.

Unai bamona idia karaia neganai, Dirava ena siahu amo edia kariota edia uili ia kokidia. Aigupito taudia idia gari bada bona idia boiboi matamaia: ‘Iehova be Israela taudia ia durudia bona ita ia tuari henia noho. Ita giroa!’ To idia leiti vadaeni.

Unai neganai Iehova ese Mose ia hamaoroa ena au be Davara Kakakakana ataiai do ia abia isi, laulau dekenai oi itaia bamona. Mose be unai bamona ia karaia neganai, haba bamona ia gini ranu ibounai ia giroa bona Aigupito taudia bona edia kariota ia koudia. Tuari taudia ibounai be Israela taudia murinai idia heau. Bona Aigupito tauna ta ia roho mauri lasi!

Iehova ena taunimanima ibounai idia moale, badina idia roho mauri! Tatau ese Iehova tanikiu henia anena ta idia abia, idia gwau: ‘Iehova be hairai dalana dekenai ia kwalimu. Hosi bona edia guia taudia be davara dekenai ia negea.’ Mose ena taihuna Miriama be ena tareko ia abia, bona hahine ibounai be mai edia tareko danu ia murinai idia lao. Bona mai moale danu idia mavaru bona unai ane tamona idia abia: ‘Iehova be hairai dalana dekenai ia kwalimu. Hosi bona edia guia taudia be davara dekenai ia negea.’