Hereva Henia Bona Hadibaia Karadia Hanamoa Program

HEREVANA oi be matamata eiava buruka, tau eiava hahine, inai kosi ese oi ia durua diba, emu lalohadai gwauraia hedinarai bona Dirava ena Hereva hadibaia karadia oi hanamoa totona.

Sikuli naria tauna ese Tiokratik Haroro Sikuli lalonai idia vareai taudia dekenai edia kahana ia henia. Rau gabedia toi lalonai be emu sisiba pepana ia noho. Sisiba ta ta vairanai ia noho namba be rau gabedia lalonai idia noho stadi ta ta hegeregerena. Unai stadi ese hereva henia bona hadibaia karadia hanamoa daladia bona dahaka dainai idia ta ta be mai anina bada idia hahedinaraia. Idia gwauraia daladia oi badinaia totona heduru hereva namodia idia noho danu.

Sisiba fom dekenai idia noho kala idauidau idia hahedinaraia edena sisiba be (1) kamonai taudia vairanai duahiduahi kahana, (2) taunimanima rua eiava ma haida ese haheitalai bamona idia karaia kahana, eiava (3) kongregesen idia hereva henia kahana totona. Sikuli naria tauna ese oi totona hereva hanamoa sisiba do ia makaia. Kahana ta ta totona sisiba tamona sibona oi badinaia be namo. Bema unai stadi ena dokona kahana ai ia noho eksasais oi karaia, heduru do oi abia. Bema emu hereva amo oi hahedinaraia idia makaia stadi ena sisiba oi badinaia namonamo, sisiba henia tauna ese oi totona hereva hanamoa sisiba ma ta do ia makaia.

Bema emu kahana be haheitalai bamona do oi karaia, karaia dalana do oi abia hidi. Karaia daladia edia lista be rau 82 dekenai ia noho, to ma haida oi gaukaralaia diba danu. Reana sisiba henia tauna ia laloa karaia dalana ta oi tohoa be namo, unai oi dibaia totona, eiava ia laloa oi ese ta do oi abia hidi.

Ena be sikuli totona emu kahana oi hegaegaelaia lasi, to inai buka oi duahia bona eksasais oi karaia neganai, gau momo do oi hanamoa. Reana pura ta ta ai stadi idauna ta oi karaia diba.

Herevana sikuli lalonai nega daudau oi noho vadaeni eiava haroro gaukara oi karaia daudau vadaeni, emu kara oi hanamoa diba. Emai ura be Tiokratik Haroro Sikuli dekenai idia henia edukeisen amo heduru bada do oi abia.