Hereva Dokona

1, 2. Dahaka dainai hari iseda abidadama ita hagoadaia be mai anina bada? Herevalaia.

ABIDADAMA. Unai hereva namo hereana ese kara namona ta ia hahedinaraia. To, unai hereva ita itaia o kamonai neganai, hereva ma ta do ita laloa, unai be “Karaharaga!” Badina, bema ita be abidadama lasi, karaharaga iseda abidadama ita hagoadaia be namo. To bema ita be mai iseda abidadama, karaharaga ita gimaia bona hagoadaia be namo. Dahaka dainai?

² Mani oi laloa, oi be tano kaukauna ai oi raka lao noho dainai oi ranu mase. Bona oi ura dikadika ranu do oi inua. Bena ranu oi davaria neganai, unai ranu be dina ena siahu amo do oi gimaia. Unai amo emu ranu do oi hahonua lou diba, badina unai ese oi do ia durua ela bona oi lao henia gabuna dekenai oi ginidae. Hari ita noho tanobadana ai, momo idia ura lasi Iehova idia tomadiho henia. Abidadama momokanina be unai ranu bamona, oi gimaia bona hagoadaia be gau badana, to bema lasi do ia manoka diba. Dina ena siahu dainai ranu ia ore bona tano ia kaukau bamona. Bema ranu be lasi do ita mauri lasi, unai hegeregerena namona be ita hekwarahi noho, badina bema abidadama be lasi, do ita mauri lasi.​—Roma 1:17.

3. Iehova ese dahaka ia henia ita ia durua iseda abidadama ita hagoadaia totona, bona dahaka gaudia rua ita laloatao be namo?

³ Iehova ia diba abidadama be mai anina bada, bona ia diba hari inai negai ia auka iseda abidadama ita hagoadaia totona. Unai dainai, Iehova ese abidadama taudia haida edia sivarai ia gaukaralaia, unai amo idia ita tohotohoa diba. Iehova ena heduru amo aposetolo Paulo ese inai hereva ia torea: “Abidadama bona haheauka karana amo Dirava ese ia gwauhamatalaia gaudia idia abia taudia do umui tohotohoa.” (Heb. 6:12) Unai dainai Iehova ena orea ese ita ia hagoadaia, inai buka ese ia herevalaia abidadama tatau bona hahine edia haheitalai ita tohotohoa totona, do ita gaukara goada noho. Hari, dahaka ita karaia be namo? Mani inai gaudia rua ita laloatao: (1) Iseda abidadama ita hagoadaia noho; bona (2) iseda helaro ita laloa noho be namo.

4. Edena dala ai Satani ia ura iseda abidadama ia hadikaia, to dahaka dainai ita gari lasi be namo?

⁴ Emu abidadama oi hagoadaia noho. Satani ia ura abidadama ia hadikaia. Inai tanobada ia lohiaia tauna ese inai nega oromana ai idia vara gaudia ia gaukaralaia noho dainai, iseda abidadama hagoadaia totona be mai ena hekwarahi. Satani ena goada ese iseda goada ia hereaia. Unai dainai iseda abidadama ita hagoadaia totona be auka, a? Lasi! Iehova be abidadama korikorina idia tahua taudia ibounai edia Turana namona. Bona ita ia hamaoroa Iena heduru amo, Diabolo ita dadaraia diba bona ita amo do ia heau siri! (Iam. 4:7) Dina ta ta ai iseda abidadama ita hagoadaia karana amo ia ita dadaraia diba. Edena dala ai?

5. Baibel ai abidadama tatau bona hahine be edena dala ai edia abidadama idia hagoadaia? Herevalaia.

⁵ Inai buka ai ita itaia bamona, Baibel ese ia herevalaia abidadama tatau bona hahine be abidadama karana ida idia vara lasi. To edia mauri dalana amo idia hamomokania, abidadama be Iehova ena lauma helaga ena huahua ta. (Gal. 5:22, 23) Heduru totona idia guriguri bona Iehova ese edia abidadama ia hagoadaia. Namona be edia kara ita tohotohoa, ita laloaboio lasi Iehova idia guriguri henia taudia be edia guriguri hegeregerena idia badinaia neganai, Iena lauma helaga ia henia. (Luka 11:13) Gau ma haida ita karaia diba, a?

6. Edena dala ai Baibel sivaraidia ita stadilaia karana amo namo ita davaria diba?

⁶ Inai buka lalonai, ita ese abidadama taudia edia haheitalai haida sibona ita herevalaia. To momo herea idia noho! (Heberu 11:32 duahia.) Ita ta ta ese ita abia hidi dalana hegeregerena, mai guriguri bona kudouna ibounai ida Baibel ita stadilaia. Bema Baibel ai abidadama taudia edia sivarai ita duahia haraga, iseda abidadama do ita hagoadaia namonamo lasi. To, iseda duahiduahi amo namo ita abia totona, namona be nega ita atoa Baibel ena sivarai ita tahua namonamo. Bema hanaihanai ita laloatao unai goevadae lasi tatau bona hahine be mai edia “hemami ita hegeregerena,” do ita abia dae unai be sivarai korikorina. (Iam. 5:17) Ita ese idia davaria hisihisi ita laloa neganai, do ita mamia edia hekwakwanai idia haheaukalaia dalana be iseda hegeregerena.

7-9. (a) Hari ita karaia bamona, Baibel negadiai abidadama tatau bona hahine edia hemami Iehova tomadiho henia karana dekenai be edena bamona? (b) Dahaka dainai iseda kara amo iseda abidadama ita hagoadaia be namo?

⁷ Ita karaia gaudia amo iseda abidadama ita hagoadaia diba. Laloatao, “abidadama mai ena kara lasi be mase gauna.” (Iam. 2:26) Bema Iehova ese hari ita dekenai ia henia hesiai gaukara be unai abidadama tatau bona hahine dekenai ia henia, edia hemami mani ita laloa!

⁸ Hegeregere, bema Iehova ese Aberahamo ia hamaoroa Ia do ia tomadiho henia, to taunimanima lasi gabuna ai idia haginia nadi boubou patadia dekenai do ia tomadiho lasi, Aberahamo ena hemami mani oi laloa. To Kingdom Hall namodia bona hebouhebou badadia dekenai Iehova do ia tomadiho henia, bona “daudau amo” ia itaia gwauhamata edia anina ta ta be unai hebou gabudia ai ita herevalaia. (Heberu 11:13 duahia.) Bona mani oi laloa, bema Elia idia hamaoroa iena gaukara be, aposteit king dikana ena lohia henunai Iehova do ia hesiai henia noho, Bala peroveta taudia do ia hamasea lasi, to, maino herevadia amo taunimanima do ia hagoadaia bona helaro sivaraina do ia harorolaia. Oi laloa hari Iehova ita tomadiho henia hegeregerena, Baibel ese ia herevalaia abidadama tatau bona hahine be karaharaga unai asainmen do idia abia dae, a?

⁹ Unai dainai ita karaia gaudia amo iseda abidadama ita hagoadaia noho. Unai amo ita ese Dirava ena Hereva ai idia noho abidadama tatau bona hahine edia haheitalai ita tohotohoa noho. Hamatamaia Hereva hegeregerena, do oi mamia emu hetura karana idia ida be ia goada ia lao noho. Danu idia be emu tura korikorina ai do idia lao negana be ia kahirakahira.

10. Paradaiso ai dahaka do ita moalelaia?

¹⁰ Emu helaro oi laloa noho. Abidadama tatau bona hahine be hanaihanai Dirava ese ia henia helaro amo goada idia abia. Oi danu, a? Hegeregere, “kara maoromaoro taudia . . . do idia toreisi lou”—Dirava ena abidadama hesiai taudia unai, bona idia do oi hedavari henia ena moale mani oi laloa. (Kara 24:15 duahia.) Idia dekenai dahaka henanadai haida do oi henia?

11, 12. Tanobada matamata ai, dahaka henanadai be inai taudia dekenai do oi henia (a) Abela? (b) Noa? (c) Aberahamo? (d) Ruta? (e) Abigaila? (f) Eseta?

¹¹ Abela oi hedavari henia neganai, ena tama sina totona dahaka henanadai do oi henia? Eiava do oi nanadaia: “Eden umana idia gimaia kerubi anerudia oi hereva henidia, a? Oi idia haere henia, a?” Noa dekenai dahaka henanadai do oi henia? Reana do oi nanadaia: “Nefilim taudia oi gari henia, a? Unai lagani lalonai, bouti ai idia noho animal ibounai be edena bamona oi naria?” Bema Aberahamo oi hedavari henia, reana do oi nanadaia: “Sema ida oi hedavari, a? Daika ese oi dekenai Iehova ena sivarai ia hadibaia? Uru hanua oi rakatania totona be ia auka, a?”

¹² Unai hegeregerena, do idia toreisi lou abidadama hahinedia totona, reana inai bamona henanadai do oi laloa. “Ruta, dahaka ese oi ia durua dainai Iehova oi tomadiho henia?” “Abigaila, Davida oi durua karana be Nabala dekenai oi gwauraia totona oi gari, a?” “Eseta, Baibel ai emu sivarai ena dokonai, oi bona Modekai dekenai dahaka ia vara?”

13. (a) Toreisi lou taudia be oi dekenai dahaka henanadai do idia henia? (b) Idaunegai abidadama tatau bona hahine do oi hedavari henia ena helaro namona be edena bamona oi laloa?

¹³ Oibe, unai abidadama tatau bona hahine be oi do idia henanadai henia danu. Dina gabedia ai idia vara gaudia bona nega aukadia ai, Iehova ese ena taunimanima ia hanamoa daladia be idia dekenai do oi herevalaia be moale gauna! Oibe, Iehova ese ena gwauhamata ibounai ia hagugurua dalana idia dibaia neganai, do idia moale bada. Unai nega ia ginidae neganai, do ita lalohekwarahi lasi Baibel ai Dirava ena hesiai taudia edia sivarai ita piksaia totona. Badina idia be Paradaiso ai, ita ida do idia noho! Unai dainai hari edia sivarai oi stadilaia namonamo, unai amo idia be emu tura korikoridia bamona do oi laloa. Edia abidadama oi tohotohoa noho. Unai tura namodia ida Iehova hesiai henia karana do oi moalelaia ela bona hanaihanai!