Iesu ese Sabati ai Gorere Ia Hanamoa

Farisea taudia be Iesu idia inai henia dainai, dala idia tahua ia idia arest totona. Idia gwau, sabati dinana ai gorere taudia ia hanamoa be kerere. Sabati dinana ta ai, Iesu ese matakepulu tauna ta ia davaria, ia be strit ai taunimanima dekenai ia noinoi. Iesu be ena hahediba taudia ia hamaoroa: ‘Dirava ena siahu ese inai tauna ia durua dalana do umui itaia.’ Iesu ese ena kanudi be kopukopu ida ia mikisia, bona peist ia karaia, bena unai tauna ena matana ai ia atoa. Iesu ia gwau: ‘Oi lao Siloama gohuna dekenai emu matana oi huria.’ Matakepulu tauna be unai ia karaia, bena ena matana ia namo bona ia itaia diba.

Taunimanima idia hoa. Idia gwau: ‘Ia be guna iniseniai ia helai bona ia noinoi tauna eiava ia be unai tauna hegeregerena?’ Unai tauna ia gwau: ‘Unai be lau, lau vara neganai lau matakepulu!’ Ia idia nanadaia: ‘Dahaka dainai hari oi matakepulu lasi?’ Ia vara gauna ia gwauraia neganai, Farisea taudia dekenai ia idia hakaua lao.

Unai tau ese Farisea taudia ia hamaoroa: ‘Iesu ese egu matana dekenai peist ia atoa bona ia gwau, do lau lao bona egu matana lau huria. Unai lau karaia murinai lau itaia diba.’ Farisea taudia idia gwau: ‘Iesu be Sabati dinana ai gorere ia hanamoa, ena siahu be Dirava amo lasi.’ To haida idia gwau: ‘Bema ena siahu be Dirava amo lasi, gorere do ia hanamoa diba lasi.’

Farisea taudia ese unai tauna ena tama sina idia boiria bona idia nanadaia: ‘Edena bamona emui natuna be hari ia itaia diba?’ Ena tama sina idia gari, badina Farisea taudia idia gwau bema ta ese Iesu ia abidadama henia, sinagoga amo ia do idia negea raka-lasi. Unai dainai idia gwau: ‘Ai diba lasi. Ia umui nanadaia.’ Farisea taudia be unai tauna dekenai henanadai ma haida idia henia, bena ia gwau: ‘Lau diba gauna be umui dekenai lau gwauraia. Dahaka dainai lau umui henanadai noho?’ Farisea taudia idia badu, bona ia idia negea raka-lasi.

Iesu be unai tauna ia davaria, bona ia nanadaia: ‘Mesia oi abidadama henia, a?’ Unai tauna ia gwau: ‘Bema ia lau diba, do lau abidadama henia.’ Iesu ia gwau: ‘Lau be Mesia.’ Iesu be kara namona ia hahedinaraia. Ia ese gorere tauna ia hanamoa sibona lasi to ia durua ia abidadama totona.