Gau ta ese Idia ia Koua Diba Lasi

Tau ta ena aena be ia dika bona dina ibounai dubu helaga ena geiti ai ia helai bona moni totona ia noinoi. Adorahi ta ai, ia itaia Petero bona Ioane be dubu helaga lalonai idia raka vareai. Idia dekenai ia gwau: ‘Mani lau dekenai moni umui henia.’ Petero ia gwau: ‘Lau dekenai ia noho gauna be moni ia hereaia. Iesu ena ladanai, oi lau hamaoroa oi raka!’ Bena Petero ese ia durua ia toreisi, bona ia raka! Unai idia itaia taudia be idia moale bada bona momo be abidadama taudia ai idia lao.

To hahelaga taudia bona Sadukea taudia be idia badu. Aposetolo taudia idia dogoatao bona kota dekenai idia abia lao, bona idia hamaorodia: ‘Daika ena siahu amo inai tauna umui hanamoa?’ Petero ia gwau: ‘Iesu Keriso, umui hamasea tauna amo siahu ai abia.’ Tomadiho gunalaia taudia idia boiboi: ‘Iesu umui herevalaia lasi!’ To aposetolo taudia idia gwau: ‘Ia herevalaia karana do ai hadokoa lasi.’

Petero bona Ioane idia ruhaia neganai, maoromaoro aposetolo taudia ma haida dekenai idia lao bona ia vara gauna idia herevalaia. Idia guriguri hebou, Iehova idia noia: ‘Mani ai oi durua mai gari lasi ida emu gaukara do ai karaia noho.’ Iehova ese ena lauma helaga ia henia bona haroro bona hoa karadia idia karaia. Momo herea be abidadama taudia ai idia lao noho. Sadukea taudia be idia mama dainai aposetolo taudia idia arest bona dibura ruma ai idia atodia. To hanuaboi ai, Iehova ese aneru ia siaia, dibura ruma ia kehoa bona aposetolo taudia ia hamaoroa: ‘Dubu helaga dekenai umui giroa lou, bona umui haroro.’

Daba ai, tomadiho gunalaia taudia edia kota, Sanhedrin idia hamaoroa: ‘Dibura ruma be idia lokaia namonamo, to umui arest tatau be idia noho lasi! Idia be dubu helaga lalonai taunimanima idia hadibaia noho!’ Aposetolo taudia idia arest lou bona Sanhedrin dekenai idia abia lao. Hahelaga tauna badana ia gwau: ‘Umui ai oda henia Iesu do umui herevalaia lasi!’ To Petero ia haere: “Dirava be lohia dainai ia ai kamonai henia be maoro, to taunimanima lasi.”

Tomadiho gunalaia taudia idia badu dikadika, idia ura aposetolo taudia idia hamasea. Farisea tauna Gamaliela ia gini bona ia gwau: ‘Naria namonamo! Reana Dirava be inai tatau ida. Umui ura Dirava umui tuari henia, a?’ Idia ese iena sisiba idia abia dae. Aposetolo taudia idia kwadia murinai, idia oda henidia lou edia haroro gaukara idia hadokoa totona, bona idia ruhadia. To unai ese idia ia koua lasi. Idia be mai gari lasi ida, dubu helaga bona ruma ta ruma ta ai sivarai namona idia harorolaia.