Oiemu Natudia Edena Bamona Oi Sisiba Henidia?

TAMA sina momo idia gwau edia natudia sisiba henidia karana be ia auka. Tau ta mai ena adavana ida, edia natudia edia mauri laganidia be 10 bona 7, be idia gwau, Hadibaia Tauna Badana Ita Kamonai Henia bona Memero Kekeni—Moale Umui Davaria Dalana bukadia ese idia durudia bada.

Idia gwau: “Aiemai natudia ai sisiba henidia gwauraia neganai, idia ida ai herevahereva guna, edia kerere ai dibaia goevagoeva totona. Reana ta ese lalokau ia hahedinaraia lasi ma ta dekenai, eiava ai dekenai hemataurai idia hahedinaraia lasi. Bena sibodia edia daiutu dekenai ai siaidia lao, unuseniai unai buka ta ena karoa ta, edia kerere ia sisibalaia herevana, idia duahia totona. Bible ena siri haida danu ai gwauraidia hidi idia duahidia totona.”

Bena dahaka ia vara? “Idia raka lasi, idia gwau, ‘Ina bona Mama, unai hereva ai duahia vadaeni, umui ida ita herevalaia lou diba’; unai neganai edia kara ia idau vaitani!” Edia natuna kekenina ta ena mauri laganidia be 7 bona ia be lalo-auka kekenina. Inai bamona idia gwauraia, idia gwau: “Ena be mai ena badu ida ena daiutu dekenai ia raka vareai, to ia raka lasi neganai, ia kiri noho bona ia gwau, ‘Lau sori. Lau diba lau kerere!’”

Bema oi be tama ta o sina ta, eiava tama sina haida oi diba, heduru idia abia be namo edia natudia sisiba henidia totona, namona be inai dava maragi bukadia oi abidia, ani? Momokani, idia be heduru namona natu hadibadia totona.