Lalona Biagua Karana

Iseda lalona ita biagua namonamo be mai ena hekwarahi. Kekeni ta ia gwau: “Lau moale, bena haraga herea lau lalohisihisi bada. Nega haida lau moale eiava lau lalohisihisi be lau diba lasi. Ia be hegeregere dibura ai lau boio bamona. Herevana lau be daika dekenai lau hereva, to ia dekenai lauegu lalona ena mamina lau gwauraia hedinarai diba lasi bona sibogu dekenai danu lau gwauraia hedinarai diba lasi. Lau laloa lau be raho namo kekenina lasi dainai lau ida idia sikuli taudia bona lau diba taudia ese lau idia laloa lasi. Gabeai lau dara doko bena lau be sibogu lau badulaia.”

Bena hari kekeni ese buka ta ladana Memero Kekeni​—Moale Umui Davaria Dalana ia abia. Ia gwau: “Iena hereva be namo herea momokani, unai dainai lau ura karoa ta, ladana ‘Hahine Ai Oi Lao Dalana’ lau duahia. Lau hoa bada, badina unai karoa ese lauegu lalona ena mamina ia gwauraia bona hanamoa dalana ia gwauraia hedinarai danu. Unai hereva ese egu lalona ia hagoadaia, badina ia gwau kekeni bona ulato momo ese unai mamina idia abia. Namona be lauegu lalona biagua dalana maorona lau dibaia.”

Hari buka ese memero bona kekeni ia durudia, edia lalona idia biagua totona, bona ta be sibona ena kopina ia gadaralaia karana ia herevalaia danu. Inai henanadai edia haere ia gwauraia danu: Memero bona kekeni ese kekero muramurana idia inua be namo a? Idia do headava lasi neganai idia mahuta hebou be namo a? Henu kahana oi hahonua bena 80 toea danu oi siaia ai dekenai bena hari buka ta do oi abia diba.

Buka ta, ladana Memero Kekeni​—Moale Umui Davaria Dalana, mai ena kopina aukana bona mai ena rau 192, mani umui siaia lau dekenai. Lau ese 80 toea lau siaia inai.