Kwadi Bamona

SIAHU neganai oi be rei dekenai oi raka neganai, kwadi momo be oi raka gabuna vairanai idia puri lao oi itadia, a? Ena be oi lalodia bada lasi, to idia be gabu ibounai dekenai idia noho. Edia toana be oi do idia hadikaia diba lasi, idia be gau maragidia sibona.

To, kwadi be gau maragidia dainai idia be toa namona taunimanima idia laulaulaidia totona. Ena be taunimanima haida be sibodia idia gwauraia taunimanima badadia, to, Iseda Havaraia Diravana be unai bamona ia lalodia lasi. Iena peroveta tauna Isaia ia gwau: “Tanobada kuboruna ataiai Tauna ia noho, bona idia noholaia taudia be kwadi bamona.”​—Isaia 40:22.

Iehova Dirava ena siahu, ena goada, bona ena aonega be bada herea dainai, ia be taunimanima ataiai momokani, taunimanima edia aonega bona siahu be kwadi ataiai momokani hegeregerena. To, Dirava ena kara badana be lalokau. Bona iena lalokau bada karana ese ia doria ita ia laloa, ita ia durua, bona ita ia hamauria totona​—bema ia ita lalokau henia bona ena hereva ita badinaia. Ena be ita be kwadi maragidia bamona, to Iehova be mai lalokau danu ita ia kara henia. Salamo torea tauna ia gwau: “Daika be Iehova iseda Dirava bamona, ia be ataiai ia noho? Ia be mai manau danu guba bona tanobada ia itaia noho, manau tauna be tano kahuna amo ia abia isi.”​—Salamo 113:​5-7.

Unai salamo herevana ia gwauraia hegeregerena, Iehova be mai lalokau danu manau tauna ia durua. Oibe, ‘Dirava do idia tahua bona idia davaria’ manau taudia Ia ese ia durudia. (Kara 17:27) Dirava idia davaria​—bona ena hesiai idia karaia taudia​—be ia lalodia bada. (Isaia 43:​4, 10 itaia danu.) Gau badana lasi kwadidia be toa namona ita dekenai, namona be ita laloatao iseda siahu be bada lasi bona mai ena lalokau Havaraia Diravana ese taunimanima ia turana henidia bona ia hebogahisi henidia, unai dainai namona be iseda noho be hekokorokulaia gauna lasi. Oi hahedinaraia Dirava ena lalokau oi moalelaia, a?