Oi Idia Durua Diba A?

INAI magasin, oi dogoatao gauna, be lalona hagoadaia gauna; ia ese ruma bese hanamodia karadia bona kara maoromaoro ia sisibalaidia. Ia hahedinaraia hari inai nega dikana be Baibel ese ia perovetalaia, bona do ia hadokoa gauna ia gwauraia danu​—Dirava ena Basileia gavamanina unai. Vadaeni, Gima Kohorona bona Noga! magasinidia ese oi idia durua diba a?

Philippines hahinena ta ladana Vilma be revareva ai ia gwau: ‘Lau laloa emui magasin be namo herea momokani. Noga! bona Gima Kohorona lau itadia bona lau duahidia negana ginigunana be basi ai lau helai neganai, Manila amo egu ruma lau lou henia neganai. Lau laolao negadiai lau be vaia niuspepa lau duahia, to unai neganai ta lau abia lasi.

‘Tau badana ta be lau badibadinai ia helai, emui magasin ia duahidia. Noga! ia duahia guna bena Gima Kohorona ia duahia. Lau noia Noga! magasin lau do ia henia do lau duahia totona. Momokani, unai magasin edia hereva lau moalelaidia bada, edia hereva be mai anina hari inai negai, bona egu lalona idia hagoadaia.’

Dokonai hahine ia gwau: “Lau ura emui magasin do lau abidia. Abidia dalana be mani lau umui hadibaia.” Unai dainai Iehova ena Witness taudia edia brens opesi Philippines ai ese ia hadibaia bena magasin idia siaidia matamaia ia dekenai.