Daidia Idia Laloa Lauma Dikadia Idia Noho?

OI LALOA ita itaia diba lasi laumadia be mai edia siahu emu mauri lalonai? Taunimanima momo do idia gwau, lasi momokani. Ena be idia gwau Dirava ia noho, to dika idia havaraia lauma dikadia idia noho ena lalohadai idia dadaraia.

West kahana ai, taunimanima momo be ita itaia diba lasi lauma idia noho ena lalohadai idia abia dae lasi badina Kerisendom ese idia hadibalaia herevadia dainai; lagani handred momo lalodiai Kerisendom ese taunimanima ia hadibadia tanobada be gau ibounai bogaraginai ia noho, guba be atai ai bona hel be henu ai. Unai hahediba herevana ia gwau, aneru be guba idia moalelaia to demoni be hel idia biagua.

Saiens amo idia diba matamata gaudia dainai taunimanima be guba bona tanobada gaukara dalana dekenai lalohadai kereredia idia dadaraia, bona lauma mauridia idia noho ena lalohadai idia ura lasi abia dae. The New Encyclopædia Britannica ia gwau: “Lagani 1500 ia lao 1599 C.E. negana lalonai, Copernicus ese diba matamatadia ia davaria (unai be hisiu ia stadilaia Poland tauna Copernicus), bona unai murinai . . . idia laloa lasi Tanobada be guba bona hisiu iboudiai edia bogaraginai ia noho, to idia laloa dokona lasi noho gabuna ena galaxy ena kahana maragi herea ta lalonai ia be dina ena hisiu ta sibona​—idia laloa aneru bona demoni idia noho ena lalohadai be maoro lasi.”

Ena be momo idia laloa lauma dikadia idia noho lasi, to taunimanima milion momo idia laloa idia noho. Tomadiho momo, guna bona harihari danu, be kara dika laumadia idia herevalaidia momo. Idia laloa unai aneru dikadia be taunimanima edia goeva lauma dalana ai idia hamiroa, bona danu, idia laloa unai aneru dikadia be idia vara kava gau dikadia idia havaraia, hegeregere tuari, aniani lasi negadia, bona tano mareremarere, bona idia laloa idia ese gorere, kwarana dika, bona mase idia havaraia.

Keristen tomadiho bona Iuda tomadiho lalonai, lauma dikana badana be Satana, Muslim taudia ese idia gwauraia Iblis. Idaunegai Parasa taudia edia Zoroaster tomadihona lalonai, idia gwauraia Angra Mainyu. Lagani 100 ia lao 299 C.E. negana lalonai Gnostic tomadihona ia goada, bona idia gwau ia be Demiurge. Idia gwau ia be mama dirava maragina ta, to tanobada taudia momo idia diba lasi Demiurge idia tomadiho henia.

Ist kahana ena tomadiho momo lalodiai lauma dikadia maragidia ma haida idia herevalaidia. Hindu taudia idia laloa asuras (demoni) be devas (dirava haida) idia inai henidia. Taunimanima ese idia gari henidia bada asuras demonidia be rakshasas, gara gabudia ai idia noho toana dika laumadia.

Buddhist taudia idia laloa demoni be mai edia siahu taunimanima be Nirvana do idia abia dalana idia koua totona, Nirvana be moale hisidae. Unai lauma amo taunimanima dibaganidia lauma badana be Mara, mai ena natudia kekeni toi, Rati (Ura), Raga (Moale), bona Tanha (Lalo-Hekwarahi).

China tomadiho taudia be lahi audia bona lahi tosi bona idia pou gaudia idia gaukaralaia kuei, eiava tubutubu gaudia edia demoni, idia koudia totona. Japan tomadiho lalonai danu, idia gwau demoni be momo; idia gari henidia bada laumadia be tengu, idia be taunimanima lalodiai idia noho ela bona pris tauna ese ia luludia.

Asia, Africa, Oceania, bona America tanodia ai, idia laloa lauma ese taunimanima idia durudia eiava idia hadikadia diba idia vara gaudia hegeregerena ai bona edia ura hegeregerena ai. Taunimanima ese unai laumadia idia matauraidia bada, dika idia koua totona bona namo idia abia totona.

Taunimanima momo be meamea bona lauma karadia idia tahua goadagoada danu, bona ia hedinarai namonamo nega daudau vadaeni taunimanima idia laloa lauma dikadia idia noho bona kara momo idia biagua. To unai laumadia idia noho ena lalohadai be maoro, eiava? Baibel ia gwau idia noho. To, bema idia noho, bona taunimanima idia veridia dika idia davaria totona, dahaka dainai Dirava ese ia koudia lasi?