“Iena Gadona Idia Diba”

“LAU ia naria tauna, mamoe naria bamona be Iehova.” Unai be Salamo 23 ena hamatamaia herevana. Baibel lalonai, Isaia ena peroveta hereva ia gwau Iehova Dirava be mamoe naria tauna bamona, ia gwau: “Ia ese seri do ia naria, mamoe naria tauna bamona. Ena imana amo mamoe natudia do ia haboudia; bona ena kemena ai do ia rosidia lao. Rata idia henia mamoedia be metairametaira ia hakaudia.”​—⁠Isaia 40:⁠11.

Unai hegeregerena, Iesu Keriso be mamoe naria tauna bamona idia gwauraia. Ia gwau: “Lau be mamoe naria tauna namona inai. Mamoe naria tauna namona ese iena mauri ia atoa diho mamoe totona.” (Ioane 10:11) Iesu ia gwau “mamoe ese [mamoe naria tauna ena] gadona idia kamonai. Ia ese ena mamoe momokani edia ladana ia hatoa, vadaeni ia hakaudia murimuri dekenai.” Ma ia gwau “[mamoe naria tauna be] mamoe momokani ibounai murimuri dekenai ia hakaudia, edia vairana dekenai ia raka, vadaeni iena gadona idia diba dainai iena murina dekenai idia raka. To idau tauna ena murina dekenai do idia raka lasi, lasi momokani. Ia dekena amo do idia heau siri, badina be idau taudia edia gadona idia diba lasi.”​—⁠Ioane 10:​2-5.

Iehova Dirava bona iena Natuna, Iesu Keriso, edia kara be unai siri edia hereva hegeregerena. Edia mamoe bamona taudia be mai hebogahisi bona mai edia lalokau ida idia kara henidia. Unai dainai, mamoe bamona taudia be lalokau, noho-namo, bona gari lasi mamina idia abia.

Edia hetura heheni karana be mamoe korikori bona edia naria tauna ena hetura karana bamona. Lagani 1831 ai, John Hartley ese unai kara dekenai ia davaria gaudia ia torea hedinarai. Ia gwau Greece dekenai, mamoe naria taudia edia kara be edia mamoe dekenai ladana idia henidia. Mamoe naria tauna be ena mamoe ladana ia boiboilaia neganai, unai mamoe ia mai. Lagani 51 bamona unai nega murinai, lagani 1882 ai, J. L. Porter be unai bamona ia hereva danu. Ia sibona ena matana amo mamoe naria taudia ia itaia, “idia . . . be rege idauna ai idia boiboi” bona mamoe idia kamonai bona mamoe naria tauna murinai idia raka. Unai lagani tamona lalonai, William M. Thomson ena toretore lalonai ia gwau nega momo idia karaia toho dainai, ia hedinarai goevagoeva mamoe idia hadibaia neganai, edia naria tauna murinai idia raka bona iena gadona idia diba.

Hari inai negai, mamoe naria taudia bona edia mamoe idia hetura karana idia itaia, a? Oibe. September 1993 National Geographic magasin lalonai, Australia hahinena Robyn Davidson be Rabari besena, India ena notwest kahanai, edia sivarai ia torea, ia gwau: “Mamoe naria taudia ta ta iboudiai edia boiboi regena be idau, sisina idia idau. Daba kahanai boiboi ta ena anina be idia raka lao, boiboi ma ta be mamoe ia hakaudia ranu dekenai, bona boiboi ma haida idia noho danu. Taunimanima ta ta iboudiai be sibodia edia mamoe idia diba bona mamoe iboudiai be sibodia edia biaguna idia diba, bona daba kahanai, mamoe orea ta ta iboudiai be seri badana amo do idia siri bona ta ta edia biaguna murinai do idia raka.”

Oibe, hari loaloa taudia hani idia gwauraia sivaraidia be Iesu ia diba. Unai kara ia itaia dainai, mamoe be iena gadona idia diba ena haheitalai herevana ia gwauraia be maoro. Oi be Iesu ena mamoe ta, a? Iena gadona oi diba bona oi kamonai henia, a? Bema oi diba bona oi abia dae iena hadibaia herevadia be hereva momokanidia, bona bema iena taravatu oi badinadia bona ia hegeregerena Iehova oi tomadiho henia, vadaeni, Iehova Dirava bona iena Natuna, Iesu Keriso, edia lalokau bona hebogahisi naria dalana ena mamina oi davaria.​—⁠Ioane 15:⁠10.