“Keristen Taudia Korikoridia be Unai Bamona Idia Karaia be Namo”

LAGANI 1990 ai, iena buka Arbeit macht tot​—Eine Jugend in Auschwitz (Gaukara ese Oi Ia Hamasea​—Uhau Negana Auschwitz Dekenai) lalonai, Auschwitz amo ia roho mauri tauna Tibor Wohl be ia ida idia dibura taudia rua edia hereva ia torea. Ta be Austria tauna, bona ia gwau ia be “abidadama lasi tauna.” To unai kamepa lalonai purple triangle toana idia atoa dibura taudia ia hanamodia​—idia be Bible Student taudia, unai kamepa dekenai Iehova ena Witness taudia be unai ladana amo idia gwauraidia.

Unai Austria tauna be ena turana ia hamaoroa, ia gwau: ‘Idia lao lasi tuari dekenai. Idia laloa ta idia alaia lasi to idia mase be namo. Lau laloa Keristen taudia korikoridia be unai bamona idia karaia be namo. Edia kara ta lau itaia bona oi lau hadibaia be namo. Stutthof kamepa lalonai, Iuda taudia bona Bible Student taudia be ai danu idia atoa ruma tamona lalonai. Unai dinadia ai Bible Student taudia be gaukara auka momokani idia henidia, murimuri ai keru bada lalonai. Ai lalo-parara diba lasi edena bamona idia roho mauri diba. Idia gwau Iehova ese goada ia henidia. Edia paraoa idia ura momokani, badina idia hitolo dainai. To dahaka idia karaia? Edia paraoa ibounai idia haboua, kahana idia dogoatao bona kahana be edia tadikaka, lauma dalana ai edia tadikaka unai, idia henidia; unai tadikaka be ma kamepa amo idia mai bona idia hitolo. Idia abidia dae bona idia kisi henidia. Idia do aniani lasi neganai, idia guriguri, bena murinai edia vairadia be mai moale toana amo idia diari. Idia gwau idia iboudiai edia hitolo ia ore. Unai dainai, oi itaia, lau sibogu lau laloa, “Unai be Keristen taudia korikoridia.” Guna lau laloa hegeregerena unai bamona idia karaia. Auschwitz dekenai idia hitolo turadia bema unai bamona ita abidia dae be namo herea!’