Manu Bona Palauapalaua amo Ita Abia Dibana

HARI inai negai, taunimanima ese idia laloa bada herea gauna be dahaka? Momo be edia ruma bese edia ura gaudia hoia totona eiava edia noho hanamoa totona, moni do ia hegeregere be namo idia laloa bada.

Iesu Keriso be tanobada dekenai ia noho neganai, taunimanima be sibodia, eiava edia ruma bese durua monina ia hegeregere totona idia hekwarahi bada. To, Iesu ia gwau idia laloa bada gauna, ena be ia maoro be lalo-hekwarahi gauna ai ia lao diba bona lauma gaudia tahua dalana do ia koua. Unai hereva ena anina hahedinaraia totona, Iesu ese iena aposetolo taudia ia hamaorodia manu bona palauapalaua idia itaia namonamo totona.

Manu be dina ibounai idia aniani​—idia aniani bada badina edia tauanina ese aniani amo ia abia goadana ia haorea haraga. To, idia be uhe idia hadoa diba lasi, aniani idia gogoa eiava idia haboua diba lasi gabeai gaukaralaia totona. To, Iesu ia gwau bamona, iseda “Tamana guba dekenai noho ese unai manu ia naria namonamo.” (Mataio 6:26) Unai hegeregerena, Dirava ese “tano ena herahera” gaudia be hairai bamona, dabua ia henidia.​—Mataio 6:​28-30.

Iesu ese ita ia hagoadaia, bema ita ese lauma gaudia ita atoa guna bona tauanina gaudia be gabeai ita laloa, Dirava ese ita ura aniani bona dabua do ia henia. Bema Dirava ese manu bona palauapalaua ia naridia, ia idia lalokau henia bona iena ‘Basileia bona iena kara maoromaoro do idia tahua guna’ taudia do ia naridia danu. (Mataio 6:33) Oiemu mauri lalonai, Dirava ena Basileia oi tahua guna, a?