Lalokau Dainai Idia Karaia

CANADA dekenai, mai ena abidadama bada bona heabidae karana ia karaia momo vabu ta be ena natuna kekenidia hani Keristani momokani ena dala ai ia hadibadia. Kongregesen ena elda taudia idia itaia iena ruma dekenai gau momo idia dika. Ia be moni lasi bona unai gaudia be sibona ia hanamoa diba lasi. Unai dainai 1 Timoteo 5:​9, 10, ena hakaua hereva hegeregerena ai, elda taudia idia hegaegae idia durua totona. Dahaka idia karaia?

Palani idia karaia, vabu bona ena natudia be dina ima lalonai gabu ta dekenai do idia lao. Kongregesen lalonai taunimanima 80 bona ma haida be mai edia lalona ibounai ida idia heduru, kohu, moni, bona edia nega idia henia. Ruma bese taudia idia lao bena miniti haida sibona murinai, gaukara taudia momo herea be ruma dekenai idia lao, nanigo bamona. Ruma ena murimuri ibounai idia hanamoa. Haba ena matu idia koudia bona idia penia. Foloa be sandpaper amo idia hamanadaia bena idia penia. Tile bona carpet matamata idia atoa. Paua bona laiti gaudia ibounai idia hanamoa. Sea bona teibolo gunadia idia negea bona matamata idia atoa. Dina ima lalonai, ruma ibounai idia hanamoa ore!

Mai moale ida idia gaukara dainai unai gabu dekenai idia noho taudia idia hoa. Tau burukana, ta ena lagani be 80, be Witness taudia edia gaukara ia moalelaia bada dainai, iena penipeni barasi ia abia mai bona ia ura bada ia durudia. Gaukara taudia ta ena moni gaukara biaguna ese kisini dekenai sitou amo kwalahu dikadia kokia gauna ia henia. Ma ta ese kisini seipi matamatadia ia henia. Tau ta be ia hoa dikadika dainai ia ura Iehova ena Witness taudia ia dibadia namonamo. Mai moale ida Mauri Hanaihanai Paradaiso Lalonai bukana ia abia.

Vabu bona ena natudia kekeni idia giroa mai neganai, idia hoa bada herea. Momo idia tai, idia kiri, bona idia herosi heheni​—Keristani lalokau ena toana ia hedinarai momokani negana ta unai, bona idia laloaboio diba lasi. Momokani, kongregesen lalonai idia dabu taudia lalokau henidia bona durua karana be Keristani korikorina ena toana. Badina Paulo ia gwau: “Unai dainai, dala ita davaria neganai, taunimanima ibounai dekenai kara namodia do ita karaia. To Keriso ena abidadama henia taudia do ita durua bada herea be namo.”​—Galatia 6:10.