Basileia Haroro Ripoti

‘Tanobada Ena Diari Bamona Idia Hedinarai’

IEHOVA ENA WITNESS taudia edia kara ia idau vaitani bona nega momo niusi dekenai edia ladana idia hadikaia badina rara abia karana idia dadaraia dainai. To, Baibel ena hahegani herevana dainai idia ese unai bamona idia karaia. Ia hahedinaraia Dirava ese rara gaukaralaia kava karana ia taravatua, badina rara be mai anina bada gauna iena matana ai. (Genese 9:​3, 4; Levitiko 17:14) Baibel ena hereva rara dekenai idia tahua neganai, Iehova ena Witness taudia idia davaria, Baibel ena hereva be ‘rara umui dadaraia’. Unai dainai hari inai negai idia karaia rara henia hanai karana idia dadaraia.​—⁠Kara 15:​19, 20, 28, 29 NW.

Vanegai laganidia lalonai, medikal orea taudia, bona gabu haida dekenai kota oreadia danu be Iehova ena Witness taudia idia durua. Hegeregere, Denmark dekenai hahine matamatana ta, Baibel ena hahegani rara dekenai ia diba hahinena, be motuka aksiden dekenai ia abia bero dainai ia mase. Rara ia dadaraia dainai, ena doketa taudia be hua ta lalonai niusi dekenai Iehova ena Witness taudia edia kara idia maumauraia loulou.

Unai hahine matamatana ena tama sina ese kota idia noia ia vara gauna do idia tahua, bona April 1994 ai Denmark’s Commission of Patients’ Complaints ese idia davaria gaudia idia gwauraia hedinarai. Idia gwau unai gorere hahinena be rara ia dadaraia dainai ia mase lasi, to medikal gaukara taudia be edia gaukara idia karaia namonamo lasi dainai ia mase. Board of Forensic Medicine bona helt naria taudia edia tahua gaukara amo idia ese unai abia hidi idia karaia. Denmark ena kliniki iboudiai ai, pepapepa idia hariharilaia, bona ia lalonai National Board of Health doketa taudia ia hamaorodia idia be mai edia maduna bema Iehova ena Witness taudia ese rara idia dadaraia, durua gaudia idaudia do idia gaukaralaia.

Sivarai ma ta be lagani 15 Witness mero matamatana ladana Dan dekenai ia vara gauna, ia be leukemia gorerena dainai ia mase. Doketa taudia ese Dan ena boga-auka lalohadaina, rara abia hanai ura karana dadaraia lalohadaina unai, idia matauraia. Unai dainai gabu momo dekenai taunimanima idia gwau doketa edia kerere dainai Dan ia mase. To, momo be unai koikoi hereva idia abia dae lasi.

Hegeregere, Dan ena sikuli ena heditisa be Iehova ena Witness taudia edia Kingdom Hall dekenai ia lao Dan ena mase herevana kamonaia totona. To, niusi idia karaia taudia be Dan ena sivarai idia gwauraia maoro lasi dainai ia hoa bada herea. Iena gaukara gabuna ai Witness ta dekenai henanadai haida ia henia murinai, ia ese Iehova ena Witness taudia edia vidio kaset Jehovah’s Witnesses​—⁠The Organization Behind the Name ia abia. Unai vidio ia hoalaia bada dainai, dala ia karaia ena sikuli tisa iboudiai ese unai vidio idia itaia. Gabeai, sikuli ena klas ta ta ese unai vidio idia itaia.

Denmark ena helt minista danu ia moale lasi taunimanima ese Dan ena doketa taudia idia gwauraia dika dainai. Ia gwau doketa taudia edia kara be maoro badina Dan ena ura bona abidadama idia matauraia.

Tanobada hegegemadai, Basileia harorolaia taudia milioni momo be Dirava ena taravatu idia badinaia noho. Edia kamonai karana dainai, idia idau, idia be ‘tanobada ena diari bamona idia hedinarai.’​—⁠Filipi 2:​12, 15.