“Do Umui Haheauka”

BEMA ita ura “Dirava ia gwauhamatalaia davana namona” do ita abia, namona be ita “haheauka.” (Heberu 10:36) Unai siri lalonai inai hereva “haheauka” be aposetolo Paulo ese Greek gado ai ia gaukaralaia herevana ta ida idia hahegeregerea. Baibel ia tahua namonamo tauna ta, ia gwau, nega haida unai hereva amo idia ese “tubutubu gauna ta be gabu dikana dekenai ia tubu diba dalana” idia herevalaia.

Europe ena ororo kahadia dekenai, unai bamona tubutubu gauna ta ia tubu. Hoa gauna be inai, iena ladana idia hatoa, noho-hanaihanai. Oibe, unai tubutubu gauna be ia noho hanaihanai lasi, to lagani momo lalonai ia tubu, bona siahu negadia ai ena palauapalaua namodia ia havaraia. The New Encyclopædia Britannica bukana ia gwau, unai tubutubu gauna be “gabu dikana ai ia tubu namonamo diba bona nega daudau sisina lalonai ia tubu diba;” unai dainai iena ladana idia hatoa noho-hanaihanai. (Unai tubutubu gaudia edia saiens ladana be Sempervivum bona unai ladana ena anina be “noho-hanaihanai.”)

Hoa gauna be unai mauri daudau tubutubu gauna be gabu dikadia dekenai ia tubu diba. Ororo edia gabana, nega ibounai lai ia toa goadagoada gabudia dekenai, oi davaria diba. Unai bamona gabudia be hora 24 lalonai idia paraka herea idia lao haraga diba. Nadi badadia edia matu dekenai, tano sisina lalonai ena ramuna idia tubu diba. Dahaka dainai unai tubutubu gau be unai gabu dikadia lalonai ia tubu diba?

Noho-hanaihanai tubutubu gauna ese ena rau lalodiai ranu ia haboua namonamo. Unai dainai medu ia diho eiava sinou ia veve neganai, unai ranu ia gaukaralaia namonamo diba. Inai danu, gabu tamona dekenai idia momo idia tubu hebou, unai amo edia goada idia haboua, nadi idia dogoatao auka masemase totona. Ena be tano be bada lasi, to nadi matuna lalonai idia tubu dainai, medu, sinou, siahu, eiava lai ese ia hamasedia lasi. Anina be idia tubu namonamo diba, badina be gabu dikadia ai idia davaria gau namodia idia gaukaralaia namonamo.

Lauma dalanai, gau haida ese iseda haheauka idia tohoa. Hedibagani negadiai, dahaka ese ita do ia durua, do ita haheauka noho totona? Noho-hanaihanai tubutubu gauna bamona, ita ese mauri ia henia ranuna, Dirava ena Hereva unai ita haboua diba bona Keristani taudia korikoridia ita bamoa diba, ita do idia durua bona idia naria totona. Gau badana be, unai tubutubu gauna, ororo kahadia ai ia tubu gauna bamona, namona be ita ese iseda “nadi badana,” Iehova, bona iena Hereva bona iena orea dekenai do ita kamokau auka masemase.​—⁠2 Samuela 22:⁠3.

Momokani, noho-hanaihanai tubutubu gauna mai hairaina ese ita ia hadibaia, ena be gabu dikana dekenai ita noho, to bema Dirava ese ia henia gaudia ita gaukaralaia namonamo, ita haheauka diba. Iehova ese ita ia gwauhamata henia, unai bamona haheauka karana dainai, ia ‘gwauhamatalaia davana namona do ita abia’ diba. Anina korikorina be do ita noho hanaihanai diba.​—⁠Heberu 6:12; Mataio 25:⁠46.