Connecticut Ena Kota Badana ese Gorere Hahinena Ena Maoro Ia Abia Isi
April 8, 1996 ai, U.S.A. dekenai, Connecticut ena Kota Badana ese Iehova ena Witness taudia edia rara dadaraia maorona ia abia isi. Unai hahemaoro herevana ese guna kota maragina ese ia henia hahemaoro herevana ia haidaua.
August 1994 ai, Nelly Vega, ia be Iehova ena Witness hahinena ta, be natuna roboana ia havaraia murinai rara bada ia diho matamaia bona idia koua diba lasi. Idia koua totona idia hekwarahi to idia hegeregere lasi. Mrs. Vega ena gorere ia dika momokani neganai, hospital be ia ura rara henia hanai kota oda do ia abia. Mrs. Vega be medikal pepa ta ia sainia vadaeni, unai pepa ia gwau hospital dekenai ia noho neganai rara eiava rara amo idia karaia muramura do idia henia lasi, unai amo ia abia hidi dalana ai bema dika ta ia vara, hospital be do ia kerere lasi. To, hospital taudia idia gwau idia ura rara idia henia hanai badina beibi matamatana ena namo idia laloa dainai, idia gwau beibi be ena sinana ida ia noho be gau badana. Kota maragina ia lalo-hekwarahi danu badina Mrs. Vega be rara sibona ia halusia to ia be gorere lasi hahine matamatana. Unai dainai, ena be Mrs. Vega ena adavana bona ena loea be rara henia hanai lasi dainai idia hepapahuahu goadagoada, kota ese rara henia hanai oda ia henia bona rara idia henia Mrs. Vega dekenai.
Gabeai, unai kara be Connecticut ena Kota Badana dekenai idia abia lao. Unuseniai, iboudiai idia gwau hospital ese ia karaia karana be Mrs. Vega ena maoro ia hadikaia. Edia hahemaoro herevana ia gwau: “Kota maragina ai unai gauna tahua be hanuaboi momokani ai idia karaia, nega dikana momokani lalonai bona unai dainai kahana ta ta be ena hereva ia hahedinaraia namonamo diba lasi.”
Connecticut ena Kota Badana ena hahemaoro herevana be mai anina bada Iehova ena Witness taudia sibona dekenai lasi to taunimanima ibounai dekenai. Donald T. Ridley, Mrs. Vega ena loea ia gwau: “Edia doketa taudia edia abia hidi idia ura lasi gorere taudia ibounai dekenai unai hereva be mai anina bada. Unai ese hospital taudia be gorere taudia edia ura, herevana ia be tomadiho eiava ma lalohadai ta dainai, idia dadaraia bona idia kamonai lasi karana do ia hadokoa.”