Buruka Taudia Dekenai Inai be Hekwakwanai Negana

MAMA ONIYAN, iena mauri lagani be 68 hahinena, be West Africa ena siti badana ta ai ia noho. Ia matamata neganai, ia laloa iena buruka negana do ia moalelaia diba, badina do ia ritaea bona iena natudia bona tubudia kahirakahira do ia noho. To, unai ia vara lasi, dina ta ta iboudiai, dina ena siahu henunai, ranu keruma ia hoihoilaia. Ia abia moni maragina ese ia durua ia roho mauri totona. Iena memero rua be daudau tanona ma ta dekenai idia noho. Nega daudau vadaeni moni idia siaia lasi ia dekenai.

Nega gunadia ai, buruka taudia idia matauraia bada herea Africa dekenai. Idia matauraia badina idia mauri daudau vadaeni dainai idia be mai edia diba, bona unai diba dainai idia be aonega bona mai edia lalo-parara. Idia ese tubudia idia naria bona hadibaia. Nega momo matamata taudia ese edia sisiba bona edia lalo-namo idia tahua. Taunimanima be Baibel ena sisiba hegeregerena idia mauri, ia gwau: “Tau buruka [eiava hahine] edia vairanai do umui toreisi, bona buruka taudia ibounai do umui matauraia.”​—⁠Levitiko 19:⁠32.

Hari inai nega be idau. Ogogami, gau edia davana ia daekau, moni gaukara be lasi, bona taunimanima momo idia lao siti dekenai dainai, buruka taudia idia rakatania sibodia idia naria totona. HelpAge Kenya oreana, ena dairekta tauna Camillus Were, ia gwau: “Buruka taudia durua bona naria karana ena kastom ia manoka ia lao noho.”

Momokani, famili hebamo heheni karana ia manoka ia lao be Africa tanodia sibona dekenai ia vara lasi. Guardian Weekly ese Japan ia herevalaia, ia gwau: “Japan taudia edia mai anina bada mauri taravatuna ta be natudia ese edia tama sina idia matauraia, unai lalohadai idia abia Confucius amo. To taunimanima momo be siti dekenai idia lao bona famili taudia hebamo heheni karana ia maragi ia lao dainai, hari Japan taudia, pesen 85, be hospital eiava buruka taudia naria oreadia ai idia mase.”

Herevana edia mauri dalana be dahaka, to Dirava idia ura hamoalea taudia ibounai idia hekwarahi edia tama sina matauraia totona. Idia ese inai Baibel sisiba idia badinaia: “Emui tamana bona sinana do umui matauraia. . . . Mauri namona do umui abia, bona emui mauri do ia daudau tanobada dekenai.” (Efeso 6:⁠2, 3) Buruka tama sina matauraia bona naria be mai ena hekwarahi, to davana namona ia mailaia diba.