Idia Dabu Taudia Dekenai Lalokau Ita Hahedinaraia
KERISTANI taudia be mai edia maduna bona ia be hahenamo danu edia dabu tadikaka bona taihu dekenai lalokau do idia hahedinaraia. (1 Ioane 3:17, 18) Aposetolo Paulo ia gwau: “Taunimanima ibounai dekenai kara namodia do ita karaia. To Keriso ena abidadama henia taudia do ita durua bada herea be namo.” (Galatia 6:10) Tadikaka ta, kahirakahira lagani 40 bamona Iehova ia hesiai henia, be vanegai unai bamona Keristani lalokau ia mamia, iena adavana ia gorere bena ia mase neganai. Ena sivarai ia torea, ia gwau:
“Egu adavana ia gorere neganai, ruma dekenai lau naria dainai, hua rua lalonai moni gaukara lau karaia diba lasi. Kongregesen lalonai turadia ese mai edia ura danu ai idia durua neganai, egu lalo-hekwarahi ia maragi! Harihari dalanai moni bada idia henia, idia henia kadi idia gwau ‘gaudia edia davana karaia totona’—unai moni amo ruma davana, ranu, paua, bona ma gau haida edia davana ai karaia.
“Pura rua idia do noho, egu adavana ia do mauri noho lalonai, emai sekit naria tauna ese ai ia vadivadi bona ai ia hagoadaia bada. Pura ena dokona ai kongregesen ese do idia itaia slaid danu ia hahedinaraia ai dekenai. Telefon amo hebou ai kamonai diba—sekit naria tauna ese ia naria haroro gaukara hebouna danu. Hebou ta dekenai, ia ese haroro gaukara totona idia hebou taudia iboudiai ia hamaorodia nega tamona egu adavana dekenai idia gwau, ‘namo.’ To, ena be idia ida ia noho lasi, ena mamina be ia sibona ia noho lasi.
“Ia mase horana lalonai, kahirakahira elda iboudiai be egu ruma dekenai. Unai dina tamona lalonai tadikaka bona taihu handred mai kahana idia mai. ‘Hoa dalanai’ aniani be teibolo dekenai ia hedinaraia idia noho taudia totona. Edia harihari gaudia, hebogahisi herevadia, hahegoada herevadia, bona edia guriguri lau totona lau gwauraia diba lasi. Lau idia hagoadaia bada! Dokonai lau ese tadikaka lau hamaorodia aniani idia mailaia karana bona egu ruma idia hagoevaia gaukarana do idia hadokoa!
“Iehova ena orea sibona lalonai unai bamona hebogahisi, heduru, bona lalokau ita davaria diba, ani? Taunimanima momo hari be edia imana tamona ai edia turadia momokanidia idia duahia diba. Iehova ese Keristani tadikaka bona taihu momo herea amo ita ia hanamoa!”—Mareko 10:29, 30.