Kerere be Daika Ena?

Momo be edia hekwakwanai dainai Dirava dekenai kerere idia atoa. Baibel ena aonega herevana ta ia gwau: “Tau ta ena kara kava karana ese ena mauri ia hadikaia, bena ia ese Lohiabada ia badu henia.” (Aonega Herevadia 19:​3, The New English Bible) To, bema ita gwau taunimanima edia hekwakwanai be Dirava ena kerere, unai be hegeregere ita gwau inuinu kekero taudia dekenai aksiden idia vara momo be motuka ia karaia tauna ena kerere.

Dirava be iena Hereva, Baibel, amo taunimanima dekenai mai anina bada hakaua herevadia ia henia. Dirava ese ita dekenai ia henia bukana ita stadilaia bona ia gwauraia taravatu bona hakaua herevadia hegeregerena ita noho neganai, mauri ena hekwakwanai momo ita dadaraia diba. To, bema Dirava ena hakaua dalana ita dadaraia dika do ia vara. Hegeregere, idia aniani badabada, kuku idia ania, idia inuinu momo, eiava matabodaga karadia idia karaia taudia be nega momo gorere dikadia idia davaria. (Luka 21:​34; 1 Korinto 6:18; 2 Korinto 7:⁠1) Keristani aposetolo tauna Paulo ia gwau: “Bema tau ta aniani uhena ia hadoa, vadaeni unai bamona aniani sibona be do ia abia. Bema tauanina ena ura ia hadoa neganai, ia ese mase do ia abia. Bema Lauma ena gau ia hadoa neganai, ia ese mauri hanaihanai do ia abia.”​—⁠Galatia 6:​7, 8.

Dirava ena taravatu bona hakaua herevadia hegeregerena ita noho be namo herea! Bema unai ita karaia, Iehova ese Isaia amo ia gwauraia gwauhamatana do ita mamia, ia gwau: “Lau inai Lohiabada, emui Dirava. Emui namo habadaia dalana, be umui dekenai lau hadibaia noho. Emui raka dalana namona dekenai umui lau hakaua noho. Egu oda hereva bema umui kamonai henia neganai, emui noho be do ia namo, mai maino danu, sinavai hegeregerena, bona emui kara maoromaoro be goada, davara ena hurehure bamona.”​—⁠Isaia 48:​17, 18.