“Daika be mai Ena Aonega, Vadaeni Ori Ibounai Do Ia Duahia Diba?”
“UMUI be dina ia diho ena kahana dekenai ori korema umui itaia, bona umui gwau medu do ia diho, vadaeni ia diho. O laurabada kahana dekena amo lai ia mai neganai, umui gwau dina do ia siahu, vadaeni ia siahu.” Evanelia buka torea tauna Luka ese unai hereva, Iesu ena, ia torea bona idaunegai Palestine taudia ese guba ena toana ena anina idia gwauraia toho ia haheitalaia. (Luka 12:54, 55) Nega haida, unai idaunegai taudia be guba ena toana idauidau idia itaia bona, nega sisina lalonai, idia gwauraia guna gaudia idia vara momokani.
Hari inai negai, meteorologist taudia ese masini idauidau, hegeregere tanobada idia gegea satellite, Doppler radar, bona kompiuta mai edia siahu bada idia gaukaralaia bona, nega daudau lalonai, medu do ia diho bona ia diho lasi negadia idia gwauraia guna. To nega momo idia gwauraia guna gaudia idia vara lasi. Dahaka dainai?
Gau idauidau dainai unai bamona gaudia gwauraia maoromaoro guna be auka. Hegeregere, siahu eiava keru, air pressure, lai ia bada o ia maragi, bona edena kahana amo ia mai ese idia haidaua haraga diba. Danu, dina, ori, bona davara edia siahu idia kara heheni daladia be mai anina, to saiens taudia ese unai gaudia idia do lalo-pararalaia namonamo lasi. Unai dainai, nega momo medu do ia diho negadia idia gwauraia guna taudia edia hereva idia guguru lasi.
Taunimanima be hanaihanai unai gaudia idia gwauraia maoro diba lasi dainai, Iobu ia abia henanadai ita laloa: “Medu o paripari be mai edia tamana, a? Aisi, bona paripari ena aisi, be mai edia sinana, a? . . . Oiemu gadona oi habadaia diba, ori dekenai do oi boiboi, ranu momo ese oi dekenai do ia moru totona, a? . . . Daika ese taunimanima edia kudouna dekenai, aonega ia henia? Daika ese taunimanima edia lalona dekenai, diba bada ia henia? Daika be mai ena aonega, vadaeni ori ibounai do ia duahia diba, a? Bona guba ena ranu be daika ese ia habubua diho?”—Iobu 38:28-37.
Unai henanadai edia haere be inai: Taunimanima lasi, to Iehova Dirava ese. Oibe, ena be taunimanima edia toana be idia aonega, to iseda Havaraia Tauna ena aonega be idia edia aonega amo ia ataiai momokani. Momokani, ena lalokau dainai ia ese ita dekenai ena aonega ia henia Baibel amo, bena kwalimu dalana do ita badinaia diba.—Aonega Herevadia 5:1, 2.