‘Mero Oi Hadibaia’

UMA gabu namona oi karaia totona, oi be uhe do oi negea kava lasi bena hua haida murinai oi mai anina oi haboua. Lasi. Gaukara bada do oi karaia, tano oi hegaegaelaia, uhe oi hadoa, bona ranu amo oi dairia bona idia tubu gaudia oi naria ela bona anina idia atoa.

Unai kara be Aonega Herevadia 22:6 ena hereva ia haheitalaia goevagoeva, ia gwau: “Mero dekenai mauri dala maorona do oi hadibaia, vadaeni ia buruka neganai, unai dala do ia rakatania lasi.” Momokani, natuna naria namonamo karana lalonai, tama sina ese natudia idia hadibaia be mai anina bada.

To, inai taravatu lasi tanobadana lalonai, tama sina momo be unai idia karaia lasi. Tanobada taudia momo edia lalohadai be edia natudia do idia durua lasi, to sibodia edia hekwakwanai idia hamaoromaoroa dalana idia dibaia be namo. Unai idia karaia neganai, natudia be idia hekwarahi sibodia idia naria totona. Unai bamona ia vara neganai, kara dika bona kara gageva taudia ese matamata taudia idia hadikaia diba.​—⁠Aonega Herevadia 13:⁠20.

Namo bada do ia vara bema tama sina ese edia natudia edia mauri lagani be do maragi neganai, idia dekenai Keristani hakaua herevadia idia hadibaia! Edia lagani be hida neganai? Aposetolo Paulo ia gwau: “Maragi negana amo.” Unai ia vara tau matamatana Timoteo dekenai. Iena sinana, Euniko bona iena tubuna hahine Loi ese Timoteo dekenai “revareva helagadia” idia hadibaia, unai amo “diba” ia abia bona ena ‘lalona idia veria bona ia abia dae.’ Vadaeni, unai ese dahaka ia havaraia? ‘Mauri ia davaria totona,’ unai bamona hadibaia karana ese ia durua bada.​—⁠2 Timoteo 1:5; 3:​14, 15, NW.

Unai hegeregerena hari inai negai, ‘kara namo idia karaia bona idia hesiku lasi’ tama sina be hahenamo bada do idia davaria bema idia “manoka lasi.” (Galatia 6:⁠9) Aonega King Solomona ia gwau: “Kara maoromaoro tauna ena tamana, be do ia moale bada.”​—⁠Aonega Herevadia 23:⁠24.