“Hahine Namo Hereana Ena Moale Adavana”

NEGA haida, taunimanima haida idia gwau Iehova ena Witness taudia be headava hadikaia taudia. To, headava namodia momo lalonai ta sibona be Iehova ena Witness tauna ese ia hahedinaraia unai hereva be koikoi. Ruma bese lalonai Baibel ena sisiba badinaia karana ese headava namodia ia havaraia, inai revareva, France ena niuspepa ta lalonai idia halasia, ese unai ia hahedinaraia.

“Kahirakahira lagani 28 vadaeni, lau be hahine namo hereana ena moale adavana, bona ia be Iehova ena Witness hahinena ta. Ia ese lauegu natudia 5 ia naria, idia rua be iena lasi, to idia ibounai ia naria hegeregere bona ia lalokau henidia bada. Hari lau be kampani ta ena dairekta ta bona egu gaukara taudia be 45, bona umui lau hamaoroa momokani diba ia ese lau ia durua bada dainai inai dagi lau abia. Unai dainai, hanaihanai lau duahia niuspepa ena hereva ta lalonai, Iehova ena Witness taudia be Lot-et-Garonne kahana idia hadikaia diba gauna ta idia gwauraia herevana lau itaia neganai, egu lalona lau hadaia ia vara momokani gauna ta umui dekenai lau hahedinaraia totona.”

Unai revareva be ma ia gwau: “Idia be kuku idia ania lasi eiava idia inuinu kekero lasi. Unai be taunimanima hadikaia gauna ta, a? Idia be Keristani taudia mai edia haheauka bona ta idia doria lasi idia badinaia taravatudia ia badinaia totona. To, dala momo ai idia be haheitalai namona. . . . Idia be koikoi dalanai moni gaukaralaia kerere karadia lalonai idia vareai lasi eiava drag idia hoihoilaia lasi. Idia be headava karana idia karaia kava lasi, bona umui lau hamaoroa diba, idia be taunimanima ibounai hegeregerena idia noho. . . .

“Reana lau do umui nanadaia: Vadaeni, dahaka dainai oi be Iehova ena Witness tauna ta lasi? Badina idia ese Keristani abidadama bona kara maoromaoro taravatudia idia badinaia, bona taunimanima momo be inai idia badinaia diba lasi.”