Iehova Ita Badinaia Noho

ENA be hari inai negai badinaia karana be bada lasi, to unai kara be Dirava momokanina, Iehova, ena hesiai taudia edia kara badana ta. Ena be nega daudau lalonai hetoho idauidau idia davaria, to ta ia badinaia tauna do ia gini auka noho. Tau namona, King Hesekaia, oi laloa. Baibel ia gwau: “Ia hegeregerena ta ese Iuda ia gunalaia lasi, Iuda ena king gunana ta, o Iuda ena king gabeai ta.” Dahaka dainai Hesekaia ia idau? Ena be dirava koikoina, Moleka, idia tomadiho henia taudia ese idia hagegea, to ia ese ‘Iehova ia badinaia namonamo.’ Oibe, Hesekaia be “[Iehova] ena murinai raka ena kara dekena amo ia raka siri lasi momokani. Hesekaia ese [Iehova] ena Taravatu ibounai, Mose dekenai ia henia gaudia ibounai, ia badinaia namonamo.”​​—⁠2 King Taudia 18:​1-6.

Iehova ia badinaia noho tauna ma ta be aposetolo Paulo. Keristani Greek Revarevadia lalonai iena hesiai gaukara ena sivarai ita davaria, bona ia hahedinaraia namonamo Paulo be mai ena ura ibounai ida Dirava ia hesiai henia, unai amo ia ese Dirava ia badinaia hanaihanai. Iena tanobada maurina ena dokonai, Paulo be inai bamona sibona ia gwauraia diba: “Tuari namona lau tuarilaia vadaeni, lauegu heau helulu be ia ore vadaeni, bona lauegu abidadama lau karaia haorea vadaeni.”​​—⁠2 Timoteo 4:⁠7.

Hesekaia bona Paulo be ita dekenai badinaia karana idia haheitalaia namo herea! Edia abidadama ita tohotohoa bona iseda Dirava Bada Hereana, Iehova, ita badinaia noho.​​—⁠Heberu 13:⁠7.